Lingapurana 2.21
Liṅgapurāṇa 2.21
- Language
- Sanskrit
Contents
- 2.21.83 — 1 part
2.21.1
sūta uvāca
parīkṣya bhūmiṃ vidhivadgandhavarṇarasādibhiḥ /
alaṅkṛtya vitānādyairīśvarāvāhanakṣamām //
2.21.2
ekahastapramāṇena maṇḍalaṃ parikalpayet /
ālikhetkamalaṃ madhye pañcaratnasamanvitam //
2.21.3
cūrṇairaṣṭadalaṃ vṛttaṃ sitaṃ vā raktameva ca /
parivāreṇa saṃyuktaṃ bahuśobhāsamanvitam //
2.21.4
āvāhya karṇikāyāṃ tu śivaṃ paramakāraṇam /
arcayetsarvayatnena yathāvibhavavistaram //
2.21.5
daleṣu siddhayaḥ proktāḥ karṇikāyāṃ mahāmune /
vairāgyajñānanālaṃ ca dharmakandaṃ manoramam //
2.21.6
vāmā jyeṣṭhā ca raudrī ca kālī vikaraṇī tathā /
balavikaraṇīcaiva balapramathinī kramāt //
2.21.7
sarvabhūtasya damanī kesareṣu ca śaktayaḥ /
manonmanī mahāmāya karṇikāyāṃ śivāsane //
2.21.8
vāmadevādibhiḥ sārdhaṃ dvandvanyāyena vinyaset /
manonmanaṃ mahādevaṃ manonmanyātha madhyataḥ //
2.21.9
sūryasomāgnisaṃbandhātpraṇavākhyaṃ śivātmakam /
puruṣaṃ vinyasedvaktraṃ pūrve patre raviprabham //
2.21.10
aghoraṃ dakṣiṇe pātre nīlāñjanacayopamam /
uttare vāmadevākhyaṃ japākusumasannibham //
2.21.11
sadyaṃ paścimapatre tu gokṣīradhavalaṃ nyasen /
īśānaṃ karṇikāyāṃ tu śuddhasphaṭikasannibham //
2.21.12
candramaṇḍalasaṃkāśaṃ hṛdayāyeti mantrataḥ /
vāhneye rudradigbhāge śirase dhūmravarcase //
2.21.13
śikhāyai ca namaścoti raktābhe nairṛte dale /
kavacāyāñjanābhāya iti vāyudalenyaset //
2.21.14
astrāyāgnisikhābhāya iti dikṣu pravinyaset /
netrebhyaśceti caiśānyāṃ piṅgalebhyaḥ pravinyesat //
2.21.15
śivaṃ sadā śivaṃ devaṃ maheśvaramataḥ param /
rudraṃ viṣṇuṃ viriñciṃ ca sṛṣṭinyāyena bhāvayet //
2.21.16
śivāya rudrarūpāya śāntyatītāya śaṃbhave /
śāntāya śāntadaityāya namaścandramase tathā //
2.21.17
vedyāya vidyādhārāya vahnaye vahnivarcase /
kālāyai ca pratiṣṭhāyai tārakāyāntakāya ca //
2.21.18
nivṛttyai dhanadevāya dhārāyai dhāraṇāya ca /
mantrairetairmahābhūtavigrahaṃ ca sadāśivam //
2.21.19
īśānamukuṭaṃ devaṃ puruṣāsyaṃ purātanam /
aghora hṛdayaṃ hṛṣṭaṃ vāmaguhyaṃ maheśvaram //
2.21.20
sadyamūrti smareddevaṃ sadasadvyaktikāraṇam /
pañcavaktraṃ daśabhujamaṣṭatriṃśatkalāmayam //
2.21.21
sadyamaṣṭaprakāreṇa prabhidya ca kalāmayam /
vāmaṃ trayodaśavidhaurvibhidya vitataṃ prabhum //
2.21.22
aghoramaṣṭadhā kṛtvā kalārūpeṇa saṃsthitam /
puruṣaṃ ca caturdhā vai vibhajya ca kalāmayam //
2.21.23
īśānaṃ pañcadhā kṛtvā pañcamūrtyā vyavasthitam /
haṃsahaṃseti mantreṇa śivabhaktyā samanvitam //
2.21.24
oṅkāramātramoṅkāramakāraṃ samarūpiṇam /
ā ī ū e tathā aṃbānukrameṇātmarūpiṇam //
2.21.25
pradhānasahitaṃ devaṃ pralayotpattivarjitam /
aṇoraṇīyāṃsamajaṃ mahato 'pi mahattamam //
2.21.26
urdhvaretasamīśānaṃ virūpākṣamumāpatim /
sahasraśirasaṃ devaṃ sahasrākṣaṃ sanātanam //
2.21.27
sahasrahastacaraṇaṃ nādāntaṃ nādavigraham /
khadyotasadṛśākāraṃ candrarekhākṛti prabhum //
2.21.28
dvādaśānte bhruvormadhye tālumadhye gale kramāt /
hṛddeśe 'vasthitaṃ devaṃ svānandamamṛtaṃ śivam //
2.21.29
vidyudvalayasaṃkāśaṃ vidyutkoṭisamaprabham /
śyāmaṃ raktaṃ kalākāraṃ śaktitrayakṛtāsanam //
2.21.30
sadāśivaṃ smareddevaṃ tattvatrayasamanvitam /
vidyāmūrtimayaṃ deva pūjayecca yathākramāt //
2.21.31
lokapālāṃstathāstreṇa pūrvādyānpūjayet pṛthak /
caruṃ ca vidhināsādya śivāya vinivedayet //
2.21.32
ardhaṃ śivāya dattvaiva śeṣardhena tu homayet /
aghoreṇātha śiṣyāya dāpayedbhoktumuttamam //
2.21.33
upaspṛśya śucirbhūtvā puruṣaṃ vidhinā yajet /
pañcagavyaṃ tataḥ prāśya īśānenābhimantritam //
2.21.34
vāmadevena bhasmāṅgī bhasmanoddhūlayetkramāt /
karṇayośca japeddevīṃ gāyatrīṃ rudradevatām //
2.21.35
sasūtraṃ sapidhānaṃ ca vastrayugmena veṣṭitam /
tatpūrvaṃ hemaratnaughairvāsitaṃ vai hiraṇmayam //
2.21.36
kalaśānvinyasetpañca pañcabhirbrāhmaṇaistataḥ /
homaṃ ca caruṇā kuryādyathāvibhavavistaram //
2.21.37
śiṣyaṃ ca vāsayedbhaktaṃ dakṣiṇe maṇḍalasya tu /
darbhaśayyāsamārūḍhaṃ śivadhyānaparāyaṇam //
2.21.38
aghoreṇa yathānyāyamaṣṭottaraśataṃ punaḥ /
ghṛtena hutvā duḥsvapnaṃ prabhāte śodhayenmalam //
2.21.39
evaṃ copoṣitaṃ śiṣyaṃ snātaṃ bhūṣitavigraham /
navavastrottarīyaṃ ca soṣṇīṣaṃ kṛtamaṅgalam //
2.21.40
dukūlādyena vastreṇa netraṃ baddhvā praveśayet /
suvarṇapuṣpasaṃmiśraṃ yatāvibhavavistaram //
2.21.41
īśānena ca mantreṇa kuryātpuṣpāñjaliṃ prabhoḥ /
pradakṣiṇātrayaṃ kṛtvā rudrādhyāyena vā punaḥ //
2.21.42
kevalaṃ praṇavenātha śivadhyānaparāyaṇaḥ /
dhyātvā tu devadeveśamīśāne saṃkṣipetsvayam //
2.21.43
yasminmantre patetpuṣpaṃ tanmantrastasya sidhyati /
śivāṃbhasā tu saṃspṛśya avoreṇa ca bhasmanā //
2.21.44
śiṣyamūrdhani vinyasya gandhādyaiḥ śiṣyamarcayet /
vāruṇaṃ paramaṃ śreṣṭhaṃ dvāraṃ vai sarvavarṇinām //
2.21.45
kṣattriyāṇāṃ viśeṣeṇa dvāraṃ vai paścimaṃ smṛtam /
netrāvaraṇamunmucya maṇḍalaṃ darśayettataḥ //
2.21.46
kuśāsena tu saṃsthāpya dakṣiṇāmūrtimāsthitaḥ /
tattvaśuddhiṃ tataḥ kuryātpañcatattvaprakārataḥ //
2.21.47
nivṛttyā rudraparyantamaṇḍamañjodbhavātmaja /
pratiṣṭhayā tadūrdhvaṃ ca yāvadavyaktagocaram //
2.21.48
viśveśvarāntaṃ vai vidyā kalāmātreṇa suvrata /
tadūrdhvamārgaṃ saṃśodhya śivabhaktyā śivaṃ nayet //
2.21.49
samarcanāya tattvasya tasya bhogeśvarasya vai /
tattvatrayaprabhedena caturbhiruta vā tathā //
2.21.50
homayed aṅgamantreṇa śāntyatītaṃ sadāśivam /
sadyādibhistu śāntyantaṃ caturbhiḥ kalayā pṛthak //
2.21.51
śāntyatītaṃ muniśreṣṭha īśānenāthavā punaḥ /
pratyekamaṣṭottaraśataṃ diśā homaṃ tu kārayet //
2.21.52
īśānyāṃ pañcamonātha pradhānaṃ parigīyate /
samidājyacarūṃl lājān sarṣapāṃś ca yavāṃs tilān //
2.21.53
dravyāṇi sapta hotavyaṃ svāhāntaṃ praṇavādikam /
teṣāṃ pūrṇāhutirvipra īśānena vidhīyate //
2.21.54
sahaṃsena yathānyāyaṃ praṇavādyena suvrata /
aghoreṇa ca mantreṇa prāyaścittaṃ vidhīyate //
2.21.55
jayādisviṣṭaparyantamagnikāryaṃ krameṇa tu /
guṇasaṃkhyāprakāreṇa pradhānena ca yojayet //
2.21.56
bhūtāni brahmabhirvāpi maunī bījādibhistathā /
atha pradhānamātreṇa prāṇāpānau niyamya ca //
2.21.57
ṣaṣṭhena bhedayedātmapraṇavāntaṃ kulākulam /
anyo 'nyamupasaṃhṛtya brahmāṇaṃ keśavaṃ haram //
2.21.58
rudre rudraṃ tamīśāne śive devaṃ maheśvaram /
tasmātsṛṣṭiprakārema bhāvayedbhavanāśanam //
2.21.59
sthāpyātmanamamuṃ jīvaṃ tāḍanaṃ dvāradarśanam /
dīpanaṃ grahaṇaṃ caiva bandhanaṃ pūjayā saha //
2.21.60
amṛtīkaraṇaṃ caiva kārayedvidhipūrvakam /
paṣṭhāntaṃ sadyasaṃyuktaṃ tṛtīyena samanvitam //
2.21.61
phaḍantaṃ saṃhṛtiḥ proktā pañcabhūtaprakārataḥ /
sadyādyaṣaṣṭhasahitaṃ śikhāntaṃ saphaḍantakam //
2.21.62
tāḍanaṃ kathitaṃ dvāraṃ tattvānāmapi yoginaḥ /
pradhānaṃ saṃpuṭīkṛtya tṛtīyena ca dīpanam //
2.21.63
ādyena saṃpuṭīkṛtya pradhānaṃ grahaṇaṃ smṛtam /
pradhānaṃ prathamenaiva saṃpuṭīkṛtya pūrvavat //
2.21.64
bandhanaṃ paripūrṇena plāvanaṃ cāmṛtena ca /
śāntya tītā tataḥ śāntirvidyā nāma kalāmalā //
2.21.65
pratiṣṭhā ca nivṛttiśca kalāsaṃkramaṇaṃ smṛtā /
tattvavarṇakalāyuktaṃ bhuvanena yathākramam //
2.21.66
mantraiḥ pādaiḥ stavaṃ kuryādviśodhya ca yathāvidhi /
ādyena yonibījena kalpayitvā ca pūrvavat //
2.21.67
pūjāsaṃprokṣaṇaṃ viddhi tāḍanaṃ haraṇaṃ tathā /
saṃhatasya ca saṃyogaṃ vikṣepaṃ ca yathākramam //
2.21.68
arcanā ca tathā garbhadhāraṇaṃ jananaṃ punaḥ /
adhikāro bhavedbhānorlayaścaiva viśeṣataḥ //
2.21.69
uttamādyaṃ tathāntyena yonibījena suvrata /
uddāre prokṣaṇe caiva tāḍane ca mahāmune //
2.21.70
aghoreṇa phaḍantena saṃsṛtiśca na saṃśayaḥ /
pratitattvaṃ kramo hyeṣa yogamārgeṇa suvrata //
2.21.71
muṣṭinā caiva yāvacca tāvatkālaṃ nayetkramāt /
viṣuveṇa tu yogena nivṛttyādi śivāntikam //
2.21.72
ekatra samatāṃ yāti nānyathā tu pṛthakpṛthak /
nāsāgre dvādaśāntena pṛṣṭhena saha yoginām //
2.21.73
kṣantavyamiti viprendra devadevasya śāsanam /
hemarājatatāmrādyairvidhinā kalpitena ca //
2.21.74
sakūrcena savastreṇa tantunā veṣṭitena ca /
tīrthāṃbupūritenaiva ratnagarbheṇa suvrata //
2.21.75
saṃhitāmāntritenaiva rudrādhyāyastutena ca /
secayecca tataḥ śiṣyaṃ śivabhaktaṃ ca dhārmikam //
2.21.76
so 'pi śiṣyaḥ śivasyāgre suroragre ca sādaram /
vahneśca dīkṣāṃ kurvīta dīkṣitaśca tathācaret //
2.21.77
varaṃ prāṇaparityāgaśchedanaṃ śiraso 'pi vā /
na tvanabhyarcya bhuñjīyādbhagavantaṃ sadāśivam //
2.21.78
evaṃ dīkṣā prakartavyā pūjā caiva yatākramam /
trikālamekakālaṃ vā pūjayetparameśvaram //
2.21.79
agnihotraṃ ca vedāśca yajñāśca bahudakṣiṇāḥ /
śivaliṅgārcanasyaite kalāṃśenāpi no samāḥ //
2.21.80
sadā yajati yajñena sadā dānaṃ prayacchati /
sadā ca vāyubhakṣaśca sakṛdyo 'bhyarcayecchivam //
2.21.81
ekakālaṃ dvikālaṃ vā trikālaṃ nityameva vā /
yor'cayānti mahādevaṃ te rudrā nātra saṃśayaḥ //
2.21.82
nārudrastu spṛsedrudraṃ nārudro rudramarcayet /
nārudraḥ kīrtayedrūdraṃ nārudro rudramāpnuyāt //
2.21.83
evaṃ saṃkṣepataḥ prokto hyadhikārividhikramaḥ /
śivārcanārthaṃ dharmārthakāmamokṣaphalapradaḥ //
2.21.83.p1
iti śrīliṃṅgamahāpurāṇe uttarabhāge dīkṣāvidhirnāmaikaviṃśatitamodhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (2)
- Liṅga — Sanskrit
- Śaivasarvasvasāra — Vidyāpati, Sanskrit