Lingapurana 2.14
Liṅgapurāṇa 2.14
- Language
- Sanskrit
Contents
- 2.14.33 — 1 part
2.14.1
sanatkumāra uvāca
pañca brahmāṇi me nandinnācakṣva gaṇasattama /
śreyaḥkaraṇabhūtāni pavitrāṇi śarīriṇām //
2.14.2
nandikeśvara uvāca
śivasyaiva svarūpāṇi pañca brahmāhvayāni te /
kathayāmi yathātattvaṃ padmayoneḥ sutottama //
2.14.3
sarvalokaikasaṃhartā sarvalokaikarakṣitā /
sarvalokaikanirmātā pañcabrahmātmakaḥ śaviḥ //
2.14.4
sarveṣāmeva lokānāṃ yadupādānakāraṇam /
nimittakāraṇaṃ cāhussa śivaḥ pañcadhā smṛtaḥ //
2.14.5
mūrtayaḥ pañca vikhyātāḥ pañca brahmāhvayāḥ parāḥ /
sarvalokaśaraṇyasya śivasya paramātmanaḥ //
2.14.6
kṣetrajñaḥ prathamā mūrtiśivasya parameṣṭhinaḥ /
bhoktā prakṛtivargasya bhogyasyeśānasaṃjñitaḥ //
2.14.7
sthāṇostatpuruṣākhyā ca dvitīyā mūrtirucyate /
prakṛtiḥ sā hi vijñeyā paramātmaguhātmikā //
2.14.8
aghorākhyā tṛtīyā ca śaṃbhormūrtirgarīyasī /
buddheḥ sā mūrtirityuktā dharmādyaṣṭāṅgasaṃyutā //
2.14.9
caturthī vāmadevākhyā mūrtiḥ śaṃbhorgariyasī /
ahaṅkārātmakatvena vyāpya sarvaṃ vyavasthitā //
2.14.10
sadyojātāhvayā śaṃbhoḥ pacamī mūrtirucyate /
manastattvātmakatvena sthitā sarvaśarīriṣu //
2.14.11
īśānaḥ paramo devaḥ parameṣṭhī sanātanaḥ /
śrotrendriyātmakatvena sarvabhūteṣvavasthitaḥ //
2.14.12
sthitastatpuruṣo devaḥ śarīreṣu śarīriṇām /
tvagindriyātmakatvena tattvavidbhirudāhṛtaḥ //
2.14.13
aghoropi mahādevaścakṣurātmatayā budhaiḥ /
kīrtitaḥ sarvabhūtānāṃ śarīreṣu vyavasthitaḥ //
2.14.14
jihvendriyātmakatvena vāmadevopi viśrutaḥ /
aṅgabhājāmaśeṣāṇāmaṅgeṣuṃ paridhiṣṭhitaḥ //
2.14.15
ghrāṇendriyātmakatvena sadyojātaḥ smṛto budhaiḥ /
prāṇabhājāṃ samastānāṃ vigraheṣu vyavasthitaḥ //
2.14.16
sarveṣveva śarīreṣu prāṇabhājāṃ pratiṣṭhitaḥ /
vāgindriyātmakatvena budhairīśāna ucyate //
2.14.17
pāṇīndriyātmakatvena sthitastatpuruṣo budhaiḥ /
ucyate vigraheṣveva sarvavigrahadhāriṇām //
2.14.18
sarvavigrahiṇāṃ dehe hyaghoropi vyavasthitaḥ /
pādendriyātmakatvena kīrtitas tattvavedibhiḥ //
2.14.19
pāyvindriyātmakatvena vāmadevo vyavasthitaḥ /
sarvabhūtanikāyānāṃ kāyeṣu munibhiḥ smṛtaḥ //
2.14.20
upasthātmatayā devaḥ sadyojātaḥ sthitaḥ prabhuḥ /
iṣyate vedaśāstrajñairdeheṣu prāṇadhāriṇām //
2.14.21
īśānaṃ prāṇināṃ devaṃ śabdatanmātrarūpiṇam /
ākāśajanakaṃ prāhurmunivṛndārakaprajāḥ //
2.14.22
prāhustatpuruṣaṃ devaṃ sparśatanmātrakātmakam /
samīrajanakaṃ prāhurbhagavantaṃ munīśvarāḥ //
2.14.23
rūpatanmātrakaṃ devamaghoramapi ghorakam /
prāhurvedavido mukhyā janakaṃ jātavedasaḥ //
2.14.24
rasatanmātrarūpatvāt prathitaṃ tattvavedinaḥ /
vāmadevamapāṃ prāhurjanakatvena saṃsthitam //
2.14.25
sadyojātaṃ mahādevaṃ gandhatanmātrarūpiṇam /
bhūmyātmānaṃ praśaṃsaṃti sarvatattvārthavedinaḥ //
2.14.26
ākāśātmānamīśānamādidevaṃ munīśvarāḥ /
parameṇa mahattvena saṃbhūtaṃ prāhuradbhutam //
2.14.27
prabhuṃ tatpuruṣaṃ devaṃ pavanaṃ pavanātmakam /
samastalokavyāpitvātprathitaṃ sūrayo viduḥ //
2.14.28
athārcitatayā khyātamaghoraṃ dahanātmakam /
kathayanti mahātmānaṃ vedavākyārthavedinaḥ //
2.14.29
toyātmakaṃ mahādevaṃ vāmadevaṃ manoramaṃm /
jagatsaṃjīvanatvena kathitaṃ munayo viduḥ //
2.14.30
viśvaṃbharātmakaṃ devaṃ sadyojātaṃ jagadgurum /
carācarekabhartāraṃ paraṃ kavivarā viduḥ //
2.14.31
pañcabrahmātmakaṃ sarvaṃ jagatsthāvarajaṅgamam /
śivānandaṃ tadityāhurmunayastattvadarśinaḥ //
2.14.32
pañcaviṃśatitattvātmā prapañce yaḥ pradṛśyate /
pañcabrahmātmakatvena sa śivo nānyatāṃ gataḥ //
2.14.33
pañcaviṃśatitattvātmā pañcabrahmātmakaḥ śivaḥ /
śreyorthibhirato nityaṃ cintanīyaḥ prayatnataḥ //
2.14.33.p1
iti śrīliṅgamahāpurāṇe uttarabhāge pañcabrahmakathanaṃ nāma caturdaśo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (1)
- Liṅga — Sanskrit