[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 2.19 # Lingapurana 2.19 Liṅgapurāṇa 2.19 - **Language:** Sanskrit ## Contents - [2.19.43](https://indike.org/pramana/in.purana.linga.2.19.43) — 1 part ### [2.19.1](https://indike.org/pramana/in.purana.linga.2.19.1) śailādiruvāca taṃ prabhuṃ prītamanasaṃ praṇipatya vṛṣadhvajam / apṛcchanmunayo devāḥ prītikaṇṭakitatvacaḥ // ### [2.19.2](https://indike.org/pramana/in.purana.linga.2.19.2) devā ūcuḥ bhagavān kena mārgeṇa pūjanīyo dvijātibhiḥ / kutra vā kena rūpeṇa vaktumarhasi śaṅkaraḥ // ### [2.19.3](https://indike.org/pramana/in.purana.linga.2.19.3) kasyādhikāraḥ pūjāyāṃ brāhmaṇasya kathaṃ prabho / kṣatriyāṇāṃ kathaṃ deva vaiśyānāṃ vṛṣabhadhvaja // ### [2.19.4](https://indike.org/pramana/in.purana.linga.2.19.4) strīśūdrāṇāṃ kathaṃ vāpi kuṇḍagolādināṃ tu vā / hitāya jagatāṃ sarvamasmākaṃ vaktumarhasi // ### [2.19.5](https://indike.org/pramana/in.purana.linga.2.19.5) sūta uvāca teṣāṃ bhāvaṃ samālokya munīnāṃ nīlalohitaḥ / prāha gaṃbhīrayā vācā maṇḍalasthaḥ sadāśivaḥ // ### [2.19.6](https://indike.org/pramana/in.purana.linga.2.19.6) maṇḍale cāgrato paśyandevadevaṃ sahomayā / devāśca munayaḥ sarve vidyutkoṭisamaprabham // ### [2.19.7](https://indike.org/pramana/in.purana.linga.2.19.7) aṣṭabāhuṃ caturvaktraṃ dvādaśākṣaṃ mahābhujam / ardhanārīśvaraṃ devaṃ jaṭāmukuṭadhāriṇam // ### [2.19.8](https://indike.org/pramana/in.purana.linga.2.19.8) sarvābharaṇasaṃyuktaṃ raktamālyānulepanam / raktāṃbaradharaṃ sṛṣṭisthitisaṃhārakārakam // ### [2.19.9](https://indike.org/pramana/in.purana.linga.2.19.9) tasya pūrvamukhaṃ pītaṃ prasannaṃ puruṣātmakam / aghoraṃ dakṣiṇaṃ vaktraṃ nīlāñjanacayopamam // ### [2.19.10](https://indike.org/pramana/in.purana.linga.2.19.10) daṃṣṭrākarālamatyugraṃ jvālāmālāsamāvātam / raktaśmaśruñjaṭāyuktaṃ cottare vidrumaprabham // ### [2.19.11](https://indike.org/pramana/in.purana.linga.2.19.11) prasannaṃ vāmadevākhyaṃ varadaṃ viśvarūpiṇam / paścimaṃ vadanaṃ tasya gokṣīradhavalaṃ śubham // ### [2.19.12](https://indike.org/pramana/in.purana.linga.2.19.12) muktāphalamayairhārairbhūṣitaṃ tilakojjvalam / sadyojātamukhaṃ divyaṃ bhāskarasya smarāriṇaḥ // ### [2.19.13](https://indike.org/pramana/in.purana.linga.2.19.13) ādityamagrato paśyanpūrvavaccaturānanam / bhāskaraṃ purato devaṃ caturvakraṃ ca pūrvavat // ### [2.19.14](https://indike.org/pramana/in.purana.linga.2.19.14) bhānuṃ dakṣiṇato devaṃ caturvaktraṃ ca pūrvavat / ravimuttarato 'paśyanpūrvavaccaturānanam // ### [2.19.15](https://indike.org/pramana/in.purana.linga.2.19.15) vistārāṃ maṇḍale pūrve uttarāṃ dakṣiṇe sthitām / bodhanīṃ paścime bhāge maṇḍalasya prajāpateḥ // ### [2.19.16](https://indike.org/pramana/in.purana.linga.2.19.16) adhyāyanīṃ ca kauberyāmekavaktrāṃ caturbhujām / sarvābharaṇasaṃpannāḥ śaktayaḥ sarvasaṃmatāḥ // ### [2.19.17](https://indike.org/pramana/in.purana.linga.2.19.17) brahmāṇaṃ dakṣiṇe bhāge viṣṇuṃ vāme janārdanam / ṛgyajuḥ sāmamārgeṇa mūrtitrayamayaṃśivam // ### [2.19.18](https://indike.org/pramana/in.purana.linga.2.19.18) īśānaṃ varadaṃ devamīśānaṃ parameśvaram / brahmāsanasthaṃ vadaraṃ dharmajñānāsanopari // ### [2.19.19](https://indike.org/pramana/in.purana.linga.2.19.19) vairāgyaiśvaryasaṃyukte prabhūte vimale tathā / sāraṃ sarveśvaraṃ devamārādhyaṃ paramaṃ sukham // ### [2.19.20](https://indike.org/pramana/in.purana.linga.2.19.20) sitapaṅkajamadhyasthaṃ dīptādyairabhisaṃvṛtam / dīptāṃ dīpaśikhākārāṃ sūkṣmāṃ vidyutprabhāṃ śubhām // ### [2.19.21](https://indike.org/pramana/in.purana.linga.2.19.21) jayāmagniśīkhākārāṃ prabhāṃ kanakasaprabhām / vibhūtiṃ vidrumaprakhyāṃ vimalāṃ padmasannibhām // ### [2.19.22](https://indike.org/pramana/in.purana.linga.2.19.22) amoghāṃ karṇikākārāṃ vidyutaṃ viśvavarṇinīm / caturvaktrāṃ caturvarṇāṃ devīṃ vai sarvatomukhīm // ### [2.19.23](https://indike.org/pramana/in.purana.linga.2.19.23) somamaṅgārakaṃ devaṃ budhaṃ buddhimatāṃ varam / bṛhaspatiṃ bṛhadvuddhiṃ bhārgavaṃ tejasāṃ nidhim // ### [2.19.24](https://indike.org/pramana/in.purana.linga.2.19.24) mandaṃ mandagatiṃ caiva samantāttasya te sadā / sūryaṃ śivo jagannāthaḥ somaḥ sākṣādumā svayam // ### [2.19.25](https://indike.org/pramana/in.purana.linga.2.19.25) pañcabhūtāni śeṣāṇi tanmayaṃ ca carācaram / dṛṣṭaiva munayaḥ sarve devadevamumāpatim // ### [2.19.26](https://indike.org/pramana/in.purana.linga.2.19.26) kṛtāñjalipuṭāḥ sarve munayo devatāstathā / astu vanvāgbhiriṣṭabhirvaradaṃ nīlalohitam // ### [2.19.27](https://indike.org/pramana/in.purana.linga.2.19.27) ṛṣaya ūcuḥ namaḥ śivāya rudrāya kadrudrāya pracetase / mīḍhuṣṭamāya sarvāya śipiviṣṭāyaraṃhase // ### [2.19.28](https://indike.org/pramana/in.purana.linga.2.19.28) prabhūte vimale sāre hyādhāre parame sukhe / navaśaktyāvṛtaṃ devaṃ padmasthaṃ bhāskaraṃ prabhum // ### [2.19.29](https://indike.org/pramana/in.purana.linga.2.19.29) ādityaṃ bhāskaraṃ bhānuṃ raviṃ devaṃ divākaram / umāṃ prabhāṃ tathā prajñāṃ saṃdhyāṃ sāvitrikāmapi // ### [2.19.30](https://indike.org/pramana/in.purana.linga.2.19.30) vistārāmuttarāṃ devīṃ bodanīṃ praṇamāmyaham / āpyāyanīṃ ca varadāṃ brahmāṇaṃ keśavaṃ haram // ### [2.19.31](https://indike.org/pramana/in.purana.linga.2.19.31) somādivṛndaṃ ca yathākramema saṃpūjya mantrairvihitakrameṇa / smarāmi devaṃ ravimaṇḍalasthaṃ sadāśivaṃ śaṅkaramādidevam // ### [2.19.32](https://indike.org/pramana/in.purana.linga.2.19.32) indrādidevāṃśca tatheśvarāṃśca nārāyaṇaṃ padmajamādidevam / prāgādyadhordhvaṃ ca yathākrameṇa vajrādipadmaṃ ca tathā smarāmi // ### [2.19.33](https://indike.org/pramana/in.purana.linga.2.19.33) siṃdūravarṇāya samaṇḍalāya suvarṇavajrābharaṇāya tubhyam / padmābhanetrāya sapaṅkajāya brahmendranārāyaṇakāraṇāya // ### [2.19.34](https://indike.org/pramana/in.purana.linga.2.19.34) rathaṃ ca saptāśvamanūruvīraṃ gaṇaṃ tathā saptavidhaṃ krameṇa / ṛtupravāheṇa ca vālīkhilyānsmarāmi mandehagaṇakṣayaṃ ca // ### [2.19.35](https://indike.org/pramana/in.purana.linga.2.19.35) hutvā tilādyairvividhaistathāgnau punaḥ samāpyaiva tathaiva sarvam / udvāsya hṛtpaṅkajamadhyasaṃsthaṃ smarāmi biṃbaṃ tava devadeva // ### [2.19.36](https://indike.org/pramana/in.purana.linga.2.19.36) smarāmi biṃbāni yathākrameṇa raktāni padmāmalalocanāni / padmaṃ ca savye varadaṃ ca vāme kare tathā bhūṣitabhūṣaṇāni // ### [2.19.37](https://indike.org/pramana/in.purana.linga.2.19.37) daṃṣṭrākarālaṃ tava divyavaktraṃ vidyutprabhaṃ daityayaṅkaraṃ ca / smarāmi rakṣābhirataṃ dvijānāṃ mandeharakṣogaṇabhartsanaṃ ca // ### [2.19.38](https://indike.org/pramana/in.purana.linga.2.19.38) somaṃ sitaṃ bhūmijamagnirṇaṃ cāmīkarābhaṃ budhamindusūnum / bṛhaspatiṃ kāñcanasannikāśaṃ śukraṃ sitaṃ kṛṣṇataraṃ ca mandam // ### [2.19.39](https://indike.org/pramana/in.purana.linga.2.19.39) smarāmi savyamabhayaṃ vāmamūrugataṃ varam / sarveṣāṃ mandaparyantaṃ mahādevaṃ ca bhāskaram // ### [2.19.40](https://indike.org/pramana/in.purana.linga.2.19.40) pūrṇenduvarṇena ca puṣpadhaprasthena toyane śubhena pūrṇam / pātraṃ dṛḍhaṃ tāmramayaṃ prakalpya dāsye tavārdhyaṃ bhagavanprasīda // ### [2.19.41](https://indike.org/pramana/in.purana.linga.2.19.41) namaḥ śivāya devāya īśvarāya kapardine / rudrāya viṣṇave tubhyaṃ brahmaṇe sūryamūrtaye // ### [2.19.42](https://indike.org/pramana/in.purana.linga.2.19.42) sūta uvāca yaḥ śivaṃ maṇḍalaṃ devaṃ saṃpūjyaivaṃ samāhitaḥ / prātarmadhyāhnasāyāhne paṭhetstavamanuttamam // ### [2.19.43](https://indike.org/pramana/in.purana.linga.2.19.43) itthaṃ śivena sāyujyaṃ labhate nātra saṃśayaḥ // ### [2.19.43.p1](https://indike.org/pramana/in.purana.linga.2.19.43.p1) iti śrīliṅgamahāpurāṇe uttarabhāge ekonaviṃśodhyāyaḥ ## Linked texts (1) - [Śivapurāṇa (complete text)](https://indike.org/pramana/in.purana.siva*complete-2.7.2.8.32) — Sanskrit --- Source: [https://indike.org/pramana/in.purana.linga.2.19](https://indike.org/pramana/in.purana.linga.2.19) · Pramāṇa