Lingapurana 2.23
Liṅgapurāṇa 2.23
- Language
- Sanskrit
Contents
- 2.23.31 — 1 part
2.23.1
śailādiruvāca
atha te saṃpravakṣyāmi śivārcanamanuttamam /
trisaṃdhyam arcayed īśam agnikāryaṃ ca śaktitaḥ //
2.23.2
śivasnānaṃ purā kṛtvā tattvaśuddhiṃ ca pūrvavat /
puṣpahastaḥ praviśyātha pūjāsthānaṃ samāhitaḥ //
2.23.3
prāṇāyāmatrayaṃ kṛtvā dāhanāplāvanāni ca /
gandhādivāsitakaro mahāmudrāṃ pravinyaset //
2.23.4
vijñānena tanuṃ kṛtvā brahmāgnerapi yatnataḥ /
avyaktabuddhyahaṅkāratanmātrāsaṃbhavāṃ tanum //
2.23.5
śivāmṛtena saṃpūtaṃ śivasya ca yathātatham /
adhoniṣṭhyā vitastyāṃ tu nābhyāmupari tiṣṭhati //
2.23.6
hṛdayaṃ tadvijānīyādviśvasyāyatanaṃ mahat /
hṛtpadmakarṇikāyāṃ tu devaṃ sākṣātsadāśivam //
2.23.7
pañcavaktraṃ daśabhujaṃ sarvābharaṇabhūṣitam /
prativaktraṃ trinetraṃ ca śaśāṅkakṛtaśekharam //
2.23.8
baddhapadmāsanāsīnaṃ śuddhasphaṭikasannibham /
ūrdhvaṃ vaktraṃ sitaṃ dhyāyetpūrvaṃ kuṅkumasannibham //
2.23.9
nīlābhaṃ dakṣiṇaṃ vaktramatiraktaṃ tathottaram /
gokṣīradhavalaṃ divyaṃ paścimaṃ parameṣṭhinaḥ //
2.23.10
śūlaṃ paraśukhaṅgaṃ ca vajraṃ śaktiṃ ca dakṣiṇe /
vāme pāśāṅkuśaṃ ghaṇṭāṃ nāgaṃ nārācamuttamam //
2.23.11
varadābhayahastaṃ vā śeṣaṃ pūrvavadeva tu /
sarvābharaṇasaṃyuktaṃ citrāṃbaradharaṃ śivam //
2.23.12
brahmāṅgavigrahaṃ devaṃ sarvadevottamottamam /
pūjayetsarvabhāvena brahmāṅgairbrahmaṇaḥ patim //
2.23.13
uktāni pañca brahmāṇi śivāṅgāni śṛṇuṣva me /
śaktibhūtāni ca tathā hṛdayādīni suvrata //
2.23.14
oṃ īśānaḥ sarvavidyānāṃ hṛdayāya śaktibījāya namaḥ /
oṃ īśvaraḥ sarvabhūtānāmamṛtāya śirasenamaḥ //
2.23.15
oṃ brahmādhipataye kālāgnirupāya śikhāyai namaḥ /
oṃ brahmaṇodhipataye kālacaṇḍamārutāya kavacāya namaḥ //
2.23.16
oṃ brahmaṇe bṛṃhaṇāya jñānamūrtaye netrāya namaḥ /
oṃ śivāya sadāśivāya pāśupatāsrāya apratihatāya phaṭphaṭ //
2.23.17
oṃ sadyojātāya bhavebhavenāti bhave bhavasya māṃ bhavodbhavāya śivamūrtaye namaḥ /
oṃ haṃsaśikhāya vidyādehāya ātmasvarūpāya parāparāya śivāya śivatamāya namaḥ //
2.23.18
kathitāni śivāṅgāni mūrtividyā ca tasya vai /
brahmāṅgamūrti vidyāṅgasahitāṃ śivaśāsane //
2.23.19
saurāṇi ca pravakṣyāmi bāṣkalādyāni suvrata /
aṅgāni sarvavedeṣu sārabhūtāni suvrata //
2.23.20
oṃbhūḥ oṃbhuvaḥ oṃ svaḥ oṃmahaḥ oñjanaḥ ontapaḥ oṃsatyam oṃṛtam oṃbrahmānavākṣaramayaṃ mantraṃ bāṣkalaṃ parikīrtitam /
na kṣaratīti loke 'smiṃstato hyakṣaramucyate /
satyam akṣaram ity uktaṃ praṇavādinamo ḥntakam //
2.23.21
oṃ bhūrbhuvaḥ svaḥ tatsaviturvareṇyaṃ bhargo devasya dhīmahi /
dhiyo yo naḥ pracodayāt
namaḥ sūryāya khakholkāya namaḥ //
2.23.22
mūlamantramiti proktaṃ bhāskarasya mahātmanaḥ /
navākṣareṇa dīptādya mūlamantreṇa bhāskaram //
2.23.23
pūjayedaṅgamantrāṇi kathayāmi samāsataḥ /
vedādibhiḥ prabhūtādyaṃ praṇavena tu madhyamam //
2.23.24
oṃbhūḥ brahmaṇe hṛdayāya namaḥ /
oṃbhuvaḥ viṣṇave śirase namaḥ /
oṃsvaḥ rudrāya śikhāyai namaḥ oṃbhūrbhuvaḥ svaḥ jvālāmāninyai devāya namaḥ oṃmahaḥ maheśvarāya kavacāya namaḥ /
oñjanaḥ śivāya netrebhyo namaḥ /
ontapastāpanāya astrāya namaḥ /
evaṃ prasaṃgādeveha saurāṇi kathitāni ha /
śaivāni ca samāsena nyāsayogena suvrata //
2.23.25
itthaṃ mantramayaṃ devaṃ pūjayeddhṛdayāṃbuje /
nābhau homaṃ tu kartavyaṃ janayitvā yathākramam //
2.23.26
manasā sarvakāryāṇi śivāgnau devamīśvaram /
pañcabrahmāṅgasaṃbhūtaṃ śivamūrtiṃ sadāśivam //
2.23.27
raktapadmāsanāsīnaṃ sakalīkṛtya yatnataḥ /
mūlena mūrtimantreṇa brahmāṅgādyaistū suvrata //
2.23.28
samidājyāhutīrhutvā manasā candramaṇḍalāt /
candrasthānātsamutpannāṃ pūrṇadhārāmanusmaret //
2.23.29
pūrṇāhutividhānena jñānināṃ śivaśāsane /
śivaṃ vaktragataṃ dhyāyettejomātraṃ ca śāṅkaram //
2.23.30
lalāṭe devadeveśaṃ bhramadhye vā smaretpunaḥ /
yacca hṛtkamale sarvaṃ samāpya vidhivistaram //
2.23.31
śuddhadīpaśikhākāraṃ bhāvayedbhavanāśanam /
liṅge ca pūjayeddevaṃ sthaṇḍile vā sadāśivam //
2.23.31.p1
iti śrīliṅgamahāpurāṇe uttarabhāge trayoviṃśatitamodhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (1)
- Liṅga — Sanskrit