Pramāṇa · Search · About · API

Lingapurana 2.22

Liṅgapurāṇa 2.22

Language
Sanskrit

Contents

2.22.1

śailādiruvāca
snānayāgādikarmāṇi kṛtvā vai bhaskarasya ca /
śivasnānaṃ tataḥ kuryādbhasmasnānaṃ śivārcanam //

2.22.2

ṣaṣṭhena mṛdamādāya bhaktyā bhūmaunyasenmṛdam /
dvitīyena tathābhyukṣya tṛtīyena ca śodhayet //

2.22.3

caturthenaiva vibhajenmalamekena śodhayet /
snātvā ṣaṣṭhena taccheṣāṃ mṛdaṃ hastagatāṃ punaḥ //

2.22.4

tridhā vibhajya sarvaṃ ca caturbhirmadhyamaṃ punaḥ /
ṣaṣṭhena saptavārāṇi vāmaṃ mūlena cālabhet /
daśavāraṃ ca ṣaṣṭhena diśo bandhaḥ prakīrtitaḥ //

2.22.5

vāmena tīrthaṃ savyena śarīramanulipya ca /
snātvā sarvaiḥsmaran bhānumabhiṣekaṃ samācaret //

2.22.6

śṛṅgeṇa parṇapuṭakaiḥ pālāśena dalena vā /
saurai rebhiśca vividhaiḥ sarvāsiddhikaraiḥ śubhaiḥ //

2.22.7

sārauṇi ca pravakṣyāmi bāṣkalādyāni suvrata /
aṅgāni sarvadeveṣu sārabhūtāni sarvataḥ //

2.22.8

oṃ bhūḥ oṃbhuvaḥ oṃsvaḥ oṃ mahaḥ oṃ janaḥ oṃ tapaḥ oṃsatyam oṃ ṛtam oṃ brahmā /
navākṣaramayaṃ mantraṃ bāṣkalaṃ parikīrtitam /
na kṣaratīti lokāni ṛtamakṣaramucyate /
satyamakṣarīmatyuktaṃ praṇavādinamontakam //

2.22.9

oṃ bhūrbhavaḥ suvaḥ tatsaviturvareṇyaṃ bhargo devasya dhīmahi /
oṃ namaḥ sūryāya khakholkāya namaḥ //

2.22.10

mūlamantramidaṃ proktaṃ bhāskarasya mahātmanaḥ /
navākṣareṇa dīptāsyaṃ mūlamantreṇa bhāskaram //

2.22.11

pūjayendragamantrāṇi kathayāmi yatākramam /
vedādibhiḥ prabhūtādyaṃ praṇavena ca madhyamam //

2.22.12

oṃ bhūḥ brahma hṛdayāya oṃ bhuvaḥ viṣṇuśirase oṃsvaḥ rudraśikhāyai oṃbhūrbhūvaḥ svaḥ jvālāmālinīśikhayai oṃ mahaḥ maheśvarāya kavacāya oñjanaḥ śivāya netrebhyaḥ
oṃ tapaḥ tāpakāya astrāya phaṭ mantrāṇi kathitānyevaṃ saurāṇi vividhāni ca /
etaiḥ śṛṅgādibhiḥ pātraiḥ svātmānamābheṣeṭayet //

2.22.13

tāmrakuṃbhena vā vipraḥ kṣatriyo vaiśya eva ca /
sakusena sapuṣpeṇa mantraiḥ sarvai samāhitaḥ //

2.22.14

raktavastraparīdhānaḥ svācāmedvidhipūrvakam /
sūryaścoti divā rātrau cāgniśceti dvijottamaḥ //

2.22.15

āpaḥ punantu madhyāhne mantrācamanamucyate /
ṣaṣṭhena śuddhiṃ kṛtvaiva japedādyamanuttamam //

2.22.16

vauṣaḍantaṃ tathā mūlaṃ navākṣaramanuttamam /
karaśākhāṃ tathāṅguṣṭhamadhyamānāmikāṃ nyaset //

2.22.17

tale ca tarjanyaṅguṣṭhaṃ muṣṭibhāgāni vinyaset /
navākṣaramayaṃ dehaṃ kṛtvāṅgairapi pāvitam //

2.22.18

sūryo 'hamiti saṃcintya mantrairetairyathākramam /
vāmahastagatairadbhirgandhasiddhārthakānvitaiḥ //

2.22.19

kuśapuñjena cābhyukṣya mūlāgrairaṣṭadhā sthitaiḥ /
āpo hiṣṭhādibhiścaiva śeṣamāghrādha vai jalam //

2.22.20

vāmanāsāpuṭenaiva dehe saṃbhāvayecchivam /
arghyamādāya dehasthaṃ savyanāsāpuṭena ca //

2.22.21

kṛṣṇavarṇena bāhyasthaṃ bhāvayecca śilāgatam /
tarpayetsarvadevebhya ṛṣibhyaśca viśeṣataḥ //

2.22.22

bhūtebhyaśca pitṛbhyaśca vidhinārghyaṃ ca dāpayet /
vyāpiniṃ ca parāṃ jyotsnāṃ saṃdhyāṃ samyagupāsayet //

2.22.23

prātarmadhyāhnasāyāhne arghyaṃ caiva nivedayet /
raktacandanatoyena hastamātreṇa maṇḍalam //

2.22.24

suvṛttaṃ kalpayedbhūmau prārthayeta dvijottamāḥ /
prāṅmukhastāmrapātraṃ ca sagandhaṃ prasthāpūritam //

2.22.25

pūrayedgandhatoyena raktacandanakena ca /
raktapuṣpaistilaiścaiva kuśākṣatasamanvitaiḥ //

2.22.26

dūrvāpāmārgagavyena kevalena ghṛtena ca /
āpūrya mūlamantreṇa navākṣaramayena ca /
jānubhyāṃ dharaṇīṃ gatvā deva devaṃ namasya ca //

2.22.27

kṛtvā śirasi tatpātramarghya mūlena dāpayet /
aśvamedhāyutaṃ kṛtvā yatphalaṃ parikīrtitam //

2.22.28

tatphalaṃ labhate dattvā saurārghyaṃ sarvasaṃmatam /
dattvaivārghyaṃ yajedbhaktyā devadevaṃ triyaṃbakam //

2.22.29

athavā bhāskaraṃ ceṣṭvā āgneyaṃ snānamācaret /
pūrvavadvai śivasnānaṃ mantramātreṇa bheditam //

2.22.30

dantadhāvanapūrvaṃ ca snānaṃ sauraṃ ca śāṅkaram /
vighneśaṃ varuṇaṃ caiva guruṃ tīrthaṃ samarcayet //

2.22.31

baddhvā padmāsanaṃ tīrthe tathā tīrthaṃ samarcayet /
tīrthaṃ saṃgṛhya vidhinā pūjāsthānaṃ praviśya ca //

2.22.32

mārgeṇārghyapavitreṇa tadākramya ca pādukam /
pūrvavatkaravinyāsaṃ dehavinyāsamācaret /
tīrthaṃ saṃgṛhya vidhinā pūjāsthānaṃ pravisya ca //

2.22.33

arghyasya sādanaṃ caiva samāsātparikīrtitam /
baddhvā padmāsanaṃ yogī prāṇāyāmaṃ samabhyaset //

2.22.34

raktapuṣpāṇi saṃgṛhya kamalādyāni bhāvayet /
ātmano dakṣiṇe sthāpya jalabhāṇḍaṃ ca vāmataḥ //

2.22.35

tāmrapātrāṇi saurāṇi sarvakāmārthasiddhaye /
ārghyapātraṃ samādāya prakṣālya ca yathāvidhi //

2.22.36

pūrvoktenāṃbunā sārdhaṃ jalabhāṇḍe tathaiva ca /
astrodakena caivārghyamarghyadravyasamanvitam //

2.22.37

saṃhitāmantritaṃ kṛtvā saṃpūjya prathamena ca /
turīyeṇāvaguṇṭhyaiva sthāpayedātmano pari //

2.22.38

pādyamācamanīyaṃ ca gandhapūṣpasamanvitam /
aṃbhasā śodhite pātre stāpayetpūrvavatpṛthak /
saṃhitāṃ caiva vinyasya kavacenāvaguṇṭhyaca //

2.22.39

arghyābunā samabhyukṣya dravyāṇi ca viśeṣataḥ /
ādityaṃ ca japed devaṃ sarvadevanamaskṛtam //

2.22.40

ādityo vai teja ūrjo balaṃ yaśo vivirdhati /
ityādinā namaskṛtya kalpayedāsanaṃ prabhoḥ //

2.22.41

prabhūtaṃ vimalaṃ sāramārāvyaṃ paramaṃ sukham /
āgnoyyādiṣu koṇeṣumadhyamāntaṃ hṛdānyaset //

2.22.42

aṅgaṃ pravinyaseccaiva bījamaṅkurameva ca /
nālaṃ suṣirasaṃ yuktaṃ sūtrakaṇṭakasaṃyutam //

2.22.43

dalaṃ dalāgraṃ suśvetaṃ hemābhaṃ raktameva ca /
karṇikākesaropetaṃ dīptādyaiḥ śaktibhirvṛtam //

2.22.44

dīptā sūkṣmā jayā bhadrā vibhūtirvimalākramāt /
aghorā vikṛtā caiva dīptādyāścāṣṭaśaktayaḥ //

2.22.45

bhāskarābhamukhāḥ sarvāḥ kṛtāñjalipuṭāḥ śubhāḥ /
athavā padmahastā vā sarvābharaṇabhūṣitāḥ //

2.22.46

madhyato varadāṃ devīṃ sthāpayetsarvatomukhīm /
āvāhayettato devīṃ bhāskaraṃ parameśvaram //

2.22.47

navākṣareṇa mantreṇa bāṣkaloktena bhāskaram /
āvāhane ca sānnidhyamanenaiva vidhīyate //

2.22.48

mudrā ca padmamudrākhyā bhaskarasya mahātmanaḥ /
mūle nārghyaṃ tato dadyātpādyamācamanaṃ pṛthak //

2.22.49

punararghyapradānena bāṣkalena yatāvidhi /
raktapadmāni puṣpāṇi raktacandanameva ca //

2.22.50

dīpadhūpādinaivedyaṃ mukhāvāsādireva ca /
tāṃbūlavartidīpādyaṃ bāṣkalena vidhīyate //

2.22.51

āgnoyyāṃ ca tathaiśānyāṃ nairṛtyāṃ vāyugocare /
pūrvasyāṃ paścime caiva paṭprakāraṃ vidhīyate //

2.22.52

netrāntaṃ vidhinābhyarcya praṇavādinamontakam /
karṇikāyāṃ pravinyasya rūpakadhyānamācaret //

2.22.53

sarve vidyutprabhāḥ śāntā raudramastraṃ prakīrtitam /
daṃṣṭrākarālavadanaṃ hyaṣṭamūrti bhayaṅkaram //

2.22.54

varadaṃ dakṣiṇaṃ hastaṃ vāmaṃ padmavibhūṣitam /
sarvābharaṇasaṃpannā raktasraganulepanāḥ //

2.22.55

raktāṃbaradharāḥ sarvā mūrtayastasya saṃsthitāḥ /
samaṇḍalo mahādevaḥ siṃdūrāruṇavigrahaḥ //

2.22.56

padmahasto 'mṛtāsyaśca dvihastanayanaḥ prabhuḥ /
raktābharaṇasaṃyukto raktasraganulepanaḥ //

2.22.57

itthaṃrūpadharaṃ dhyāyedbhāskaraṃ bhuvaneśvaram /
padmabāhye śubhaṃ cātra maṇḍaleṣu samantataḥ //

2.22.58

somamaṅgārakaṃ caiva budhaṃ buddhimatāṃvaram /
bṛhaspatiṃ mahābuddhiṃ rudraputraṃ ca bhārgavam //

2.22.59

śanaiścaraṃ tathā rāhuṃ ketuṃ dhūmraṃ prakīrtitam /
sarve dvinetrā dvibhujā rāhuścordhvaśarīradhṛk //

2.22.60

vivṛttāsyo ḥñjaliṃ kṛtvā bhrukuṭīkuṭilekṣaṇaḥ /
śanaiścaraśca daṃṣṭrāsyo varadābhayahastadhṛk //

2.22.61

svaiḥsvairbhāvaiḥ svanāmnā ca praṇavādinamontakam /
pūjanīyāḥ prayatnena dharmakāmārthasiddhaye //

2.22.62

saptasaptagaṇāṃścaiva bahirdevasya pūjayet /
ṛṣayo devagandharvāḥ pannagāpsarasāṃ gaṇāḥ //

2.22.63

grāmaṇyo yātudhānāśca tathā yakṣāśca mukhyataḥ /
saptāśvān pūjayedagre saptacchandomayān vibhoḥ //

2.22.64

vālakhilyagaṇaṃ caiva nirmālyagrahaṇaṃ vibhoḥ /
pūjayedāsanaṃ sūrterdevatāmapi pūjayet //

2.22.65

arghyaṃ ca dāpayetteṣāṃ pṛthageva vidhā nataḥ /
āvāhane ca pūjānte teṣāmudvāsane tathā //

2.22.66

sahasraṃ vā tadardhaṃ vā śatamaṣṭottaraṃ tu vā /
bāṣkalaṃ ca japedagre dhaśāṃśena ca yojayet //

2.22.67

kuṇḍaṃ ca paścime kuryādvartulaṃ caiva mekhalam /
caturaṅgulamānena cotsedhādvistarādapi //

2.22.68

ekahastapramāṇena nitye naimittike tathā /
kṛtvāśvatthadalākāraṃ nābhiṃ kuṇḍe daśāṅgulam //

2.22.69

tadardhena purastāttu gajoṣṭhasadṛśaṃ smṛtam /
galamekāṅgulaṃ caiva śeṣandviguṇavistaram //

2.22.70

tatpramāṇena kuṇḍasya tyaktvā kurvīta mekhalām /
yatnena sādhayitvaiva paścādvomaṃ ca kārayet //

2.22.71

ṣaṣṭhenolle khanaṃ kuryātprokṣayedvāriṇā punaḥ /
āsanaṃ kalpayenmadhye prathamena samāhitaḥ //

2.22.72

prabhāvatīṃ tataḥ śaktimādyenaiva tu vunyaset /
bāṣkalenaiva saṃpūjya gandhapuṣpādibhiḥ kramāt //

2.22.73

bāṣkalenaiva mantreṇa kriyāṃ prati yajetpṛthak /
mūlamantreṇa vidhinā paścātpūrṇāhutirbhavet //

2.22.74

kramādevaṃ vidhānena sūryāgnirjanito bhavet /
pūrvoktena vidhānena prāguktaṃ kamalaṃ nyaset //

2.22.75

mukhopari samabhyarcya pūrvavadbhāskaraṃ prabhum /
daśaivāhutayo deyā bāṣkalena mahāmune //

2.22.76

aṅgānāṃ ca tathaikaikaṃ saṃhitābhiḥ pṛthak punaḥ /
jayādisviṣṭaparyantamidhmaprakṣepameva ca //

2.22.77

samānyaṃ sarvamārgeṣu pāraṃparyakrameṇa ca /
nivedya devadevāya bhāskarāyāmitātmane //

2.22.78

pūjāhomādikaṃ sarvaṃ dattvārghyaṃ ca pradākṣiṇam /
aṅgaiḥ saṃpūjya saṃkṣipya hṛdyudvāsya namasya ca //

2.22.79

śivapūjāṃ tataḥ kuryāddharmakāmārthasiddhaye /
evaṃ saṃkṣepataḥ proktaṃ yajanaṃ bhāskarasya ca /
sarvaiśvaryasamopetastejasāpratimaśca saḥ //

2.22.80

yaḥ sakṛdvā yajeddevaṃ devadevaṃ jagadgurum /
bhāskaraṃ paramātmānaṃ sa yāti paramāṃ gatim //

2.22.81

sarvapāpavinirmuktāḥ sarvapāpa vivarjitaḥ /
sarvaiśvaryasamopetastejasāpratimaśca saḥ //

2.22.82

putrapautrādimitraiśca bāndhavaiś ca samantataḥ /
bhuktvaiva vipulān bhogānihaiva dhana dhānyavān //

2.22.83

yānavāhanasaṃpanno bhūṣaṇairvividhairapi /
kālaṃ gatopi sūryeṇa modate kālamakṣayam //

2.22.84

punastasmādihāgatya rājā bhavati dharmikaḥ /
vedavedāṅgasaṃpanno brāhmaṇo vātra jāyate //

2.22.85

punaḥ prāgvāsanāyogāddhārmiko vedapāragaḥ /
sūryameva samabhyarcya sūryasāyujyamāpnuyāt //

2.22.85.p1

iti śrīliṅgamahāpurāṇe uttarabhāge dvāviṃśatitamo 'dhyāyaḥ

Commentaries (2)

Linked texts (3)