[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Linga Purana](https://indike.org/pramana/in.purana.linga) › 2.23 # Linga Purana 2.23 Liṅgapurāṇa 2.23 - **Language:** Sanskrit ## Contents - [2.23.31](https://indike.org/pramana/in.purana.linga.2.23.31) — 1 part ### [2.23.1](https://indike.org/pramana/in.purana.linga.2.23.1) śailādiruvāca atha te saṃpravakṣyāmi śivārcanamanuttamam / trisaṃdhyam arcayed īśam agnikāryaṃ ca śaktitaḥ // ### [2.23.2](https://indike.org/pramana/in.purana.linga.2.23.2) śivasnānaṃ purā kṛtvā tattvaśuddhiṃ ca pūrvavat / puṣpahastaḥ praviśyātha pūjāsthānaṃ samāhitaḥ // ### [2.23.3](https://indike.org/pramana/in.purana.linga.2.23.3) prāṇāyāmatrayaṃ kṛtvā dāhanāplāvanāni ca / gandhādivāsitakaro mahāmudrāṃ pravinyaset // ### [2.23.4](https://indike.org/pramana/in.purana.linga.2.23.4) vijñānena tanuṃ kṛtvā brahmāgnerapi yatnataḥ / avyaktabuddhyahaṅkāratanmātrāsaṃbhavāṃ tanum // ### [2.23.5](https://indike.org/pramana/in.purana.linga.2.23.5) śivāmṛtena saṃpūtaṃ śivasya ca yathātatham / adhoniṣṭhyā vitastyāṃ tu nābhyāmupari tiṣṭhati // ### [2.23.6](https://indike.org/pramana/in.purana.linga.2.23.6) hṛdayaṃ tadvijānīyādviśvasyāyatanaṃ mahat / hṛtpadmakarṇikāyāṃ tu devaṃ sākṣātsadāśivam // ### [2.23.7](https://indike.org/pramana/in.purana.linga.2.23.7) pañcavaktraṃ daśabhujaṃ sarvābharaṇabhūṣitam / prativaktraṃ trinetraṃ ca śaśāṅkakṛtaśekharam // ### [2.23.8](https://indike.org/pramana/in.purana.linga.2.23.8) baddhapadmāsanāsīnaṃ śuddhasphaṭikasannibham / ūrdhvaṃ vaktraṃ sitaṃ dhyāyetpūrvaṃ kuṅkumasannibham // ### [2.23.9](https://indike.org/pramana/in.purana.linga.2.23.9) nīlābhaṃ dakṣiṇaṃ vaktramatiraktaṃ tathottaram / gokṣīradhavalaṃ divyaṃ paścimaṃ parameṣṭhinaḥ // ### [2.23.10](https://indike.org/pramana/in.purana.linga.2.23.10) śūlaṃ paraśukhaṅgaṃ ca vajraṃ śaktiṃ ca dakṣiṇe / vāme pāśāṅkuśaṃ ghaṇṭāṃ nāgaṃ nārācamuttamam // ### [2.23.11](https://indike.org/pramana/in.purana.linga.2.23.11) varadābhayahastaṃ vā śeṣaṃ pūrvavadeva tu / sarvābharaṇasaṃyuktaṃ citrāṃbaradharaṃ śivam // ### [2.23.12](https://indike.org/pramana/in.purana.linga.2.23.12) brahmāṅgavigrahaṃ devaṃ sarvadevottamottamam / pūjayetsarvabhāvena brahmāṅgairbrahmaṇaḥ patim // ### [2.23.13](https://indike.org/pramana/in.purana.linga.2.23.13) uktāni pañca brahmāṇi śivāṅgāni śṛṇuṣva me / śaktibhūtāni ca tathā hṛdayādīni suvrata // ### [2.23.14](https://indike.org/pramana/in.purana.linga.2.23.14) oṃ īśānaḥ sarvavidyānāṃ hṛdayāya śaktibījāya namaḥ / oṃ īśvaraḥ sarvabhūtānāmamṛtāya śirasenamaḥ // ### [2.23.15](https://indike.org/pramana/in.purana.linga.2.23.15) oṃ brahmādhipataye kālāgnirupāya śikhāyai namaḥ / oṃ brahmaṇodhipataye kālacaṇḍamārutāya kavacāya namaḥ // ### [2.23.16](https://indike.org/pramana/in.purana.linga.2.23.16) oṃ brahmaṇe bṛṃhaṇāya jñānamūrtaye netrāya namaḥ / oṃ śivāya sadāśivāya pāśupatāsrāya apratihatāya phaṭphaṭ // ### [2.23.17](https://indike.org/pramana/in.purana.linga.2.23.17) oṃ sadyojātāya bhavebhavenāti bhave bhavasya māṃ bhavodbhavāya śivamūrtaye namaḥ / oṃ haṃsaśikhāya vidyādehāya ātmasvarūpāya parāparāya śivāya śivatamāya namaḥ // ### [2.23.18](https://indike.org/pramana/in.purana.linga.2.23.18) kathitāni śivāṅgāni mūrtividyā ca tasya vai / brahmāṅgamūrti vidyāṅgasahitāṃ śivaśāsane // ### [2.23.19](https://indike.org/pramana/in.purana.linga.2.23.19) saurāṇi ca pravakṣyāmi bāṣkalādyāni suvrata / aṅgāni sarvavedeṣu sārabhūtāni suvrata // ### [2.23.20](https://indike.org/pramana/in.purana.linga.2.23.20) oṃbhūḥ oṃbhuvaḥ oṃ svaḥ oṃmahaḥ oñjanaḥ ontapaḥ oṃsatyam oṃṛtam oṃbrahmānavākṣaramayaṃ mantraṃ bāṣkalaṃ parikīrtitam / na kṣaratīti loke 'smiṃstato hyakṣaramucyate / satyam akṣaram ity uktaṃ praṇavādinamo ḥntakam // ### [2.23.21](https://indike.org/pramana/in.purana.linga.2.23.21) oṃ bhūrbhuvaḥ svaḥ tatsaviturvareṇyaṃ bhargo devasya dhīmahi / dhiyo yo naḥ pracodayāt namaḥ sūryāya khakholkāya namaḥ // ### [2.23.22](https://indike.org/pramana/in.purana.linga.2.23.22) mūlamantramiti proktaṃ bhāskarasya mahātmanaḥ / navākṣareṇa dīptādya mūlamantreṇa bhāskaram // ### [2.23.23](https://indike.org/pramana/in.purana.linga.2.23.23) pūjayedaṅgamantrāṇi kathayāmi samāsataḥ / vedādibhiḥ prabhūtādyaṃ praṇavena tu madhyamam // ### [2.23.24](https://indike.org/pramana/in.purana.linga.2.23.24) oṃbhūḥ brahmaṇe hṛdayāya namaḥ / oṃbhuvaḥ viṣṇave śirase namaḥ / oṃsvaḥ rudrāya śikhāyai namaḥ oṃbhūrbhuvaḥ svaḥ jvālāmāninyai devāya namaḥ oṃmahaḥ maheśvarāya kavacāya namaḥ / oñjanaḥ śivāya netrebhyo namaḥ / ontapastāpanāya astrāya namaḥ / evaṃ prasaṃgādeveha saurāṇi kathitāni ha / śaivāni ca samāsena nyāsayogena suvrata // ### [2.23.25](https://indike.org/pramana/in.purana.linga.2.23.25) itthaṃ mantramayaṃ devaṃ pūjayeddhṛdayāṃbuje / nābhau homaṃ tu kartavyaṃ janayitvā yathākramam // ### [2.23.26](https://indike.org/pramana/in.purana.linga.2.23.26) manasā sarvakāryāṇi śivāgnau devamīśvaram / pañcabrahmāṅgasaṃbhūtaṃ śivamūrtiṃ sadāśivam // ### [2.23.27](https://indike.org/pramana/in.purana.linga.2.23.27) raktapadmāsanāsīnaṃ sakalīkṛtya yatnataḥ / mūlena mūrtimantreṇa brahmāṅgādyaistū suvrata // ### [2.23.28](https://indike.org/pramana/in.purana.linga.2.23.28) samidājyāhutīrhutvā manasā candramaṇḍalāt / candrasthānātsamutpannāṃ pūrṇadhārāmanusmaret // ### [2.23.29](https://indike.org/pramana/in.purana.linga.2.23.29) pūrṇāhutividhānena jñānināṃ śivaśāsane / śivaṃ vaktragataṃ dhyāyettejomātraṃ ca śāṅkaram // ### [2.23.30](https://indike.org/pramana/in.purana.linga.2.23.30) lalāṭe devadeveśaṃ bhramadhye vā smaretpunaḥ / yacca hṛtkamale sarvaṃ samāpya vidhivistaram // ### [2.23.31](https://indike.org/pramana/in.purana.linga.2.23.31) śuddhadīpaśikhākāraṃ bhāvayedbhavanāśanam / liṅge ca pūjayeddevaṃ sthaṇḍile vā sadāśivam // ### [2.23.31.p1](https://indike.org/pramana/in.purana.linga.2.23.31.p1) iti śrīliṅgamahāpurāṇe uttarabhāge trayoviṃśatitamodhyāyaḥ ## Commentaries (1) - [Śivatoṣiṇī](https://indike.org/pramana/in.purana.linga!ganesa-ballala-natu.155.3) — Gaṇeśa Ballāla Nātū, Sanskrit ## Discussed in (1) - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c7.s17.75) — Hazra 1940, English --- Source: [https://indike.org/pramana/in.purana.linga.2.23](https://indike.org/pramana/in.purana.linga.2.23) · Pramāṇa