[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Linga Purana](https://indike.org/pramana/in.purana.linga) › 2.3 # Linga Purana 2.3 Liṅgapurāṇa 2.3 - **Language:** Sanskrit ## Contents - [2.3.112](https://indike.org/pramana/in.purana.linga.2.3.112) — 1 part ### [2.3.1](https://indike.org/pramana/in.purana.linga.2.3.1) ambarīṣa uvāca mārkaṇḍeya mahāprājña kena yogena labdhavān / gānavidyāṃ mahābhāga nārado bhagavānmuniḥ // ### [2.3.2](https://indike.org/pramana/in.purana.linga.2.3.2) tuṃbarośca samānatvaṃ kasminkāla upeyivān / etadācakṣva me sarvaṃ sarvajñosi mahāmate // ### [2.3.3](https://indike.org/pramana/in.purana.linga.2.3.3) mārkaṇḍeya uvāca śruto mayāyamartho vai nāradāddevadarśanāt / svayamahā mahātejā nārado 'sau mahāmatiḥ // ### [2.3.4](https://indike.org/pramana/in.purana.linga.2.3.4) saṃtapyamāno bhagavān divyaṃvarṣasahasrakam / nirucchvāsena saṃyuktastuṃbarorgauravaṃ smaran // ### [2.3.5](https://indike.org/pramana/in.purana.linga.2.3.5) tatāpa ca mahāghoraṃ taporāśistapaḥ param / athāntarikṣe śuśrāva nārado 'sau mahāmuniḥ // ### [2.3.6](https://indike.org/pramana/in.purana.linga.2.3.6) vāṇīṃ divyāṃ mahāghoṣāmadbhutāmasarīriṇīm / kimarthaṃ muniśārdūla tapastapasi duścaram // ### [2.3.7](https://indike.org/pramana/in.purana.linga.2.3.7) ulūkaṃ paśya gatvā tvaṃ yadi gāne ratā matiḥ / mānasottaraśaile tu gānabandhuriti smṛtaḥ // ### [2.3.8](https://indike.org/pramana/in.purana.linga.2.3.8) gaccha śīghraṃ ca paśyainaṃ gānavittvaṃ bhaviṣyasi / ityukto vismayā viṣṭo nārado vāgvidāṃ varaḥ // ### [2.3.9](https://indike.org/pramana/in.purana.linga.2.3.9) mānasottaraśaile tu gānabandhuṃ jagāma vai / gandharvāḥ kinnarā yakṣāstathā cāpsarasāṃ gaṇāḥ // ### [2.3.10](https://indike.org/pramana/in.purana.linga.2.3.10) samāsīnāstu parito gānabandhuṃ tatastataḥ / ganavidyāṃ samāpannaḥ sikṣitāstena pakṣiṇā // ### [2.3.11](https://indike.org/pramana/in.purana.linga.2.3.11) snigdhakaṇṭhasvarās tatra samāsīnām udānvitāḥ / tato nāradamālokya gānabandhuruvāca ha // ### [2.3.12](https://indike.org/pramana/in.purana.linga.2.3.12) / praṇipatya yathānyāyaṃ svāgatenābhyapūjayat / kimarthaṃ bhagavānatra cāgato 'si mahāmate // ### [2.3.13](https://indike.org/pramana/in.purana.linga.2.3.13) kiṃ kāryaṃ hi mayā brahman brūhi kiṃ karavāṇi te / nārada uvāca ulūkendra mahāprājña śṛṇusarvaṃ yathātatham // ### [2.3.14](https://indike.org/pramana/in.purana.linga.2.3.14) mama vṛttaṃ pravakṣyāmi purā bhūtaṃ mahādbhutam / atīte hi yuge vidvannārāyaṇasamīpagam // ### [2.3.15](https://indike.org/pramana/in.purana.linga.2.3.15) māṃ vinirdhūya saṃhṛṣṭaḥ samāhūya ca tuṃbarum / lakṣmīsamanvito viṣṇuraśṛṇodgānamuttamam // ### [2.3.16](https://indike.org/pramana/in.purana.linga.2.3.16) brahmādayaḥ surāḥ sarve nirastāḥ sthānato 'cyutāḥ / kauśikādyāḥ samāsīnā gānayogena vai harim // ### [2.3.17](https://indike.org/pramana/in.purana.linga.2.3.17) evamārādhya saṃprāptā gāṇapatyaṃ yathāsukham / tenāhamatiduḥkhārtastapastaptumihāgataḥ // ### [2.3.18](https://indike.org/pramana/in.purana.linga.2.3.18) yaddattaṃ yaddhutaṃ caiva yathā vā śrutameva ca / yadadhītaṃ mayā sarvaṃ kalāṃ nārhati ṣoḍaśīm // ### [2.3.19](https://indike.org/pramana/in.purana.linga.2.3.19) viṣṇormāhātmyayuktasya gāna yogasya vai tataḥ / saṃcintyāhaṃ tapo ghoraṃ tadarthaṃ taptavān dvija // ### [2.3.20](https://indike.org/pramana/in.purana.linga.2.3.20) divyavarṣasahasraṃ vai tato hyaśṛṇuvaṃ punaḥ / vāṇīmākāśasaṃbhūtāṃ tvāmuddiśya vihaṅgama // ### [2.3.21](https://indike.org/pramana/in.purana.linga.2.3.21) ulūkaṃ gaccha devaṣe gānabandhuṃ matiryadi / gāte cedvartate brahman tatra tvaṃ vetsyase cirāt // ### [2.3.22](https://indike.org/pramana/in.purana.linga.2.3.22) ityahaṃ preritastena tvatsamīpamīhāgataḥ / kiṃ karīṣyāmi śiṣyohaṃ tava māṃ pālayāvyaya // ### [2.3.23](https://indike.org/pramana/in.purana.linga.2.3.23) gānabandhuruvāca śṛṇu nārada yadvṛttaṃ purā mama mahāmate / atyāścaryasamāyuktaṃ sarvapāpaharaṃ śubham // ### [2.3.24](https://indike.org/pramana/in.purana.linga.2.3.24) bhuvaneśa iti khyāto rājabhūddhārmikaḥ purā / aśvamedhasahasraiśca vājapeyāyutena ca // ### [2.3.25](https://indike.org/pramana/in.purana.linga.2.3.25) gavāṃ koṭyarbude caiva suvarmasya tathaiva ca / vāsasāṃ rathahastīnāṃ kanyāśvānāṃ tathaiva ca // ### [2.3.26](https://indike.org/pramana/in.purana.linga.2.3.26) datvā sa rājā viprebhyo medinīṃ pratipālayan / nivārayan svake rājye geyayogena keśavam // ### [2.3.27](https://indike.org/pramana/in.purana.linga.2.3.27) anyaṃ vā geyayogena gāyanyadi sa me bhavet / vadhyaḥ sarvātmanā tasmādvedai rīḍyaḥ paraḥ pumān // ### [2.3.28](https://indike.org/pramana/in.purana.linga.2.3.28) gānayogena sarvatra striyo gāyantu nityaśaḥ / sūtamāgadhasaṃghāśca gītaṃ te kārayantu vai // ### [2.3.29](https://indike.org/pramana/in.purana.linga.2.3.29) ityajñāpyamahātejā rājyaṃ vai paryapālayat / tasya rājñaḥ purābhyāśe harimitra iti śrutaḥ // ### [2.3.30](https://indike.org/pramana/in.purana.linga.2.3.30) brāhmaṇo viṣṇubhaktaśca sarvadvandvavivarjitaḥ / nadīpulinamāsādya pratimāṃ ca hareḥ śubhām // ### [2.3.31](https://indike.org/pramana/in.purana.linga.2.3.31) abhyarcya ca yathānyāyaṃ ghṛtadadhyuttaraṃ bahu / miṣṭānnaṃ pāyasaṃ dattvā harerāvedya pūpakam // ### [2.3.32](https://indike.org/pramana/in.purana.linga.2.3.32) praṇipatya yathānyāyaṃ tatra vinyastamānasaḥ / agāyata hariṃ tatra tālavarṇalayānvitam // ### [2.3.33](https://indike.org/pramana/in.purana.linga.2.3.33) atīva snehasaṃyuktastadgatenāntarātmanā / tato rājñaḥ samādeśāccārāstatra samāgatāḥ // ### [2.3.34](https://indike.org/pramana/in.purana.linga.2.3.34) tadarcanādi sakalaṃ nirdūya ca samantataḥ / brāhmaṇaṃ taṃ gṛhītvā te rājñe samyaṅnyavedayan // ### [2.3.35](https://indike.org/pramana/in.purana.linga.2.3.35) tato rājā dvijaśreṣṭhaṃ paribhartsya sudurmatiḥ / rājyānnaryātayāmāsa hṛtvā sarvaṃ dhanādikam // ### [2.3.36](https://indike.org/pramana/in.purana.linga.2.3.36) pratimāṃ ca hareścaiva mlecchā hṛtvā yayuḥ punaḥ / tataḥ kālena mahatā kāladharmamupeyivān // ### [2.3.37](https://indike.org/pramana/in.purana.linga.2.3.37) sa rājā sarvalokeṣu pūjyamānaḥ samantataḥ / kṣudhārtaśca tathā khinno yamamāha suduḥ khitaḥ // ### [2.3.38](https://indike.org/pramana/in.purana.linga.2.3.38) kṣuttṛṭ ca vartate deva svargatasyāpi me sadā / mayā pāpaṃ kṛtaṃ kiṃ vā kiṃ kariṣyāmi vai yama // ### [2.3.39](https://indike.org/pramana/in.purana.linga.2.3.39) yama uvāca tvayā hi sumahatpāpaṃ kṛtamajñānamohataḥ / harimitraṃ prati tadā vāsudevaparāyaṇam // ### [2.3.40](https://indike.org/pramana/in.purana.linga.2.3.40) harimitre kṛtaṃ pāpaṃ vāsudevārcanādiṣu / tena pāpena saṃprāptaḥ kṣudrogastvāṃ sadā nṛpa // ### [2.3.41](https://indike.org/pramana/in.purana.linga.2.3.41) dānayajñādikaṃ sarvaṃ pranaṣṭaṃ te narādhipa / gītavādyasamopetaṃ gāyamānaṃ mahāmatim // ### [2.3.42](https://indike.org/pramana/in.purana.linga.2.3.42) harimitraṃ samāhūya hṛtavānasi taddhanam / upahārādikaṃ sarvaṃ vāsudevasya sannidhau // ### [2.3.43](https://indike.org/pramana/in.purana.linga.2.3.43) tava bhṛtyaistadā luptaṃ pāpaṃ cakrustvadājñayā / hareḥ kīrtiṃ vinā cānyadbrahmaṇena nṛpottama // ### [2.3.44](https://indike.org/pramana/in.purana.linga.2.3.44) na geyayoge gātavyaṃ tasmātpāpaṃ kṛtaṃ tvayā / naṣṭaste sarvalokodya gacca parvatakoṭaram // ### [2.3.45](https://indike.org/pramana/in.purana.linga.2.3.45) pūrvotsṛṣṭaṃ svadehaṃ taṃ khādannityaṃ nikṛtya vai / tasminkoṇe tvimaṃ dehaṃ khādannityaṃ kṣudhanvitaḥ // ### [2.3.46](https://indike.org/pramana/in.purana.linga.2.3.46) mahānirayasaṃsthastvaṃ yāvanmanvantaraṃ bhavet / manvantare tato 'tīte bhūmyāṃ tvaṃ ca bhaviṣyasi // ### [2.3.47](https://indike.org/pramana/in.purana.linga.2.3.47) tataḥ kālena saṃprāpya mānuṣyamavagacchasi / gānabandhuruvāca evamuktvā yamo vidvāṃstatraivāntaradhīyata // ### [2.3.48](https://indike.org/pramana/in.purana.linga.2.3.48) harimitro vimānena stūyamāno gaṇādhipaiḥ / viṣṇulokaṃ gataḥ śrīmān saṃgṛhya gamabāndhavān // ### [2.3.49](https://indike.org/pramana/in.purana.linga.2.3.49) bhuvaneśo nṛpo hyasmin koṭare parvatasya vai / khādamānaḥ śavaṃ nityam āste kṣuttṛṭsamanvitaḥ // ### [2.3.50](https://indike.org/pramana/in.purana.linga.2.3.50) adrākṣaṃ taṃ nṛpaṃ tatra sarvametanmamoktavān / samālokyāhamājñāya harimitraṃ sameyivān // ### [2.3.51](https://indike.org/pramana/in.purana.linga.2.3.51) vimānenārkavarṇena gacchantamamarairvṛtam / indradyumnaprasādena prāptaṃ me hyāyuruttamam // ### [2.3.52](https://indike.org/pramana/in.purana.linga.2.3.52) tenāhaṃ harimitraṃ vai dṛṣṭavān asmi suvrata / tadaiśvaryaprabhāvena mano me samupāgatam // ### [2.3.53](https://indike.org/pramana/in.purana.linga.2.3.53) gānavidyāṃ prati tadā kinnaraiḥ samupāviśam / ṣaṣṭiṃ varṣasahasrāṇāṃ gānayogena me mune // ### [2.3.54](https://indike.org/pramana/in.purana.linga.2.3.54) jihvā prasāditā spaṣṭā tato gānamaśikṣayam / tatastu dviguṇenaiva kālenābhūdiyaṃ mama // ### [2.3.55](https://indike.org/pramana/in.purana.linga.2.3.55) gānayogasamāyuktā gatā manvantarā daśa / gānācāryo 'bhavaṃ tatra gandharvādyāḥ samāgatāḥ // ### [2.3.56](https://indike.org/pramana/in.purana.linga.2.3.56) ete kinnarasaṃghā vai māmācāryamupāgatāḥ / tapasā naiva śakyā vai gānavidyā tapodhana // ### [2.3.57](https://indike.org/pramana/in.purana.linga.2.3.57) tasmācchrutena saṃyukto mattastvaṃ gānamāpnuhi / evamukto munistaṃ vai praṇipatya jagau tadā // ### [2.3.58](https://indike.org/pramana/in.purana.linga.2.3.58) tacchṛṇuṣva muniśreṣṭha vāsudevaṃ namasya tu / mārkaṇḍeya uvāca ulūkenaivamuktastu nārado munisattamaḥ // ### [2.3.59](https://indike.org/pramana/in.purana.linga.2.3.59) śikṣākrameṇa saṃyuktastatra gānamāśikṣayat / gānabandhustadāhedaṃ tyaktalajjo bhavādhunā // ### [2.3.60](https://indike.org/pramana/in.purana.linga.2.3.60) ulūka uvāca strīsaṃgame tathā gīte dyūte vyākhyānasaṃgame / vyavahāre tathāhāre tvarthānāṃ ca samāgame // ### [2.3.61](https://indike.org/pramana/in.purana.linga.2.3.61) āye vyaye tathā nityaṃ tyaktalajjastu vai bhavet / na kuñcitena gūḍhena nityaṃ prāvaramādibhiḥ // ### [2.3.62](https://indike.org/pramana/in.purana.linga.2.3.62) hastavikṣepabhāvena vyādi tāsyena caiva hi / niryātajihvāyogena na geyaṃ hi kathañcana // ### [2.3.63](https://indike.org/pramana/in.purana.linga.2.3.63) na gāyedūrdhvabāhuśca nordhvadṛṣṭiḥ kathañcana / svāṅgaṃ nirīkṣamāṇena paraṃ saṃprekṣatā tathā // ### [2.3.64](https://indike.org/pramana/in.purana.linga.2.3.64) saṃghaṭṭe ca tathotthāne kaṭisthānaṃ na śasyate / hāso roṣastathā kaṃpastathānyatra smṛtiḥ punaḥ // ### [2.3.65](https://indike.org/pramana/in.purana.linga.2.3.65) naitāni śastarūpāṇi gānayoge mahāmate / naikahastena śakyaṃ syāttālasaṃghaṭṭanaṃ mune // ### [2.3.66](https://indike.org/pramana/in.purana.linga.2.3.66) kṣudhārttena bhayārtena tṛṣṇārtena tathaiva ca / gānayoge na kartavyo nāndhakāre kathañcana // ### [2.3.67](https://indike.org/pramana/in.purana.linga.2.3.67) evamādīni cānyāni na kartavyāni gāyatā / mārkaṇḍeya uvāca evamuktaḥ sa bhagavāṃstenoktairvidhilakṣaṇaiḥ / aśikṣayattathā gītaṃ divyaṃ varṣasahasrakam // ### [2.3.68](https://indike.org/pramana/in.purana.linga.2.3.68) tataḥ samastasaṃpanno gītaprastārakādiṣu / vipañcyādiṣu saṃpannaḥ sarvasvaravibhāgavit // ### [2.3.69](https://indike.org/pramana/in.purana.linga.2.3.69) ayutāni ca ṣaṭtriṃśatsahasrāṇi śatāni ca / svarāṇāṃ bhedayogena jñātavānmunisattamaḥ // ### [2.3.70](https://indike.org/pramana/in.purana.linga.2.3.70) tato gandharvasaṃghāśca kinnarāṇāṃ tathaiva ca / muninā saha saṃyuktāḥ prītiyuktā bhavanti te // ### [2.3.71](https://indike.org/pramana/in.purana.linga.2.3.71) gānabandhuṃ muniḥ prāha prāpya gānamanuttamam / tvāṃ samāsādya saṃpannastvaṃ hi gītaviśāradaḥ // ### [2.3.72](https://indike.org/pramana/in.purana.linga.2.3.72) dhvāṅkṣaśatro mahāprājña kimācārya karomi te / gānabandhuruvāca brahmaṇo divase brahman manavastu caturdaśa // ### [2.3.73](https://indike.org/pramana/in.purana.linga.2.3.73) tatastrai lokyasaṃplāvo bhaviṣyati mahāmune / tāvanme tvāyuṣo bhāvastāvanme paramaṃ śubham // ### [2.3.74](https://indike.org/pramana/in.purana.linga.2.3.74) manasādhyāhitaṃ me syāddakṣiṇā munisattama / nārada uvāca atītakalpasaṃyoge garuḍastvaṃ bhaviṣyasi // ### [2.3.75](https://indike.org/pramana/in.purana.linga.2.3.75) svasti te 'stu mahāprājña gamiṣyāmi prasīda mām / mārkaṇḍeya uvāca evamuktvā jagāmatha nāradopi janārdanam // ### [2.3.76](https://indike.org/pramana/in.purana.linga.2.3.76) śvetadvīpe hṛṣīkeśaṃ gāpayāmāsa gītakān / tatra śrutvā tu bhagavānnāradaṃ prāha mādhavaḥ // ### [2.3.77](https://indike.org/pramana/in.purana.linga.2.3.77) tuṃbarorna viśiṣṭosi gītairadyāpi nārada / yadā viśiṣṭo bhavitā taṃ kālaṃ pravadāmyaham // ### [2.3.78](https://indike.org/pramana/in.purana.linga.2.3.78) gānabandhuṃ samāsādya gānārthajño bhavānasi / manorvaivasvatasyāhamaṣṭaviśatime yuge // ### [2.3.79](https://indike.org/pramana/in.purana.linga.2.3.79) dvāṃparāṃ te bhavaṣyāmi yudavaṃśakulodbhavaḥ / devakyāṃ vasudevasya kṛṣṇo nāmnā mahāmate // ### [2.3.80](https://indike.org/pramana/in.purana.linga.2.3.80) tadānīṃ māṃ samāsādya smārayethā yathātatham / tatra tvāṃ gītasaṃpannaṃ kariṣyāmi mahāvratam // ### [2.3.81](https://indike.org/pramana/in.purana.linga.2.3.81) tuṃbarośca samañcaiva tathātiśayasaṃyutam / tāvatkālaṃ yatāyogaṃ devagandharvayoniṣu // ### [2.3.82](https://indike.org/pramana/in.purana.linga.2.3.82) śikṣayasva yatānyāyamityuktvāntaradhīyata / tato muniḥ praṇamyainaṃ tathātiśayasaṃyutam // ### [2.3.83](https://indike.org/pramana/in.purana.linga.2.3.83) devarṣirdevasaṃkāśaḥ sarvābharaṇabhūṣitaḥ / tapasāṃ nidhiratyantaṃ vāsudevaparāyaṇaḥ // ### [2.3.84](https://indike.org/pramana/in.purana.linga.2.3.84) skandhe vipañcīmāsādya sarvalokāṃścacāra saḥ / vāruṇaṃ yāmyamāgneyamaidraṃ kauberameva ca // ### [2.3.85](https://indike.org/pramana/in.purana.linga.2.3.85) vāyavyaṃ ca tatheśānaṃ saṃsadaṃ prāpya dharmavit / gāyamāno hariṃ samyagvīṇāvādavicakṣaṇaḥ // ### [2.3.86](https://indike.org/pramana/in.purana.linga.2.3.86) gandharvāpsarasāṃ saṃghaiḥ pūjyamānastata stataḥ / brahmalokaṃ samāsādya kasmiṃścitkālaparyaye // ### [2.3.87](https://indike.org/pramana/in.purana.linga.2.3.87) hāhāhūhūśca gandharvau gītavādyaviśāradau / brahmaṇo gāyakau divyau nityau gandharvasattamau // ### [2.3.88](https://indike.org/pramana/in.purana.linga.2.3.88) tatra tābhyāṃ samāsādya gāyamāno hariṃ prabhum / brahmaṇā ca mahātejāḥ pūjito munisattamaḥ // ### [2.3.89](https://indike.org/pramana/in.purana.linga.2.3.89) taṃ praṇamya mahātmānaṃ sarvalokapitāmaham / cacāra ca yathākāmaṃ sarvalokeṣu nāradaḥ // ### [2.3.90](https://indike.org/pramana/in.purana.linga.2.3.90) tataḥ kālena mahatā gṛhaṃ prāpya ca tuṃbaroḥ / vīṇāmādāya tatrastho hyagāyata mahāmuniḥ // ### [2.3.91](https://indike.org/pramana/in.purana.linga.2.3.91) svarakalpāstu tatrasthāḥ ṣaḍjādyāḥ sapta vai matāḥ / krīḍato bhagavāndṛṣṭvā nirgataśca susatvaram // ### [2.3.92](https://indike.org/pramana/in.purana.linga.2.3.92) śikṣayā māsa bahuśastatra tatra mahāmatiḥ / śramayogena saṃyukto nāradopi mahāmuniḥ // ### [2.3.93](https://indike.org/pramana/in.purana.linga.2.3.93) saptasvarāṅganāḥ paśyan gānavidyāviśāradaḥ / āsīdvīṇā samāyoge na tāstantryaḥ prapedire // ### [2.3.94](https://indike.org/pramana/in.purana.linga.2.3.94) tato ravaitake kṛṣṇaṃ praṇipatya mahāmuniḥ / vijñāpayadaśeṣaṃ tu śvetadvīpe tu yat purā // ### [2.3.95](https://indike.org/pramana/in.purana.linga.2.3.95) nārāyaṇena kathitaṃ gānayogamanuttamam / tacchrutvā prāhasankṛṣṇaḥ prāha jāṃbavatīṃ mudā // ### [2.3.96](https://indike.org/pramana/in.purana.linga.2.3.96) etaṃ munivaraṃ bhadre śikṣayasva yathāvidhi / vīṇāgāna samāyoge tathetyuktvā ca sā harim // ### [2.3.97](https://indike.org/pramana/in.purana.linga.2.3.97) prahasaṃtī yathāyogaṃ śikṣayāmāsa taṃ munim / tataḥ saṃvatsare pūrṇe punarāgamya mādhavam // ### [2.3.98](https://indike.org/pramana/in.purana.linga.2.3.98) praṇipatyāgratastasthau punarāha sa keśavaḥ / satyāṃ samīpamāgaccha śikṣayasva yathāvidhi // ### [2.3.99](https://indike.org/pramana/in.purana.linga.2.3.99) tathetyuktvā satyabhāmāṃ praṇipatyajagau muniḥ / tayā sa sikṣito vidvān pūrṇe saṃvatsare punaḥ // ### [2.3.100](https://indike.org/pramana/in.purana.linga.2.3.100) vāsudevamiyukto 'sau rukmiṇīsadanaṃ gataḥ / aṅganābhistatastābhirdāsībhirmunisattamaḥ // ### [2.3.101](https://indike.org/pramana/in.purana.linga.2.3.101) ukto 'sau gāyamānopi na svaraṃ vetsi vai mune / tataḥ śrameṇa mahatā vatsaratrayasaṃyutam // ### [2.3.102](https://indike.org/pramana/in.purana.linga.2.3.102) śikṣitosau tadā devyā rukmiṇyāpi jagau muniḥ / tataḥ svarāṅganāḥ prāpyaḥ tantrīyogaṃ mahāmuneḥ // ### [2.3.103](https://indike.org/pramana/in.purana.linga.2.3.103) āhūya kṛṣṇo bhagavān svayameva mahāmunim / aśikṣayadameyātmā gānayogamanuttamam // ### [2.3.104](https://indike.org/pramana/in.purana.linga.2.3.104) tato 'tiśayamāpannastuṃbarormunisattamaḥ / tato nanarta devarṣiḥ praṇipatya janārdanam // ### [2.3.105](https://indike.org/pramana/in.purana.linga.2.3.105) uvāca ca hṛṣīkeśaḥ sarvajñastvaṃ mahāmune / prahasya gānayogena gāyasva mama sannidhau // ### [2.3.106](https://indike.org/pramana/in.purana.linga.2.3.106) etatte prārthitaṃ prāptaṃ mama loke tathaiva ca / nityaṃ tuṃbaruṇā sārdhaṃ gāyasva ca yathātatham // ### [2.3.107](https://indike.org/pramana/in.purana.linga.2.3.107) evamukto munistatra yathāyogaṃ cacāra saḥ / yadā saṃpūjayan kṛṣṇo rudraṃ bhuvananāyakam // ### [2.3.108](https://indike.org/pramana/in.purana.linga.2.3.108) tadā jagai harestasya niyogācchaṅkarāya vai / rukmiṇyā saha satyā ca jāṃbavatyā mahāmuniḥ // ### [2.3.109](https://indike.org/pramana/in.purana.linga.2.3.109) kṛṣṇena ca nṛpaśreṣṭha śrutijātiviśāradaḥ / eṣa vo muniśārdūlāḥ prokto gītakramo muneḥ // ### [2.3.110](https://indike.org/pramana/in.purana.linga.2.3.110) brāhmaṇo vāsudevākhyāṃ gāyamāno bhṛśaṃ nṛpa / hareḥ sālokyamāpnoti rudragāno 'dhiko bhavet // ### [2.3.111](https://indike.org/pramana/in.purana.linga.2.3.111) anyathā narakaṃ gacchedgāyamānonyadeva hi / karmaṇā manasā vācā vāsudevaparāyaṇaḥ // ### [2.3.112](https://indike.org/pramana/in.purana.linga.2.3.112) gāyan śṛṇvaṃstamāpnoti tasmādgeyaṃ paraṃ viduḥ // ### [2.3.112.p1](https://indike.org/pramana/in.purana.linga.2.3.112.p1) iti śrīliṅgamahāpurāṇe uttarabhāge vaiṣṇavagītakathanaṃ nāma tṛtīyo 'dhyāyaḥ ## Commentaries (1) - [Śivatoṣiṇī](https://indike.org/pramana/in.purana.linga!ganesa-ballala-natu.135.41) — Gaṇeśa Ballāla Nātū, Sanskrit ## Linked texts (1) - [Himavatkhaṇḍa](https://indike.org/pramana/in.purana.sthala.himalaya.himavatkhanda.88.15-2) — Sanskrit ## Discussed in (1) - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c7.s9.10) — Hazra 1940, English --- Source: [https://indike.org/pramana/in.purana.linga.2.3](https://indike.org/pramana/in.purana.linga.2.3) · Pramāṇa