Pramāṇa · Search · About · API

Lingapurana 2.6

Liṅgapurāṇa 2.6

Language
Sanskrit

Contents

2.6.1

ṛṣaya ūcuḥ
māyāvitvaṃ śrutaṃ viṣṇordevadevasya dhīmataḥ /
kathaṃ jyeṣṭhāsamutpattirdevadevājjanārdanāt //

2.6.2

vaktumarhasi cāsmākaṃ lomaharṣaṇa tattvataḥ /
sūta uvāca
anādinidhanaḥ śrīmāndhātā nārāyaṇaḥ prabhuḥ //

2.6.3

jagaddvaidhamidaṃ cakre mohanāya jagatpatiḥ /
viṣṇurvai brāhmaṇānvedānvedadharmān sanātanān //

2.6.4

śriyaṃ padmāṃ tathā śreṣṭhāṃ bhāgamekamakārayat /
jyeṣṭhāmalakṣmīmaśubhāṃ vedabāhyānnarādhamān //

2.6.5

adharmaṃ ca mahātejā bhāgameka makalpayat /
alakṣmīmagrataḥ sṛṣṭvā paścātpadmāṃ janārdanaḥ //

2.6.6

jyeṣṭhā tena samākhyātā alakṣmīrdvijasattamāḥ /
amṛtodbhavavelāyāṃ viṣānantaramulbaṇāt //

2.6.7

aśubhā sā tathotpannā jyeṣṭhā iti ca vai śrutam /
tataḥ śrīśca samutpannā padmā viṣṇuparigrahaḥ //

2.6.8

duḥsaho nāma viprarṣirupayeme 'śubhāṃ tadā /
jyeṣṭhāṃ tāṃ paripūrṇo 'sau manasā vīkṣya dhiṣṭhitām //

2.6.9

lokaṃ cacāraṃ hṛṣṭātmā tayā saha munistadā /
yasmin ghoṣo hareścaiva harasya ca mahātmanaḥ //

2.6.10

vedaghoṣastathā viprā homadhūmastathaiva ca /
bhasmāṅgino vā yatrāsaṃstatra tatra bhayārditā //

2.6.11

pidhāya karṇau saṃyāti dhāvamānā itastataḥ /
jyeṣṭhāmevaṃvidhāṃ dṛṣṭvā duḥsaho mohamāgataḥ //

2.6.12

tayā saha vanaṃ gatvā cacāra sa mahāmuniḥ /
tapo mahadvane ghore yāti kanyā pratigraham //

2.6.13

na kariṣyāmi cetyuktvā pratijñāya ca tāmṛṣiḥ /
yogajñānaparaḥ śuddho yatra yogīśvaro muniḥ //

2.6.14

tatrāyāntaṃ mahātmānaṃ mārkaṇḍeyamapaśyata /
praṇipatya mahātmānaṃ duḥsaho munimabravīt //

2.6.15

bhāryeyaṃ bhagavanmahyaṃ na sthāsyati kathañcana /
kiṃ karomīti viprarṣe hyanayā saha bhāryayā //

2.6.16

praviśāmi tathā kutra kuto na praviśāmyaham /
mārkaṇḍeya uvāca
śṛṇu duḥsaha sarvatra akīrtiraśubhānvitā //

2.6.17

alakṣmīratulā ceyaṃ jyeṣṭhā ityabhiśabditā /
nārāyaṇaparā yatra vedamārgānusāriṇaḥ //

2.6.18

rudrabhaktā mahātmāno bhasmoddhūlitavigrahāḥ /
sthitā yatra janā nityaṃ mā viśethāḥ kathañcana //

2.6.19

nārāyaṇa hṛṣīkeśa puṇḍarīkākṣa mādhava /
acyutānanta govinda vāsudeva janārdana //

2.6.20

rudra rudreti rudreti śivāya ca namo namaḥ /
namaḥ śivatarāyeti śaṅkarāyeti sarvadā //

2.6.21

mahādeva mahādeva mahādeveti kīrtayet /
umāyāḥ pataye caiva hiraṇyapataye sadā //

2.6.22

hiraṇyabāhave tubhyaṃ vṛṣāṅkāya namo namaḥ /
nṛsiṃhavāmanācintya mādhaveti ca ye janāḥ //

2.6.23

vakṣyanti satataṃ hṛṣṭā brāhmaṇāḥ kṣatriyāstathā /
vaiśyāḥ śūdrāśca ye nityaṃ teṣāṃ dhanagṛhādiṣu /
ārāme caiva goṣṭheṣu na viśethāḥ kathañcana //

2.6.24

jvālāmālākarālaṃ ca sahasrādityasannibham /
cakraṃ viṣṇoratīvograṃ teṣāṃ hanti sadāśubham //

2.6.25

svāhākāro vaṣaṭkāro gṛhe yasmin hi vartate /
taddhitvā cānyamāgaccha samāghoṣetha yatra vā //

2.6.26

vedābhyāsaratā nityaṃ nityakarmaparāyaṇāḥ /
vāsudevārcanaratā dūratastānvisarjayet //

2.6.27

agnihotraṃ gṛhe yeṣāṃ liṅgārcā vā gṛheṣu ca /
vāsudevatanurvāpi caṇḍikā yatra tiṣṭhati //

2.6.28

dūrato vraja tān hitvā sarvapāpavivarjitān /
nityanaimittikairyajñairyajanti ca maheśvaram //

2.6.29

tān hitvā vraja cānyatra duḥsahatvaṃ sahānayā /
śrotriyā brāhmaṇā gāvo guravo 'tithayaḥ sadā //

2.6.30

rudrabhaktāśca pūjyante yairnityaṃ tānvivarjayet /
duḥsaha uvāca
yasminpraveśo yogyo me tadbrūhi munisattama //

2.6.31

tvadvākyādbhayanirmukto viśānmeṣāṃ gṛhe sadā /
mārkaṇḍeya uvāca
na śrotriyā dvijā gāvo guravo 'tithayaḥ sadā /
yatra bhartā ca bhāryā ca parasparavirodhinau //

2.6.32

sabhāryastvaṃ gṛhaṃ tasya viśethā bhayavarjitaḥ /
devadevo mahādevo rudrastribhuvaneśvaraḥ //

2.6.33

vinindyo yatra bhagavān viśasva bhayavarjitaḥ /
vāsudevaratirnāsti yatra nāsti sadāśivaḥ //

2.6.34

japahomādikaṃ nāsti bhasma nāsti gṛhe nṛṇām /
parvaṇyabhyarcanaṃ nāsti caturdaśyāṃ viśeṣataḥ //

2.6.35

kṛṣṇāṣṭamyāṃ ca rudrasya saṃdhyāyāṃ bhasmavarjitāḥ /
caturdaśyāṃ mahādevaṃ na yajanti ca yatra vai //

2.6.36

viṣṇornāmavihinā ye saṃgatāśca durātmabhiḥ /
namaḥ kṛṣṇāya śarvāya śivāya parameṣṭhine //

2.6.37

brāhmaṇāśca narā mūḍhā navadanti durātmakāḥ /
tatraiva satataṃ vatsa sabhāryastvaṃ samāvisa //

2.6.38

vedaghoṣo na yatrāsti gurupūjādayo na ca /
pitṛkarmavihīnāṃstu sabhāryastvaṃ samāviśa //

2.6.39

rātrau rātrau gṛhe yasmin kalaho vartate mithaḥ /
anayā sārdhamaniśaṃ viśa tvaṃ bhayavarjitaḥ //

2.6.40

liṅgārcanaṃ yasya nāsti yasya nāsti japādikam /
rudrabhaktirvinindā ca tatraiva viśa nirbhayaḥ //

2.6.41

atithiḥ śrotriyo vāpi gururvāvaiṣṇavopi vā /
na saṃti yadgṛhe gāvaḥ sabhāryastvaṃ samāviśa //

2.6.42

bālānāṃ prekṣamāṇānāṃ yatrādattvā tvabhakṣayan /
bhakṣyāṇi tatra saṃhṛṣṭaḥ sabhāryastvaṃ samāviśa //

2.6.43

anabhyarcya mahādevaṃ vāsudevamathāpi vā /
ahutvā vidhivadyatra tatra nityaṃ samāviśa //

2.6.44

pāpa karmaratā mūḍhā dayāhīnāḥ parasparam /
gṛhe yasminsamāsaṃte deśe vā tatra saṃviśa //

2.6.45

prākārāgāravidhvaṃsā na caiveḍyā kuṭuṃbinī /
tadgṛhaṃ tu samāsādya vasa nityaṃ hi hṛṣṭadhīḥ //

2.6.46

yatra kaṇṭakino vṛkṣā yatra niṣpāvavallarī /
brahmavṛkṣaśca yatrāsti sabhāryāstvaṃ samāviśa //

2.6.47

agastyārkādayo vāpi bandhujīvo gṛheṣu vai /
karavīro viśeṣeṇa nandyāvartamathāpi vā //

2.6.48

mallikā vā gṛhe yeṣāṃ sabhāryāstvaṃ samāviśa /
kanyā ca yatra vai vallī drohī vā ca jaṭī gṛhe //

2.6.49

bahulā kadalī yatra sabhāryastvaṃ samāviśa /
tālaṃ tamālaṃ bhallātaṃ tittiḍīkhaṇḍameva ca //

2.6.50

kadaṃbaḥ khādiraṃ vāpi sabhāryastvaṃ samāviśa /
nyagrodhaṃ vā gṛhe yeṣāmaśvatthaṃ cūtameva vā //

2.6.51

uduṃbaraṃ vā panasaṃ sabhāryāstvaṃ samāviśa /
yasya kākagṛhaṃ niṃbe ārāme vā gṛhepi vā //

2.6.52

daṇḍinī muṇḍinī vāpi sabhāryastvaṃ samāviśa /
ekā dāsī gṛhe yatra trigavaṃ pañcamāhiṣam //

2.6.53

ṣaḍaśvaṃ saptamātaṅgaṃ sabhāryastvaṃ samāviśa /
yasya kālī gṛhe devī pretarūpā ca ḍākinī //

2.6.54

kṣetrapālethavā yatra sabhāryastvaṃ samāviśa /
bhikṣubiṃbaṃ ca vai yasya gṛhe kṣapaṇakaṃ tathā //

2.6.55

bauddhaṃ vā biṃbamāsādya tatra pūrṇaṃ samāviśa /
śayanāsanakāleṣu bhojanāṭanavṛttiṣu //

2.6.56

yeṣāṃ vadati no vāṇī nāmāni ca hareḥ sadā /
tadgahaṃ te samākhyātaṃ sabhāryasya niveśitum //

2.6.57

pāṣaṇḍācāraniratāḥ śrautasmārtabahiṣkṛtāḥ /
viṣṇubhakti vinirmuktā mahādevavinindakāḥ //

2.6.58

nāstikāśca śaṭhā yatra sabhāryāstvaṃ samāviśa /
sarvasmādadhikatvaṃ ye na vadanti pinākinaḥ //

2.6.59

sādhāraṇaṃ smarantyenaṃ sabhāryastvaṃ samāviśa /
brahmā ca bhagavānviṣṇuḥ śakraḥ sarvasureśvaraḥ //

2.6.60

rudraprasādajāśceti na vadanti durātmakāḥ /
brahmā ca bhagavānviṣṇuḥ śakraśca sama eva ca //

2.6.61

vadanti mūḍhāḥ khadyotaṃ bhānuṃ vā mūḍhacetasaḥ /
teṣāṃ gṛhe tathā kṣetra āvāse vā sadānayā //

2.6.62

viśa bhuṅkṣva gṛhaṃ teṣāṃ api pūrṇamananyadhīḥ /
ye 'śranti kevalaṃ mūḍhāḥ pakvamannaṃ vicetasaḥ //

2.6.63

snānamaṅgalahīnāś ca teṣāṃ tvaṃ gṛham āviśa /
yā nārī śaucavibhraṣṭā dehasaṃskāravarjitā //

2.6.64

sarvabhakṣaratā nityaṃ tasyāḥ stāne samāviśa /
malināsyāḥ svayaṃ martyā malināṃbaradhāriṇaḥ //

2.6.65

maladantā gṛhasthāśca gṛhe teṣāṃ samāviśa /
pādaśaucavinirmuktāḥ saṃdhyākāle ca śāyinaḥ //

2.6.66

saṃdhyāyāma śrute ye vai gṛhaṃ teṣāṃ samāviśa /
atyāśanaratā martyā atipānaratā narāḥ //

2.6.67

dyūtavādakriyāmūḍhāḥ gṛhe teṣāṃ samāviśa /
brahmasvahāriṇo ye cāyogyāṃścaiva yajanti vā //

2.6.68

śūdrānnabhojino vāpi gṛhaṃ teṣāṃ samāviśa /
madyapānaratāḥ pāpā māṃsa bhakṣaṇatatparāḥ //

2.6.69

paradāraratā martyā gṛhaṃ teṣāṃ samāviśa /
parvaṇyanarcābhiratā maithune vā divā ratāḥ //

2.6.70

saṃdhyāyāṃ maithunaṃ yeṣāṃ gṛhe teṣāṃ samāviśa /
pṛṣṭhato maithunaṃ yeṣāṃ śvānavanmṛgavacca vā //

2.6.71

jale vā maithunaṃ kuryātsabhāryastvaṃ samāviśa /
rajasvalāṃ striyaṃ gaccheccāṇḍālīṃ vā narādhamaḥ //

2.6.72

kanyāṃ vā gogṛhe vāpi gṛhaṃ teṣāṃ samāviśa /
bahunā kiṃ pralāpena nityakarmabahiṣkṛtāḥ //

2.6.73

rudrabhaktivihīnāye gṛhaṃ teṣāṃ samāviśa /
śṛṅgairdivyauṣadhaiḥ kṣudraiḥ śepha ālipya gacchati //

2.6.74

bhagadrāvaṃ karotyasmātsabhāryastvaṃ samāviśa /
sūta uvāca
ityuktvā sa muniḥ śrīmān nirmārjya nayane tadā //

2.6.75

brahmarṣirbrahmasaṃkāśastatraivāntarddhimātanot /
duḥsahaśca tathoktāni stānāni ca samīyivān //

2.6.76

viśeṣāddevadevasya viṣṇornidāratātmanām /
sabhāryo muniśārdūlaḥ saiṣā jyeṣṭhā iti smṛtā //

2.6.77

duḥsahastāmuvācedaṃ taḍāgāśramamantare /
āsva tvamatra cāhaṃ vai pravekṣyāmi rasātalam //

2.6.78

āvayoḥ sthānamālokya nivāsārthaṃ tataḥ punaḥ /
āgamiṣyāmi te pārśvamityuktā tamuvāca sā //

2.6.79

kimaśrāmi mahābhāga ko me dāsyati vai balim /
ityuktastāṃ muniḥ prāha yāḥ striyastvāṃ yajanti vai //

2.6.80

balibhiḥ puṣpadhūpaiśca na tāsāṃ ca gṛhaṃ viśa /
ityuktvā tvāviśattatra pātālaṃ bilayogataḥ //

2.6.81

adyāpi ca vinirmagno muniḥ sa jalasaṃstare /
grāmaparvatabāhyeṣu nityamāste 'śubhā punaḥ //

2.6.82

prasaṃgāddevandeveśo viṣṇustribhuvaneśvaraḥ /
lakṣmyā dṛṣṭastayā lakṣmīḥ sā tamāha janārdanam //

2.6.83

bhartā gato mahābāho bilaṃ tyaktvā sa māṃ prabho /
anāthāhaṃ jagannātha vṛttiṃ dehi namostu te //

2.6.84

sūta uvāca
ityukto bhagavānviṣṇuḥ prahasyāha janārdanaḥ /
jyeṣṭhāmalakṣmīṃ deveśo mādhavo madhusūdanaḥ //

2.6.85

śrīviṣṇuruvāca
ye rudramanaghaṃ śarvaṃ śaṅkaraṃ nīlalohitam /
aṃbāṃ haimavatīṃ vāpi janitrīṃ jagatāmapi //

2.6.86

madbhaktānnindayantyatra teṣāṃ vittaṃ tavaiva hi /
yepi caiva mahādevaṃ vinindyaiva yajanti mām //

2.6.87

mūḍhā hyabhāgyā madbhaktā api teṣāṃ dhanaṃ tava /
yasyājñayā hyahaṃ brahmā prasādādvartate sadā //

2.6.88

ye yajanti vinindyaiva mama vidveṣakārakāḥ /
madbhaktā naiva te bhaktā iva vartanti durmadāḥ //

2.6.89

teṣāṃ gṛhaṃ dhanaṃ kṣetramiṣṭāpūrtaṃ tavaiva hi /
sūta uvāca
ityuktvā tāṃ parityajya lakṣmyālakṣmīṃ janārdanaḥ //

2.6.90

jajāpa bhagavanrudramalakṣmīkṣayasiddhaye /
tasmātpradeyastasyai ca balirnityaṃmunīśvarāḥ //

2.6.91

viṣṇubhaktairna saṃdehaḥ sarvayatnena sarvadā /
aṅganābhiḥ sadā pūjyā balibhirvividhairdvijāḥ //

2.6.92

yaḥ paṭhecchṛṇuyādvāpi śrāvayedvā dvijottamān /
alakṣmīvṛttamanagho lakṣmīvāllaṃbhate gatim //

2.6.92.p1

iti śrīliṅgamahāpurāṇe uttarabhāge alakṣmīvṛttaṃ nāma ṣaṣṭhe 'dhyāyaḥ

Commentaries (2)

Linked texts (5)