Lingapurana 2.48
Liṅgapurāṇa 2.48
- Language
- Sanskrit
Contents
- 2.48.50 — 1 part
2.48.1
sūta uvāca
sarveṣāmapi devānāṃ pratiṣṭhāmapi vistarāt /
svairmatrairyāgakuṇḍāni vinyasyaikaikameva ca //
2.48.2
sthāpayedutsavaṃ kṛtvā pūjayecca vidhānataḥ /
bhānoḥ pañcāgninā kāryaṃ dvādaśāgnikrameṇa vā //
2.48.3
sarvakuṇḍāni vṛttāni padmākārāṇi suvratāḥ /
aṃbāyā yonikuṇḍaṃ syādvardhanyekā vidhīyate //
2.48.4
śaktīnāṃ sarvakāryeṣu yonikuṇḍaṃ vidhīyate /
gāyatrīṃ kalpayecchaṃbhoḥ sarveṣāmapi yatnataḥ /
sarve rudrāṃśajā yasmātsaṃkṣepeṇa vadāmi vaḥ //
2.48.5
gāyatrībhedāḥ
tatpuruṣāya vidmahe vāgviśuddhāya dhīmahi /
tannaḥ śivaḥ pracodayāt //
2.48.6
gaṇāṃbikāyai vidmahe karmasiddhyai ca dhīmahi /
tanno gaurī pracodayāt //
2.48.7
tatpuruṣāya vidmahe mahādevāya dhīmahi /
tanno rudraḥ pracodayāt //
2.48.8
tatpuruṣāya vidmahe vakratuṇḍāya dhīmahi /
tanno dantiḥ pracodayāt //
2.48.9
mahāsenāya vidmahe vāgviśuddhāya dhīmahi /
tannaḥ skandaḥ procadayāt //
2.48.10
tīkṣṇaśṛṅgāya vidmahe vedapādāya dhīmahi /
tanno vṛṣaḥ pracodayāt //
2.48.11
harivaktrāya vidmahe rudravaktrāya dhīmahi /
tanno nandī pracodayāt //
2.48.12
nārāyaṇāya vidmahe vāsudevāya dhīmahi /
tanno viṣṇuḥ pracodayāt //
2.48.13
mahāṃbikāyai vidmahe karmasiddhaiya ca dhīmahi /
tanno lakṣmīḥ pracodayāt //
2.48.14
samuddhṛtāyai vidmahe viṣṇunaikena dhīmahi /
tanno dharā pracodayāt //
2.48.15
vainateyāya vidmahe suvarṇapakṣāya dhīmahi /
tanno garuḍaḥ pracodayāt //
2.48.16
padmodbhavāya vidmahe vedavaktrāya dhīmahi /
tannaḥ sraṣṭā pracodayāt //
2.48.17
śivāsyajāyai vidmahe devarūpāyai dhīmahi /
tanno vācā pracodayāt //
2.48.18
devarājāya vidmahe vajrahastāya dhīmahi /
tannaḥ śakraḥ pracodayāt //
2.48.19
rudranetrāya vidmahe śaktihastāya dhīmahi /
tanno vahniḥ pracodayāt //
2.48.20
vaivasvatāya vidmahe daṇḍahastāya dhīmahi /
tanno yamaḥ pracodayāt //
2.48.21
niśācarāya vidmahe khaḍgahastāya dhīmahi /
tanno nirṛtiḥ pracodayāt //
2.48.22
śuddhahastāya vidmahe pāśahastāya dhīmahi /
tanno varuṇaḥ pracodayāt //
2.48.23
sarpaprāṇāya vidmahe yaṣṭihastāya dhīmahi /
tanno vuyaḥ pracodayāt //
2.48.24
yakṣeśvarāya vidmahe gadāhastāya dhīmahi /
tanno yakṣaḥ pracodayāt //
2.48.25
sarveśvarāya vidmahe śūlahastāya dhīmahi /
tanno rudraḥ pracodayāt //
2.48.26
kātyāyanyai vidmahe kanyākumāryai dhīmahi /
tanno durgā pracodayāt //
2.48.27
evaṃ prabhidya gāyatrīṃ tattadevānurūpataḥ /
pūjayet sthāpayetteṣāmāsanaṃ praṇavaṃ smṛtam //
2.48.28
athavā viṣṇumatulaṃ sūktena puruṣeṇa vā /
viṣṇuṃ caiva mahāviṣṇuṃ sadāviṣṇumanukramāt //
2.48.29
sthāpayeddevagāyatryā parikalpya vidhānataḥ /
vāsudevaḥ pradhānastu tataḥ saṃkarṣaṇaḥ svayam //
2.48.30
pradyumno hyaniruddhaśca mūrtibhedāstu vai prabhoḥ /
bahūni vividhānīha tasya śāpodbhavāni ca //
2.48.31
sarvāvarteṣu rūpāṇi jagatāṃ ca hitāya vai /
matsyaḥ kūrmo 'tha vārāho nārasiṃho 'tha vāmanaḥ //
2.48.32
rāmo rāmaśca kṛṣṇaśca bauddhaḥ kalkī tathaiva ca /
tathānyāni na devasya hareḥ sāpodbhavāni ca //
2.48.33
teṣāmapi ca gāyatrīṃ kṛtvā stāpya ca pūjayet /
guhyāni devadevasya harernārāyaṇasya ca //
2.48.34
vijñānāni ca yantrāṇi mantropaniṣadāni ca /
pañca brahmāṅgajānīha pañcabhūtamayāni ca //
2.48.35
namo nārāyaṇāyeti mantraḥ paramaśobhanaḥ /
hareraṣṭākṣarāṇīha praṇavena samāsataḥ //
2.48.36
oṃ namo vāsudevāya namaḥ saṃkarṣaṇāya ca /
pradyumnāya pradhānāya aniruddhāya vai namaḥ //
2.48.37
ekamekena mantreṇa sthāpayetparameśvaram /
biṃbāniyāni devasya śivasya parameṣṭhinaḥ //
2.48.38
pratiṣṭhā caiva pūjā ca liṅgavanmunisattamāḥ /
ratnavinyāsasahitaṃ kautukāni harerapi //
2.48.39
acale kārayetsarvaṃ calepyevaṃ vidhānataḥ /
tannetronmīlanaṃ kuryānnetramantreṇa suvratāḥ //
2.48.40
kṣetrapradakṣiṇaṃ caiva ārāmasya purasya ca /
jalādhivāsanaṃ caiva pūrvavatparikīrtitam //
2.48.41
kuṇḍamaṇḍapanirmāṇaṃ śayanaṃ ca vidhīyate /
hutvā navāgnibhāgena navakuṇḍe yatāvidhi //
2.48.42
athavā pañcakuṇḍeṣu pradhāne kevale 'tha vā /
pratiṣṭhā kathitā divyā pāraṃparyakramāgatā //
2.48.43
śilodbhavānāṃ biṃbānāṃ citrābhāsasya vā punaḥ /
jalādhivāsanaṃ proktaṃ vṛṣendrasya prakīrtitam //
2.48.44
prāsādasya pratiṣṭhāyāṃ pratiṣṭhā parikīrtitā /
prāsādāṅgasya sarvasya yathāṅgānāṃ tanoriva //
2.48.45
vṛṣāgnimātṛvighneśakumārānapi yatnataḥ /
śreṣṭhāṃ durgāṃ tathā caṇḍīṃ gāyatryā vai yathāvidhi //
2.48.46
prāgādyaṃ sthāpayecchaṃbhoraṣṭāvaraṇamuttamam /
lokapālagaṇeśādyānapi śaṃbhoḥ pravinyaset //
2.48.47
umā caṇḍī ca nandī ca mahākālo mahāmuniḥ /
vighneśvaro mahābhṛṅgī skandaḥ saumyāditaḥ kramāt //
2.48.48
indrādīnsveṣu sthāneṣu brahmāṇaṃ ca janārdanam /
sthāpayeccaiva yatnena kṣetreśaṃ veśagocare //
2.48.49
siṃhāsane hyanantādīn vidyeśāmapi ca kramāt /
sthāpayetpraṇavenaiva guhyāṅgādīni paṅkaje //
2.48.50
evaṃ saṃkṣepataḥ proktaṃ calasthāpanasuttamam /
sarveṣāmapi devānāṃ devīnāṃ ca viśeṣataḥ //
2.48.50.p1
iti śrīliṅgamahāpurāṇe uttarabhāge 'ṣṭacatvāriṃśo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (5)
- Acintyaviśvasādākhyatantra — Sanskrit
- Liṅga — Sanskrit
- Vratakhaṇḍa — Hemādri, Sanskrit
- Mānasāra Series (I. A Dictionary of Hindu Architecture; II. Indian Architecture according to Mānasāra-Śilpaśāstra; III. Mānasāra on Architecture and Sculpture: Sanskrit Text; IV. Architecture of Mānasāra: Translation; V. Architecture of Mānasāra: Illustrations; VI. Hindu Architecture in India and Abroad; VII. An Encyclopaedia of Hindu Architecture) — Prasanna Kumar Acharya, English
- Ancient Indian Historical Tradition — F. E. Pargiter, English