Linga Purana 2.7
Liṅgapurāṇa 2.7
- Language
- Sanskrit
Contents
- 2.7.33 — 1 part
2.7.1
ṛṣaya ūcuḥ
kiñjapānmucyate jantuḥ sarvalokabhayādibhiḥ /
sarvapāpavinirmuktaḥ prāpnoti paramāṃ gatim //
2.7.2
alakṣmīṃvātha saṃtyajya gamiṣyati japena vai /
lakṣmīvāso bhavenmartyaḥ sūta vaktumihārhasi //
2.7.3
sūta uvāca
purā pitāmahenoktaṃ vasiṣṭhāya mahātmane /
vakṣye saṃkṣepataḥ sarvaṃ sarvalokahitāya vai //
2.7.4
śṛṇvantu vacanaṃ sarve praṇipatya janārdanam /
devadevamajaṃ viṣṇuṃ kṛṣṇamacyutamavyayam //
2.7.5
sarvapāpaharaṃ śuddhaṃ mokṣadaṃ brahmavādinam /
manasākarmaṇā vācā yo vidvānpuṇyakarmakṛt //
2.7.6
nārāyaṇaṃ japennityaṃ praṇamya puruṣottamam /
svapannārāyaṇaṃ devaṃ gacchannārāyaṇaṃ tathā //
2.7.7
bhuñjannārāyaṇaṃ viprāstiṣṭhañjāgratsanātanam /
unmiṣannimiṣanvāpi namo nārāyaṇeti vai //
2.7.8
bhojyaṃ peyaṃ ca lehyaṃ ca namo nārāyaṇeti ca /
abhimantrya spṛśanbhuṅkte sa yāti paramāṃ gatim //
2.7.9
sarvapāpavinirmuktaḥ prāpnoti ca satāṃ gatim /
alakṣmīśca mayā proktā patnī yā duḥsahasya ca //
2.7.10
nārāyaṇapadaṃ śrutvā gacchatyeva na saṃśayaḥ /
yā lakṣmīrdevadevasya hareḥ kṛṣṇasya vallabhā //
2.7.11
gṛhe kṣetre tathāvāse tanauvasati suvratāḥ /
āloḍya sarvaśāstrāṇi vicārya ca punaḥ punaḥ //
2.7.12
itamekaṃ suniṣpannaṃ dhyeyo nārāyaṇaḥ sadā /
kiṃ tasya bahubhirmantraiḥ kiṃ tasya bahubhirvrataiḥ //
2.7.13
namo nārāyaṇāyeti mantraḥ sarvārthasādhakaḥ /
tasmātsarveṣu kāleṣu namo nārāyaṇeti ca //
2.7.14
japetsa yāti viprendrā viṣṇulokaṃ sabāndhavaḥ /
anyacca devadevasya śṛṇvantu munisattamāḥ //
2.7.15
mantro mayā purābhyastaḥ sarvavedārthasādhakaḥ /
dvādaśākṣarasaṃyukto dvādaśātmā purātanaḥ //
2.7.16
tasyaiveha ca māhātmyaṃ saṃkṣepātpravadāmi vaḥ /
kaściddvijo mahāprājñastapastaptvā kathañcana //
2.7.17
putramekaṃ tayotpādya saṃskāraiśca yathākramam /
yojayitvā yatākālaṃ kṛtopanayanaṃ punaḥ //
2.7.18
adhyāpayāmāsa tadā sa ca novāca kiñcana /
na jihvā spandate tasya duḥkhito 'bhūddvijottamaḥ //
2.7.19
vāsudeveti niyatamaitareyo vadatyasau /
pitā tasya tathā cānyāṃ pariṇīya yathāvidhi //
2.7.20
putrānutpādayāmāsa tathaiva vidhipūrvakam /
vedānadhītya saṃpannā babhūvuḥ sarvasaṃmatāḥ //
2.7.21
aitareyasya sā mātā duḥkhitā śokamūrcchitā /
uvāca putrāḥ saṃpannā vedavedāṅgapāragāḥ //
2.7.22
brāhmaṇaiḥ pūjyamānā vai modayanti ca mātaram /
mama tvaṃ bhāgyahīnāyāḥ putro jāto nirākṛtiḥ //
2.7.23
mamātra nidhanaṃ śreyo na kathañcana jīvitam /
ityuktaḥ sa ca nirgamya yajñavāṭaṃ jagāma vai //
2.7.24
tasminyāte dvijānāṃ tu na mantrāḥ pratipedire /
aitareye sthitetatra brāhmaṇā mohitāstadā //
2.7.25
tato vāṇī samudbhūtā vāsudeveti kīrtanāt /
aitareyasya te viprāḥ praṇipatya yatātatham //
2.7.26
pūjāṃ cakrustato yajñaṃ svayameva samāgatam /
tataḥ samāpya taṃ yajñamaitareyo dhanādibhiḥ //
2.7.27
sarvavedānsadasyāha sa ṣaḍaṅgān samāhitāḥ /
tuṣṭuvuśca tathā viprā brahmādyāśca tathā dvijāḥ //
2.7.28
sasarjuḥ puṣpavarṣāṇi khecarāḥ siddhacāraṇāḥ /
evaṃ samāpya vai yajñamaitareyo dvijottamāḥ //
2.7.29
mātaraṃ pūjayitvā tu viṣṇoḥ sthānaṃ jagāma ha /
etadvai kathitaṃ sarvaṃ dvādaśākṣaravaibhavam //
2.7.30
paṭhatāṃ śṛṇvatāṃ nityaṃ mahāpātakanāśanam /
japedyaḥ puruṣo nityaṃ dvādaśākṣaramavyayam //
2.7.31
sa yāti divyamatulaṃ viṣṇostatparamaṃ padam /
api pāpasamācāro dvādaśākṣaratatparaḥ //
2.7.32
prāpnoti paramaṃ sthānaṃ nātra kāryā vicāraṇā /
kiṃ punarye svadharmasthā vāsudevaparāyaṇāḥ //
2.7.33
divyaṃ sthānaṃ mahātmānaḥ prāpnuvantīti suvratāḥ //
2.7.33.p1
iti śrīliṅgamahāpurāṇe uttarabhāge dvādaśākṣarapraśaṃsānāma saptamo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (1)
- Liṅga — Sanskrit