Lingapurana 2.35
Liṅgapurāṇa 2.35
- Language
- Sanskrit
Contents
- 2.35.11 — 1 part
2.35.1
sanatkumāra uvāca
atha te saṃpravakṣyāmi hemadhenuvidhikramam /
sarvapāpapraśamanaṃ grahadurbhikṣanāśanam //
2.35.2
upasargapraśamanaṃ sarvavyādhi nivāraṇam /
niṣkāṇāṃ ca sahasreṇa suvarṇena tu kārayet //
2.35.3
tadardhenāpi vā samyak tadardhārdhena vā punaḥ /
śatena vā prakartavyā sarvarūpaguṇānvitā //
2.35.4
gorūpaṃ sukhuraṃ divyaṃ sarvalakṣaṇasaṃyutam /
khurāgre vinyasedvajraṃ śṛṅge vai padmarāgakam //
2.35.5
bhruvormadhye nyaseddivyaṃ mauktikaṃ munisattamāḥ /
vauḍūryeṇa stanāḥ kāryā lāṅgūlaṃ nīlataḥ subham //
2.35.6
dantasthāne prakartavyaḥ puṣparāgaḥ suśobhanaḥ /
paśuvatkārayitvā tu vatsaṃ kuryātsuśobhanam //
2.35.7
suvarṇadaśaniṣkeṇa sarvaratnasuśobhitam /
pūrvoktavedikāmadhye maṇḍalaṃ parikalpya tu //
2.35.8
tanmadhye surabhiṃ sthāpya savatsāṃ sarvatattvavit /
savatsāṃ surabhiṃ tatra vastrayugmena veṣṭayet //
2.35.9
saṃpūjayedgāṃ gāyatryā savatsāṃ surabhiṃ punaḥ /
athaikāgnividhānena homaṃ kuryādyathāvidhi //
2.35.10
samidājyavidhānena pūrvavaccheṣamācaret /
śivapūjā prakartavyā liṅgaṃ snāpya ghṛtādibhiḥ //
2.35.11
gāmālabhya ca gāyatryā śivāyādāpayecchubhām /
dakṣiṇā ca prakartavyā triṃśanniṣkā mahāmate //
2.35.11.p1
iti śrīliṅgamahāpurāṇe uttarabhāge hemadhenudānavidhinīrūpaṇaṃ nāma pañcatriṃśo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (5)
- Liṅga — Sanskrit
- Dānakhaṇḍa — Hemādri, Sanskrit
- Caturvargacintāmaṇi — Hemādri, Sanskrit
- Ṣoḍaśamahādānavidhi (Hemādri) — Hemādri, Sanskrit
- Studies in the Purāṇic Records on Hindu Rites and Customs — R. C. Hazra, English