Linga Purana 2.50
Liṅgapurāṇa 2.50
- Language
- Sanskrit
Contents
- 2.50.50 — 1 part
2.50.1
ṛṣaya ūcuḥ
nigrahaḥ kathitastena śivavaktreṇa śūlinā /
kṛtāparāndhināṃ taṃ tu vaktumarhasi suvrata //
2.50.2
tvayā navidinaṃ nāsti laukikaṃ vaidikaṃ tathā /
śrautaṃ smārtaṃ mahābhāga romaharṣaṇa suvrata //
2.50.3
sūta uvāca
purā bhṛgusutenokto hiraṇyākṣāya suvratāḥ /
nigraho 'ghoraśiṣyeṇa śukreṇākṣayatejasā //
2.50.4
tasya prasādaddaityendro hiraṇyākṣaḥ pratāpavān /
trailokyamakhilaṃ jitvā sadevāsuramānuṣam //
2.50.5
utpādya putraṃ gaṇapaṃ cāndhakaṃ cāruvikramam /
rarāja loke devena varāheṇa niṣūditaḥ //
2.50.6
strībādhāṃ bālabādhāṃ ca gavāmapi viśeṣataḥ /
kurvato nāsti vijayo mārgeṇānena bhūtale //
2.50.7
tena daityena sā devī dharā nītā rasātalam /
tenāghoreṇa devena niṣphalo nigrahaḥ kṛtaḥ //
2.50.8
saṃvatsara sahasrānte varāheṇa ca sūditaḥ /
tasmādaghorasiddhyarthaṃ brāhmaṇānnaiva bādhayet //
2.50.9
strīṇāmapi viśeṣeṇa gavāmapi na kārayet /
guhyādguhyatamaṅgopyamatiguhyaṃ vadāmi vaḥ //
2.50.10
ātatāyinamuddiśya kartavyaṃ nṛpasattamaiḥ /
brāhmaṇebhyo na kartavyaṃ svarāṣṭreśasya vā punaḥ //
2.50.11
atīvadurjaye prāpte bale sarve niṣūdite /
adharmayuddhe saṃprāpte kuryādvidhimanuttamam //
2.50.12
aghṛṇenaiva kartavyo hyaghṛṇenaiva kārayet /
kṛtamātre na saṃdeho nigrahaḥ saṃprajāyate //
2.50.13
lakṣamātraṃ pumāñjaptvā aghoraṃ ghorarūpiṇam /
daśāṃśaṃ vidhinā hutvā tilena dvijasattamāḥ //
2.50.14
saṃpūjya lakṣapuṣpeṇa sitena vidhipūrvakam /
bāṇaliṅge 'thavā vahnau dakṣiṇāmūrtimāśritaḥ //
2.50.15
siddhamantro 'nyatā nāsti draṣṭā siddhyādayaḥ punaḥ /
siddhamantraḥ svayaṃ kuryātpretasthāne viśeṣataḥ //
2.50.16
mātṛsthāne 'pi vā vidvānvedavedāṅgapāragaḥ /
kevalaṃ mantrasiddho vā brāhmaṇaḥ śivabhāvitaḥ //
2.50.17
kuryādvidhimimaṃ dhīmānātmanor'thaṃ nṛpasya vā /
sūlāṣṭakaṃ nyasedvidvānpūrvādīśānakāntakam //
2.50.18
triśikhaṃ ca triśūlaṃ ca caturviśācchikāgrataḥ /
aghoravigrahaṃ kṛtvā saṃkalīkṛtavigrahaḥ //
2.50.19
sarvanāśakaraṃ dhyātvā sarvakarmāṇi kārayet /
kālāgnikoṭisaṃkāśaṃ svadehamapi bhāvayet //
2.50.20
śūlaṃ kapālaṃ pāśaṃ ca daṇḍaṃ caiva śarāsanam /
bāṇaṃ ḍamarukaṃ khaḍgamaṣṭāyudhamanukramāt //
2.50.21
aṣṭahastaśca varado nīlakaṇṭho digaṃbaraḥ /
pañcatattvasamārūḍho hyardhacandradharaḥ prabhuḥ //
2.50.22
daṃṣṭrākarālavadano raudradṛṣṭirbhayaṅkaraḥ /
huṃphaṭkāramahāśabdaśabditākhiladiṅmukhaḥ //
2.50.23
trinetraṃ nāgapāśena subaddhamukuṭaṃ svayam /
sarvābharaṇasaṃpannaṃ pretabhasmāvaguṇṭhitam //
2.50.24
bhūtaiḥ pretaiḥ piśācaiśca ḍākinībhiśca rākṣasaiḥ /
saṃvṛtaṃ gajakṛttvā ca sarpabhūṣaṇabhūṣitam //
2.50.25
vṛścikābharaṇaṃ devaṃ nīlanīradanisvanam /
nīlāñjanādrisaṃkāśaṃ siṃhacarmottarīyakam //
2.50.26
dhyāyedevamaghoreśaṃ ghoraghorataraṃ śivam /
ṣaṭtriṃśaduktamātrābhiḥ prāṇāyāmena suvratāḥ //
2.50.27
mahāmudrāsamāyuktaḥ sarvakarmāṇi kārayet /
siddhamantraścitāgnau vā pretasthāne yathāvidhi //
2.50.28
sthāpayenmadhyadeśe tu eendre yāmye ca vāruṇe /
kauberyāṃ vidivatkṛtvā homakuṇḍāni śāstrataḥ //
2.50.29
ācāryo madhyakuṇḍe tu sādhakāśca diśāsu vai /
paristīrya vilomena pūrvavacchūlasaṃbhṛtaḥ //
2.50.30
kālāgnipīṭhamadhyasthaḥ svayaṃ śiṣyaiśca tādṛśaiḥ /
dhyātvā ghoramaghoreśaṃ dvātriṃśākṣarasaṃyutam //
2.50.31
vibhītakena vai kṛtvā dvādaśāṅgulamānataḥ /
pīṭhe nyasya nṛpendrasya śatrumaṅgārakeṇa tu //
2.50.32
kuṇḍasyādhaḥ khanecchatruṃ brāhmaṇaḥ krodhamūrcchitaḥ /
adhomukhordhvapādaṃ tu sarvakuṇḍeṣu yatnataḥ //
2.50.33
śmaśānāṅgāramānīya tuṣeṇa saha dāhayet /
tatrāgniṃ sthāpayettūṣṇīṃ brahmacaryaparāyaṇaḥ //
2.50.34
māyūrāstreṇa nābhyāṃ tu jvalanaṃ dīpayettataḥ /
kañcukaṃ tuṣasaṃyuktaiḥ kārpāsāsthisamanvitaiḥ //
2.50.35
raktavastrasamaṃ miśrairhemadravyairviśeṣataḥ /
hastayantrodbhavaistailaiḥ saha homaṃ tu kārayet //
2.50.36
aṣṭottarasahasraṃ tu homayedanupūrvaśaḥ /
kṛṣṇapakṣe caturdaśyāṃ samārabhya yathākramam //
2.50.37
aṣṭamyantaṃ tathāṅgāramaṇḍalasthānavarjitaḥ /
evaṃ kṛte nṛpendrasya śatravaḥ kulajaiḥ saha //
2.50.38
sarvaduḥkhasamopetāḥ prayānti yamasādanam /
mantreṇānena cādāya nṛkapāle nakhaṃ tathā //
2.50.39
keśaṃ nṛṇāṃ tathāṅgāraṃ tuṣaṃ kañcukameva ca /
cīracchaṭāṃ rājadhūlīṃ gṛhasaṃmārjanasya vā //
2.50.40
viṣasarpasya dantāni vṛṣadantāni yāni tu /
gavāṃ caiva krameṇaiva vyāghradantanakhāni ca //
2.50.41
tathā kṛṣṇamṛgāṇāṃ ca biḍālasya ca pūrvavat /
nakulasya ca dantāni varāhasya viśeṣataḥ //
2.50.42
daṃṣṭrāṇi sādhayitvā tu mantreṇānena suvratāḥ /
japedaṣṭottaraśataṃ mantraṃ cāghoramuttamam //
2.50.43
tatkapālaṃ nakhaṃ kṣetre gṛhe vā nagare 'pi vā /
pretasthāne 'pi vā rāṣṭre mṛtavastreṇa veṣṭayet //
2.50.44
śatroraṣṭamārāśau vā pariviṣṭe divākare /
some vā pariviṣṭe tu mantreṇānena suvratāḥ //
2.50.45
sthānanāśo bhavettasya śatrornāśaśca jāyate /
śatruṃ rājñaḥ samālikhya gamane samavasthite //
2.50.46
bhūtale darpaṇaprakhye vitānopari śobhite /
catustoraṇasaṃyukte darbhamālāsamāvṛte //
2.50.47
vedādhyayanasaṃpanne rāṣṭre vṛddhiprakāśake /
dakṣiṇena tu pādena mūrdhni saṃtāḍayetsvayam //
2.50.48
evaṃ kṛte nṛpendrasya śatrunāśo bhaviṣyati /
svārāṣṭrapatimuddiśya yaḥ kuryādābhicārikam //
2.50.49
sa ātmānaṃ nihatyaiva svakulaṃ nāśayetkudhīḥ /
tasmātsvarāṣṭragāṃptāraṃ nṛpatiṃ pālayetsadā //
2.50.50
mantraiṣadhikriyādyaiśca sarvayatnena sarvadā /
etadrahasyaṃ kathitaṃ na deyaṃ yasya kasyacit //
2.50.50.p1
iti śrīliṅgamahāpurāṇe uttarabhāge pañcāśattamo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (2)
- Liṅga — Sanskrit
- Tristhalīsetu (Nārāyaṇa) — Nārāyaṇa (Mahiṣamaṅgalam) 1513, Sanskrit