Pramāṇa · Search · About · API

Lingapurana 2.20

Liṅgapurāṇa 2.20

Language
Sanskrit

Contents

2.20.1

sūta uvacā
ata rudro mahādevo maṇḍalasthaḥ pitāmahaḥ /
pūjyo vai brāhmaṇānāṃ ca kṣatriyāṇāṃ viśeṣataḥ //

2.20.2

vaiśyānāṃ naiva śūdrāṇāṃ śuśruṣāṃ pūjakasya ca /
strīṇāṃ naivādikāro 'sti pūjādiṣu na saṃśayaḥ //

2.20.3

strīśūdrāṇāṃ dvajendraiśca pūjayā tatphalaṃ bhavet /
nṛpāṇāmupakārārthaṃ brāhmaṇādyairviśeṣataḥ //

2.20.4

evaṃ saṃpūjayeyurvai brāhmaṇādyāḥ sadāśivam /
ityuktvā bhagavān rudrastatraivāntaradhātsvayam //

2.20.5

te devā munayaḥ sarve śivamuddiśya śaṅkaram /
praṇemuśca mahātmāno rudradhyānena vihvalāḥ //

2.20.6

jagmuryathāgataṃ devā munayaśca tapodhanāḥ /
tasmādabyarcayennityamādityaṃ śivarūpiṇam //

2.20.7

dharmakāmārthamuktyarthaṃ manasā karmaṇā girā /
ṛṣaya ūcuḥ
romaharṣaṇa sarvajña sarvasāstrabhṛtāṃ vara //

2.20.8

vyāsaśiṣya mahābhāga vāhneyaṃ vada sāṃpratam /
śivena devadevena bhaktānāṃ hitakāmyayā //

2.20.9

vedāt ṣaḍaṅgāduddhṛtya sāṃkhyayogācca sarvataḥ /
tapaśca vipulaṃ taptvā devadānavaduścaram //

2.20.10

arthadeśādisaṃyuktaṃ gūḍhamajñānaninditam /
varṇāśramakṛtairdharmairviparītaṃ kvacitsamam //

2.20.11

śivena kathitaṃ sāstraṃ dharmakāmārthamuktaye /
śatakoṭipramāṇena tatra pūjā kathaṃ vibhoḥ //

2.20.12

snānayogādayo vāpi śrotuṃ kautuhalaṃ hi naḥ /
sūta uvāca
purā sanatkumāreṇa merupṛṣṭhe suśobhane //

2.20.13

pṛṣṭo nandīśvaro devaḥ śailādiḥ śivasaṃmataḥ /
pṛṣṭoyaṃ praṇipatyaivaṃ munimukhyaiśca sarvataḥ //

2.20.14

tasmai sanatkumārāya nandinā kulanandinā /
kathitaṃ yacchivajñānaṃ śṛṇvantu munipuṅgavāḥ //

2.20.15

śaivaṃ saṃkṣipya vedoktaṃ śivena paribhāṣitam /
stutinindādirahitaṃ sadyaḥ pratyayakārakam //

2.20.16

guruprasādajaṃ divyamanāyāsena muktidam /
sanatkumāra uvāca
bhagavansarva bhūteśa nandīśvara maheśvara //

2.20.17

kathaṃ pūjādayaḥ śaṃbhordharmakāmārthamuktaye /
vaktumarhasi śailāde vinayenāgatāya me //

2.20.18

sūta uvāca
saṃprekṣya bhagavānnandī niśamya vacanaṃ punaḥ /
kālavelādhikārādyamavadadvadatāṃ varaḥ //

2.20.19

śailāderuvāca
gurutaḥ śāstrataścaivamadhikāraṃ vravīmyaham /
gauravādeva saṃjñaiṣā śivācāryasya nānyathā //

2.20.20

svayamācarate yastu ācāre sthāpayatyapi /
ācinoti ca śāstrārthānācāryastena cocyate //

2.20.21

tasmādvedārthatattvajñamācāryaṃ bhasmaśāyinam /
gurumanveṣayedbhaktaḥ subhagaṃ priyadarśanam //

2.20.22

pratipannaṃ janānandaṃ śrutismṛtipathānugam /
vidyayābhayadātāraṃ laulyacāplayavarjitam //

2.20.23

ācārapālakaṃ dhīraṃ samayeṣu kṛtāspadam /
taṃ dṛṣṭvā sarvabhāvena pūjayecchivavadgurum //

2.20.24

ātmanā ca dhanenaiva śraddhāvittānusārataḥ /
tāvadārādhayecchiṣyaḥ prasanno 'sau yathā bhavet //

2.20.25

suprasanne mahābhāge sadyaḥ pāśakṣayo bhavet /
gururmānyo guruḥ pūjyo gurureva sadāśivaḥ //

2.20.26

saṃvatsaratrayaṃ vātha śiṣyānviprānparīkṣayet /
prāṇadravyapradānena ādeśaiśca itastataḥ //

2.20.27

uttamaścādhame yojyo nīca uttamavastuṣu /
ākṛṣṭāstāḍitā vāpi ye viṣādaṃ na yānti vai //

2.20.28

te yogyāḥ śivadharmiṣṭhāḥ śivadharmaparāyaṇāḥ /
saṃyatā dharmasaṃpannāḥ śrutismṛtipathānugāḥ //

2.20.29

sarvadvandvasahādhīrā nityamudyuktacetasaḥ /
paropakāraniratā guruśuśrūṣaṇe ratāḥ //

2.20.30

ārjavā mārdavāḥ svasthā anukūlāḥ priyaṃvadāḥ /
amānino buddhimantastyaktaspardhā gataspṛhāḥ //

2.20.31

śaucācāraguṇopetā dambhamātsaryavarjitāḥ /
yogyā evaṃ dvijāḥ sarve śivabhaktiparāyaṇāḥ //

2.20.32

evaṃvṛttasamopetā vāṅmanaḥkāyakarmabhiḥ /
śodhyā evaṃvidhāścaiva tattvānāṃ ca viśuddhaye //

2.20.33

śuddho vinayasaṃpanno mithyākaṭukavarjitaḥ /
gurvājñāpālakaścaiva śiṣyo 'nugrahamarhati //

2.20.34

guruśca śāstravit prājñas tapasvī janavatsalaḥ /
lokācārarato hyevaṃ tattvavinmokṣadaḥ smṛtaḥ //

2.20.35

sarvalakṣaṇasaṃpannaḥ sarvaśāstraviśāradaḥ /
sarvopāyavidhānajñastattvahīnasya niṣphalam //

2.20.36

svasaṃvedya pare tattve niścayo yasya nātmani /
ātmano 'nugraho nāsti parasyānugrahaḥ katham //

2.20.37

prabuddhastu dvijo yastu sa śuddhaḥ sādhayatyapi /
tattvahīne kuto bodhaḥ kuto hyātmaparigrahaḥ //

2.20.38

parigrahavinirmuktāste sarve paśavoditāḥ /
paśubhiḥ preritā ye tu sarve te paśavaḥ smṛtāḥ //

2.20.39

tasmāt tattvavido ye tu te muktā mocayanty api /
saṃvittijananaṃ tattvaṃ parānandasamudbhavam //

2.20.40

tattvaṃ tu viditaṃ yena sa evānandadarśakaḥ /
na punarnāmamātreṇa saṃvittirahitastu yaḥ //

2.20.41

anyo 'nyaṃ tārayennaiva kiṃ śilā tārayec chilām /
yeṣāṃ tannāmamātreṇa muktirvai nāmamātrikā //

2.20.42

yogināṃ darśanādvāpi sparśanādbhāṣaṇādapi /
sadyaḥ saṃjāyate cājñā pāśopakṣayakāriṇī //

2.20.43

athavā yogamārgeṇa śiṣyadehaṃ praviśya ca /
bodayedeva yogena sarvatattvāni śodhya ca //

2.20.44

ṣaāḍardhaśuddhirvihitā jñānayogena yoginām /
śiṣyaṃ parīkṣya dharmajñaṃ dhārmikaṃ vedapāragam //

2.20.45

brāhmaṇaṃ kṣatriyaṃ vaiśyaṃ bahudoṣavivarjitam /
jñānena jñeyamālokya karṇāt karṇāgatena tu //

2.20.46

dīpāddīpo yatā cānyaḥ saṃcaredvidhipadguruḥ /
bhauvanaṃ ca padaṃ caiva varṇākhyaṃ mātramuttamam //

2.20.47

/
kālādhvaraṃ mahā bhāga tattvākhyaṃ sarvasaṃmatam /
bhidyate yasya sāmārthyādājñāmātreṇa sarvataḥ //

2.20.48

tasya siddhiśca muktiśca gurukāruṇyasaṃbhavā /
pṛthivyādīni bhūtāni āviśanti ca bhauvane //

2.20.49

śabdaḥ sparśastathā rūpaṃ raso gandhaśca bhāvataḥ /
padaṃ varṇākhyakaṃ vipra buddhīndriyavikalpanam //

2.20.50

karmendriyāṇi mātraṃ hi mano buddhirataḥ param /
ahaṅkāramathāvyaktaṃ kālādhvaramiti smṛtam //

2.20.51

puruṣādiviriñcyantamunmanatvaṃ parātparam /
tatheśatvamiti proktaṃ sarvatattvārtha bodhakam //

2.20.52

ayogī naiva jānāti tattvaśuddhiṃ śivātmikām //

2.20.52.p1

iti śrīliṅgamahāpurāṇe uttarabhāge viṃśodhyāyaḥ

Commentaries (2)

Linked texts (9)