Lingapurana 2.5
Liṅgapurāṇa 2.5
- Language
- Sanskrit
Contents
2.5.1
ṛṣaya ūcuḥ
aikṣvākuraṃbarīṣo vai vāsudevaparāyaṇaḥ /
pālayāmāsa pṛthivīṃ viṣṇorājñāpuraḥ saraḥ //
2.5.2
śrutametanmahābuddhe tatsarvaṃ vaktumarhasi /
nityaṃ tasya hareścakraṃ śatrurogabhayādikam //
2.5.3
hantīti śrūyate loke dhārmikasya mahātmanaḥ /
aṃbarīṣasya caritaṃ tatsarvaṃ brūhi sattama //
2.5.4
māhātmyamanubhāvaṃ ca bhaktiyogamanuttamam /
yathāvacchrotumicchāmaḥ sūta vaktuṃ tvamarhasi //
2.5.5
sūta uvāca
śrūyatāṃ muniśārdūlāścaritaṃ tasya dhīmataḥ /
aṃbarīṣasya māhātmyaṃ sarvapāpaharaṃ param //
2.5.6
triśaṅkordayitā bhāryā sarvalakṣaṇaśobhitā /
aṃbarīṣasya jananī nityaṃ śaucasamanvitā //
2.5.7
yoganidrāsamārūḍhaṃ śeṣaparyaṅkaśāyinam /
nārāyaṇaṃ mahātmānaṃ brahmāṇḍakamalodbhavam //
2.5.8
tamasā kālarudrākhyaṃ rajasā kanakāṇḍajam /
sattvena sarvagaṃ viṣṇuṃ sarvadevanamaskṛtam //
2.5.9
arcayāmāma satataṃ vāṅmanaḥ kāyakarmabhiḥ /
mālyadānādikaṃ sarvaṃ svayamevamacīkarat //
2.5.10
gandhādiṣeṣaṇaṃ caiva dhūpadravyādikaṃ tathā /
bhūmerālepanādīni haviṣāṃ pacanaṃ tathā //
2.5.11
tatkautukasamāviṣṭā svayameva cakāra sā /
śubhā padmāvatī nityaṃ vācā nārāyaṇeti vai //
2.5.12
anantetyeva sā nityaṃ bhāṣamāṇā pativratā /
daśavarṣasahasrāṇi tatpareṇāntarātmanā //
2.5.13
arcayāmāsa govindaṃ gandhapuṣpādibhiḥ śuciḥ /
viṣṇubhaktānmahābhāgān sarvapāpavivarjitān //
2.5.14
dānamānārcanairnityaṃ dhanaratnairatoṣayat /
tataḥ kadācitsā devī dvādaśīṃ samupoṣya vai //
2.5.15
hareragre mahābhāgā suṣvāpa patinā saha /
tatra nārāyaṇo devastāmāha puruṣottamaḥ //
2.5.16
kim icchasi varaṃ bhadre mattas tvam brūhi bhāmini /
sā dṛṣṭvā tu varaṃ vavre putro me vaiṣṇavo bhavet //
2.5.17
sārvabhaumo mahātejāḥ svakarmanirataḥ śuciḥ /
tathetyuktvā dadau tasyai phalam ekaṃ janārdanaḥ //
2.5.18
sā prabuddhā phalaṃ dṛṣṭvā bhartre sarvaṃ nyavedayat /
bhakṣayāmāsa saṃhṛṣṭā phalaṃ tadgatamānasā //
2.5.19
tataḥ kālena sā devī putraṃ kulavivardhanam /
asūta sā sadācāraṃ vāsudevaparāyaṇam //
2.5.20
śubhalakṣaṇasaṃpannaṃ cakraāṅkitatanūruham /
jātaṃ dṛṣṭvā pitā putraṃ kriyāḥ sarvāścakāra vai //
2.5.21
aṃbarīṣa iti khyāto loke samabhavatprabhuḥ /
pitaryuparate śrīmānabhiṣikto mahāmuniḥ //
2.5.22
mantriṣvādhāya rājyaṃ ca tapa ugrañcakāra saḥ /
saṃvatsarasahasraṃ vai japannārāyaṇaṃ prabhum //
2.5.23
hṛtpuṇḍarīkamadhyasthaṃ sūryamaṇḍalamadhyataḥ /
śaṅkhacakragadāpadmadhārayantaṃ caturbhujam //
2.5.24
śuddhajāṃbūnadanibhaṃ brahmaviṣṇuśivātmakam /
sarvābharaṇasaṃyuktaṃ pītāṃbaradharaṃ prabhum //
2.5.25
śrīvatsavakṣasaṃ devaṃ puruṣaṃ puruṣottamam /
tato garuḍamāruhya sarvadevairabhiṣṭutaḥ //
2.5.26
ājagāma sa viśvātmā sarvalokanamaskṛtaḥ /
airāvatamivācintyaṃ kṛtvā vai garuḍaṃhariḥ //
2.5.27
svayaṃ śakra ivāsīnastamāha nṛpasattamam /
indro 'hamasmi bhadraṃ te kiṃ dadāmi varaṃ ca te //
2.5.28
sarvalokeśvaro 'haṃ tvāṃrakṣituṃ samupāgataḥ /
aṃbarīṣa uvāca
nāhaṃ tvamābhisaṃdhāya tapa āsthitavāniha //
2.5.29
tvayā dattaṃ ca neṣyāmi gaccha śakra yathāsukham /
mama nārāyaṇo nāthastaṃ nāmāmi jagatpatim //
2.5.30
gacchedra mākṛthāstvatra mama buddhivilopanam /
tataḥ prahasya bhagavān svarūpamakarodvarīḥ //
2.5.31
śārṅgacakragadāpāṇiḥ khaṅgahasto janārdanaḥ /
garuḍopari sarvātmā nīlācala ivāparaḥ //
2.5.32
devagandharvasaṃghaiśca stūyamānaḥ samantataḥ /
praṇamya sa ca saṃtuṣṭastuṣṭāva garuḍadhvajam //
2.5.33
prasīda lokanātheśa mama nātha janārdana /
kṛṣṇa viṣṇo jagannātha sarvalokanamaskṛta //
2.5.34
tvamādistvamanādistvamanantaḥ pūruṣaḥ prabhuḥ /
aprameyo vibhurviṣṇurgovindaḥ kamalekṣaṇaḥ //
2.5.35
maheśvarāṅgajo madhye puṣkaraḥ khagamaḥ khagaḥ /
kavyavāhaḥ kapālī tvaṃ havyavāhaḥ prabhañjanaḥ //
2.5.36
ādidevaḥ kriyānandaḥ paramātmātmanī sthitaḥ /
tvāṃ prapannosmigovinda jaya devakinandana /
jaya deva jagannātha pāhi māṃ puṣkarekṣaṇa //
2.5.37
nānyā gatistvadanyā me tvameva śaraṇaṃ mama /
sūta uvāca
tamāha bhagavānviṣṇuḥ kiṃ te hṛdi cikīrṣitam //
2.5.38
tatsarvaṃ te pradāsyāmi bhaktosi mama suvrata /
bhaktipriyo 'haṃ satataṃ tasmāddātumihāgataḥ //
2.5.39
aṃbarīṣa uvāca
lokanātha parānanda nityaṃ me vartate matiḥ /
vāsudevaparo nityaṃ vāṅmanaḥ kāyakarmabhiḥ //
2.5.40
yathā tvaṃ devadevasya bhavasya paramātmanaḥ /
tathā bhavāmyahaṃ viṣṇo tava deva janārdana //
2.5.41
pāliyiṣyāmi pṛthivīṃ kṛtvā vai vaiṣṇavaṃ jagat /
yajñahomārcanaiścaiva tarpayāmi surottamān //
2.5.42
vaiṣṇavānpālayiṣyāmi nihaniṣyāmi śātravān /
lokatāpabhaye bhīta iti me dhīyate matiḥ //
2.5.43
śrībhagavānuvāca
evamastu yathecchaṃ vai cakrametatsudarśanam /
purā rudraprasādena labdhaṃ vai durlabhaṃ mayā //
2.5.44
ṛṣiśāpādikaṃ duḥkhaṃ śatrurogādikaṃ tathā /
nihaniṣyati te nityamityuktvāntaradhīyata //
2.5.45
sūta uvāca
tataḥ praṇamya mudito rājā nārāyaṇaṃ prabhum /
praviśya nagarīṃ ramyāmayodhyāṃ paryapālayat //
2.5.46
brāhmaṇādīṃśca varṇāṃśca svasvakarmaṇy ayojayat /
nārāyaṇaparo nityaṃ viṣṇubhaktānakalmaṣān //
2.5.47
pālayāmāsa hṛṣṭātmā viśeṣeṇa janādhipaḥ /
aśvamedhaśatairiṣṭvā vājapeyaśatena ca //
2.5.48
pālayāmāsa pṛthivīṃ sāgarāvaraṇāmimām /
gṛhegṛhe haristasthau vedaghoṣo gṛhegṛhe //
2.5.49
nāmaghoṣo hareścaiva yajñaghoṣastathaiva ca /
abhavannṛpaśārdūle tasmin rājyaṃ praśāsati //
2.5.50
nāsasyā nātṛṇā bhūmirna durbhikṣādibhiryutā /
rāgahīnāḥ prajā nityaṃ sarvopadravavarjitāḥ //
2.5.51
aṃbarīṣo mahātejāḥ pālayāmāsa medinīm /
tasyaivaṃvartamānasya kanyā kamalalocanā //
2.5.51.p1
śrīmatī nāma vikhyātā sarvalakṣaṇasaṃyutā //
2.5.52
pradānasamayaṃ prāptā devamāyeva śobhanā //
2.5.53
tasminkāle muniḥ śrīmānnārado 'bhyāgataścavai /
aṃbarīṣasya rājño vai parvataśca mahāmatiḥ //
2.5.54
tāvubhāvāgatau dṛṣṭvā praṇipatya yathāvidhi /
aṃbarīṣo mahātejāḥ pūjayāmāsa tāv ṛṣī //
2.5.55
kanyāṃ tāṃ ramamāṇāṃ vai meghamadhye śatahradām /
prāha tāṃ prekṣya bhagavān nāradaḥ sasmitas tadā //
2.5.56
keyaṃ rājanmahābhāgā kanyā surasutopamā /
brūhi dharmabhṛtāṃ śreṣṭha sarvalakṣaṇaśobhitā //
2.5.57
rājovāca
duhiteyaṃ mama vibho śrīmatī nāma nāmataḥ /
pradānasamayaṃ prāptā varamanveṣate śubhā //
2.5.58
ityukto muniśārdūlastāmaicchannārado dvijāḥ /
parvatopi munistāṃ vai cakame munisattamāḥ //
2.5.59
anujñāpya ca rājānaṃ nārado vākyamabravīt /
rahasyāhūya dharmātmāmama dehi sutāmimām //
2.5.60
parvato hi tathā prāha rājānaṃ rahasi prabhuḥ /
tāvubhau saha dharmātmā praṇipatya bhayārditaḥ //
2.5.61
ubhau bhavantau kanyāṃ me pārthayānau kathaṃ tvaham /
kariṣyāmi mahāprājña śṛṇu nārada me vacaḥ //
2.5.62
tvaṃ ca parvata me vākyaṃ śṛṇu vakṣyāmi yatprabho /
kanyeyaṃ yuvayorekaṃ varayiṣyati cecchubhā //
2.5.63
tasmai kanyāṃ prayacchāmi nānyathā śaktirasti me /
tathetyuktvā tato bhūyaḥ śvo yāsyāva iti sma ha //
2.5.64
ityuktvā munisārdūlau jagmatuḥ prītimānasau /
vāsudevaparau nityamubhau jñānavidāṃvarau //
2.5.65
viṣṇu lokaṃ tato gatvā nārado munisattamaḥ /
praṇipatya hṛṣīkeśaṃ vākyametaduvāca ha //
2.5.66
śrotavyamasti bhagavannātha nārāyaṇa prabho /
rahasi tvāṃ pravakṣyāmi namaste bhuvaneśvara //
2.5.67
tataḥ prahasya govindaḥ sarvānutsārya taṃ munim /
brūhītyāha ca viśvātmā munirāha ca keśavam //
2.5.68
tvadīyo nṛpatiḥ śrīmānaṃbarīṣo mahīpatiḥ /
tasya kanyā viśālākṣī śrīmatī nāma nāmataḥ //
2.5.69
pariṇetumanāstatra gato 'smi vacanaṃ śṛṇu /
parvato 'yaṃ muniḥ śrīmāṃstava bhṛtyastaponidhiḥ //
2.5.70
tāmaicchatsopi bhagavannāvāmāha janādhipaḥ /
aṃbarīṣo mahātejāḥ kanyeyaṃ yuvayorvaram //
2.5.71
lāvaṇyayuktaṃ vṛṇuyādyadi tasmai dadāmyaham /
ityāhāvāṃ nṛpastatra tathetyuktvāhamāgataḥ //
2.5.72
āgamiṣyāmi te rājan śvaḥ prabhāte gṛhaṃ tviti /
āgatohaṃ jagannātha kartumarhasi me priyam //
2.5.73
vānarānanavadbhāti parvatasya mukhaṃ yathā /
tathā kuru jagannātha mama cedicchasi priyam //
2.5.74
tathetyuktvā sa govindaḥ prahasta madhusūdanaḥ /
tvayoktaṃ ca kariṣyāmi gaccha saumya yathāgatam //
2.5.75
evamuktvā munirhṛṣṭaḥ praṇipatya janārdanam /
manyamānaḥ kṛtātmānaṃ tathāyodhyāṃ jagāma saḥ //
2.5.76
gate munivare tasminparvato 'pi mahāmuniḥ /
praṇamya mādhavaṃ hṛṣṭo rahasyenamuvāca ha //
2.5.77
vṛttaṃ tasya nivedyāgre nāradasya jagatpateḥ /
golāṅgūlamukhaṃ yadvanmukhaṃ bhāti tathā kuru //
2.5.78
tacchrutvā bhagavānviṣṇustvayoktaṃ ca karomi vai /
gaccha śīghramayodhyāṃ vai māvedīrnāradasya vai //
2.5.79
tvayā me saṃvidaṃ tatra tathetyuktvā jagāma saḥ /
tato rājā samājñāya prāptau munivarau tadā //
2.5.80
māṅgalyairvividhaiḥ sarvāmayodhyāṃ dhvajamālinīm /
maḍaṃyāmāsa puṣpaiśca lājairścaiva samantataḥ //
2.5.81
aṃbusiktagṛhadvārāṃ siktāpaṇamahāpathām /
divyagandharasopetāṃ dhūpitāṃ divyadhūpakaiḥ //
2.5.82
kṛtvā ca nagarīṃ rājā maṇḍayāmāsa tāṃ sabhām /
divyairgandhaistathā dhūpai ratnaiśca vividhaistathā //
2.5.83
alaṅkṛtāṃ maṇistaṃbhairnānāmālyopaśobhitām /
parārdhyāstaraṇopetairdivyairbhadrāsanairvṛtām //
2.5.84
kṛtvā nṛpendrastāṃ kanyāṃ hyādāya praviveśa ha /
sarvābharaṇasaṃpannāṃ śrīrivāyatalojanām //
2.5.85
karasaṃmitamadhyāṅgīṃ pañcasnigdhāṃ śubhānanām /
strībhiḥ parivṛtāṃ divyāṃ śrīmatīṃ saṃśritāṃ tadā //
2.5.86
sabhā ca sā bhūpapeḥ samṛddhā maṇipravekottamaratnacitrā /
nyastā sanā mālyavatī subaddhā tāmāyayuste nararājavargāḥ //
2.5.87
athāparo brahmavarātmajo hi traividyavidyo bhagavānmahātmā /
saparvato brahmavidāṃva riṣṭho mahāmunirnārada ājagāma //
2.5.88
tāvagatau samīkṣyātha rājā saṃbhrāntamānasaḥ /
divyamāsanāmādāya pūjayāmāsa tāvubhau //
2.5.89
ubhau devarṣisiddhau tau ubhau jñānavidāṃ varau /
samāsīnau mahātmānau kanyārthaṃ munisattamau //
2.5.90
tāvubhau praṇipatyāgre kanyāṃ tāṃ śrīmatīṃ śubhām /
sutāṃ kamalapatrākṣīṃ prāha rājā yaśasvinīm //
2.5.91
anayoryaṃ varaṃ bhadre manasā tmavihecchasi /
tasmai mālāmimāndehi praṇipatya yathāvidhi //
2.5.92
evamuktā tu sā kanyā strībhiḥ parivṛtā tadā /
mālāṃ hiraṇmayīṃ divyāmādāya subhalocanā //
2.5.93
yatrāsīnau mahātmānau tatrāgamyasthitā tadā /
vīkṣamāṇā muniśreṣṭhau nāradaṃ parvataṃ tathā //
2.5.94
muniśreṣṭhaṃ na paśyāmi nāradaṃ parvataṃ tathā /
anayormadhyatastvekamūnaṣoḍaśavārṣikam //
2.5.95
saṃbhrāntamānasā tatra pravātakadalī yathā /
tasthau tāmahā rājāsau vatse kiṃ tvaṃ kariṣyasi //
2.5.96
anayoreka muddiśya dehi mālāmimāṃ śubhe /
sā prāha pitaraṃ trastā imau tau naravānarau //
2.5.97
muniśreṣṭhaṃ na paśyāmi nāradaṃ parvataṃ tathā /
anayormadhyatastvekamūnaṣoḍaśavārṣikam //
2.5.98
sarvābharaṇasaṃpannamatasīpuṣpasaṃnibham /
dīrghabāhuṃ viśālākṣaṃ tuṅgīrasthalam uttamam //
2.5.99
rekhāṅkitakaṭigrīvaṃ raktāntāyatalocanam /
namracāpānukaraṇapaṭubhrūyugaśobhitam //
2.5.100
vibhaktatrivalīvyaktaṃ nābhivyaktaśubhodaram /
hiraṇyāṃbarasaṃvītaṃ tuṅgaratnanakhaṃ śubham /
padmākārakaraṃ tvenaṃ padmāsyaṃ padmalocanam //
2.5.101
sunāsaṃ padmahṛdayaṃ padmanābhaṃ śriyā vṛtam /
dantapaṅktibhiratyarthaṃ kundakuḍmalasannibhaiḥ //
2.5.102
hasaṃtaṃ māṃ samālokya dakṣiṇaṃ ca prasārya vai /
pāṇiṃ sthitamamuṃ tatra paśyāmi śubhamūrdhajam //
2.5.103
saṃbhrāntamānasāṃ tatra vepatīṃ kadalīmiva /
sthitāṃ tāmāha rājāsau vatse kiṃ tvaṃ kariṣyasi //
2.5.104
evamukte muniḥ prāha nāradaḥ saṃśayaṅgataḥ /
kiyanto bāhavastasya kanye brūhi yathātatham //
2.5.105
bāhudvayaṃ ca paśyāmītyāha kanyā śucismitā /
prāha tāṃ parvatastatra tasya vakṣaḥsthale śubhe //
2.5.106
kiṃ paśyasi ca me brūhi kare kiṃ vāsya paśyasi /
kanyā tamāha mālāṃ vai pañcarūpāmanuttamām //
2.5.107
vakṣaḥsthale 'sya paśyāmi kare kārmukasāyakān /
evamuktau muniśreṣṭhau parasparamanuttamau //
2.5.108
manasā cintayantau tau māyeyaṃ kasyacid bhavet /
māyāvī taskaro nūnaṃ svayameva janārdanaḥ //
2.5.109
āgato na yatā kuryātkathamasmanmukhaṃ tvidam /
golāṅgūlatvamityevaṃ cintayā māsa nāradaḥ //
2.5.110
parvatopi yathānyāyaṃ vānaratvaṃ kathaṃ mama /
prāptamityeva manasā cintāmāpedivāṃstathā //
2.5.111
tato rājā praṇamyāsau nāradaṃ parvataṃ tathā /
bhavadbhyāṃ kimidaṃ tatra kṛtaṃ buddhivimohajam //
2.5.112
svasthau bhavantau tiṣṭhetāṃ yathā kanyārtha mudyatau /
evamuktau muniśreṣṭhau nṛpamūcaturulbaṇau //
2.5.113
tvameva mohaṃ kuruṣe nāvāmiha kathañcana /
āvayorekameṣā te varayatveva māciram //
2.5.114
tataḥ sā kanyakā bhūyaḥ praṇiptayeṣṭadevatām /
māyāmādāya tiṣṭhantaṃ tayormadhye samāhitam //
2.5.115
sarvābharaṇasaṃyukta matasīpuṣpasannibham /
dīrghabāhuṃ supuṣṭāṅgaṃ karṇāntāyatalocanam //
2.5.116
pūrvavatpuruṣaṃ dṛṣṭvā mālāṃ tasmai dadau hi sā /
anantaraṃ hi sā kanyā na dṛṣṭā manujaiḥ punaḥ //
2.5.117
tato nādaḥ samabhavat kimetaditi vismitau /
tāmādāya gato viṣṇuḥ svasthānaṃ puruṣottamaḥ //
2.5.118
purā tadarthamaniśaṃ tapastaptvā varāṅganā /
śrīmatī sā samutpannā sā gatā ca tathā harim //
2.5.119
tāvubhau muniśārdūlau dhikkṛtāvati duḥkhitau /
vāsudevaṃ prati tadā jagmaturbhavanaṃ hareḥ //
2.5.120
tāvāgatau samīkṣyāha śrīmatiṃ bhagavānhariḥ /
muniśreṣṭhau samāyātau gūhasvātmānamatra vai //
2.5.121
tathetyuktvā ca sā devī prahasaṃtī cakāra ha /
nāradaḥ praṇipatyāgre prāha dāmodaraṃ harim //
2.5.122
priyaṃ hi kṛtavānadya mama tvaṃ parvatasya hi /
tvameva nūnaṃ govinda kanyāṃ tāṃ hṛtavānāsi //
2.5.123
vimohyāvāṃ svayaṃ buddhyā pratārya surasattama /
ityuktaḥ puraṣo viṣṇuḥ pidhāya śrotramacyutaḥ /
pāṇibhyāṃ prāha bhagavān bhavadbhyāṃ kimudīritam //
2.5.124
kāmavānapi bhāvoyaṃ munivṛttiraho kila /
evamukto muniḥ prāha vāsudevaṃ sa nāradaḥ //
2.5.125
karṇamūle mama kathaṃ golāṅgūlamukhaṃ tviti /
karṇamūle tamāhedaṃ vānaratvaṃ kṛtaṃ mayā //
2.5.126
parvatasya mayā vidvan golāṅgūlamukhaṃ tava /
mayā tava kṛtaṃ tatra priyārthaṃ nānyathā tviti //
2.5.127
parvato 'pi tathā prāha tasyāpyevaṃ jagādasaḥ /
śṛṇvatorubhayostatra prāha dāmodaro vacaḥ //
2.5.128
priyaṃ bhavadbhyāṃ kṛtavān satyenātmānamālabhe /
nāradaḥ prāha dharmātmā āvayormadhyataḥ sthitaḥ //
2.5.129
dhanuṣmān puruṣaḥ ko ḥtra tāṃ hṛtvā gatavānkila /
tac chrutvā vāsudevo 'sau prāha tau munisattamau //
2.5.130
māyāvino mahātmano bahavaḥ saṃti sattamāḥ /
tatra sā śrīmatī nūnamadṛṣṭvā munisattamau //
2.5.131
cakrapāṇirahaṃ nityaṃ caturbāhuriti sthitaḥ /
tāṃ tathā nāhamaicchaṃ vai bhavadbhyāṃ viditaṃ hi tat //
2.5.132
ityuktau praṇipatyainamūcatuḥ prītimānasau /
ko 'tra doṣastava vibho nārāyaṇa jagatpate //
2.5.133
daurātmyaṃ tannṛpasyaiva māyāṃ hi kṛtavānasau /
ityuktvā jagmatustasmānmunīnāradaparvatau //
2.5.134
aṃbarīṣaṃ samāsādya śāpenainamayojayat /
nāradaḥ parvataścaiva yasmādāvāmihāgatau //
2.5.135
āhūya paścādanyasmai kanyāṃ tvaṃ dattavānasi /
māyāyogena tasmāttvaṃ tamo hyabhibhaviṣyati //
2.5.136
tena cātmānamatyarthaṃ yathāvattvaṃ ca vetsyasi /
evaṃ śāpepradatte tu tamorāśirathotthitaḥ //
2.5.137
nṛpaṃ prati tataścakraṃ viṣṇoḥ prādurabhūt kṣaṇāt /
cakravitrāsitaṃ ghoraṃ tāvubhau tama abhyagāt //
2.5.138
tataḥ saṃtrastasarvāṅgau dhāvamānau mahāmunī /
pṛṣṭhataścakramālokya tamorāśiṃ durāsadam //
2.5.139
kanyāsiddhiraho prāptā hyāvayoriti vegitau /
lokālokāntamaniśaṃ dhāvamānau bhayārditau //
2.5.140
trāhitrāhīti govindaṃ bhāṣamāṇau bhayārditau /
viṣṇulokaṃ tato gatvā nārāyaṇa jagatpate //
2.5.141
vāsudeva hṛṣīkeśa padmanābha janārdana /
trāhyāvāṃ puṇḍarīkākṣa nātho 'si puruṣottama //
2.5.142
tato nārāyaṇaścintya śrīmāñchrīvatsalāñchanaḥ /
nivārya cakraṃ dhvāntaṃ ca bhaktānugrahakāmyayā //
2.5.143
aṃbarīṣaśca madbhaktastathaitau munisattamau /
anayorasya ca tathā hitaṃ kāryaṃ mayādhunā //
2.5.144
āhūya tattamaḥ śrīmān girā prahlādayan hariḥ /
provāca bhagavān viṣṇuḥ śṛṇutāṃ ma idaṃvacaḥ //
2.5.145
ṛṣiśāpo na caivāsīdanyathā ca varo mama /
datto nṛpāya rakṣārthaṃ nāsti tasyānyathā punaḥ //
2.5.146
aṃbarīṣasya putrasyanaptuḥ putro mahāyaśāḥ /
śrīmāndasaratho nāma rājā bhavati dhārmikaḥ //
2.5.147
tasyāhamagrajaḥ putro rāmanāmā bhavāmyaham /
tatra me dakṣiṇobāhurbharato nāma vai bhavet //
2.5.148
śatrughno nāma savyaśca śeṣo 'sau lakṣmaṇaḥ smṛtaḥ /
tatra māṃ samupāgaccha gacchedānīṃ nṛpaṃ vinā //
2.5.149
muniśreṣṭhau ca hitvā tvamiti smāha ca mādhavaḥ /
evam uktaṃ tamo nāśaṃ tatkṣaṇāc ca jagāma vai //
2.5.150
nivāritaṃ hareścakraṃ yathāpūrvamatiṣṭhata /
muniśreṣṭhau bhayānmuktau praṇipatya janārdanam //
2.5.151
nirgatau śokasaṃtaptau ūcatustau parasparam /
adyaprabhṛti dehāntamāvāṃ kanyāparigraham //
2.5.152
na kariṣyāva ityuktvā pratijñāya ca tāvṛṣī /
yogadhyānaparau śuddhau yathāpūrvaṃ vyavasthitau //
2.5.153
aṃbarīṣaśca rājāsau paripālya ca medinīm /
sabhṛtyajñātisaṃpanno viṣṇulokaṃ jagāma vai //
2.5.154
mānārthamaṃbarīṣasya tathaiva munisiṃhayoḥ /
rāmo dāśarathir bhūtvā nātmavedīśvaro 'bhavat //
2.5.155
munayaśca tathā sarve bhṛgvādyā munisattamāḥ /
māyā na kāryā vidvadbhirityāhuḥ prekṣyataṃ harim //
2.5.156
nāradaḥ parvataścaiva ciraṃ jñātvā viceṣṭitam /
māyāṃ viṣṇorvinindyaiva rudrabhaktau babhūvatuḥ //
2.5.157
etaddhi kathitaṃsarva mayā yuṣmākamadya vai /
aṃbarīṣasya māhātmyaṃ māyāvitvaṃ ca vai hareḥ //
2.5.158
yaḥ paṭhecchṛṇuyādvāpi śrāvayedvāpi mānavaḥ /
māyāṃ visṛjya puṇyātmā rudralokaṃ sa gacchati //
2.5.159
idaṃ pavitraṃ paramaṃ puṇyaṃ vedairudīritam /
sāyaṃ prātaḥ paṭhennityaṃ viṣṇoḥ sāyujyamāpnuyāt //
2.5.159.p1
iti śrīliṅgamahāpurāṇe uttarabhāge śrīmatyākhyānaṃ nāma pañcamo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (4)
- Kālikāpurāṇa — Sanskrit
- Adbhutarāmāyaṇa — Vālmīki, Sanskrit
- Puruṣārthasudhānidhi — Sāyaṇācārya, Sanskrit
- Ānandarāmāyaṇa — Vālmīki, Sanskrit