Pramāṇa · Search · About · API

Lingapurana 2.18

Liṅgapurāṇa 2.18

Language
Sanskrit

Contents

2.18.1

devā ūcuḥ
ya eṣa bhagavān rudro brahmaviṣṇumaheśvarāḥ /
skandaścāpi tathā cedro bhuvanāni caturdaśa /
aśvinau grahatārāsca nakṣatrāṇi ca khaṃ diśaḥ //

2.18.2

bhūtāni ca tathā sūryaḥ somaścāṣṭau grahāstathā /
prāṇaḥ kālo yamo mṛtyuramṛtaḥ parameśvaraḥ //

2.18.3

bhūtaṃ bhavyaṃ bhaviṣyacca vartamānaṃ maheśvaraḥ /
viśvaṃ kṛtsnaṃ jagatsarvaṃ satyaṃ tasmai namonamaḥ //

2.18.4

tvamādau ca tathā bhūto bhūrbhuvaḥ svastathaiva ca /
ante tvaṃ viśvarūpo 'si śīrṣaṃ tu jagataḥ saṃdā //

2.18.5

brahmaikastvaṃ dvitridhārthamadhaśca tvaṃ sureśvaraḥ /
śāntiśca tvaṃ tathā puṣṭistuṣṭiścāpyahutaṃ hutam //

2.18.6

viśvaṃ caiva tathāviśvaṃ dattaṃ vādattamīśvaram /
kṛtaṃ cāpyakṛtaṃ devaṃ paramapyaparaṃ dhruvam /
parāyaṇaṃ satāṃ caiva hyasatāmapi śaṅkaram //

2.18.7

apāma somam amṛtā abhūmāganma jyotiravidāma devān /
kiṃ nūnamasmānkṛṇavadarātiḥ kimu dhūrtiramṛtaṃ martyasya //

2.18.8

etajjagaddhitaṃ divyamakṣaraṃ sūkṣmamavyayam //

2.18.9

prājā patyaṃ pavitraṃ ca saumyamagrāhyamavyayam /
agrāhyeṇāpi vā grāhyaṃ vāyavyena samīraṇaḥ //

2.18.10

saumyena saumyaṃ grasati tejasā svena līlayā /
tasmai namo 'pasaṃhartre mahāgrāsāya śūline //

2.18.11

hṛdisthā devatāḥ sarvā hṛdi prāṇe pratiṣṭhitāḥ /
hṛdi tvamasi yo nityaṃ tisro mātrāḥ parastu saḥ //

2.18.12

śiraścottarataścaiva pādau dakṣiṇatastathā /
yo vai cottarataḥ sākṣātsa oṅkāraḥ sanātanaḥ //

2.18.13

oṅkāro yaḥ sa eveha praṇavo vyāpya tiṣṭhati /
anantastārasūkṣmaṃ ca śuklaṃ vaidyutameva ca //

2.18.14

paraṃ brahmā sa īśāna ekorudraḥ sa eva ca /
bhavānmaheśvaraḥ sākṣānmahādevo na saṃśayaḥ //

2.18.15

ūrdhvamunnāmayatyeva sa oṅkāraḥ prakīrtitaḥ /
prāṇānavati yastasmāt praṇavaḥ parikīrtitaḥ //

2.18.16

sarvaṃ vyāpnoti yastasmātsarvavyāpī sanātanaḥ /
brahmā hariśca bhagavānādyantaṃ nopalabdhavān //

2.18.17

tathānye ca tato 'nanto rudraḥ paramakāraṇam /
yastārayati saṃsārāttāra ityabhidhīyate //

2.18.18

sūkṣmo bhūtvā śarīrāṇi sarvadā hyadhitiṣṭhiti /
tasmātsūkṣmaḥ samākhyāto bhagavannīlalohitaḥ //

2.18.19

nīlaśca lohitaścaiva pradhānapuruṣānvayāt /
skandate 'sya yataḥ śukraṃ tathā śukramapaitica //

2.18.20

vidyotayati yastasmādvaidyutaḥ parigīyate /
bṛhattvādbṛṃhaṇatvācca bṛhate ca parāpare //

2.18.21

tasmādbṛṃhati yasmāddhi paraṃ brahmeti kīrtitam /
advitīyo 'tha bhagavāṃsturīyaḥ parameśvaraḥ //

2.18.22

īśānamasya jagataḥ svardṛśāṃ cakṣur īśvaram /
īśānamindrasūrayaḥ sarveṣāmapi sarvadā //

2.18.23

īśānaḥ sarvavidyānāṃ yattadīśāna ucyate /
yadīkṣate ca bhagavānnirīkṣyamiti cājñayā //

2.18.24

ātmajñānaṃ mahādevo yogaṃ gamayati svayam /
bhagavāṃścocyate devo devadevo maheśvaraḥ //

2.18.25

sarvāṃllokānkrameṇaiva yo gṛhṇati maheśvaraḥ /
visṛjatyepa deveśo vāsayatyapi līlayā //

2.18.26

eṣo hi devaḥ pradiśo 'nusarvāḥ pūrvo hi jātaḥ sa u garbhe antaḥ /
sa eva jātaḥ sa janiṣyamāṇaḥ pratyaṅmukhāstiṣṭhati sarvatomukhaḥ //

2.18.27

upāsitavyaṃ yatnena tadetatsadbhiravyayam /
yato vāco nivartante hyaprāpya manasā saha //

2.18.28

tadagrahaṇameveha yadvāgvadati yatnataḥ /
aparaṃ ca paraṃ veti parāyaṇamiti svayam //

2.18.29

vadanti vācaḥ sarvajñaḥ śaṅkaraṃ nīlalohitam /
eṣa sarvo namastasmai puruṣaḥ piṅgalaḥ śivaḥ //

2.18.30

sa eṣa sa mahārudro viśvaṃ bhūtaṃ bhaviṣyati /
bhuvanaṃ bahudhā jātaṃ jāyamānamitastataḥ //

2.18.31

hiraṇyabāhurbhagavān hiraṇyapatirīśvaraḥ /
aṃbikāpatirīśāno hemaretā vṛṣadhvajaḥ //

2.18.32

umāpatirvirūpākṣo viśvasṛgviśvavāhanaḥ /
brahmāṇaṃ vidadhe yo 'sau putramagre sanātanam //

2.18.33

prahiṇoti sma tasyaiva jñānamātmaprakāśakam /
tamekaṃ puruṣaṃ rudraṃ puruhutaṃ puruṣṭutam //

2.18.34

bālāgramātraṃ hṛdayasya madhye viśvandevaṃ vahnirūpaṃ vareṇyam /
tamātmasthaṃ ye 'nupaśyanti dhīrāsteṣāṃ śāntiḥ śāśvatī netareṣām //

2.18.35

mahato yo mahīyāṃśca hyaṇorapyaṇuravyayaḥ /
guhāyāṃ nihitaścātmā jantorasya maheśvaraḥ //

2.18.36

veśmabhūto 'sya viśvasya kamalastho hṛti svayam /
gahvaraṃ gahanaṃ tatsthaṃ tasyāntaścordhvataḥ sthitaḥ //

2.18.37

tatrāpi dahraṃ gaganamoṅkāraṃ parameśvaram /
bālāgramātraṃ tanmadhye ṛtaṃ paramakāraṇam //

2.18.38

satyaṃ brahma mahādevaṃ puruṣaṃ kṛṣṇapiṅgalam /
ūrdhvaratesamīśānaṃ virūpākṣamajodbhavam //

2.18.39

adhitiṣṭhati yoniṃ yo yoniṃ vācaika īśvaraḥ /
dehaṃ pañcavidhaṃ yena tamīśānaṃ purātanam //

2.18.40

prāṇeṣvantarmanaso liṅgamāhuryasminkrodho yā ca tṛṣṇā kṣamā ca /
tṛṣṇāṃ chittvā hetujālasya mūlaṃ buddhyācintyaṃ sthāpayitvā ca rudre //

2.18.41

ekaṃ tamāhurvai rudraṃ śāśvataṃ parameśvaram /
parātparataraṃ vāpi parātparataraṃ dhruvam //

2.18.42

brahmaṇo janakaṃ viṣṇorvahnervāyoḥ sadāśivam /
dhyātvāgninā ca śodhyāṅgaṃ viśodhya ca pṛthakpṛthak //

2.18.43

pañcabhūtāni saṃyamya mātrāvidhiguṇakramāt /
mātrāḥ pañca catasraśca trimātrādistataḥ param //

2.18.44

ekamātramamātraṃ hi dvādaśānte vyavasthitam /
sthitvā sthāpyāmṛto bhūtvā vrataṃ pāśupataṃ caret //

2.18.45

etadvrataṃ pāśupataṃ cariṣyāmi samāsataḥ /
agnimādhāya vidhivadṛgyajuḥ sāmasaṃbhavaiḥ //

2.18.46

upoṣitaḥ śuciḥ snātaḥ śuklāṃbaradharaḥ svayam /
śuklayajñopavīti ca śuklamālyānulepanaḥ //

2.18.47

juhuyādvirajovidvān virajāśca bhaviṣyati /
vāyavaḥ pañca śudhyatāṃ vāṅmanaścaraṇādayaḥ //

2.18.48

śrotraṃ jihvā tataḥ prāṇastato buddhistathaiva ca /
śiraḥ pāṇistathā pārśvaṃ pṛṣṭhodaramanantaram //

2.18.49

jaṅghe śiśramupasthaṃ ca pāyurmeḍhraṃ tathaiva ca /
tvacā māṃsaṃ ca rudhiraṃ medo 'sthīni tathaiva ca //

2.18.50

śabdaḥ sparśaṃ ca rūpaṃ ca raso gandhastathaiva ca /
bhūtāni caiva śudhyantāṃ dehe medādayastathā //

2.18.51

annaṃ prāṇe mano jñānaṃ śudhyantāṃ vai śivecchayā /
hutvājyena samidbhiśca caruṇā ca yathākramam //

2.18.52

upasaṃhṛtya rudrāgniṃ gṛhītvā bhasma yatnataḥ /
agnirityādinā dhīmān vimṛjyāṅgāni saṃspṛśet //

2.18.53

etatpāśupataṃ divyaṃ vrataṃ pāśavimocanam /
brāhmaṇānāṃ hitaṃ proktaṃ kṣatriyāṇāṃ tathaiva ca //

2.18.54

vaiśyānāmapi yogyānāṃ yatīnāṃ tu viśeṣataḥ /
vānaprasthāśramasthānāṃ gṛhasthānāṃ satāmapi //

2.18.55

vimuktirvidhinānena dṛṣṭvā vai brahmacāriṇām /
agnirityādinā bhasma gṛhītvā hyagnihotrajam //

2.18.56

so 'pi pāśupato vipro vimṛjyāṅgāni saṃspṛśet /
bhasmācchanno dvijo vidvān mahāpātakasaṃbhavaiḥ //

2.18.57

pāpaurvimucyate sadyo mucyate ca na saṃśayaḥ /
vīryamagreryato bhasma vīryavānbhasmasaṃyutaḥ //

2.18.58

bhasmāsnānarato vipro bhasmaśāyī jitendriyaḥ /
sarvapāpavinirmuktaḥ śivasāyujyamāpnuyāt //

2.18.59

tasmātsarvaprayatnena bhūtyaṅgaṃ pūjayedvudhaḥ /
rerekāro na kartavyastuntuṅkārastathaiva ca //

2.18.60

na tatkṣamati deveśo brahmā vā yadi keśavaḥ /
mama putro bhasmadhārī gaṇeśaśca varānane //

2.18.61

teṣāṃ viruddhaṃ yattyājyaṃ sa yāti narakārṇavam /
gṛhastho brahmahīnopi tripuṇḍraṃ yo na kārayet //

2.18.62

pūjā karma kriyā tasya dānaṃ snānaṃ tathaiva ca /
niṣphalaṃ jāyate sarvaṃ yathā bhasmani vai hutam //

2.18.63

tasmācca sarvakāryeṣu tripuṇḍraṃ dhārayedbudhaḥ /
ityuktvā bhagavānbrahmā stutvā devaiḥ samaṃ prabhuḥ //

2.18.64

bhasmācchannaiḥ svayaṃ channo virarāma viśāṃpate /
atha teṣāṃ prasādārthaṃ paśūnāṃ patirīśvaraḥ //

2.18.65

sagamaścāṃbayā sārdhaṃ sānnidhyamakarotprabhuḥ /
atha saṃnihitaṃ rudraṃ tuṣṭuvuḥ surapuṅgavam //

2.18.66

rudrādhyāyena sarveśaṃ devadeva mumāpatim /
devopi devānālokya ghṛṇayā vṛṣabhadhvajaḥ //

2.18.67

tuṣṭosmītyāha devebhyo varaṃ dātuṃ surārihā //

2.18.67.p1

iti śrīliṅgamahāpurāṇe uttarabhāgeṣṭādaśodhyāyaḥ

Commentaries (1)

Linked texts (9)