Lingapurana 2.19
Liṅgapurāṇa 2.19
- Language
- Sanskrit
Contents
- 2.19.43 — 1 part
2.19.1
śailādiruvāca
taṃ prabhuṃ prītamanasaṃ praṇipatya vṛṣadhvajam /
apṛcchanmunayo devāḥ prītikaṇṭakitatvacaḥ //
2.19.2
devā ūcuḥ
bhagavān kena mārgeṇa pūjanīyo dvijātibhiḥ /
kutra vā kena rūpeṇa vaktumarhasi śaṅkaraḥ //
2.19.3
kasyādhikāraḥ pūjāyāṃ brāhmaṇasya kathaṃ prabho /
kṣatriyāṇāṃ kathaṃ deva vaiśyānāṃ vṛṣabhadhvaja //
2.19.4
strīśūdrāṇāṃ kathaṃ vāpi kuṇḍagolādināṃ tu vā /
hitāya jagatāṃ sarvamasmākaṃ vaktumarhasi //
2.19.5
sūta uvāca
teṣāṃ bhāvaṃ samālokya munīnāṃ nīlalohitaḥ /
prāha gaṃbhīrayā vācā maṇḍalasthaḥ sadāśivaḥ //
2.19.6
maṇḍale cāgrato paśyandevadevaṃ sahomayā /
devāśca munayaḥ sarve vidyutkoṭisamaprabham //
2.19.7
aṣṭabāhuṃ caturvaktraṃ dvādaśākṣaṃ mahābhujam /
ardhanārīśvaraṃ devaṃ jaṭāmukuṭadhāriṇam //
2.19.8
sarvābharaṇasaṃyuktaṃ raktamālyānulepanam /
raktāṃbaradharaṃ sṛṣṭisthitisaṃhārakārakam //
2.19.9
tasya pūrvamukhaṃ pītaṃ prasannaṃ puruṣātmakam /
aghoraṃ dakṣiṇaṃ vaktraṃ nīlāñjanacayopamam //
2.19.10
daṃṣṭrākarālamatyugraṃ jvālāmālāsamāvātam /
raktaśmaśruñjaṭāyuktaṃ cottare vidrumaprabham //
2.19.11
prasannaṃ vāmadevākhyaṃ varadaṃ viśvarūpiṇam /
paścimaṃ vadanaṃ tasya gokṣīradhavalaṃ śubham //
2.19.12
muktāphalamayairhārairbhūṣitaṃ tilakojjvalam /
sadyojātamukhaṃ divyaṃ bhāskarasya smarāriṇaḥ //
2.19.13
ādityamagrato paśyanpūrvavaccaturānanam /
bhāskaraṃ purato devaṃ caturvakraṃ ca pūrvavat //
2.19.14
bhānuṃ dakṣiṇato devaṃ caturvaktraṃ ca pūrvavat /
ravimuttarato 'paśyanpūrvavaccaturānanam //
2.19.15
vistārāṃ maṇḍale pūrve uttarāṃ dakṣiṇe sthitām /
bodhanīṃ paścime bhāge maṇḍalasya prajāpateḥ //
2.19.16
adhyāyanīṃ ca kauberyāmekavaktrāṃ caturbhujām /
sarvābharaṇasaṃpannāḥ śaktayaḥ sarvasaṃmatāḥ //
2.19.17
brahmāṇaṃ dakṣiṇe bhāge viṣṇuṃ vāme janārdanam /
ṛgyajuḥ sāmamārgeṇa mūrtitrayamayaṃśivam //
2.19.18
īśānaṃ varadaṃ devamīśānaṃ parameśvaram /
brahmāsanasthaṃ vadaraṃ dharmajñānāsanopari //
2.19.19
vairāgyaiśvaryasaṃyukte prabhūte vimale tathā /
sāraṃ sarveśvaraṃ devamārādhyaṃ paramaṃ sukham //
2.19.20
sitapaṅkajamadhyasthaṃ dīptādyairabhisaṃvṛtam /
dīptāṃ dīpaśikhākārāṃ sūkṣmāṃ vidyutprabhāṃ śubhām //
2.19.21
jayāmagniśīkhākārāṃ prabhāṃ kanakasaprabhām /
vibhūtiṃ vidrumaprakhyāṃ vimalāṃ padmasannibhām //
2.19.22
amoghāṃ karṇikākārāṃ vidyutaṃ viśvavarṇinīm /
caturvaktrāṃ caturvarṇāṃ devīṃ vai sarvatomukhīm //
2.19.23
somamaṅgārakaṃ devaṃ budhaṃ buddhimatāṃ varam /
bṛhaspatiṃ bṛhadvuddhiṃ bhārgavaṃ tejasāṃ nidhim //
2.19.24
mandaṃ mandagatiṃ caiva samantāttasya te sadā /
sūryaṃ śivo jagannāthaḥ somaḥ sākṣādumā svayam //
2.19.25
pañcabhūtāni śeṣāṇi tanmayaṃ ca carācaram /
dṛṣṭaiva munayaḥ sarve devadevamumāpatim //
2.19.26
kṛtāñjalipuṭāḥ sarve munayo devatāstathā /
astu vanvāgbhiriṣṭabhirvaradaṃ nīlalohitam //
2.19.27
ṛṣaya ūcuḥ
namaḥ śivāya rudrāya kadrudrāya pracetase /
mīḍhuṣṭamāya sarvāya śipiviṣṭāyaraṃhase //
2.19.28
prabhūte vimale sāre hyādhāre parame sukhe /
navaśaktyāvṛtaṃ devaṃ padmasthaṃ bhāskaraṃ prabhum //
2.19.29
ādityaṃ bhāskaraṃ bhānuṃ raviṃ devaṃ divākaram /
umāṃ prabhāṃ tathā prajñāṃ saṃdhyāṃ sāvitrikāmapi //
2.19.30
vistārāmuttarāṃ devīṃ bodanīṃ praṇamāmyaham /
āpyāyanīṃ ca varadāṃ brahmāṇaṃ keśavaṃ haram //
2.19.31
somādivṛndaṃ ca yathākramema saṃpūjya mantrairvihitakrameṇa /
smarāmi devaṃ ravimaṇḍalasthaṃ sadāśivaṃ śaṅkaramādidevam //
2.19.32
indrādidevāṃśca tatheśvarāṃśca nārāyaṇaṃ padmajamādidevam /
prāgādyadhordhvaṃ ca yathākrameṇa vajrādipadmaṃ ca tathā smarāmi //
2.19.33
siṃdūravarṇāya samaṇḍalāya suvarṇavajrābharaṇāya tubhyam /
padmābhanetrāya sapaṅkajāya brahmendranārāyaṇakāraṇāya //
2.19.34
rathaṃ ca saptāśvamanūruvīraṃ gaṇaṃ tathā saptavidhaṃ krameṇa /
ṛtupravāheṇa ca vālīkhilyānsmarāmi mandehagaṇakṣayaṃ ca //
2.19.35
hutvā tilādyairvividhaistathāgnau punaḥ samāpyaiva tathaiva sarvam /
udvāsya hṛtpaṅkajamadhyasaṃsthaṃ smarāmi biṃbaṃ tava devadeva //
2.19.36
smarāmi biṃbāni yathākrameṇa raktāni padmāmalalocanāni /
padmaṃ ca savye varadaṃ ca vāme kare tathā bhūṣitabhūṣaṇāni //
2.19.37
daṃṣṭrākarālaṃ tava divyavaktraṃ vidyutprabhaṃ daityayaṅkaraṃ ca /
smarāmi rakṣābhirataṃ dvijānāṃ mandeharakṣogaṇabhartsanaṃ ca //
2.19.38
somaṃ sitaṃ bhūmijamagnirṇaṃ cāmīkarābhaṃ budhamindusūnum /
bṛhaspatiṃ kāñcanasannikāśaṃ śukraṃ sitaṃ kṛṣṇataraṃ ca mandam //
2.19.39
smarāmi savyamabhayaṃ vāmamūrugataṃ varam /
sarveṣāṃ mandaparyantaṃ mahādevaṃ ca bhāskaram //
2.19.40
pūrṇenduvarṇena ca puṣpadhaprasthena toyane śubhena pūrṇam /
pātraṃ dṛḍhaṃ tāmramayaṃ prakalpya dāsye tavārdhyaṃ bhagavanprasīda //
2.19.41
namaḥ śivāya devāya īśvarāya kapardine /
rudrāya viṣṇave tubhyaṃ brahmaṇe sūryamūrtaye //
2.19.42
sūta uvāca
yaḥ śivaṃ maṇḍalaṃ devaṃ saṃpūjyaivaṃ samāhitaḥ /
prātarmadhyāhnasāyāhne paṭhetstavamanuttamam //
2.19.43
itthaṃ śivena sāyujyaṃ labhate nātra saṃśayaḥ //
2.19.43.p1
iti śrīliṅgamahāpurāṇe uttarabhāge ekonaviṃśodhyāyaḥ
Linked texts (1)
- Śivapurāṇa (complete text) — Sanskrit