Lingapurana 2.55
Liṅgapurāṇa 2.55
- Language
- Sanskrit
Contents
- 2.55.48 — 3 parts
2.55.1
ṛṣaya ūcuḥ
kathaṃ triyaṃbako devo devadevo vṛṣadhvajaḥ /
dhyeyaḥ sarvārthāsiddhyarthaṃ yogamārgeṇa suvrata //
2.55.2
pūrvamevāpi nikhilaṃ śrutaṃ śrutisamaṃ punaḥ /
vistareṇa ca tatsarvaṃ saṃkṣepādvaktumarhasi //
2.55.3
sūta uvāca
evaṃ paitāmahenaiva nandī dinakaraprabhaḥ /
merupṛṣṭhe purā pṛṣṭo munisaṃghaiḥ samāvṛtaḥ //
2.55.4
so 'pi tasmai kumārāya brahmaputrāya suvratāḥ /
mithaḥ provāca bhagavānpraṇatāya samāhitaḥ //
2.55.5
nandikeśvara uvāca
evaṃ purā mahādevo bhagavānnīlalohitaḥ /
giriputryāṃbayā devyā bhagavatyaikaśayyayā //
2.55.6
pṛṣṭaḥ kailāsaśikhare hṛṣṭapuṣṭatanūruhaḥ /
śrīdevyuvāca
yogaḥ katividhaḥ proktastatkathaṃ caiva kīdṛśam //
2.55.7
jñānaṃ ca mokṣadaṃ divyaṃ mucyante yena jantavaḥ /
śrībhagavānuvāca
prathamo mantrayogaśca sparśayogo dvitīyakaḥ //
2.55.8
bhāvayogastṛtīyaḥ syād abhāvaśca caturthakaḥ /
sarvottamo mahāyogaḥ pañcamaḥ parikīrtitaḥ //
2.55.9
dhyānayukto japābhyāso mantrayogaḥ prakīrtitaḥ /
nāḍīśuddhyadhiko yastu recakādikramānvitaḥ //
2.55.10
samastavyastayogena jayo vāyoḥ prakīrtitaḥ /
balasthirakriyāyukto dhāraṇādyaiśca śobhanaiḥ //
2.55.11
dhāraṇātrayasaṃdīpto bhedatrayaviśodhakaḥ /
kuṃbhakāvasthito 'bhyāsaḥ sparśayogaḥ prakīrtitaḥ //
2.55.12
mantrasparśavinirmukto mahādevaṃ samāśritaḥ /
bahirantarvibhāgasthasphuratsaṃharaṇātmakaḥ //
2.55.13
bhāvayogaḥ samākhyātāścittaśuddhipradāyakaḥ /
vilināvayavaṃ sarvaṃ jagatsthāvarajaṅgamam //
2.55.14
śūnyaṃ sarvaṃ nirābhāsaṃ svarūpaṃ yatra cintyate /
abhāvayogaḥ saṃproktaścittanirvāṇakārakaḥ //
2.55.15
nīrūpaḥ kevalaḥ śuddhaḥ svacchandaṃ ca suśobhanaḥ /
anirdeśyaḥ sadālokaḥ svayaṃvedyaḥ samaṃ tataḥ //
2.55.16
svabhāvo bhāsate yatra mahāyogaḥ prakīrtitaḥ /
nityoditaḥ svayañjyotiḥ sarvacittasamutthitaḥ //
2.55.17
nirmalaḥ kevalo hyātmā mahāyoga iti smṛtaḥ /
aṇimādipradāḥ sarve sarve jñānasya dāyakāḥ //
2.55.18
uttarottaravaiśiṣṭyameṣu yogeṣvanukramāt /
ahaṃ saṃgavinirmukto mahākāśopamaḥ paraḥ //
2.55.19
sarvāvaraṇanirmukto hyacintyaḥ svarasena tu /
jñeyametatsamākhyātamagrāhyamapi daivataiḥ //
2.55.20
pravilīno mahānsamyak svayaṃvedyaḥ svasākṣikaḥ /
cakāstyānandavapuṣā tena jñeyam idaṃ matam //
2.55.21
parīkṣitāya śiṣyāya brāhmaṇāyāhitāgnaye /
dhārmikāyākṛtaghnāya dātavyaṃ kramapūrvakam //
2.55.22
gurudaivatabhaktāya anyathā naiva dāpayet /
nindito vyādhitolpāyustathā caiva prajāyate //
2.55.23
dāturapyevamanaghe tasmājñātvaiva dāpayet /
sarvasaṃgavinirmukto madbhakto matparāyaṇaḥ //
2.55.24
sādhako jñānasaṃyuktaḥ śrautasmārtaviśāradaḥ /
gurubhaktaśca puṇyātmā yogyo yogarataḥ sadā //
2.55.25
eva devi samākhyāto yogamārgaḥ sanātanaḥ /
sarvavedāgamāṃbhojamakarandaḥ sumadhyame //
2.55.26
pītvā yogāmṛtaṃ yogī mucyate brahmavittamaḥ /
evaṃ pāśupataṃ yogaṃ yogaiśvaryamanuttamam //
2.55.27
atyāśramamidaṃ jñeyaṃ muktaye kena labhyate /
tasmādiṣṭaiḥ samācāraiḥ śivārcanarataiḥ priye //
2.55.28
ityuktvā bhagavāndevīmanujñāpya vṛṣadhvajaḥ /
śaṅkukarṇaṃ samāsādya yuyojātmānamātmani //
2.55.29
śailādiruvāca
tasmāttvamapi yogīndra yogābhyāsarato bhava /
svaṃyabhuva parā mūrtirnūnaṃ brahmamayī varā //
2.55.30
tasmātsarvaprayatnena mokṣārtho puruṣottamaḥ /
bhasmasnāyī bhavennityaṃ yoge pāśupate rataḥ //
2.55.31
dhyeyā yathākrameṇaiva vaiṣṇavī ca tataḥ parā /
māheśvarī parā paścātsaiva dhyeyā yathākramam //
2.55.32
yogeśvarasya yā niṣṭhā saiṣā saṃhṛtya varṇitā //
2.55.33
sūta uvāca
evaṃ śilādaputreṇa nandinā kulanandinā /
yogaḥ pāśupataḥ prokto bhasmaniṣṭhena dhīmatā //
2.55.34
sanatkumāro bhagavānvyāsāyāmitatejase /
tasmādahamapi śrutvā niyogātsatriṇāmapi //
2.55.35
kṛtakṛtyo 'smi viprebhyo namo yajñebhya eva ca /
namaḥ śivāya śāntāya vyāsāya munaye namaḥ //
2.55.36
granthaikādaśasāhasraṃ purāṇaṃ laiṅgamuttamam /
aṣṭottarasatādhyāya mādimāṃśamataḥ param //
2.55.37
ṣaṭcatvārīṃśadadhyāyaṃ dharmakāmārthamokṣadam /
atha te munayaḥ sarve naimiṣeyāḥ samāhitāḥ //
2.55.38
praṇemurdevamīśānaṃ prītikaṇṭakitatvacaḥ /
śākhāṃ paurāṇikīmevaṃ kṛtvaikādaśikāṃ prabhuḥ //
2.55.39
brahmā svayaṃbhūrbhagavānidaṃ vacanamabravīt /
laiṅgamādyantamakhilaṃ yaḥ paṭhecchṛṇuyādapi //
2.55.40
dvijebhyaḥ śrāvayedvāpi sa yāti paramāṃ gatim /
tapasā caiva yajñena dānenādhyayanena ca //
2.55.41
yā gatistasya vipulā śāstravidyā ca vaidikī /
karmaṇā cāpi miśreṇa kevalaṃ vidyayāpi vā //
2.55.42
nivṛttiścāsya viprasya bhavedbhaktiśca śāśvatī /
mayi nārāyaṇe deve śraddhā cāstu mahātmanaḥ //
2.55.43
vaṃśasya cākṣayā vidyā cāpramādaśca sarvataḥ /
ityājñā brahmaṇastasmāttasya sarvaṃ mahātmanaḥ //
2.55.44
ṛṣayaḥ procuḥ
ṛṣeḥ sūtasya cāsmākameteṣābhapi cāsya ca /
nāradasya ca yā siddhistīrthayātrāratasya ca //
2.55.45
prītiśca vipulā yasmā dasmākaṃ romaharṣaṇa //
2.55.46
sā sadāstu virūpākṣaprasādāttu samantataḥ /
evamukteṣu vipreṣu nārado bhagavānapi //
2.55.47
karābhyāṃ suśubhāgrābhyāṃ sūtaṃ pasparśivāṃstvaci /
svastyastu sūta bhadraṃ te mahādeve vṛṣadhvaje //
2.55.48
śraddhā tavāstu cāsmākaṃ namastasmai śivāya ca //
2.55.48.p1
iti śrīliṅgamahāpurāṇe uttarabhāge pañcapañcāśattamodhyāyaḥ
2.55.48.p2
samāptaṃ caitallaiṅgottarārdham
2.55.48.p3
śrībhavānīśaṅkarārpaṇamastu
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (2)
- Bhāgavatapurāṇa — Vyāsa, Sanskrit
- Garuḍapurāṇa — Vyāsa, Sanskrit