Lingapurana 2.13
Liṅgapurāṇa 2.13
- Language
- Sanskrit
Contents
- 2.13.37 — 1 part
2.13.1
sanatkumāra uvāca
bhūyo 'pi vada me nandin mahimānamumāpate /
aṣṭamūrtermaheśasya śivasya parameṣṭhinaḥ //
2.13.2
nandikeśvara uvāca
vakṣyāmi te maheśasya mahimānamumāpateḥ /
aṣṭamūrterjagadvyāpya sthitasya parameṣṭhinaḥ //
2.13.3
carācarāṇāṃ bhūtānāṃ dhātā viśvaṃbharātmakaḥ /
śarva ityucyate devaḥ sarvaśāstrārthapāragaiḥ //
2.13.4
viśvaṃbharātmanastasya sarvasya parameṣṭhinaḥ /
vikeśī kathyate patnī tanayoṅgārakaḥ smṛtaḥ //
2.13.5
bhava ityucyate devo bhagavānvedavādibhiḥ /
saṃjīvanasya lokānāṃ bhavasya paramātmanaḥ //
2.13.6
umā saṃkīrtitā devī sutaḥ śukraśca sūribhiḥ /
saptalokāṇḍakavyāpī sarvalokaikarakṣitā //
2.13.7
vahnyātmā bhagavāndevaḥ smṛtaḥ paśupatirbudhaiḥ /
svāhā patnyātmanastasya proktā paśupateḥ priyā //
2.13.8
ṣaṇmukho bhagavān devo budhaiḥ putra udāhṛtaḥ /
samastabhuvanavyāpī bhartā sarvaśarīriṇām //
2.13.9
pavanātmā budhairdeva īśāna iti kīrtyate /
īśānasya jagatkarturdevasya pavanātmanaḥ //
2.13.10
śivā devī budairuktā putraścāsya manojavaḥ /
carācarāṇāṃ bhūtānāṃ sarveṣāṃ sarvakāmadaḥ //
2.13.11
vyomātmā bhagavāndevo bhīma ityucyate budhaiḥ /
mahāmahimno devasya bhīmasya gaganātmanaḥ //
2.13.12
diśo daśa smṛtā devyaḥ sutaḥ sargaśca sūribhiḥ /
sūryātmā bhagavāndevaḥ sarveṣāṃ ca vibhūtidaḥ //
2.13.13
rudra ityucyate devairbhagavān bhuktimuktidaḥ /
sūryātma kasya rudrasya bhaktānāṃ bhaktidāyinaḥ //
2.13.14
suvarcalā smṛtā devī sutaścāsya śanaiścaraḥ /
samastasaumyavastūnāṃ prakṛtitvena viśrutaḥ //
2.13.15
somātmako budhairdevo mahādeva iti smṛtaḥ /
somātmakasya devasya mahādevasya sūribhiḥ //
2.13.16
dayitā rohiṇī proktā budhaścaiva śarīrajaḥ /
havyakavyasthitiṃ kurvan havyakavyāśināṃ tadā //
2.13.17
yajamānātmako devo mahādevo budhaiḥ prabhuḥ /
ugra ityucyate sadbhirīśānaśceti cāparaiḥ //
2.13.18
ugrāhvayasya devasya yajamānātmanaḥ prabhoḥ /
dīkṣā patnī budhairuktā saṃtānākhyaḥ sutastathā //
2.13.19
śarīriṇāṃ śarīreṣu kaṭhinaṃ koṅkaṇādivat /
pārthivaṃ tadvapurjñeyaṃ śarvatattvaṃ bubhutsubhiḥ //
2.13.20
dehedehe tu deveśo dehabhājāṃ yadavyayam /
vastudravyātmakaṃ tasya bhavasya paramātmanaḥ //
2.13.21
jñeyaṃ ca tattvavidbhirvai sarvavedārthapāragaiḥ /
āgneyaḥ pariṇāmo yo vigraheṣu śarīriṇām //
2.13.22
mūrtiḥ paśupatirjñeyā sā tattvaṃ vettumicchubhiḥ /
vāyavyaḥ pariṇāmo yaḥ śarīreṣu śarīriṇām //
2.13.23
budhairīśoti sā tasya tanurjñeyā na saṃśayaḥ /
suṣiraṃ yaccharīrasthamaśeṣāṇāṃ śarīriṇām //
2.13.24
bhīmasya sā tanurjñeyā tattvavijñānakāṅkṣibhiḥ /
cakṣurādigataṃ tejo yaccharīrasthamaṅginām //
2.13.25
rudrasyāpi tanurjñeyā paramārthaṃ bubhutsubhiḥ /
sarvabhūtaśarīreṣu manaścandrātmakaṃ hi yat //
2.13.26
mahādevasya sā mūrtirboddhavyā tattvacintakaiḥ /
ātmā yo yajamānākhyaḥ sarvabhūtaśarīragaḥ //
2.13.27
mūrtirugrasya sā jñeyā paramātmabubhutsubhiḥ /
jātānāṃ sarva bhūtānāṃ caturdaśasu yoniṣu //
2.13.28
aṣṭamūrterananyatvaṃ vadanti paramarṣayaḥ /
saptamūrtimayānyāhurīśasyāṅgāni dehinām //
2.13.29
ātmā tasyāṣṭamī mūrtiḥ sarvabhūtaśarīragā /
aṣṭamūrtimamuṃ devaṃ sarvalokātmakaṃ vibhum //
2.13.30
bhajasva sarvabhāvena śreyaḥ prāptuṃ yadīcchasi /
prāṇino yasya kasyāpi kriyate yadyanugrahaḥ //
2.13.31
aṣṭamūrtermaheśasya kṛtamārādhanaṃ bhavet /
nigrahaścet kṛto loke dehino yasya kasyacit //
2.13.32
aṣṭamūrtermaheśasya sa eva vihito bhavet /
yadyavajñā kṛtā loke yasya kasya cidaṅginaḥ //
2.13.33
aṣṭamūrtermahe śasya vihitā sā bhavedvibhoḥ /
abhayaṃ yat pradattaṃ syādaṅgino vasya kasyacit //
2.13.34
ārādhanaṃ kṛtaṃ tasmādaṣṭamūrterna saṃśayaḥ /
sarvopakārakaraṇaṃ pradānamabhayasya ca //
2.13.35
ārādhanaṃ tu devasya aṣṭamūrterna saṃśayaḥ /
sarvopakārakaraṇaṃ sarvānugraha eva ca //
2.13.36
tadarcanaṃ paraṃ prāhuraṣṭamūrtermunīśvarāḥ /
anugrahaṇamanyeṣāṃ vidhātavyaṃ tvayāṅginām //
2.13.37
sarvābhayapradānaṃ ca śivārādhanamicchatā //
2.13.37.p1
iti śrīliṅgamahāpurāṇe uttarabhāge trayodaśo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (1)
- Kūrmapurāṇa — Vyāsa, Sanskrit