Pramāṇa · Search · About · API

Lingapurana 2.47

Liṅgapurāṇa 2.47

Language
Sanskrit

Contents

2.47.1

sūta uvāca
iti niśamya kṛtāñjalaya stadā divi mahāmunayaḥ kṛtaniścayāḥ /
śivataraṃ śivamīśvaramavyayaṃ manasi liṅgamayaṃ praṇipatya te //

2.47.2

sakaladevapatirbhagavānajo hariraśeṣapatirguruṇā svayam /
munivarāśca gaṇāśca surāsurā naravarāḥ śivaliṅgamayāḥ punaḥ //

2.47.3

śrutvaivaṃ munayaḥ sarve ṣaṭkulīyāḥ samāhitāḥ /
saṃtyajya sarvaṃ devasya pratiṣṭhāṃ kartumudyatāḥ //

2.47.4

apṛcchansūtamanaghaṃ harṣagadgadayā girā /
liṅgapratiṣṭhāṃ vipulāṃ sarve te śaṃsitavratāḥ //

2.47.5

sūta uvāca
pratiṣṭhāṃ liṅgamūrtervo yathāvadanupūrvaśaḥ /
pravakṣyāmi samāsena dharmakāmārthamuktaye //

2.47.6

kṛtvaiva liṅgaṃ vidhinā bhuvi liṅgeṣu yatnataḥ /
liṅgamekatamaṃ śailaṃ brahmaviṣṇuśivātmakam //

2.47.7

hemaratnamayaṃ vāpi rājataṃ tāmrajaṃ tu vā /
savedikaṃ sasūtraṃ ca samyagvistṛtamastakam //

2.47.8

viśodhya sthāpayedbhaktyā savedikamanuttamam /
liṅgavedī umā devī liṅgaṃ sākṣānmaheśvaraḥ //

2.47.9

tayoḥ sapūjanādeva devī devaśca pūjitau /
pratiṣṭhayā ca deveśo devyā sārdhaṃ pratiṣṭhitaḥ //

2.47.10

tasmātsavedikaṃ liṅgaṃ sthāpayetsthāpakottamaḥ //

2.47.11

mūle brahmā vasati bhagavānmadhyabhāge ca viṣṇuḥ sarveśānaḥ /
paśupatirajo rudramūrtirvareṇyaḥ /
tasmālliṅgaṃ gurutarataraṃ pūjayetsthāpayedvā yasmātpūjyo gaṇapatirasau devamukhyaiḥ samastaiḥ //

2.47.12

gandhaiḥ sragdhūpadīpaiḥ snapanahutabalistotramantropahārairnityaṃ ye 'bhyarcayānti tridaśavaratanuṃ liṅgamūrtiṃ maheśam /
garbhādhānādināśakṣayabhayarahitā devagandharvamukhyaiḥ siddhairvandyāśca pūjyā gaṇavaranamitāste bhavantyaprameyāḥ //

2.47.13

tasmādbhaktyopacāreṇa sthāpayetparameśvaram /
pūjayecca viśeṣeṇa liṅgaṃ sarvārthasiddhaye //

2.47.14

samarcya sthāpayelliṅgaṃ tīrthamadhye śivāsane /
kūrcavastrādibhirliṅgamācchādya kalaśaiḥ punaḥ //

2.47.15

lokapālādidaivatyaiḥ sakūrcaiḥ sākṣataiḥ śubhaiḥ /
utkūrcaiḥ svastikādyaiśca citratantukaveṣṭitaiḥ //

2.47.16

vajrādikāyudopetaiḥ savastraiḥ sapidhānakaiḥ /
lakṣayetparito liṅgamīśānena pratiṣṭhitam //

2.47.17

dhūpadīpasamopetaṃ vitānavitatāṃbaram /
lokapāladhvajaiścaiva gajādimahiṣādibhiḥ //

2.47.18

citritaiḥ pūjitaiścaiva darbhamālā ca śobhanā /
sarvalakṣaṇasaṃpūrṇā tayā bāhye ca veṣṭayet //

2.47.19

tatodhivāsayettoye dhūpadīpasamanvite /
pañcāhaṃ vā tryahaṃvātha ekarātramadhāpi vā //

2.47.20

vedādhyayanasaṃpanno nṛtyagītādimaṅgalaiḥ /
kiṅkiṇīravakopetaṃ tālavīṇāravairapi //

2.47.21

īkṣayetkālamavyagro yajamānaḥ samāhitaḥ /
utthāpya svastikaṃ dhyāyenmaṇḍape lakṣaṇānvite //

2.47.22

saṃskṛte vedisaṃyukte navakuṇḍena saṃvṛte /
pūrvokta vidhinā yukte sarvalakṣaṇasaṃyute //

2.47.23

aṣṭamaṇḍalasaṃyukte digdhvajāṣṭakasaṃyute /
pūrvoktalakṣaṇopetaiḥ kuṇḍaiḥ prāgāditaḥ kramāt //

2.47.24

pradhānaṃ kuṇḍamīśānyāṃ caturasraṃ vidhīyate /
athavā pañcakuṇḍaikaṃ sthaṇḍilaṃ caikameva ca //

2.47.25

yajñopakaraṇaiḥ sarvaiḥ śivārcāyāṃ hi bhūṣaṇaiḥ /
vedimadhye mahāśayyāṃ pañcatūlīprakalpitām //

2.47.26

kalpayetkāñcanopetāṃ sitavastrāvaguṇṭhitām /
prakalpyaivaṃ śivaṃ caiva sthāpayetparameśvaram //

2.47.27

prākśiraskaṃ nyaselliṅgamīśānena yathāvidhi /
ratnanyāse kṛte pūrva kevalaṃ kalaśaṃ nyaset //

2.47.28

liṅgamācchādya vastrābhyāṃ kūrcena ca samantataḥ /
ratnanyāse prasakte 'tha vāmādyā nava śaktayaḥ //

2.47.29

navaratnaṃ hiraṇyādyaiḥ pañcagavyena saṃyutaiḥ /
sarvadānyasamopetaṃ śilāyāmapi vinyaset //

2.47.30

sthāpayedbrahmaliṅgaṃ hi śivagāyatrisaṃyutam /
kevalaṃ praṇavenāpi sthāpayecchivamavyayam //

2.47.31

brahmajajñānamantreṇa brahmabhāgaṃ prabhostathā /
viṣṇugāyatriyā bhāgaṃ vaiṣṇavaṃ tvatha vinyaset //

2.47.32

sūtre tattvatrayopete praṇavena pravinyaset /
sarvaṃ namaḥ śivāyeti namo haṃsaḥ śivāya ca //

2.47.33

rudrādhyāyena vā sarvaṃ parimṛjya ca vinyaset /
sthāpayedbrahmabhiścaiva kalaśānvai samantataḥ //

2.47.34

vedimadhye nyasetsarvānmūrvoktavidhisaṃyutān /
madhyakuṃbhe śivaṃ devīṃ dakṣiṇe parameśvarīm //

2.47.35

skandaṃ tayośca madhye tu skandakuṃbhe sucitrite /
brahmāṇaṃ skandakuṃbhe vā īśakumbhe hariṃ tathā //

2.47.36

athavā śivakuṃbhe ca brahmāṅgāni ca vinyaset /
śivo maheśvaraścaiva rudro viṣṇuḥ pitāmahaḥ //

2.47.37

brahmāṇyevaṃ samāsena hṛdayādīni cāṃbikā /
vedimadhye nyasetsarvānpūrvoktavidhisaṃyutān //

2.47.38

vardhanyāṃ sthāpayeddevīṃ gandhatoyena pūrya ca /
hiraṇyaṃ rajataṃ ratnaṃ śivakuṃbhe pravinyaset //

2.47.39

vardhanyāmāpi yatnena gāyatryaṅgaiśca suvratāḥ /
vidyeśvarāndiśaṃ kuṃbhe brahmakūrcena pūrite //

2.47.40

aṃnateśādidevāṃśca praṇavādinamontakam /
navavastraṃ pratighaṭamaṣṭakuṃbheṣu dāpayet //

2.47.41

vidyeśvarāṇāṃ kuṃbheṣu hemaratnādi vinyaset /
vaktrakrameṇa hotavyaṃ gāyatryaṅgakrameṇa ca //

2.47.42

jayādisviṣṭaparyantaṃ sarvaṃ pūrvavadācaret /
secayecchivakuṃbhena vardhanyā vaiṣṇavena ca //

2.47.43

paitā mahena kuṃbhena brahmabhāgaṃ viśeṣataḥ /
vidyeśvarāṇāṃ kuṃbhaiśca secayetparameśvaram //

2.47.44

vinyasetsarvamantrāṇi pūrvavatsusamāhitaḥ /
pūjayetsnapanaṃ kṛtvā sahasrādiṣu saṃbhavaiḥ //

2.47.45

dakṣiṇā ca pradātavyā sahasrapaṇamuttamam /
itareṣāṃ tadardhaṃ syāttadardhaṃ vā vidhīyate //

2.47.46

vastrāṇi ca pradhānasya kṣetrabhūṣaṇagodhanam /
utsavaśca prakartavyo homayagabaliḥ kramāt //

2.47.47

navāhaṃ vāpi saptāhamekāhaṃ ca tryahaṃ tathā /
homaśca pūrvavatprokto nityamabhyarcya śaṅkaram //

2.47.48

devānāṃ bhāskarādīnāṃ homaṃ pūrvavadeva tu /
abhyantare tathā bāhye vahnau nityaṃ samarcayet //

2.47.49

ya evaṃ sthāpayelliṅgaṃ sa eva parameśvaraḥ /
tena devagaṇā rudrā ṛṣayo 'psarasastathā //

2.47.50

sthāpitāḥ pūjitāścaiva trailokyaṃ sacarācaram //

2.47.50.p1

iti śrīliṅgamahāpurāṇe uttarabhāge liṅgasthāpanaṃ nāma saptacatvāriṃśo 'dhyāyaḥ

Commentaries (1)

Linked texts (3)