Lingapurana 2.9

Liṅgapurāṇa 2.9

Language: Sanskrit

2.9.56 — 1 part

2.9.1

ṛṣaya ūcuḥ
devaiḥ purā kṛtaṃ divyaṃ vrataṃ pāśupataṃ śubham /
brahmaṇā ca svayaṃ sūta kṛṣṇenākliṣṭakarmaṇā //

2.9.2

patitena ca vipreṇa dhaindhumūkena vai tathā /
kṛtvā japtvā gatiḥ prāptā kathaṃ pāśupataṃ vratam //

2.9.3

kathaṃ paśupatirdevaḥ śaṅkaraḥ parameśvaraḥ /
vaktumarhasi cāsmākaṃ paraṃ kautūhalaṃ hi naḥ //

2.9.4

sūta uvāca
purā śāpādvinirmukto brahmaputro mahāyaśāḥ /
rudrasya devadevasya marudeśādihāgataḥ //

2.9.5

tyaktvā prasādādrudrasya uṣṭradehamajājñayā /
śilādaputramāsādya namaskṛtya vidhānataḥ //

2.9.6

meruṣṭaṣṭhe munivaraḥ śrutvā dharmamanuttamam /
māheśvaraṃ muniśreṣṭhā hyapṛcchacca punaḥ punaḥ //

2.9.7

nandinaṃ praṇipatyainaṃ kathaṃ paśupatiḥ prabhuḥ /
vaktumarhasi cāsmākaṃ tatsarvaṃ ca tadāha saḥ //

2.9.8

tatsarvaṃ śrutavān vyāsaḥ kṛṣṇadvaipāyanaḥ prabhuḥ /
tasmādahanumaśrutya yuṣmākaṃ pravadāmi vai //

2.9.9

sarve śṛṇvaṃ tu vacanaṃ namaskṛtvā maheśvaram /
sanatkumāra uvāca
kathaṃ paśupatirdevaḥ paśavaḥ ke prakīrtitāḥ //

2.9.10

kaiḥ pāśaiste nibadhyante vimucyante ca te katham /
śailādir uvāca
sanatkumāra vakṣyāmi sarvam etad yathātatham //

2.9.11

rudrabhaktasya śāntasya tava kalyāmacetasaḥ /
brahmādyāḥ sthāvarāntāśca devadevasya dhīmataḥ //

2.9.12

paśavaḥ parikīrtyante saṃsāravaśavartinaḥ /
teṣāṃ patitvādbhagavān rudraḥ paśupatiḥ smṛtaḥ //

2.9.13

anādinidhano dhātā bhagavānviṣṇuravyayaḥ /
māyāpāśena badhnāti paśuvatparameśvaraḥ //

2.9.14

sa eva mocakasteṣāṃ jñānayogena sevitaḥ /
avidyāpāśabaddhānāṃ nānyo mocaka iṣyate //

2.9.15

tamṛte paramātmānaṃ śaṅkaraṃ parameśvaram /
caturviṃśatitattvāni pāśā hi parameṣṭhinaḥ //

2.9.16

taiḥ pāśairmocayatyekaḥ śivo jīvairupāsitaḥ /
nibadhnāti paśūnekaścaturviṃśatipāśakaiḥ //

2.9.17

sa eva bhagavānrudro mocayatyapi sevitaḥ /
daśendriyamayaiḥ pāśairantaḥ karaṇasaṃbhavaiḥ //

2.9.18

bhūtatanmātrapāśaiśca paśūnmocayati prabhuḥ /
indriyārthamayaiḥ pāśair baddhvā viṣayinaḥ prabhuḥ //

2.9.19

āśu bhaktā bhavantyevaṃ parameśvarasevayā /
bhaja ityeṣa dhātur vai sevāyāṃ parikīrtitaḥ //

2.9.20

tasmātsevā budhaiḥ proktā bhaktiśabdena bhūyasī /
brahmadistaṃbaparyantaṃ paśūnbaddhvā maheśvaraḥ //

2.9.21

tribhirguṇamayaiḥ pāśaiḥ kāryaṃ kārayati svayam /
dṛḍhena bhaktiyogena paśubhiḥ samupāsitaḥ //

2.9.22

mocayatyeva tānsadyaḥ śaṅkaraḥ parameśvaraḥ /
bhajanaṃ bhaktirityuktā vāṅmanaḥ kāyakarmabhiḥ //

2.9.23

sarvakāryeṇahetutvātpāśacchedapaṭīyasī /
satyaḥ sarvaga ityādi śivasya guṇacintanā //

2.9.24

rupopādānacintā ca mānasaṃ bhajanaṃ viduḥ /
vācikaṃ bhajanaṃ dhīrāḥ praṇavādijapaṃ viduḥ //

2.9.25

kāyikaṃ bhajanaṃ sadbhiḥ prāṇāyāmādi kathyate /
dharmādharmamayaiḥ pāśairbandhanaṃ dehināmidam //

2.9.26

mocakaḥ śiva evaiko bhagavānparameśvaraḥ /
caturviśatitattvāni māyākarmaguṇā iti //

2.9.27

kīrtyante viṣayāśceti pāśā jīvanibandhanāt /
tairbaddhāḥ śivabhaktyaiva mucyante sarvadehinaḥ //

2.9.28

pañcakleśamayaiḥ pāśaiḥ paśūnbadhnāti śaṅkaraḥ /
sa eva mocakastoṣāṃ bhaktyā samyagupāsitaḥ //

2.9.29

avidyāmasmitāṃ rāgaṃ dveṣaṃ ca dvipadāṃ varāḥ /
vadantyabhiniveśaṃ ca kleśānpāśatvamāgatān //

2.9.30

tamomohomahāmohastāmisra iti paṇḍitāḥ /
andhatāmisra ityāhuravidyāṃ pañcadhā sthitām //

2.9.31

tāñjīvānmuniśārdūlāḥ sarvāṃścaivāpyavidyayā /
śivo mocayati śrīmānnānyaḥ kaścidvimocakaḥ //

2.9.32

avidyāṃ tama ityāhurasmitāṃ moha ityapi /
mahāmoha iti prājñā rāgaṃ yogaparāyaṇāḥ //

2.9.33

dveṣaṃ tāmisra ityāhurandhatāmisra ityapi /
tathaivābhiniveśaṃ ca mithyājñānaṃ vivekinaḥ //

2.9.34

tamaso 'ṣṭavidhā bhedā mohaścāṣṭavidhaḥ smṛtaḥ /
mahāmohaprabhedāśca budhairdaśa vicintitāḥ //

2.9.35

aṣṭādaśavidhaṃ cāhustāmisraṃ ca vicakṣaṇāḥ /
andhatāmisrabhedāśca tathāṣṭādaśadhā smṛtāḥ //

2.9.36

avidyayāsya saṃbandho nātīto nāstyanāgataḥ /
bhavedrāgeṇa devasya śaṃbhoraṅganivāsinaḥ //

2.9.37

kāleṣu triṣu saṃbandhastasya dveṣeṇa no bhavet /
māyātītasya devasya sthāṇoḥ paśupatervibhoḥ //

2.9.38

tathaivābhiniveśena saṃbandho na kadācana /
śaṅkarasya śaraṇyasya śivasya paramātmanaḥ //

2.9.39

kuśalākuśalaistasya saṃbandho naiva karmabhiḥ /
bhavetkālatraye śaṃbhoravidyāmativartinaḥ //

2.9.40

vipākaiḥ karmaṇāṃ vāpi na bhavedeva saṃgamaḥ /
kāleṣu triṣu sarvasya śivasya śivadāyinaḥ //

2.9.41

sukhaduḥkhairasaṃspṛśyaḥ kālatritayavartibhiḥ /
sa tair vinaśvaraiḥ śaṃbhur bodhānandātmakaḥ paraḥ //

2.9.42

āśayairaparāmṛṣṭaḥ kālatritayagocaraiḥ /
dhiyāṃ patiḥ svabhūreṣa mahādevo maheśvaraḥ //

2.9.43

aspṛśyaḥ karmasaṃskāraiḥ kālatritayavartibhiḥ /
tathaiva bhogasaṃskārairbhagavānantakāntakaḥ //

2.9.44

puṃviśeṣaparo devo bhagavānparameśvaraḥ /
ceta nācetanāyuktaprapañcādakhilātparaḥ //

2.9.45

loke sātiśayatvena jñānaiśvaryaṃ vilokyate /
śivenātiśayatvena śivaṃ prāhurmanīṣiṇaḥ //

2.9.46

pratisargaṃ prasūtānāṃ brahmaṇaṃ śāstravistaram /
upadeṣṭā sa evādau kālāvacchedavartinām //

2.9.47

kālāvacchedayuktānāṃ gurūṇāmapyasau guruḥ /
sarveṣāmeva sarveśaḥ kālāvacchedavarjitaḥ //

2.9.48

anādireṣa saṃbandho vijñānotkarṣayoḥ paraḥ /
sthitayorīdṛśaḥ sarvaḥ pariśuddhaḥ svabhāvataḥ //

2.9.49

ātmaprayojanābhāve parānugraha eva hi /
prayojanaṃ samastānāṃ kāryāṇāṃ parameśvaraḥ //

2.9.50

praṇavo vācakastasya śivasya paramātmanaḥ /
śivarudrādiśabdānāṃ praṇavopi paraḥ smṛtaḥ //

2.9.51

śaṃbhoḥ praṇavavācyasya bhāvanā tajjapādapi /
yā siddhiḥ svaparāprāpyā bhavatyeva na saṃśayaḥ //

2.9.52

jñānatattvaṃ prayatnena yogaḥ pāśupataḥ paraḥ /
uktastu devadevena sarveṣāmanukaṃpayā //

sa hovācaiva yājñavalkyo yadakṣaraṃ gārgyayoginaḥ /
abhivadanti sthūlamanantaṃ mahāścaryamadīrghamalohitamamastakamāsāyamata evo punānasamasaṃgamagandhamarasamackṣuṣkamaśrotramavāṅmanotejaskamapramāṇamanusukhamanāmagotramamaramajaramanāmayamamṛtamoṃśabdamamṛtamasaṃvṛtamapūrvamanaparamanantamabāhyaṃ tadaśrāti kiñcana na tāśrāti kiñcana //

Commentaries (1)

Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit

Linked texts (4)

Śivapurāṇa (complete text) — Sanskrit
Tattvaprakāśa — Bhoja, Sanskrit
Vedāntasāravīraśaivacintāmaṇi — Niṣṭhura Nañjanācārya 1700, Sanskrit
Kriyāsāra (ed. Mallikārjuna Śāstrī) — Sanskrit

Lingapurana 2.9

Contents

Commentaries (1)

Linked texts (4)