Lingapurana 2.26
Liṅgapurāṇa 2.26
- Language
- Sanskrit
Contents
- 2.26.30 — 1 part
2.26.1
śailādiruvāca
athavā devamīśānaṃ liṅge saṃpūjayecchivam /
brāhmaṇaḥ śivabhaktaśca śivadhyānaparāyaṇaḥ //
2.26.2
agnirityādinā bhasma gṛhītvā hyagnihotrajam /
uddhūlayeddhi sarvāṅgamāpādatalamastakam //
2.26.3
ācāmedbrahmatīrthena brahmasūtrī hyudaṅmukhaḥ /
athoṃnamaḥ śivāyeti tanuṃ kṛtvātmanaḥ punaḥ //
2.26.4
devaṃ ca tena mantreṇa pūjayetpraṇavena ca /
sarvasmādadhikā pūjā aghoreśasya śūlinaḥ //
2.26.5
sāmānyaṃ yajanaṃ sarvamagnikāryaṃ ca suvrata /
mantrabhedaḥ prabhostasya aghoradhyānameva ca //
2.26.6
mantraḥ
aghorebhyo 'tha ghorebhyo ghoraghoratarebhyaḥ śarvebhyaḥ sarvaśarvebhyo namaste astu rudrarūpebhyaḥ //
2.26.7
aghorebhyaḥ praśāntahṛdayāya namaḥ /
atha ghorebhyaḥ sarvātmabrahmaśirase svāhā /
ghoraghoratarebhyaḥ jvālāmālinī śikāyai vaṣaṭ /
sarvebhyaḥ sarvaśarvebhyaḥ piṅgalakavacāya hum /
namaste astu rudrarūpebhyaḥ netratrayāya vaṣaṭ /
sahasrākṣāya durbhedāya pāśupatāstrāya huṃ phaṭ /
snātvācāmya tanuṃ kṛtvā samabhyukṣyāgamarṣaṇam /
tarpaṇaṃ vidhinā cārghyaṃ bhānave bhānupūjanam //
2.26.8
samaṃ cāghorapūjāyāṃ mantramātreṇa bheditam /
mārgaśuddhistathā dvāri pūjāṃ vāstvadhipasya ca //
2.26.9
kṛtvā karaṃ viśodhyāgre sa śubhāsanamāsthitaḥ /
nāsāgrakamale sthāpya dagdhākṣaḥ kṣubhikāgninā //
2.26.10
vāyunā prerya tadbhasma viśodhya ca śubhāṃ bhasā /
śaktyāmṛtamaye brahmakalāṃ tatra prakalpayet //
2.26.11
aghoraṃ pañcadhā kṛtvā pañcāṅgasahitaṃ punaḥ /
itthaṃ jñānākriyāmevaṃ vinyasya ca vidhānataḥ //
2.26.12
nyāsāstrinetrasahito hṛdi dhyātvā varāsane /
nābhau vahnigataṃ smṛtvā bhrūmadhye dīpavatprabhum //
2.26.13
sāṃtyā bījāṅkurānantadharmādyairapi saṃyute /
somasūryāgnisaṃpanne mūrtitrayasamanvite //
2.26.14
vāmādibhiśca sahite manonmanyāpyadhiṣṭhite /
śivāsanetmamūrtisthamakṣayākāra rūpiṇam //
2.26.15
aṣṭatriṃśatkalādehṝṃ tritattvasahitaṃ śivam /
aṣṭādaśabhujaṃ devaṃ gajacarmottarīyakam //
2.26.16
siṃhājināṃbaradharamaghoraṃ parameśvaram /
dvātriṃśākṣararūpeṇa dvātriṃśacchaktibhirvṛtam //
2.26.17
sarvābharaṇasaṃyuktaṃ sarvadevanamaskṛtam /
kapālamālābharaṇaṃ sarvavṛścikabhūthamaṇ //
2.26.18
pūrṇoduvadanaṃ saumyaṃ candrakoṭisamaprabham /
candrarekhādharaṃ śaktyā sahitaṃ nīlarūpiṇam //
2.26.19
haste khaḍgaṃ kheṭakaṃ pāśamekeratnaiścitraṃ cāṅkuśaṃ nāgakakṣām /
śarasanaṃ pāśupataṃ tathāstraṃ daṇḍaṃ ca khaṭvāṅgamathāpare ca //
2.26.20
tantrīṃ ca ghaṇṭāṃ vipulaṃ ca śūlaṃ tathāpare ḍāmarukaṃ ca divyam /
vajraṃ gadāṃ ṭaṅkamekaṃ ca dīptaṃ samudraraṃ hastamathāsya śaṃbhoḥ //
2.26.21
varadābhayahastaṃ ca vareṇyaṃ parameśvaram /
bhāvayetpūjayeccāpi vahnau homaṃ ca kārayet //
2.26.22
homaśca pūrvavatsarvo mantrabhedaśca kīrtitaḥ /
aṣṭapuṣpādi gandhādi pūjāstutinivedanam //
2.26.23
antarbaliṃ ca kuṇḍasya vāhneyena vidhānataḥ /
maṇḍalaṃ vidhinā kṛtvā mantrairetairyathākramam //
2.26.24
rudrebhyo mātṛgaṇebhyo yakṣebhyo 'surebhyo grahebhyo rākṣasebhyo nāgebhyo nakṣatrebhyo viśvagaṇebhyaḥ kṣetrapālebhyaḥ atha vāyuvaruṇadigbhāge kṣetrapālabaliṃ kṣipet /
arghyaṃ gandhaṃ ca puṣpaṃ ca dhūpaṃ dīpaṃ ca suvratāḥ /
naivedyaṃ mukhavāsādi nivedyaṃ vai yathāvidhi //
2.26.25
vijñāpyaivaṃ visṛjyātha aṣṭapuṣpaiśca pūjanam /
sarvasāmānyametaddhi pūjāyāṃ munipuṅgavāḥ //
2.26.26
evaṃ saṃkṣepataḥ proktamaghorārcādi suvrata /
aghorārcāvidhānaṃ ca liṅgevā sthāṇḍile 'pi vā //
2.26.27
sthaṇḍilātkoṭiguṇitaṃ liṅgārcanamanuttamam /
liṅgārcanarato vipro mahāpātakasaṃbhavaiḥ //
2.26.28
pāpairapi na lipyeta padmapatramivāṃbhasā /
liṅgasya darśanaṃ puṇyaṃ darśanātsparśanaṃ varam //
2.26.29
arcanādadhikaṃ nāsti brahmaputra na saṃśayaḥ /
evaṃ saṃkṣepataḥ proktamaghorārcanamuttamam //
2.26.30
varṣakoṭiśatenāpi vistareṇa na śakyate //
2.26.30.p1
iti śrīliṅgamahāpurāṇe uttarabhāge ṣaḍviṃśatitamo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (2)
- Liṅga — Sanskrit
- Studies in the Purāṇic Records on Hindu Rites and Customs — R. C. Hazra, English