Linga Purana 2.37

Liṅgapurāṇa 2.37

sanatkumārā uvāca
athātaḥ saṃpravakṣyāmi tiladhenuvidhikramam /
pūrvoktamaṇḍape kuryācchivapūjāṃ tu paścime //

tasyāgre madhyato bhūmau padmamālikhya śobhanam /
vastrairācchāditaṃ padmaṃ tanmadhye vinyasecchubham //

tilapuṣpaṃ tu kṛtvātha hemapadmaṃ vinikṣipet /
triṃśanniṣkema kartavyaṃ tadardhārdhena vā punaḥ //

pañcaniṣkeṇa kartavyaṃ tadardhārhdena vā punaḥ /
tamārādhya vidhānena gandhapuṣpādibhiḥ kramāt //

padmasyottaradigbhāge viprānekādaśanyaset /
tānabhyarcya vidhānena gandhapuṣpādibhiḥ kramāt //

ācchādanottarāsaṃgaṃ viprebhyo dāpayetkramāt /
uṣṇīṣaṃ ca pradātavyaṃ kuṇḍaleca vibhūṣite //

hemāṅgulīyakaṃ dattvā brāhmaṇebhyo vidhānataḥ /
ekaṃ daśa ca vastrāṇiṃ teṣāmagre prakīrya ca //

teṣu vastreṣu niḥkṣipyatilādyāni pṛthakpṛthak /
kāṃsyapātraṃ śatapalaṃ vibhidyaikādaśāṃśakam //

ikṣudaṇḍaṃ ca dātavyaṃ brāhmaṇebhyo viśeṣataḥ /
gośṛge tu hiraṇyena dvinīṣkeṇa tu kārayet //

rajatena tu kartavyāḥ khurā niṣkadvayena tu /
evaṃ pṛthakpṛthag dattvā tattileṣu vinikṣipet //

rudraikādaśamantraistu rudrebhyo dāpayettadā /
padmasya pūrvadigbhāge viprāndvādaśa pūjitān //

etenaiva tu mārgeṇa teṣu śraddhāsamanvitaḥ /
dvādaśādhityamantraiśca dāpayedevameva ca //

pūrvavaddakṣiṇe bhāge viprānṣoḍaśa saṃsthitān /
mūrti vighneśamantraiśca dāpayetpūrvavatpunaḥ //

yajamānena kartavyaṃ sarvametadyathākramam /
kevalaṃ rudradānaṃ vā adityebhyo 'tha vā punaḥ //

mūrtyādīnāṃ ca vā deyaṃ yathāvibhavavistaram /
padmaṃ vinyasya rājāsau śeṣaṃ vā kārayennṛpaḥ //

dakṣiṇā ca pradātavyā pañcaniṣkeṇa bhūṣaṇam //

iti śrīliṅgamahāpurāṇe uttarabhāge tiladhenudānavidhinirūpaṇaṃ nāma saptatriṃśo 'dhyāyaḥ

Commentaries (2)