Matsya Purana 281: adhyāyaḥ 281
Matsyapurāṇa 281
- Language
- Sanskrit
adhyāyaḥ 281
281.1
aśvarathākhyamahādānavidhivarṇanam.
281.2
matsya uvāca.
athātaḥ saṃpravakṣyāmi mahādānamanuttamam.
puṇyamaśvarathaṃ nāma mahāpātakanāśanam .. 281.1
281.3
puṇyaṃ dinamathāsādya kṛtvā brāhmaṇavācanam.
lokeśāvāhanaṃ kuryāt tulā puruṣadānavat .. 281.2
281.4
ṛtvikmaṇḍapasambhārabhūṣaṇācchādanādikam.
kṛṣṇājine tilān kṛtvā kāñcanaṃ sthāpayet ratham .. 281.3
281.5
aṣṭāśvaṃ caturaśvaṃ vā catuścakraṃ sakūbaram.
aindranīlena kumbhena dhvajarūpeṇa saṃyutam .. 281.4
281.6
lokapālāṣṭakaṃ tadvat padmarāgadalānvitam.
caturaḥ pūrṇakalaśān dhānyānyaṣṭādaśaiva tu .. 281.5
281.7
kauśeyavastra saṃyuktamupariṣṭādvitānakam.
mālyekṣuphalasaṃyuktaṃ puruṣeṇa samanvitam .. 281.6
281.8
yo yadbhaktaḥ pumān kuryāt sa tannāmnādhivāsanam.
chatra cāmara kauśeya vastropānaha pādukam .. 281.7
281.9
gobhirvibhavataḥ sārddhaṃ dadyācca śayanādikam.
ābhārāttripalādūrdhvaṃ śaktitaḥ kārayed budhaḥ .. 281.8
281.10
aśvāṣṭakena saṃyuktaṃ caturbhiratha vājibhiḥ.
dvābhyāmapi yutaṃ dadyāddhemasiṃhadhvajānvitam .. 281.9
281.11
cakrarakṣāvubhau tasya turagasthā yathāśvinau.
puṇyakālamathāvāpya pūrvavatsnāpitau dvijaiḥ .. 281.10
281.12
triḥ pradakṣiṇamāvṛtya gṛhītakusumāñjaliḥ.
śuklamālyāmbaro dadyādimaṃ mantramudīrayet .. 281.11
281.13
namo namaḥ pāpavināśanāya viśvātmane vedaturaṅgamāya.
dhāmnāmadhīśāya divākarāya pāpaughadāvānala! dehi śāntim .. 281.12
281.14
vasvaṣṭakādityamarudgaṇānāṃ tvameva dhātā paramaṃ nidhānam.
yatastato me hṛdayaṃ prayātu dharmaikatānatvamaghaughanāśāt .. 281.13
281.15
iti turagarathapradānamekaṃ bhavabhayasūdanamatra yaḥ karoti.
sa kaluṣapaṭalairvimuktadehaḥ paramamupaiti padaṃ pinākapāṇeḥ .. 281.14
281.16
dedīpyamānavapuṣāṃ vijitaprabhāvamākramya maṇḍalamakhaṇḍitacaṇḍabhānoḥ.
siddhāṅganānayanaṣaṭpada pīyamāna vaktrāmbujo'mbujabhavena ciraṃ sahāste .. 281.15
281.17
iti paṭhati śrṛṇoti vā ya itthaṃ kanakaturagarathapradānamasmin.
na sa narakapuraṃ vrajet kadācinnaraka riporbhavanaṃ prayāti bhūyaḥ .. 281.16
Linked texts (7)
- Bhaviṣyapurāṇa — Vyāsa, Sanskrit
- Matsya — Sanskrit
- Dānasāgara — Ballālasena, Sanskrit
- Caturvargacintāmaṇi — Hemādri, Sanskrit
- Dānakhaṇḍa — Hemādri, Sanskrit
- Dānakalpataru — Lakṣmīdhara, Sanskrit
- Dānamayūkha — Nīlakaṇṭha Dīkṣita 1600, Sanskrit
Discussed in (1)
- History of Dharmaśāstra (Ancient and Mediaeval Religious and Civil Law in India) — Kane 1930, English