[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 2.14 # Lingapurana 2.14 Liṅgapurāṇa 2.14 - **Language:** Sanskrit ## Contents - [2.14.33](https://indike.org/pramana/in.purana.linga.2.14.33) — 1 part ### [2.14.1](https://indike.org/pramana/in.purana.linga.2.14.1) sanatkumāra uvāca pañca brahmāṇi me nandinnācakṣva gaṇasattama / śreyaḥkaraṇabhūtāni pavitrāṇi śarīriṇām // ### [2.14.2](https://indike.org/pramana/in.purana.linga.2.14.2) nandikeśvara uvāca śivasyaiva svarūpāṇi pañca brahmāhvayāni te / kathayāmi yathātattvaṃ padmayoneḥ sutottama // ### [2.14.3](https://indike.org/pramana/in.purana.linga.2.14.3) sarvalokaikasaṃhartā sarvalokaikarakṣitā / sarvalokaikanirmātā pañcabrahmātmakaḥ śaviḥ // ### [2.14.4](https://indike.org/pramana/in.purana.linga.2.14.4) sarveṣāmeva lokānāṃ yadupādānakāraṇam / nimittakāraṇaṃ cāhussa śivaḥ pañcadhā smṛtaḥ // ### [2.14.5](https://indike.org/pramana/in.purana.linga.2.14.5) mūrtayaḥ pañca vikhyātāḥ pañca brahmāhvayāḥ parāḥ / sarvalokaśaraṇyasya śivasya paramātmanaḥ // ### [2.14.6](https://indike.org/pramana/in.purana.linga.2.14.6) kṣetrajñaḥ prathamā mūrtiśivasya parameṣṭhinaḥ / bhoktā prakṛtivargasya bhogyasyeśānasaṃjñitaḥ // ### [2.14.7](https://indike.org/pramana/in.purana.linga.2.14.7) sthāṇostatpuruṣākhyā ca dvitīyā mūrtirucyate / prakṛtiḥ sā hi vijñeyā paramātmaguhātmikā // ### [2.14.8](https://indike.org/pramana/in.purana.linga.2.14.8) aghorākhyā tṛtīyā ca śaṃbhormūrtirgarīyasī / buddheḥ sā mūrtirityuktā dharmādyaṣṭāṅgasaṃyutā // ### [2.14.9](https://indike.org/pramana/in.purana.linga.2.14.9) caturthī vāmadevākhyā mūrtiḥ śaṃbhorgariyasī / ahaṅkārātmakatvena vyāpya sarvaṃ vyavasthitā // ### [2.14.10](https://indike.org/pramana/in.purana.linga.2.14.10) sadyojātāhvayā śaṃbhoḥ pacamī mūrtirucyate / manastattvātmakatvena sthitā sarvaśarīriṣu // ### [2.14.11](https://indike.org/pramana/in.purana.linga.2.14.11) īśānaḥ paramo devaḥ parameṣṭhī sanātanaḥ / śrotrendriyātmakatvena sarvabhūteṣvavasthitaḥ // ### [2.14.12](https://indike.org/pramana/in.purana.linga.2.14.12) sthitastatpuruṣo devaḥ śarīreṣu śarīriṇām / tvagindriyātmakatvena tattvavidbhirudāhṛtaḥ // ### [2.14.13](https://indike.org/pramana/in.purana.linga.2.14.13) aghoropi mahādevaścakṣurātmatayā budhaiḥ / kīrtitaḥ sarvabhūtānāṃ śarīreṣu vyavasthitaḥ // ### [2.14.14](https://indike.org/pramana/in.purana.linga.2.14.14) jihvendriyātmakatvena vāmadevopi viśrutaḥ / aṅgabhājāmaśeṣāṇāmaṅgeṣuṃ paridhiṣṭhitaḥ // ### [2.14.15](https://indike.org/pramana/in.purana.linga.2.14.15) ghrāṇendriyātmakatvena sadyojātaḥ smṛto budhaiḥ / prāṇabhājāṃ samastānāṃ vigraheṣu vyavasthitaḥ // ### [2.14.16](https://indike.org/pramana/in.purana.linga.2.14.16) sarveṣveva śarīreṣu prāṇabhājāṃ pratiṣṭhitaḥ / vāgindriyātmakatvena budhairīśāna ucyate // ### [2.14.17](https://indike.org/pramana/in.purana.linga.2.14.17) pāṇīndriyātmakatvena sthitastatpuruṣo budhaiḥ / ucyate vigraheṣveva sarvavigrahadhāriṇām // ### [2.14.18](https://indike.org/pramana/in.purana.linga.2.14.18) sarvavigrahiṇāṃ dehe hyaghoropi vyavasthitaḥ / pādendriyātmakatvena kīrtitas tattvavedibhiḥ // ### [2.14.19](https://indike.org/pramana/in.purana.linga.2.14.19) pāyvindriyātmakatvena vāmadevo vyavasthitaḥ / sarvabhūtanikāyānāṃ kāyeṣu munibhiḥ smṛtaḥ // ### [2.14.20](https://indike.org/pramana/in.purana.linga.2.14.20) upasthātmatayā devaḥ sadyojātaḥ sthitaḥ prabhuḥ / iṣyate vedaśāstrajñairdeheṣu prāṇadhāriṇām // ### [2.14.21](https://indike.org/pramana/in.purana.linga.2.14.21) īśānaṃ prāṇināṃ devaṃ śabdatanmātrarūpiṇam / ākāśajanakaṃ prāhurmunivṛndārakaprajāḥ // ### [2.14.22](https://indike.org/pramana/in.purana.linga.2.14.22) prāhustatpuruṣaṃ devaṃ sparśatanmātrakātmakam / samīrajanakaṃ prāhurbhagavantaṃ munīśvarāḥ // ### [2.14.23](https://indike.org/pramana/in.purana.linga.2.14.23) rūpatanmātrakaṃ devamaghoramapi ghorakam / prāhurvedavido mukhyā janakaṃ jātavedasaḥ // ### [2.14.24](https://indike.org/pramana/in.purana.linga.2.14.24) rasatanmātrarūpatvāt prathitaṃ tattvavedinaḥ / vāmadevamapāṃ prāhurjanakatvena saṃsthitam // ### [2.14.25](https://indike.org/pramana/in.purana.linga.2.14.25) sadyojātaṃ mahādevaṃ gandhatanmātrarūpiṇam / bhūmyātmānaṃ praśaṃsaṃti sarvatattvārthavedinaḥ // ### [2.14.26](https://indike.org/pramana/in.purana.linga.2.14.26) ākāśātmānamīśānamādidevaṃ munīśvarāḥ / parameṇa mahattvena saṃbhūtaṃ prāhuradbhutam // ### [2.14.27](https://indike.org/pramana/in.purana.linga.2.14.27) prabhuṃ tatpuruṣaṃ devaṃ pavanaṃ pavanātmakam / samastalokavyāpitvātprathitaṃ sūrayo viduḥ // ### [2.14.28](https://indike.org/pramana/in.purana.linga.2.14.28) athārcitatayā khyātamaghoraṃ dahanātmakam / kathayanti mahātmānaṃ vedavākyārthavedinaḥ // ### [2.14.29](https://indike.org/pramana/in.purana.linga.2.14.29) toyātmakaṃ mahādevaṃ vāmadevaṃ manoramaṃm / jagatsaṃjīvanatvena kathitaṃ munayo viduḥ // ### [2.14.30](https://indike.org/pramana/in.purana.linga.2.14.30) viśvaṃbharātmakaṃ devaṃ sadyojātaṃ jagadgurum / carācarekabhartāraṃ paraṃ kavivarā viduḥ // ### [2.14.31](https://indike.org/pramana/in.purana.linga.2.14.31) pañcabrahmātmakaṃ sarvaṃ jagatsthāvarajaṅgamam / śivānandaṃ tadityāhurmunayastattvadarśinaḥ // ### [2.14.32](https://indike.org/pramana/in.purana.linga.2.14.32) pañcaviṃśatitattvātmā prapañce yaḥ pradṛśyate / pañcabrahmātmakatvena sa śivo nānyatāṃ gataḥ // ### [2.14.33](https://indike.org/pramana/in.purana.linga.2.14.33) pañcaviṃśatitattvātmā pañcabrahmātmakaḥ śivaḥ / śreyorthibhirato nityaṃ cintanīyaḥ prayatnataḥ // ### [2.14.33.p1](https://indike.org/pramana/in.purana.linga.2.14.33.p1) iti śrīliṅgamahāpurāṇe uttarabhāge pañcabrahmakathanaṃ nāma caturdaśo 'dhyāyaḥ ## Commentaries (2) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.146.3) — Gaṇeśa Bhaṭṭa, Sanskrit - [Śivatoṣiṇī](https://indike.org/pramana/in.purana.linga!ganesa-ballala-natu.146.3) — Gaṇeśa Ballāla Nātū, Sanskrit ## Linked texts (1) - [Liṅga](https://indike.org/pramana/in.purana.linga-anon.146.1) — Sanskrit --- Source: [https://indike.org/pramana/in.purana.linga.2.14](https://indike.org/pramana/in.purana.linga.2.14) · Pramāṇa