Pramāṇa · Search · About · API

Matsya Purana 278: adhyāyaḥ 278

Matsyapurāṇa 278

Language
Sanskrit

adhyāyaḥ 278

278.1

gosahasrapradānākhya-mahādānavidhivarṇanam.

278.2

matsya uvāca.
athātaḥ sampravakṣyāmi mahādānamanuttamam.
gosahasrapradānākhyaṃ sarvapāpaharaṃ param .. 278.1

278.3

puṇyāṃ tithiṃ samāsādya yugamanvantarādikīm.
payovrataṃ trirātraṃ syādekarātramathāpi vā .. 278.2

278.4

lokeśāvāhanaṃ kuryāt tulā puruṣadānavat.
puṇyāhavācanaṃ kuryāddhomaḥ kāryastathaiva ca.. 278.3

278.5

gosahasraṃ bahiḥ kuryād vastramālya vibhūṣaṇam.
suvarṇaśrṛṅgābharaṇaṃ raupyapāda samanvitam .. 278.4

278.6

antaḥ praveśya daśakaṃ vastramālyaiśca pūjayet.
suvarṇaghaṇṭikāyuktaṃ kāṃsya dohanakānvitam .. 278.5

278.7

suvarṇatilakopetaṃ hemapaṭṭairalaṅkṛtam.
kauśeyavastrasamvītaṃ mālyagandhasamanvitam .. 278.6

278.8

hemaratnamayaiḥ śruṅgaiḥ cāmarairupaśobhitam.
pādukopānahacchatra bhājanāsana saṃyutam .. 278.7

278.9

gavāṃ daśaka madhye syāt kāñcano nandikeśvaraḥ.
kauśeyavastrasamvīto nānābharaṇabhūṣitaḥ .. 278.8

278.10

lavaṇadromaśikhare mālayekṣu phalasaṃyutaḥ.
kuryāt palaśatādūrdhvaṃ sarvametadaśeṣataḥ .. 278.9

278.11

śaktitaḥ palasāhasra tritayaṃ yāvadeva tu.
gośate'pi daśāṃśena sarvametat samācaret .. 278.10

278.12

puṇyakālaṃ samāsādya gītamaṅgala niḥsvanaiḥ.
sarvauṣadhyudakasnāna snāpito vedapuṅgavaiḥ .. 278.11

278.13

imamuccārayen mantraṃ gṛhītakusumāñjaliḥ.
namo'stu viśvamūrtibhyo viśvamātṛbhya eva ca.. 278.12

278.14

lokādhivāsinībhyaśca rohiṇībhyo namo namaḥ.
gavāmaṅgeṣu tiṣṭhanti bhuvanānyekaviṃśatiḥ .. 278.13

278.15

brahmādayastathā devā rohiṇyaḥ pāntu mātaraḥ.
gāvo me agrataḥ santu gāvaḥ pṛṣṭhata eva ca .. 278.14

278.16

gāvaḥ śirasi me nityaṃ gavāṃ madhye vasāmyaham.
yasmāttvaṃ vṛṣarūpeṇa dharma eva sanātanaḥ .. 278.15

278.17

aṣṭamūrteradhiṣṭhānamataḥ pāhi sanātana!.
ityāmantrya tato dadyād gurave nandikeśvaram .. 278.16

278.18

sarvopakaraṇopetaṃ goyutañca vicakṣaṇaḥ.
ṛtvigbhyo dhenumekaikāṃ daśakādvinivedayet .. 278.17

278.19

gavāñca śatamekaikaṃ tadarddhaṃ vātha viṃśatim.
daśa pañcātha vā dadyādanyebhyastadanujñayā .. 278.18

278.20

naikā bahubhyo dātavyā yato doṣakarī bhavet.
bahvyaścaikasya dātavyā dhīmatārogyavṛddhaye .. 278.19

278.21

payovrataḥ punastiṣṭhedekāhaṃ gosahasradaḥ.
śrāvayecchṛṇuyādvāpi mahādānānukīrtanam .. 278.20

278.22

taddine brahmacārī syāt yadīcchedvipulāṃ śriyam.
anena vidhināyastu gosahasraprado bhavet
sarvapāpa vinirmuktaḥ siddhacāraṇasevitaḥ .. 278.21

278.23

vimānenārkavarṇena kiṅkiṇījālamālinā.
sarveṣāṃ lokapālānāṃ loke saṃpūjyate'maraiḥ .. 278.22

278.24

pratimanvantaraṃ tiṣṭhet putrapautrasamanvitaḥ.
saptalokānatikramya tataḥ śivapuraṃ vrajet .. 278.23

278.25

śatamekottarantadvat pitṝṇāṃ tārayed budhaḥ.
mātāmahānāṃ tadvacca putrapautrasamanvitaḥ
yāvatkalpaśatantiṣṭhet rājarājo bhavet punaḥ .. 278.24

278.26

aśvamedhaśataṃ kuryācchivadhyānaparāyaṇaḥ.
vaiṣṇavaṃ yogamāsthāya tato mucyeta bandhanāt .. 278.25

278.27

pitaraścābhinandanti gosahasrapradaṃ sutam.
apisyātsa kule'smākaṃ putro dauhitra eva vā
gosahasraprado bhūtvā narakāduddhariṣyati .. 278.26

278.28

tasya karmakaro vā syādapi draṣṭā tathaiva ca.
saṃsārasāgarādasmādyo'smān santārayiṣyati .. 278.27

278.29

iti paṭhati ya etat gosahasrapradānaṃ.
surabhuvanamupeyāt saṃsmaredvātha paśyet.
anubhavati mudaṃ vā mucyamāno nikāmaṃ.
prahatakaluṣadeha so'pi yātīndralokam .. 278.28

Linked texts (6)

Discussed in (1)