Lingapurana 2.8
Liṅgapurāṇa 2.8
- Language
- Sanskrit
Contents
- 2.8.36 — 1 part
2.8.1
suta uvāca
aṣṭākṣaro dvijaśreṣṭhā namo nārāyaṇeti ca /
dvādaśākṣaramantraśca paramaḥ paramātmanaḥ //
2.8.2
mantra ṣaḍakṣaro viprāḥ sarvavedārthasaṃcayaḥ /
yaścoṃnamaḥ śivāyeti mantraḥ sarvārthasādhakaḥ //
2.8.3
tathā śivatarāyeti divyaḥ pañcākṣaraḥ śubhaḥ /
mayaskarāya cetyevaṃ namaste śaṅkarāya ca //
2.8.4
saptākṣaroyaṃ rudrasya pradhānapuruṣasya vai /
brahmā ca bhagavānviṣṇuḥ sarve devāḥ savāsavāḥ //
2.8.5
mantrairetairdvijaśreṣṭhā munayaśca yajanti tam /
śaṅkaraṃ devadevaśaṃ mayaskaramajodbhavam //
2.8.6
śivaṃ ca śaṅkaraṃ rudraṃ devadevamumāpatim /
prāhurnamaḥ śivāyoti namaste śaṅkarāya ca //
2.8.7
mayaskarāya rudrāya tathā śivatarāya ca /
japtvā mucyeta vai vipro brahmahatyādibhiḥ kṣaṇāt //
2.8.8
purā kaściddvijaḥ śakto dhundhumūka iti śrutaḥ /
āsīttṛtīye tretāyāmāvartte ca manoḥ prabhoḥ //
2.8.9
meghavāhanakalpe vai brahmaṇaḥ paramātmanaḥ /
megho bhūtvā mahādevaṃ kṛttivāsasamīśvaram //
2.8.10
bahumānena vai rudraṃ devadevo janārdanaḥ /
khinno 'tibhārādrudrasya niḥśvāsocchvāsavarjitaḥ //
2.8.11
vijñāpya śitikaṇṭhāya tapaścakreṃbujekṣaṇaḥ /
tapasā paramaiśvaryaṃ balaṃ caiva tathādbhutam //
2.8.12
labdhavānparameśānācchaṅkarātparamātmanaḥ /
tasmātkalpastadā cāsīnmeghavāhanasaṃjñayā //
2.8.13
tasminkalpe muneḥ śāpaddhundhumūkasamudbhavaḥ /
dhundhumūkātmajastena durātmā ca babhūva saḥ //
2.8.14
dhundhumūkaḥ purāsakto bhāryayā saha mohitaḥ /
tasyāṃ vai sthāpito garbhaḥ kāmāsaktena cetasā //
2.8.15
amāvāsyāmahanyeva muhūrte rudradaivate /
antarvatnī tadā bhāryā muktā tena yathāsukham //
2.8.16
asūta sā ca tanayaṃ viśalyākhyā prayatnataḥ /
rudre muhurte mandena vīkṣite munisattamāḥ //
2.8.17
mātuḥ pitustathāriṣṭaṃ sa saṃjātastathātmanaḥ /
ṛṣī tamūcaturviprā dhundhumūkaṃ mithastadā //
2.8.18
mitrāvaruṇānāmanau duṣputra iti sattamau /
vasiṣṭhaḥ prāha nīco 'pi prabhāvādvai bṛhaspateḥ //
2.8.19
putrastavāsau durbuddhirapi mucyati kilbiṣāt /
duḥkhito dhundhumūko 'sau dṛṣṭvā putram avasthitam //
2.8.20
jātakarmādikaṃ kṛtvā vidhivatsvayameva ca /
adhyāpayāmāsa ca taṃ vidhinaiva dvijottamāḥ //
2.8.21
tenādhīnaṃ yathānyāyaṃ dhaindhumūkena suvratāḥ /
kṛtodvāhastadā gatvā guruśuśruṣaṇe rataḥ //
2.8.22
anenaiva muniśreṣṭhā dhaindhumūkena durmadāt /
bhuktvānyāṃ vṛṣalīṃ dṛṣṭvā svabhāryāvāddivāniśam //
2.8.23
ekaśayyāsanagato dhaindhumūko dvijādhamaḥ /
tathā cacāra durbuddhistyaktvā dharmagatiṃ parām //
2.8.24
mādhvī pītā tayā sārdhaṃ tena rāgavivṛddhaye /
kenāpi kāraṇenaiva tāmuddisya dvijottamāḥ //
2.8.25
nihatā sā ca pāpena vṛṣalī gatamaṅgalā /
tatastasyāstadā tasya bhrātṛbhirnihataḥ pitā //
2.8.26
mātā ca tasya durbuddherdhaundhumūkasya śobhanā /
bhāryā ca tasya durbuddheḥ śyālāste cāpi suvratāḥ //
2.8.27
rājñā kṣaṇādaho naṣṭa kulaṃ tasyāśca tasya ca /
gatvāsau dhaindhumūkaśca yena kenāpi līlayā //
2.8.28
dṛṣṭvā tu taṃ muniśreṣṭhaṃ rudrajāpyaparāyaṇam /
labdhvā pāśupataṃ tadvai purā devānmaheśvarāt //
2.8.29
labdhvā pañcākṣaraṃ caiva ṣaḍakṣaramanuttamam /
punaḥ pañcākṣaraṃ caiva japtvā lakṣaṃ pṛthak pṛthak //
2.8.30
vrataṃ kṛtvā ca vidhinā divyaṃ dvādaśamāsikam /
kāladharmaṃ gataḥ kalpe pūjitaśca yamena vai //
2.8.31
uddhṛtā ca tathā mātā pitā śyālāśca suvratāḥ /
patnī ca subhagā jātā susmitā ca pativratā //
2.8.32
tābhirvimānāmāruhya devaiḥ seṃdrairabhiṣṭutaḥ /
gāṇapatyamanu prāpya rudrasya dayito 'bhavat //
2.8.33
tasmādaṣṭākṣarāṃnmantrāttathā vai dvādaśākṣarāt /
bhavetkoṭiguṇaṃ puṇyaṃ nātra kāryā vicāraṇā //
2.8.34
tasmājjapeddhiyo nityaṃ prāguktena vidhānataḥ /
śaktibījasamāyuktaṃ sa yāti paramāṃ gatim //
2.8.35
etadvaḥ kathitaṃ sarvaṃ kathāsarvasvamuttamam /
yaḥ paṭhecchṛṇuyādvāpi śrāvayedvā dvijottamān //
2.8.36
sa yāti brahmalokaṃ tu rudrajāpyamanuttamam //
2.8.36.p1
iti śrīliṅgamahāpurāṇe uttarabhāge aṣṭamo 'dhyāyaḥ
Commentaries (2)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
- Śivatoṣiṇī — Gaṇeśa Ballāla Nātū, Sanskrit
Linked texts (3)
- Sāmbapurāṇa — Sanskrit
- Liṅga — Sanskrit
- Ancient Indian Historical Tradition — F. E. Pargiter, English