Lingapurana 2.46
Liṅgapurāṇa 2.46
- Language
- Sanskrit
Contents
- 2.46.21 — 1 part
2.46.1
ṛṣaya ūcuḥ
jīvacchrāddhavidhiḥ proktastvayā sūta mahāmate /
mṛrkhāṇāmapi mokṣārthamasmākaṃ romaharṣaṇa //
2.46.2
rudrādityavasūnāṃ ca śakraādīnāṃ ca suvrata /
pratiṣṭhā kīdṛśī śaṃbhorligamūrteśca śobhanā //
2.46.3
viṣṇoḥ śakrasya devasya brahmaṇaśca mahātmanaḥ /
agner yasya nirṛter varuṇasya mahādyuteḥ //
2.46.4
vāyoḥ somasya yakṣasya kuberasyāmitātmanaḥ /
īśānasya dharāyāśca śrīpratiṣṭhātha vā katham //
2.46.5
durgāśivāpratiṣṭhā ca haimavatyāśca śobhanā /
skandasya gaṇarājasya nandinaśca viśeṣataḥ //
2.46.6
tathānyeṣāṃ ca devānāṃ gaṇānāmapi vā punaḥ /
pratiṣṭhālakṣaṇaṃ sarvaṃ vistāradvaktumarhasi //
2.46.7
bhavānsarvārthatattvajño rudrabhaktaśca suvrata /
kṛṣṇadvaipāyanasyāsi sākṣāttvamaparā tanuḥ //
2.46.8
sumanturjaiminiścaiva pailaśca paramarṣayaḥ /
gurubhaktiṃ tathā kartuṃ samartho romaharṣaṇaḥ //
2.46.9
iti vyāsasya vipulā gāthā bhāgīrathītaṭe /
ekaḥ samo vā bhinno vā śiṣyastasya mahādyuteḥ //
2.46.10
vaiśaṃpāyanatulyo 'si vyāsaśiṣyeṣu bhūtale /
tasmādasmākamakhilaṃ vaktumarhasi sāṃpratam //
2.46.11
evamuktvā sthiteṣveva teṣu sarveṣu tatra ca /
babhūva vismayo 'tīva munīnāṃ tasya cāgrataḥ //
2.46.12
athāntarikṣe vipulā sākṣāddevī sarasvatī /
alaṃ munīnāṃ praśro 'yamiti vācā babhūva ha //
2.46.13
sarvaṃ liṅgamayaṃ lokaṃ sarvaṃ liṅge pratiṣṭhitam /
tasmātsarvaṃ parityajya sthāpayetpūjayecca tat //
2.46.14
liṅgasthāpanasanmārganihitasvāyatāsinā /
āśu brahmāṇḍamudbhidya nirgacchedaviśaṅkayā //
2.46.15
upedrāṃbhojagarbhendrayamāṃbudhanadeśvarāḥ /
tathānye ca śivaṃ sthāpya liṅgamūrti maheśvaram //
2.46.16
sveṣusveṣu ca pakṣeṣu pradhānāste yathā dvijāḥ /
brahmā haraśca bhagavānviṣṇurdevī ramā dharā //
2.46.17
lakṣmīrdhṛtiḥ smṛtiḥ prajñā dharā durgā śacī tathā /
rudrāśca vasavaḥ skando viśākhaḥ śākha eva ca //
2.46.18
naigameśaśca bhagavāṃllokapālā grahāstathā /
sarve nandipurogāśca gaṇā gaṇapatiḥ prabhuḥ //
2.46.19
pitaro munayaḥ sarve kuberādyāśca suprabhāḥ /
āditya vasavaḥ sāṃkhyā aśvinau ca bhiṣagvarau //
2.46.20
viśvedevāśca sādhyāśca paśavaḥ pakṣiṇo mṛgāḥ /
brahmādisthāvarāntaṃ ca sarvaṃ liṅge pratiṣṭhitam //
2.46.21
tasmātsarvaṃ parityajya sthāpayelliṅgamavyayam /
yatnena stāpitaṃ sarvaṃ pūjitaṃ pūjayedyadi //
2.46.21.p1
iti śrīliṅgamahāpurāṇe uttarabhāge ṣaṭcatvāriṃśo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (2)
- Prāṇatoṣiṇī — Rāmatoṣaṇa Śarman 1796, Sanskrit
- Śaivasarvasvasāra — Vidyāpati, Sanskrit