Lingapurana 2.52
Liṅgapurāṇa 2.52
- Language
- Sanskrit
Contents
- 2.52.16 — 1 part
2.52.1
ṛṣaya ūcuḥ
śrutā vajreśvarī vidyā brāhmī śakropakāriṇī /
anayā sarvakāryāṇi nṛpāmāmiti naḥ śrutam //
2.52.2
viniyogaṃ vadasvāsyā vidyāyā romaharṣaṇa /
sūta uvāca
vaśyamākarṣaṇaṃ caiva vidveṣaṇamataḥ param //
2.52.3
uccāṭanaṃ staṃbhanaṃ ca mohanaṃ tāḍanaṃ tathā /
utsādanaṃ tathā chedaṃ māraṇaṃ pratibandhanam //
2.52.4
senāstaṃbhanakādīni sāvitryā sarvamācaret /
āgaccha varade devi bhūmyāṃ parvatamūrdhani //
2.52.5
brāhmaṇebyo hyanujñātā gaccha devi yathāsukham /
udvāsyānena mantreṇa gantavyaṃ nānyathā dvijāḥ //
2.52.6
pratikāryaṃ tathā bāhyaṃ kṛtvā paśyādikāṃ kriyām /
udvāsya vahnimādhāya punaranyaṃ yathāvidhi //
2.52.7
devīmāvāhya ca punarjapetsaṃpūjayetpunaḥ /
homaṃ ca vidhinā vahnau punareva samācaret //
2.52.8
sarvakāryāṇi vidhinā sādhayedvidyayā punaḥ /
jātīpuṣpaiśca vaśyārthi juhuyādayutatrayam //
2.52.9
ghṛtena karavīreṇa kuryādākarṣaṇaṃ dvijāḥ /
vidveṣaṇaṃ viśeṣeṇa kuryāllāṅgalakasya ca //
2.52.10
tailenoccāṭanaṃ proktaṃ staṃbhanaṃ madhunā smṛtam /
tilena mohanaṃ proktaṃ tāḍanaṃ rudhireṇa ca //
2.52.11
kharasya ca gajasyātha uṣṭrasya ca yathākramam /
staṃbhanaṃ sarṣapeṇāpi pāṭanaṃ cākuśena ca //
2.52.12
māraṇoccāṭane caiva rohībījena suvratāḥ /
bandhanantvahipatreṇa senāstaṃbhamataḥ param //
2.52.13
kunaṭyā niyataṃ vidyātpūjayetparameśvarīm /
ghṛtena sarvasiddhiḥ syātpayasā vā viśuddhyate //
2.52.14
tilena roganāśaśca kamalena dhanaṃ bhavet /
kāntirmadhūkapuṣpeṇa sāvitryā hyayutatrayam //
2.52.15
jayādiprabhṛtīnsarvān sviṣṭāntaṃ pūrvavatsmṛtam /
evaṃ saṃkṣepataḥ prokto viniyogotivistṛtaḥ //
2.52.16
japedvā kevalāṃ vidyāṃ saṃpūjya ca vidhānataḥ /
sarvasiddhimavāpnoti nātra kāryā vicāraṇā //
2.52.16.p1
iti śrīliṅgamahāpurāṇe uttarabhāge dvipañcāśattamo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (2)
- Liṅga — Sanskrit
- Ancient Indian Historical Tradition — F. E. Pargiter, English