Lingapurana 2.4
Liṅgapurāṇa 2.4
- Language
- Sanskrit
Contents
- 2.4.21 — 1 part
2.4.1
ṛṣaya ūcuḥ
vaiṣṇavā iti ye proktā vāsudevaparāyaṇāḥ /
kāni cihnāni teṣāṃ vai tanno brahi mahāmate //
2.4.2
teṣāṃ vā kiṃ karotyeṣa bhagavān bhūtabhāvanaḥ /
etanme sarvamācakṣva sūta sarvārthavittama //
2.4.3
sūta uvāca
aṃbarīṣeṇa vai pṛṣṭo mārkaṇḍeyaḥ purāmuniḥ /
yuṣmabhiradya yat proktaṃ tadvadāmi yathātatham //
2.4.4
mārkaṇḍeya uvāca
śṛṇu rājanyathānyāyaṃ yanmāṃ tvaṃ paripṛcchasi /
yatrāste viṣṇubhaktastu tatra nārāyaṇaḥ sthitaḥ //
2.4.5
viṣṇureva hi sarvatra yeṣāṃ vai devatā smṛtā /
kīrtyamāne harau nityaṃ romāñco yasya vartate //
2.4.6
kaṃpaḥ svedastathakṣeṣu dṛsyante jalabindavaḥ /
viṣṇubhaktisamāyuktān śrautasmārtapravartakān //
2.4.7
prīto bhavati yo dṛṣṭvā vaiṣṇavo 'sau prakīrtitaḥ /
nānyadācchādayedvastraṃ vaiṣṇavo jagato 'raṇe //
2.4.8
viṣṇubhaktamathāyāntaṃ yo dṛṣṭvā sanmukhasthitaḥ /
praṇāmādi karotyevaṃ vāsudeve yathā tathā //
2.4.9
sa vai bhakta iti jñeyaḥ sa jayī syājjagattraye /
rūkṣākṣarāṇi śṛṇvanvai tathā bhāgavateritaḥ //
2.4.10
praṇāmapūrvaṃ kṣāntyā vai yo vadedvaiṣṇavo hi saḥ /
gandhapuṣpādi kaṃ sarvaṃ śirasā yo hi dhārayet //
2.4.11
hareḥ sarvamitītyevaṃ mattvāsau vaiṣṇavaḥ smṛtaḥ /
viṣṇukṣetre śubhānyeva karoti snehasaṃyutaḥ //
2.4.12
pratimāṃ ca harernityaṃ pūjayetprayatātmavān /
viṣṇubhaktaḥ sa vijñeyaḥ karmaṇā manasā girā //
2.4.13
nārāyaṇaparo nityaṃ mahābhāgavato hi saḥ /
bhojanārādhanaṃ sarvaṃ yathāśaktyā karoti yaḥ //
2.4.14
viṣṇubhaktasya ca sadā yathānyāyaṃ hi kathyate /
nārāyaṇaparo vidvānyasyānnaṃ prītamānasaḥ //
2.4.15
aśrāti taddharerāsyaṃ gatamannaṃ na saṃśayaḥ /
svārcanādapi viśvātmā prīto bhavati mādhavaḥ //
2.4.16
mahābhāgavate tacca dṛṣṭvāsau bhaktavatsalaḥ /
vāsudevaparaṃ dṛṣṭvā vaiṣṇavaṃ dagdhakilbiṣam //
2.4.17
devāpi bhītāstaṃ yānti praṇipatya yathāgatam /
śrūyatāṃ hi purāvṛttaṃ viṣṇubhaktasya vaibhavam //
2.4.18
dṛṣṭvā yamo 'pi vai bhaktaṃ vaiṣṇavaṃ dagdhakilbiṣam /
utthāya prāñjalirbhūtvā nanāma bhṛgunandanam //
2.4.19
tasmātsaṃpūjayedbhaktyā vaiṣṇavānviṣṇuvannaraḥ /
sa yāti viṣṇusāmīpya nātra kāryā vicāraṇā //
2.4.20
anyabhaktasahasrebhyo viṣṇubhakto viśiṣyate /
viṣṇubhaktasahasrebhyo rudrabhakto viśiṣyate /
rudrabhaktātparataro nāstiloke na saśaṃyaḥ //
2.4.21
tasmāttu vaiṣṇavaṃ cāpi rudrabhaktamathāpi vā /
pūjayetsarvayatnena dharmakāmārthamuktaye //
2.4.21.p1
iti śrīliṅgamahāpurāṇe uttarabhāge viṣṇubhaktakathanaṃ nāma caturtho 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (3)
- Haribhaktivilāsa — Gopāla Bhaṭṭa Gosvāmin & Sanātana Gosvāmin 1535, Sanskrit
- Liṅga — Sanskrit
- Studies in the Purāṇic Records on Hindu Rites and Customs — R. C. Hazra, English