Lingapurana 2.15
Liṅgapurāṇa 2.15
- Language
- Sanskrit
Contents
- 2.15.26 — 1 part
2.15.1
sanatkumāra uvāca
bhūyo 'pi śivamāhātmyaṃ samācakṣva mahāmate /
sarvajño hyasi bhūtānā madhinātha mahāguṇa //
2.15.2
śailādiruvāca
śivamāhātmyamekāgraḥ śṛṇu vakṣyāmi te mune /
bahubhirbahudhā śabdaiḥ kīrtitaṃ munisattamaiḥ //
2.15.3
sadasadrūpamityāhuḥ sadasatpatirityapi /
taṃ śivaṃ munayaḥ kecitpravadanti ca sūrayaḥ //
2.15.4
bhūtabhāvavikāreṇa dvitīyena sa ucyate /
vyaktaṃ tena vihīnatvādavyaktamasadityapi //
2.15.5
ubhe te śivarūpe hi śivādanyaṃ na vidyate /
tayoḥ patitvācca śivaḥ sadasatpatirucyate //
2.15.6
kṣarākṣarātmakaṃ prāhuḥ kṣarākṣaraparaṃ tathā /
śivaṃ maheśvaraṃ kecinmunayastattvacintakāḥ //
2.15.7
uktamakṣaramavyaktaṃ vyaktaṃ kṣaramudāhṛtam /
rūpe te śaṅkarasyaiva tasmānna para ucyate //
2.15.8
tayoḥ paraḥ śivaḥ śāntaḥ kṣarākṣaraparo budhaiḥ /
ucyate paramārthena mahādevo maheśvaraḥ //
2.15.9
samastavyaktarūpaṃ tu tataḥ smṛtvā sa mucyate /
samaṣṭivyaṣṭirūpaṃ tu samaṣṭivyaṣṭikāraṇam //
2.15.10
vadanti kecidācāryāḥ śivaṃ paramakāraṇam /
samaṣṭiṃ viduravyaktaṃ vyaṣṭiṃ vyaktaṃ munīśvarāḥ //
2.15.11
rūpe te gadite śaṃbhornāstyanyadvastusaṃbhavam /
tayoḥ kāramabhāvena śivo hi parameśvaraḥ //
2.15.12
ucyate yogaśāstrajñaiḥ samaṣṭivyaṣṭikāraṇam /
kṣetrakṣetrajñarūpī ca śivaḥ kaiścidudāhṛtaḥ //
2.15.13
paramātmā paraṃ jyotirbhagavānparameśvaraḥ /
caturviśatitattvāni samaṣṭivyaṣṭikāraṇam //
2.15.14
prāhuḥ kṣetrajñaśabdena bhoktāraṃ puruṣaṃ tathā /
kṣetrakṣetravidāvete rūpe tasya svayaṃbhuvaḥ //
2.15.15
na kiñcicca śivādanyaditi prāhurmanīṣiṇaḥ /
aparabrahmarūpaṃ taṃ parabrahmātmakaṃ śivam //
2.15.16
kecidāhurmahādevamanādi nidhanaṃ prabhum /
bhūtendriyāntaḥ karaṇapradhānaviṣayātmakam //
2.15.17
aparaṃ brahma nirdiṣṭaṃ paraṃ brahma cidātmakam /
brahmaṇī te maheśasya śivasyāsya svayaṃbhuvaḥ //
2.15.18
śaṅkarasya parasyaiva śivādanyanna vidyate /
vidyāvidyāsvarūpī ca śaṅkaraḥ kaiściducyate //
2.15.19
dhātā vidhātā lokānāmādidevo maheśvaraḥ /
vidyeti ca tamevāhuravidyeti munīśvarāḥ //
2.15.20
prapañcajātamakhilaṃ te svarūpe svayaṃbhuvaḥ /
bhrāntirvidyā paraṃ ceti śivarūpamanuttamam //
2.15.21
avāpurmunayo yogātkecidāgamavedinaḥ /
artheṣu bahurūpeṣu vijñānaṃ bhrāntirucyate //
2.15.22
ātmākāreṇa saṃvittirbudhairvidyeti kīrtyate /
vikalparahitaṃ tattvaṃ paramityabhidhīyate //
2.15.23
tṛtīyarūpamīśasya nānyatkiñcana sarvataḥ /
vyaktāvyaktajñarūpīti śivaḥ kaiścinnigadyate //
2.15.24
vidhātā sarva lokānāṃ dhātā ca parameśvaraḥ /
trayoviṃśatitattvāni vyaktaśabdena sūrayaḥ //
2.15.25
vadantyavyaktaśabdena prakṛtiḥ ca parāṃ tathā /
kathayanti jñaśabdena puruṣaṃ gumabhoginam //
2.15.26
tattrayaṃ śāṅkaraṃ rūpaṃ nānyatkiñcidaśāṅkaram //
2.15.26.p1
iti śrīliṅgamahāpurāṇe uttarabhāge pañcadaśo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (1)
- Śivapurāṇa (complete text) — Sanskrit