[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Lingapurana](https://indike.org/pramana/in.purana.linga) › 2.1 # Lingapurana 2.1 Liṅgapurāṇa 2.1 - **Language:** Sanskrit ## Contents - [2.1.82](https://indike.org/pramana/in.purana.linga.2.1.82) — 1 part ### [2.1.1](https://indike.org/pramana/in.purana.linga.2.1.1) ṛṣaya ūcuḥ kṛṣṇas tuṣyati keneha sarvadeveśvareśvaraḥ / vaktumarhāsi cāsmākaṃ sūta sarvārthavidbhavān // ### [2.1.2](https://indike.org/pramana/in.purana.linga.2.1.2) sūta uvāca purā pṛṣṭo mahātejā mārkaṇḍeyo mahāmuniḥ / aṃbarīṣeṇa viprendrās tad vadāmi yathātatham // ### [2.1.3](https://indike.org/pramana/in.purana.linga.2.1.3) aṃbarīṣa uvāca mune samastadharmāṇāṃ pāragas tvaṃ mahāmate / mārkaṇḍeya purāṇo 'si purāṇārthaviśāradaḥ // ### [2.1.4](https://indike.org/pramana/in.purana.linga.2.1.4) nārāyaṇānāṃ divyānāṃ dharmāṇāṃ śreṣṭhamuttamam / tatkiṃ brūhi mahāprājña bhaktānāmiha suvrata // ### [2.1.5](https://indike.org/pramana/in.purana.linga.2.1.5) sūta uvāca tasya tadvacanaṃ śrutvā samutthāya kṛtāñjaliḥ / smaran nārāyaṇaṃ devaṃ kṛṣṇam acyutam avyayam // ### [2.1.6](https://indike.org/pramana/in.purana.linga.2.1.6) mārkaṇḍeya uvāca śṛṇu bhūpa yathānyāyaṃ puṇyaṃ nārāyaṇātmakam / smaraṇaṃ pūjanaṃ caiva praṇāmo bhaktipūrvakam // ### [2.1.7](https://indike.org/pramana/in.purana.linga.2.1.7) pratyekam aśvamedhasya yajñasya samam ucyate / ya ekaḥ puruṣaḥ śreṣṭhaḥ paramātmā janārdanaḥ // ### [2.1.8](https://indike.org/pramana/in.purana.linga.2.1.8) yasmādbrahmā tataḥ sarvaṃ samāśrityaiva mucyate / dharmamekaṃ pravakṣyāmi yaddṛṣṭaṃ viditaṃ mayā // ### [2.1.9](https://indike.org/pramana/in.purana.linga.2.1.9) purā tretāyuge kaścit kauśiko nāma vai dvijaḥ / vāsudevaparo nityaṃ sāmagānarataḥ sadā // ### [2.1.10](https://indike.org/pramana/in.purana.linga.2.1.10) bhojanāsana śayyāsu sadā tadgatamānasaḥ / udāracaritaṃ viṣṇor gāyamānaḥ punaḥ punaḥ // ### [2.1.11](https://indike.org/pramana/in.purana.linga.2.1.11) viṣṇoḥ sthalaṃ samāsādya hareḥ kṣetramanuttamam / agāyata hariṃ tatra tālavarṇalayānvitam // ### [2.1.12](https://indike.org/pramana/in.purana.linga.2.1.12) mūrcchanāsvarayogena śrutibhedena bheditam / bhaktiyogaṃ samāpanno bhikṣāmātraṃ hi tatra vai // ### [2.1.13](https://indike.org/pramana/in.purana.linga.2.1.13) tatraivaṃ gāyamānaṃ ca dṛṣṭvā kaściddvijastadā / padmākhya iti vikhyātastasmai cānnaṃ dadau tadā // ### [2.1.14](https://indike.org/pramana/in.purana.linga.2.1.14) sakuṭuṃbo mahātejā hyuṣṇamannaṃ hi tatra vai / kauśiko hi tāda hṛṣṭo gāyannāste hariṃ prabhum // ### [2.1.15](https://indike.org/pramana/in.purana.linga.2.1.15) śṛṇvannāste sa padmākhyaḥ kāle kāle vinirgataḥ / kālayogena saṃprāptāḥ śiṣyā vai kauśikasya ca // ### [2.1.16](https://indike.org/pramana/in.purana.linga.2.1.16) sapta rājanyavaiśyānāṃ viprāṇāṃ kulasaṃbhavāḥ / jñānavidyādhikāḥ śuddhā vāsudevaparāyaṇāḥ // ### [2.1.17](https://indike.org/pramana/in.purana.linga.2.1.17) teṣām api tathānnādyaṃ padmākṣaḥ pradadau svayam / śiṣyaiśca sahito nityaṃ kauśiko hṛṣṭamānasaḥ // ### [2.1.18](https://indike.org/pramana/in.purana.linga.2.1.18) viṣṇusthale hariṃ tatra āste gāyanyathāvidhi / tatraiva mālavo nāma vaiśyo viṣṇuparāyaṇaḥ // ### [2.1.19](https://indike.org/pramana/in.purana.linga.2.1.19) dīpamālāṃ harernityaṃ karoti prītimānasaḥ / mālavī nāma bhāryā ca tasya nityaṃ pativratā // ### [2.1.20](https://indike.org/pramana/in.purana.linga.2.1.20) gomayena samālipya hareḥ kṣetraṃ samantataḥ / bhartrā sahāste suprītā śṛṇvatī gānamuttamam // ### [2.1.21](https://indike.org/pramana/in.purana.linga.2.1.21) kuśasthalātsamāpannā brāhmaṇāḥ śaṃsitavratāḥ / pañcāśadvai samāpannā harergānārthamuttamāḥ // ### [2.1.22](https://indike.org/pramana/in.purana.linga.2.1.22) sādhayanto hi kāryāṇi kauśikasya mahātmanaḥ / jñānavidyārthatattvajñāḥ śṛṇvanto hyavasaṃstu te // ### [2.1.23](https://indike.org/pramana/in.purana.linga.2.1.23) khyātamāsīttadā tasya gānaṃ vai kauśikasya tat / śrutvā rājā samabhyetya kaliṅgo vākyamabravīt // ### [2.1.24](https://indike.org/pramana/in.purana.linga.2.1.24) kauśikādya gaṇaiḥ sārdhaṃ gāyasveha ca māṃ punaḥ / śṛṇudhvaṃ ca tathā yūyaṃ kuśasthalajanā api // ### [2.1.25](https://indike.org/pramana/in.purana.linga.2.1.25) tacchrutvā kauśikaḥ prāha rājānaṃ sāṃtvayā girā / na jihvā me mahārājan vāṇī ca mama sarvadā // ### [2.1.26](https://indike.org/pramana/in.purana.linga.2.1.26) hareranyamapindraṃ vā stauti naiva ca vakṣyati / evamukte tu tacchiṣyo vāsiṣṭho gautamo hariḥ // ### [2.1.27](https://indike.org/pramana/in.purana.linga.2.1.27) sārasvatastathā citraścitramālyastathā śiśuḥ / ūcuste pārthivaṃ tadvadyathā prāha ca kauśikaḥ // ### [2.1.28](https://indike.org/pramana/in.purana.linga.2.1.28) śravakāste tathā procuḥ pārthivaṃ viṣṇutatparāḥ / śrotrāṇīmāni śṛṇvanti hareranyaṃ na pārthiva // ### [2.1.29](https://indike.org/pramana/in.purana.linga.2.1.29) gānakīrtiṃ vayaṃ tasya śṛṇumonyāṃ na ca stutim / tacchrutvā pārthivo ruṣṭo gāyatāmiti cābravīt // ### [2.1.30](https://indike.org/pramana/in.purana.linga.2.1.30) svabhṛtyānbrāhmaṇā hyete kīrtiṃ śṛṇvanti me yathā / na śṛṇvanti kathaṃ tasmāt gāyamāne samantataḥ // ### [2.1.31](https://indike.org/pramana/in.purana.linga.2.1.31) eva muktāstadā bhṛtyā jaguḥ pārthivamuttamam / niruddhamārgā viprāste gāne vṛtte tu duḥkhitāḥ // ### [2.1.32](https://indike.org/pramana/in.purana.linga.2.1.32) kāṣṭhasaṃkubhiranyonyaṃ śrotrāṇi vidadhurdvijāḥ / kauśikādyāśca tāṃ jñātvā manovṛttiṃ nṛpasya vai // ### [2.1.33](https://indike.org/pramana/in.purana.linga.2.1.33) prasahyāsmāṃstu gāyeta svagānesau nṛpaḥ sthitaḥ / iti viprāḥ suniyatā jihvāgraṃ cicchiduḥ karaiḥ // ### [2.1.34](https://indike.org/pramana/in.purana.linga.2.1.34) tato rājā susaṃkruddhaḥ svadeśāttānnyavāsayat / ādāya sarvaṃ vittaṃ ca tataste jagmuruttarām // ### [2.1.35](https://indike.org/pramana/in.purana.linga.2.1.35) diśamāsādya kālena kāladharmeṇayojitāḥ / tānāgatānyamo dṛṣṭvā kiṃ kartavyamiti sma ha // ### [2.1.36](https://indike.org/pramana/in.purana.linga.2.1.36) / coṣṭitaṃ tatkṣaṇe rājan brahmā prāha surādhipān / kauśikādīn dvijānadya vāsayadhvaṃ yathāsukham // ### [2.1.37](https://indike.org/pramana/in.purana.linga.2.1.37) / gānayogena ye nityaṃ pūjayanti janārdanam / tānānayata bhadraṃ vo yadi devatvamicchatha // ### [2.1.38](https://indike.org/pramana/in.purana.linga.2.1.38) ityuktā lokapālaste kauśiketi punaḥ punaḥ / mālaveti tathā kecit padmākṣeti tathā pare // ### [2.1.39](https://indike.org/pramana/in.purana.linga.2.1.39) krośamānāḥ samabhyetya tānādāya vihāyasā / brahmalokaṃ gatāḥ śīghraṃ muhūrtenaiva te surāḥ // ### [2.1.40](https://indike.org/pramana/in.purana.linga.2.1.40) kauśikādīṃstato dṛṣṭvā brahmā lokapitāmahaḥ / pratyudgamya yathānyāyaṃ svāgatenābhyapūjayat // ### [2.1.41](https://indike.org/pramana/in.purana.linga.2.1.41) tataḥ kolāhalamabhūdatigauravamulbaṇam / brahmaṇā caritaṃ dṛṣṭvā devānāṃ nṛpasattama // ### [2.1.42](https://indike.org/pramana/in.purana.linga.2.1.42) hiraṇyagarbho bhagavāṃstānnivārya surottamān / kauśikādīnsamādāya munīn devaiḥ samāvṛtaḥ // ### [2.1.43](https://indike.org/pramana/in.purana.linga.2.1.43) viṣṇulokaṃ yayau śīghraṃ vāsudevaparāyaṇaḥ / tatra nārāyaṇodevaḥ śvetadvīpanivāsibhiḥ // ### [2.1.44](https://indike.org/pramana/in.purana.linga.2.1.44) jñānayogeśvaraiḥ siddhairviṣṇubhaktaiḥ samāhitaiḥ / nārāyaṇasamairdivyaiścaturbāhudharaiḥ śubhaiḥ // ### [2.1.45](https://indike.org/pramana/in.purana.linga.2.1.45) viṣṇucihnasamāpannairdīpyamānairakalmaṣaiḥ / aṣṭāśītisahasraiśca sevyamāno mahājanaiḥ // ### [2.1.46](https://indike.org/pramana/in.purana.linga.2.1.46) asmābhirnāradādyaiśca sanakādyairakalmaṣaiḥ / bhūtairnānāvidhaiścaiva divyastrībhiḥ samantataḥ // ### [2.1.47](https://indike.org/pramana/in.purana.linga.2.1.47) sevyamānotha madhye vai sahasradvārasaṃvṛte / sahasrayojanāyāme divye maṇimaye śubhe // ### [2.1.48](https://indike.org/pramana/in.purana.linga.2.1.48) vimāne vimale citre bhadrapīṭhāsane hariḥ / lokakārye prasaktānāṃ dattadṛṣṭiśca mādhavaḥ // ### [2.1.49](https://indike.org/pramana/in.purana.linga.2.1.49) tasminkāle 'tha bhagavān kauśikādyaiśca saṃvṛtaḥ / āgamya praṇipatyāgre tuṣṭāva garuḍadhvajam // ### [2.1.50](https://indike.org/pramana/in.purana.linga.2.1.50) tato kilokya bhagavān harirnārāyaṇaḥ prabhuḥ / kauśiketyāha saṃprītyā tānsarvāṃśca yathākramam // ### [2.1.51](https://indike.org/pramana/in.purana.linga.2.1.51) jayaghoṣo mahānasīnmahāścarye samāgate / brahmāṇamāha viśvātmā śṛṇu brahman mayoditam // ### [2.1.52](https://indike.org/pramana/in.purana.linga.2.1.52) kauśikasya ime viprāḥ sādhyasādhanatatparāḥ / hitāya saṃpravṛttā vai kuśasthalanivāsinaḥ // ### [2.1.53](https://indike.org/pramana/in.purana.linga.2.1.53) matkīrtiśravaṇe yuktā jñānatattvārthakovidāḥ / ananyadevatābhaktāḥ sādhyā devā bhavantvime // ### [2.1.54](https://indike.org/pramana/in.purana.linga.2.1.54) divyarūpadharaḥ śrīmān śṛṇvangānamihādhipaḥ / āsva nityaṃ yathākāmaṃ yāvallokā bhavanti vai // ### [2.1.55](https://indike.org/pramana/in.purana.linga.2.1.55) padmākṣamāha bhagavān dhanado bhavamādhavaḥ / dhanānāmīśvaro bhūtvā yathākālaṃ hi māṃ punaḥ // ### [2.1.56](https://indike.org/pramana/in.purana.linga.2.1.56) mālabaṃ mālavīṃ caivaṃ prāha dāmodaro hariḥ / mama loke yathākālaṃ bhāryayā saha mālava // ### [2.1.57](https://indike.org/pramana/in.purana.linga.2.1.57) divyarūpadharaḥ śrīmān śṛṇvangānamihādhipaḥ / āsva nityaṃ yathākāmaṃ yāvallokā bhavanti vai // ### [2.1.58](https://indike.org/pramana/in.purana.linga.2.1.58) padmākṣamāha bhagavān dhanado bhavamādhavaḥ / dhanānāmīśvaro bhūtvā yathākālaṃ hi māṃ punaḥ // ### [2.1.59](https://indike.org/pramana/in.purana.linga.2.1.59) āgamya dṛṣṭvā māṃ nityaṃ kuru rājyaṃ yathāsukham / evamuktvā harirviṣṇurbrahmāṇamidamabravīt // ### [2.1.60](https://indike.org/pramana/in.purana.linga.2.1.60) kauśikasyāsya gānena yoganidrā ca me gatā / viṣṇusthale ca māṃ stauti śiṣyaireṣa samantataḥ // ### [2.1.61](https://indike.org/pramana/in.purana.linga.2.1.61) rājñā nirastaḥ krūreṇa kaliṅgena mahīyasā / sa jihvācchedanaṃ kṛtvā hareranyaṃ kathañcana // ### [2.1.62](https://indike.org/pramana/in.purana.linga.2.1.62) na stoṣyāmīti niyataḥ prāptosau mama lokatām / ete ca viprā niyatā mama bhaktā yaśasvinaḥ // ### [2.1.63](https://indike.org/pramana/in.purana.linga.2.1.63) śrotracchidramathāhatya śaṅkubhirvai parasparam / śroṣyāmo naiva cānyadvai hareḥ kīrtimitisma ha // ### [2.1.64](https://indike.org/pramana/in.purana.linga.2.1.64) ete viprāsca devatvaṃ mama sānnidhyameva ca / mālavo bhāryayā sārdhaṃ matkṣetraṃ parimṛjya vai // ### [2.1.65](https://indike.org/pramana/in.purana.linga.2.1.65) dīpamālādibhirnityamabhyarcya satataṃ hi mām / gānaṃ śṛṇoti niyato matkīrticaritānvitam // ### [2.1.66](https://indike.org/pramana/in.purana.linga.2.1.66) tenāsau prāptavāṃllokaṃ mama brahmā sanātanam / padmākṣosau dadau bhojyaṃ kauśikasya mahātmanaḥ // ### [2.1.67](https://indike.org/pramana/in.purana.linga.2.1.67) dhaneśatvamavāptosau mama sānnidhyameva ca / evamuktvā haristatra samāje lokapūjitaḥ // ### [2.1.68](https://indike.org/pramana/in.purana.linga.2.1.68) tasmin kṣaṇe samāpannā madhurākṣarapeśalaiḥ / vipañcīguṇatattvajñairvādyavidyāviśāradaiḥ // ### [2.1.69](https://indike.org/pramana/in.purana.linga.2.1.69) mandaṃ mandasmitā devī vicitrābharaṇānvitā / gāyamānā samāyātā lakṣmīrviṣṇuparigrahā // ### [2.1.70](https://indike.org/pramana/in.purana.linga.2.1.70) vṛtā sahasrakoṭībhiraṅganābhiḥ samantataḥ / tato gaṇādhipā dṛṣṭvā bhuśuṇḍīparighāyudhāḥ // ### [2.1.71](https://indike.org/pramana/in.purana.linga.2.1.71) brahmādīṃstarjayantaste munīndevānsamantataḥ / utsārayantaḥ saṃhṛṣṭā dhiṣṭhitāḥ parvatopamāḥ // ### [2.1.72](https://indike.org/pramana/in.purana.linga.2.1.72) sarve vayaṃ hi niryātāḥ sārdhaṃ vai brahmaṇā suraiḥ / tasmin kṣaṇe samāhūtastuṃbarurmunisattamaḥ // ### [2.1.73](https://indike.org/pramana/in.purana.linga.2.1.73) praviveśa samīpaṃ vai devyā devasya caiva hi / tatrāsīno yathāyogaṃ nānāmūrcchāsamanvitam // ### [2.1.74](https://indike.org/pramana/in.purana.linga.2.1.74) jagau kalapadaṃ hṛṣṭo vipañcīṃ cābhyavādayat / nānāratnasamāyuktairdivyairābharaṇottamaiḥ // ### [2.1.75](https://indike.org/pramana/in.purana.linga.2.1.75) divyamālyaistathā śubhraiḥ pūjito munisattamaḥ / nirgatastuṃbarurhṛṣṭo anye ca ṛṣayaḥ surāḥ // ### [2.1.76](https://indike.org/pramana/in.purana.linga.2.1.76) dṛṣṭvā saṃpūjitaṃ yāntaṃ yathāyogamarindama / nāradotha munirdṛṣṭvā tuṃbaroḥ satkriyāṃ hareḥ // ### [2.1.77](https://indike.org/pramana/in.purana.linga.2.1.77) śokāviṣṭena manasā saṃtaptahṛdayekṣaṇaḥ / cintāmāpedivāṃstatra śokamūrcchākulātmakaḥ // ### [2.1.78](https://indike.org/pramana/in.purana.linga.2.1.78) kenāhaṃ hi haretyāsye yogaṃ devīsamīpataḥ / aho tuṃbaruṇā prāptaṃ dhiṅmāṃ mūḍhaṃ vicetasam // ### [2.1.79](https://indike.org/pramana/in.purana.linga.2.1.79) yohaṃ hareḥ sannikāśaṃ bhūtairniryātitaḥ katham / jīvanyāsyāmi kutrāhamaho tuṃbaruṇā kṛtam // ### [2.1.80](https://indike.org/pramana/in.purana.linga.2.1.80) iti saṃcintayan viprastapa āsthitavānmuniḥ / divyaṃ varṣasahasraṃ tu nirucchvāsasamanvitaḥ // ### [2.1.81](https://indike.org/pramana/in.purana.linga.2.1.81) dhyāyanviṣṇumathādhyāste tuṃbaroḥ satkriyāṃ smaran / rodamāno muhurvidvān dhiṅmāmiti ca cintayan // ### [2.1.82](https://indike.org/pramana/in.purana.linga.2.1.82) tatra yatkṛtavānviṣṇustacchṛṇuṣva narādhipa // ### [2.1.82.p1](https://indike.org/pramana/in.purana.linga.2.1.82.p1) iti śrīliṅgamahāpurāṇe uttarabhāge kauśikavṛttakathanaṃ nāma prathamodhyāyaḥ ## Commentaries (1) - [Śivatosaṇī Liṅgapurāṇaṭīkā](https://indike.org/pramana/in.purana.linga!ganesa.133.35) — Gaṇeśa Bhaṭṭa, Sanskrit --- Source: [https://indike.org/pramana/in.purana.linga.2.1](https://indike.org/pramana/in.purana.linga.2.1) · Pramāṇa