[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Linga Purana](https://indike.org/pramana/in.purana.linga) › 2.6 # Linga Purana 2.6 Liṅgapurāṇa 2.6 - **Language:** Sanskrit ## Contents - [2.6.92](https://indike.org/pramana/in.purana.linga.2.6.92) — 1 part ### [2.6.1](https://indike.org/pramana/in.purana.linga.2.6.1) ṛṣaya ūcuḥ māyāvitvaṃ śrutaṃ viṣṇordevadevasya dhīmataḥ / kathaṃ jyeṣṭhāsamutpattirdevadevājjanārdanāt // ### [2.6.2](https://indike.org/pramana/in.purana.linga.2.6.2) vaktumarhasi cāsmākaṃ lomaharṣaṇa tattvataḥ / sūta uvāca anādinidhanaḥ śrīmāndhātā nārāyaṇaḥ prabhuḥ // ### [2.6.3](https://indike.org/pramana/in.purana.linga.2.6.3) jagaddvaidhamidaṃ cakre mohanāya jagatpatiḥ / viṣṇurvai brāhmaṇānvedānvedadharmān sanātanān // ### [2.6.4](https://indike.org/pramana/in.purana.linga.2.6.4) śriyaṃ padmāṃ tathā śreṣṭhāṃ bhāgamekamakārayat / jyeṣṭhāmalakṣmīmaśubhāṃ vedabāhyānnarādhamān // ### [2.6.5](https://indike.org/pramana/in.purana.linga.2.6.5) adharmaṃ ca mahātejā bhāgameka makalpayat / alakṣmīmagrataḥ sṛṣṭvā paścātpadmāṃ janārdanaḥ // ### [2.6.6](https://indike.org/pramana/in.purana.linga.2.6.6) jyeṣṭhā tena samākhyātā alakṣmīrdvijasattamāḥ / amṛtodbhavavelāyāṃ viṣānantaramulbaṇāt // ### [2.6.7](https://indike.org/pramana/in.purana.linga.2.6.7) aśubhā sā tathotpannā jyeṣṭhā iti ca vai śrutam / tataḥ śrīśca samutpannā padmā viṣṇuparigrahaḥ // ### [2.6.8](https://indike.org/pramana/in.purana.linga.2.6.8) duḥsaho nāma viprarṣirupayeme 'śubhāṃ tadā / jyeṣṭhāṃ tāṃ paripūrṇo 'sau manasā vīkṣya dhiṣṭhitām // ### [2.6.9](https://indike.org/pramana/in.purana.linga.2.6.9) lokaṃ cacāraṃ hṛṣṭātmā tayā saha munistadā / yasmin ghoṣo hareścaiva harasya ca mahātmanaḥ // ### [2.6.10](https://indike.org/pramana/in.purana.linga.2.6.10) vedaghoṣastathā viprā homadhūmastathaiva ca / bhasmāṅgino vā yatrāsaṃstatra tatra bhayārditā // ### [2.6.11](https://indike.org/pramana/in.purana.linga.2.6.11) pidhāya karṇau saṃyāti dhāvamānā itastataḥ / jyeṣṭhāmevaṃvidhāṃ dṛṣṭvā duḥsaho mohamāgataḥ // ### [2.6.12](https://indike.org/pramana/in.purana.linga.2.6.12) tayā saha vanaṃ gatvā cacāra sa mahāmuniḥ / tapo mahadvane ghore yāti kanyā pratigraham // ### [2.6.13](https://indike.org/pramana/in.purana.linga.2.6.13) na kariṣyāmi cetyuktvā pratijñāya ca tāmṛṣiḥ / yogajñānaparaḥ śuddho yatra yogīśvaro muniḥ // ### [2.6.14](https://indike.org/pramana/in.purana.linga.2.6.14) tatrāyāntaṃ mahātmānaṃ mārkaṇḍeyamapaśyata / praṇipatya mahātmānaṃ duḥsaho munimabravīt // ### [2.6.15](https://indike.org/pramana/in.purana.linga.2.6.15) bhāryeyaṃ bhagavanmahyaṃ na sthāsyati kathañcana / kiṃ karomīti viprarṣe hyanayā saha bhāryayā // ### [2.6.16](https://indike.org/pramana/in.purana.linga.2.6.16) praviśāmi tathā kutra kuto na praviśāmyaham / mārkaṇḍeya uvāca śṛṇu duḥsaha sarvatra akīrtiraśubhānvitā // ### [2.6.17](https://indike.org/pramana/in.purana.linga.2.6.17) alakṣmīratulā ceyaṃ jyeṣṭhā ityabhiśabditā / nārāyaṇaparā yatra vedamārgānusāriṇaḥ // ### [2.6.18](https://indike.org/pramana/in.purana.linga.2.6.18) rudrabhaktā mahātmāno bhasmoddhūlitavigrahāḥ / sthitā yatra janā nityaṃ mā viśethāḥ kathañcana // ### [2.6.19](https://indike.org/pramana/in.purana.linga.2.6.19) nārāyaṇa hṛṣīkeśa puṇḍarīkākṣa mādhava / acyutānanta govinda vāsudeva janārdana // ### [2.6.20](https://indike.org/pramana/in.purana.linga.2.6.20) rudra rudreti rudreti śivāya ca namo namaḥ / namaḥ śivatarāyeti śaṅkarāyeti sarvadā // ### [2.6.21](https://indike.org/pramana/in.purana.linga.2.6.21) mahādeva mahādeva mahādeveti kīrtayet / umāyāḥ pataye caiva hiraṇyapataye sadā // ### [2.6.22](https://indike.org/pramana/in.purana.linga.2.6.22) hiraṇyabāhave tubhyaṃ vṛṣāṅkāya namo namaḥ / nṛsiṃhavāmanācintya mādhaveti ca ye janāḥ // ### [2.6.23](https://indike.org/pramana/in.purana.linga.2.6.23) vakṣyanti satataṃ hṛṣṭā brāhmaṇāḥ kṣatriyāstathā / vaiśyāḥ śūdrāśca ye nityaṃ teṣāṃ dhanagṛhādiṣu / ārāme caiva goṣṭheṣu na viśethāḥ kathañcana // ### [2.6.24](https://indike.org/pramana/in.purana.linga.2.6.24) jvālāmālākarālaṃ ca sahasrādityasannibham / cakraṃ viṣṇoratīvograṃ teṣāṃ hanti sadāśubham // ### [2.6.25](https://indike.org/pramana/in.purana.linga.2.6.25) svāhākāro vaṣaṭkāro gṛhe yasmin hi vartate / taddhitvā cānyamāgaccha samāghoṣetha yatra vā // ### [2.6.26](https://indike.org/pramana/in.purana.linga.2.6.26) vedābhyāsaratā nityaṃ nityakarmaparāyaṇāḥ / vāsudevārcanaratā dūratastānvisarjayet // ### [2.6.27](https://indike.org/pramana/in.purana.linga.2.6.27) agnihotraṃ gṛhe yeṣāṃ liṅgārcā vā gṛheṣu ca / vāsudevatanurvāpi caṇḍikā yatra tiṣṭhati // ### [2.6.28](https://indike.org/pramana/in.purana.linga.2.6.28) dūrato vraja tān hitvā sarvapāpavivarjitān / nityanaimittikairyajñairyajanti ca maheśvaram // ### [2.6.29](https://indike.org/pramana/in.purana.linga.2.6.29) tān hitvā vraja cānyatra duḥsahatvaṃ sahānayā / śrotriyā brāhmaṇā gāvo guravo 'tithayaḥ sadā // ### [2.6.30](https://indike.org/pramana/in.purana.linga.2.6.30) rudrabhaktāśca pūjyante yairnityaṃ tānvivarjayet / duḥsaha uvāca yasminpraveśo yogyo me tadbrūhi munisattama // ### [2.6.31](https://indike.org/pramana/in.purana.linga.2.6.31) tvadvākyādbhayanirmukto viśānmeṣāṃ gṛhe sadā / mārkaṇḍeya uvāca na śrotriyā dvijā gāvo guravo 'tithayaḥ sadā / yatra bhartā ca bhāryā ca parasparavirodhinau // ### [2.6.32](https://indike.org/pramana/in.purana.linga.2.6.32) sabhāryastvaṃ gṛhaṃ tasya viśethā bhayavarjitaḥ / devadevo mahādevo rudrastribhuvaneśvaraḥ // ### [2.6.33](https://indike.org/pramana/in.purana.linga.2.6.33) vinindyo yatra bhagavān viśasva bhayavarjitaḥ / vāsudevaratirnāsti yatra nāsti sadāśivaḥ // ### [2.6.34](https://indike.org/pramana/in.purana.linga.2.6.34) japahomādikaṃ nāsti bhasma nāsti gṛhe nṛṇām / parvaṇyabhyarcanaṃ nāsti caturdaśyāṃ viśeṣataḥ // ### [2.6.35](https://indike.org/pramana/in.purana.linga.2.6.35) kṛṣṇāṣṭamyāṃ ca rudrasya saṃdhyāyāṃ bhasmavarjitāḥ / caturdaśyāṃ mahādevaṃ na yajanti ca yatra vai // ### [2.6.36](https://indike.org/pramana/in.purana.linga.2.6.36) viṣṇornāmavihinā ye saṃgatāśca durātmabhiḥ / namaḥ kṛṣṇāya śarvāya śivāya parameṣṭhine // ### [2.6.37](https://indike.org/pramana/in.purana.linga.2.6.37) brāhmaṇāśca narā mūḍhā navadanti durātmakāḥ / tatraiva satataṃ vatsa sabhāryastvaṃ samāvisa // ### [2.6.38](https://indike.org/pramana/in.purana.linga.2.6.38) vedaghoṣo na yatrāsti gurupūjādayo na ca / pitṛkarmavihīnāṃstu sabhāryastvaṃ samāviśa // ### [2.6.39](https://indike.org/pramana/in.purana.linga.2.6.39) rātrau rātrau gṛhe yasmin kalaho vartate mithaḥ / anayā sārdhamaniśaṃ viśa tvaṃ bhayavarjitaḥ // ### [2.6.40](https://indike.org/pramana/in.purana.linga.2.6.40) liṅgārcanaṃ yasya nāsti yasya nāsti japādikam / rudrabhaktirvinindā ca tatraiva viśa nirbhayaḥ // ### [2.6.41](https://indike.org/pramana/in.purana.linga.2.6.41) atithiḥ śrotriyo vāpi gururvāvaiṣṇavopi vā / na saṃti yadgṛhe gāvaḥ sabhāryastvaṃ samāviśa // ### [2.6.42](https://indike.org/pramana/in.purana.linga.2.6.42) bālānāṃ prekṣamāṇānāṃ yatrādattvā tvabhakṣayan / bhakṣyāṇi tatra saṃhṛṣṭaḥ sabhāryastvaṃ samāviśa // ### [2.6.43](https://indike.org/pramana/in.purana.linga.2.6.43) anabhyarcya mahādevaṃ vāsudevamathāpi vā / ahutvā vidhivadyatra tatra nityaṃ samāviśa // ### [2.6.44](https://indike.org/pramana/in.purana.linga.2.6.44) pāpa karmaratā mūḍhā dayāhīnāḥ parasparam / gṛhe yasminsamāsaṃte deśe vā tatra saṃviśa // ### [2.6.45](https://indike.org/pramana/in.purana.linga.2.6.45) prākārāgāravidhvaṃsā na caiveḍyā kuṭuṃbinī / tadgṛhaṃ tu samāsādya vasa nityaṃ hi hṛṣṭadhīḥ // ### [2.6.46](https://indike.org/pramana/in.purana.linga.2.6.46) yatra kaṇṭakino vṛkṣā yatra niṣpāvavallarī / brahmavṛkṣaśca yatrāsti sabhāryāstvaṃ samāviśa // ### [2.6.47](https://indike.org/pramana/in.purana.linga.2.6.47) agastyārkādayo vāpi bandhujīvo gṛheṣu vai / karavīro viśeṣeṇa nandyāvartamathāpi vā // ### [2.6.48](https://indike.org/pramana/in.purana.linga.2.6.48) mallikā vā gṛhe yeṣāṃ sabhāryāstvaṃ samāviśa / kanyā ca yatra vai vallī drohī vā ca jaṭī gṛhe // ### [2.6.49](https://indike.org/pramana/in.purana.linga.2.6.49) bahulā kadalī yatra sabhāryastvaṃ samāviśa / tālaṃ tamālaṃ bhallātaṃ tittiḍīkhaṇḍameva ca // ### [2.6.50](https://indike.org/pramana/in.purana.linga.2.6.50) kadaṃbaḥ khādiraṃ vāpi sabhāryastvaṃ samāviśa / nyagrodhaṃ vā gṛhe yeṣāmaśvatthaṃ cūtameva vā // ### [2.6.51](https://indike.org/pramana/in.purana.linga.2.6.51) uduṃbaraṃ vā panasaṃ sabhāryāstvaṃ samāviśa / yasya kākagṛhaṃ niṃbe ārāme vā gṛhepi vā // ### [2.6.52](https://indike.org/pramana/in.purana.linga.2.6.52) daṇḍinī muṇḍinī vāpi sabhāryastvaṃ samāviśa / ekā dāsī gṛhe yatra trigavaṃ pañcamāhiṣam // ### [2.6.53](https://indike.org/pramana/in.purana.linga.2.6.53) ṣaḍaśvaṃ saptamātaṅgaṃ sabhāryastvaṃ samāviśa / yasya kālī gṛhe devī pretarūpā ca ḍākinī // ### [2.6.54](https://indike.org/pramana/in.purana.linga.2.6.54) kṣetrapālethavā yatra sabhāryastvaṃ samāviśa / bhikṣubiṃbaṃ ca vai yasya gṛhe kṣapaṇakaṃ tathā // ### [2.6.55](https://indike.org/pramana/in.purana.linga.2.6.55) bauddhaṃ vā biṃbamāsādya tatra pūrṇaṃ samāviśa / śayanāsanakāleṣu bhojanāṭanavṛttiṣu // ### [2.6.56](https://indike.org/pramana/in.purana.linga.2.6.56) yeṣāṃ vadati no vāṇī nāmāni ca hareḥ sadā / tadgahaṃ te samākhyātaṃ sabhāryasya niveśitum // ### [2.6.57](https://indike.org/pramana/in.purana.linga.2.6.57) pāṣaṇḍācāraniratāḥ śrautasmārtabahiṣkṛtāḥ / viṣṇubhakti vinirmuktā mahādevavinindakāḥ // ### [2.6.58](https://indike.org/pramana/in.purana.linga.2.6.58) nāstikāśca śaṭhā yatra sabhāryāstvaṃ samāviśa / sarvasmādadhikatvaṃ ye na vadanti pinākinaḥ // ### [2.6.59](https://indike.org/pramana/in.purana.linga.2.6.59) sādhāraṇaṃ smarantyenaṃ sabhāryastvaṃ samāviśa / brahmā ca bhagavānviṣṇuḥ śakraḥ sarvasureśvaraḥ // ### [2.6.60](https://indike.org/pramana/in.purana.linga.2.6.60) rudraprasādajāśceti na vadanti durātmakāḥ / brahmā ca bhagavānviṣṇuḥ śakraśca sama eva ca // ### [2.6.61](https://indike.org/pramana/in.purana.linga.2.6.61) vadanti mūḍhāḥ khadyotaṃ bhānuṃ vā mūḍhacetasaḥ / teṣāṃ gṛhe tathā kṣetra āvāse vā sadānayā // ### [2.6.62](https://indike.org/pramana/in.purana.linga.2.6.62) viśa bhuṅkṣva gṛhaṃ teṣāṃ api pūrṇamananyadhīḥ / ye 'śranti kevalaṃ mūḍhāḥ pakvamannaṃ vicetasaḥ // ### [2.6.63](https://indike.org/pramana/in.purana.linga.2.6.63) snānamaṅgalahīnāś ca teṣāṃ tvaṃ gṛham āviśa / yā nārī śaucavibhraṣṭā dehasaṃskāravarjitā // ### [2.6.64](https://indike.org/pramana/in.purana.linga.2.6.64) sarvabhakṣaratā nityaṃ tasyāḥ stāne samāviśa / malināsyāḥ svayaṃ martyā malināṃbaradhāriṇaḥ // ### [2.6.65](https://indike.org/pramana/in.purana.linga.2.6.65) maladantā gṛhasthāśca gṛhe teṣāṃ samāviśa / pādaśaucavinirmuktāḥ saṃdhyākāle ca śāyinaḥ // ### [2.6.66](https://indike.org/pramana/in.purana.linga.2.6.66) saṃdhyāyāma śrute ye vai gṛhaṃ teṣāṃ samāviśa / atyāśanaratā martyā atipānaratā narāḥ // ### [2.6.67](https://indike.org/pramana/in.purana.linga.2.6.67) dyūtavādakriyāmūḍhāḥ gṛhe teṣāṃ samāviśa / brahmasvahāriṇo ye cāyogyāṃścaiva yajanti vā // ### [2.6.68](https://indike.org/pramana/in.purana.linga.2.6.68) śūdrānnabhojino vāpi gṛhaṃ teṣāṃ samāviśa / madyapānaratāḥ pāpā māṃsa bhakṣaṇatatparāḥ // ### [2.6.69](https://indike.org/pramana/in.purana.linga.2.6.69) paradāraratā martyā gṛhaṃ teṣāṃ samāviśa / parvaṇyanarcābhiratā maithune vā divā ratāḥ // ### [2.6.70](https://indike.org/pramana/in.purana.linga.2.6.70) saṃdhyāyāṃ maithunaṃ yeṣāṃ gṛhe teṣāṃ samāviśa / pṛṣṭhato maithunaṃ yeṣāṃ śvānavanmṛgavacca vā // ### [2.6.71](https://indike.org/pramana/in.purana.linga.2.6.71) jale vā maithunaṃ kuryātsabhāryastvaṃ samāviśa / rajasvalāṃ striyaṃ gaccheccāṇḍālīṃ vā narādhamaḥ // ### [2.6.72](https://indike.org/pramana/in.purana.linga.2.6.72) kanyāṃ vā gogṛhe vāpi gṛhaṃ teṣāṃ samāviśa / bahunā kiṃ pralāpena nityakarmabahiṣkṛtāḥ // ### [2.6.73](https://indike.org/pramana/in.purana.linga.2.6.73) rudrabhaktivihīnāye gṛhaṃ teṣāṃ samāviśa / śṛṅgairdivyauṣadhaiḥ kṣudraiḥ śepha ālipya gacchati // ### [2.6.74](https://indike.org/pramana/in.purana.linga.2.6.74) bhagadrāvaṃ karotyasmātsabhāryastvaṃ samāviśa / sūta uvāca ityuktvā sa muniḥ śrīmān nirmārjya nayane tadā // ### [2.6.75](https://indike.org/pramana/in.purana.linga.2.6.75) brahmarṣirbrahmasaṃkāśastatraivāntarddhimātanot / duḥsahaśca tathoktāni stānāni ca samīyivān // ### [2.6.76](https://indike.org/pramana/in.purana.linga.2.6.76) viśeṣāddevadevasya viṣṇornidāratātmanām / sabhāryo muniśārdūlaḥ saiṣā jyeṣṭhā iti smṛtā // ### [2.6.77](https://indike.org/pramana/in.purana.linga.2.6.77) duḥsahastāmuvācedaṃ taḍāgāśramamantare / āsva tvamatra cāhaṃ vai pravekṣyāmi rasātalam // ### [2.6.78](https://indike.org/pramana/in.purana.linga.2.6.78) āvayoḥ sthānamālokya nivāsārthaṃ tataḥ punaḥ / āgamiṣyāmi te pārśvamityuktā tamuvāca sā // ### [2.6.79](https://indike.org/pramana/in.purana.linga.2.6.79) kimaśrāmi mahābhāga ko me dāsyati vai balim / ityuktastāṃ muniḥ prāha yāḥ striyastvāṃ yajanti vai // ### [2.6.80](https://indike.org/pramana/in.purana.linga.2.6.80) balibhiḥ puṣpadhūpaiśca na tāsāṃ ca gṛhaṃ viśa / ityuktvā tvāviśattatra pātālaṃ bilayogataḥ // ### [2.6.81](https://indike.org/pramana/in.purana.linga.2.6.81) adyāpi ca vinirmagno muniḥ sa jalasaṃstare / grāmaparvatabāhyeṣu nityamāste 'śubhā punaḥ // ### [2.6.82](https://indike.org/pramana/in.purana.linga.2.6.82) prasaṃgāddevandeveśo viṣṇustribhuvaneśvaraḥ / lakṣmyā dṛṣṭastayā lakṣmīḥ sā tamāha janārdanam // ### [2.6.83](https://indike.org/pramana/in.purana.linga.2.6.83) bhartā gato mahābāho bilaṃ tyaktvā sa māṃ prabho / anāthāhaṃ jagannātha vṛttiṃ dehi namostu te // ### [2.6.84](https://indike.org/pramana/in.purana.linga.2.6.84) sūta uvāca ityukto bhagavānviṣṇuḥ prahasyāha janārdanaḥ / jyeṣṭhāmalakṣmīṃ deveśo mādhavo madhusūdanaḥ // ### [2.6.85](https://indike.org/pramana/in.purana.linga.2.6.85) śrīviṣṇuruvāca ye rudramanaghaṃ śarvaṃ śaṅkaraṃ nīlalohitam / aṃbāṃ haimavatīṃ vāpi janitrīṃ jagatāmapi // ### [2.6.86](https://indike.org/pramana/in.purana.linga.2.6.86) madbhaktānnindayantyatra teṣāṃ vittaṃ tavaiva hi / yepi caiva mahādevaṃ vinindyaiva yajanti mām // ### [2.6.87](https://indike.org/pramana/in.purana.linga.2.6.87) mūḍhā hyabhāgyā madbhaktā api teṣāṃ dhanaṃ tava / yasyājñayā hyahaṃ brahmā prasādādvartate sadā // ### [2.6.88](https://indike.org/pramana/in.purana.linga.2.6.88) ye yajanti vinindyaiva mama vidveṣakārakāḥ / madbhaktā naiva te bhaktā iva vartanti durmadāḥ // ### [2.6.89](https://indike.org/pramana/in.purana.linga.2.6.89) teṣāṃ gṛhaṃ dhanaṃ kṣetramiṣṭāpūrtaṃ tavaiva hi / sūta uvāca ityuktvā tāṃ parityajya lakṣmyālakṣmīṃ janārdanaḥ // ### [2.6.90](https://indike.org/pramana/in.purana.linga.2.6.90) jajāpa bhagavanrudramalakṣmīkṣayasiddhaye / tasmātpradeyastasyai ca balirnityaṃmunīśvarāḥ // ### [2.6.91](https://indike.org/pramana/in.purana.linga.2.6.91) viṣṇubhaktairna saṃdehaḥ sarvayatnena sarvadā / aṅganābhiḥ sadā pūjyā balibhirvividhairdvijāḥ // ### [2.6.92](https://indike.org/pramana/in.purana.linga.2.6.92) yaḥ paṭhecchṛṇuyādvāpi śrāvayedvā dvijottamān / alakṣmīvṛttamanagho lakṣmīvāllaṃbhate gatim // ### [2.6.92.p1](https://indike.org/pramana/in.purana.linga.2.6.92.p1) iti śrīliṅgamahāpurāṇe uttarabhāge alakṣmīvṛttaṃ nāma ṣaṣṭhe 'dhyāyaḥ ## Commentaries (1) - [Śivatoṣiṇī](https://indike.org/pramana/in.purana.linga!ganesa-ballala-natu.138.6) — Gaṇeśa Ballāla Nātū, Sanskrit ## Linked texts (5) - [Mārkaṇḍeyapurāṇa](https://indike.org/pramana/in.purana.markandeya.50.83) — Vyāsa, Sanskrit - [Vīraśaivācārapradīpikā](https://indike.org/pramana/in.sampradaya.saiva.virasaiva.acara.virasaivacarapradipika.498) — Gurudeva 1575, Sanskrit - [Vedāntasāravīraśaivacintāmaṇi](https://indike.org/pramana/in.sampradaya.saiva.virasaiva.siddhanta.vedantasaravirasaivacintamani.1.52) — Niṣṭhura Nañjanācārya 1700, Sanskrit - [Narmadāmāhātmya](https://indike.org/pramana/in.purana.vayu.narmadamahatmya.114.126.5) — Sanskrit - [Bhagavatībhāgavatapurāṇa](https://indike.org/pramana/in.purana.upa.sakta.bhagavatibhagavatapurana.127.72) — Sanskrit --- Source: [https://indike.org/pramana/in.purana.linga.2.6](https://indike.org/pramana/in.purana.linga.2.6) · Pramāṇa