Lingapurana 2.54
Liṅgapurāṇa 2.54
- Language
- Sanskrit
Contents
- 2.54.35 — 1 part
2.54.1
sūta uvāca
triyaṃbakeṇa mantreṇa devadevaṃ triyaṃbakam /
pūjayedbāṇaliṅge vā svayaṃbhūte 'pi vā punaḥ //
2.54.2
āyurvedavidairvāpi yathāvadanupūrvaśaḥ /
aṣṭottarasahasreṇa puṇḍarīkeṇa śaṅkaram //
2.54.3
kamalena sahasreṇa tathā nīlotpalena vā /
saṃpūjya pāyasaṃ dattvā saghṛtaṃ caudanaṃ punaḥ //
2.54.4
mudgānnaṃ madhunā yuktaṃ bhakṣyāṇi surabhīṇi ca /
agnau homaśca vipulo yathāvadanupūrvaśaḥ //
2.54.5
pūrvoktairapi puṣpaiśca caruṇā ca viśeṣataḥ /
japedvai niyutaṃ samyak samāpya ca yathākramam //
2.54.6
brāhmaṇānāṃ sahasraṃ ca bhojayedvai sadakṣiṇam /
gavāṃ sahasraṃ dattvā tu hiraṇyamapi dāpayet //
2.54.7
etadvaḥ kathitaṃ sarvaṃ sarahasyaṃ samāsataḥ /
śivena devadevena śarveṇātyugraśūlinā //
2.54.8
kathitaṃ meruśikhare skandāyāmitatejase /
skandena devadevena brahmaputrāya dhīmate //
2.54.9
sākṣātsanatkumāreṇa sarvalokahitaiṣiṇā /
pārāśaryāya kathitaṃ pāraṃparyakramāgatam //
2.54.10
śuke gate parandhāma dṛṣṭvā rudraṃ triyaṃbakam /
gataśoko mahābhāgo vyasaḥ para ṛṣiḥ prabhuḥ //
2.54.11
skandasya saṃbhavaṃ śrutvā sthitāya ca mahātmane /
triyaṃbakasya māhātmyaṃ mantrasya ca viśeṣataḥ //
2.54.12
kathitaṃ bahudhā tasmai kṛṣṇadvaipāyānāya vai /
tatsakvaṃ kathayiṣyāmi prasādādeva tasya vai //
2.54.13
devaṃ saṃpūjya vidhinā japenmantraṃ triyaṃbakam /
mucyate sarpapāpaiśca saptajanmakṛtairapi //
2.54.14
saṃgrāme tatsarvaṃ labdhvā saubhāgyamatulaṃ bhavet /
lakṣahomena rājyārthī rājyaṃ labdhvā sukhī bhavet //
2.54.15
putrārthī putramāpnoti niyutena na saṃśayaḥ /
dhanārthī prayutenaiva japedeva na saṃśayaḥ //
2.54.16
dhanadhānyādibhiḥ sarvaiḥ saṃpūrṇaḥ sarvamaṅgalaiḥ /
krīḍate putrapautraiśca mṛtaḥ svarge prajāyate //
2.54.17
nānena sadṛśo mantro loke vede ca suvratāḥ /
tasmāttriyaṃbakaṃ devaṃ tena nityaṃ prapūjayet //
2.54.18
agniṣṭomasya yajñasya phalamaṣṭaguṇaṃ bhavet /
trayāṇāmapi lokānāṃ guṇānāmapi yaḥ prabhuḥ //
2.54.19
vedānāmapi devānāṃ brahmakṣatraviśāmapi /
akārokāramakārāṇāṃ mātrāṇāmapi vācakaḥ //
2.54.20
tathā somasya sūryasya vahneragnitrayasya ca /
aṃbā umā mahādevo hyaṃbakastu triyaṃbakaḥ //
2.54.21
supuṣpitasya vṛkṣasya yathā gandhaḥ suśobhanaḥ /
vāti dvarāttathā tasya gandhaḥ śaṃbhormahātmanaḥ //
2.54.22
tasmātsugandho bhagavāngandhārayati śaṅkaraḥ /
gāndhāraścamahādevo devānāmapi līlayā //
2.54.23
sugandhastasya lokesminvāyurvāti nabhastale /
tasmātsugandhistaṃ devaṃ sugandhi puṣṭivardhanam //
2.54.24
yasya retaḥ purā śaṃbhorhareryonau pratiṣṭhitam /
tasya vīryādabhūdaṇḍaṃ hiraṇmayam ajodbhavam //
2.54.25
candrādityau sanakṣatrau bhūrbhuvaḥ svarmahastapaḥ /
satyalokamatikramya puṣṭirvīryasya tasya vai //
2.54.26
pañcabhūtānyahaṅkāro buddhiḥ prakṛtireva ca /
puṣṭirbījasya tasyaiva tasmādvai puṣṭivardhanaḥ //
2.54.27
taṃ puṣṭivardhanaṃ devaṃ ghṛtena payasā tathā /
madhunā yavagodhūmamāṣabilvaphalena ca //
2.54.28
kumudārkaśamīpatragaurasarṣapaśālibhiḥ /
hutvā liṅge yathānyāyaṃ bhaktyā devaṃ yajāmahe //
2.54.29
ṛtenānena māṃ pāśādbandhanātkarmayogataḥ /
mṛtyośca bandanāccaiva mukṣīya bhava tejasā //
2.54.30
urvārukāṇāṃ pakvānāṃ yathā kālādabhūtpunaḥ /
tathaiva kālaḥ saṃprāpto manunā tena yatnataḥ //
2.54.31
evaṃ mantravidhiṃ jñātvā śivaliṅgaṃ samarcayet /
tasya pāśakṣayo 'tīva yogino mṛtyunigrahaḥ //
2.54.32
triyaṃbakasamo nāsti devo vā ghṛṇayānvitaḥ /
prasādaśīlaḥ prītaśca tathā mantropi suvratāḥ //
2.54.33
tasmātsarvaṃ parityajya triyaṃbakamumāpatim /
triyaṃbakeṇa mantreṇa pūjayetsusamāhitaḥ //
2.54.34
sarvāvasthāṃ gato vāpi mukto 'yaṃ sarvapātakaiḥ /
śivadhyānānna saṃdeho yathā rudrastathā svayam //
2.54.35
hatvā bhittvā ca bhūtāni bhuktvā cānyāyato 'pi vā /
śivamekaṃ sakṛtsmṛtvā sarvapāpaiḥ pramucyate //
2.54.35.p1
iti śrīliṅgamahāpurāṇe uttarabhāge cutaṣpañcāśattamo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (1)
- Liṅga — Sanskrit