Matsya Purana 289: adhyāyaḥ 289
Matsyapurāṇa 289
- Language
- Sanskrit
adhyāyaḥ 289
289.1
mahābhūtaghaṭamahādānavidhivarṇanam.
289.2
matsya uvāca.
athātaḥ saṃpravakṣyāmi mahādānamanuttamam.
mahābhūtaghaṭaṃ nāma mahāpātakanāśanam .. 289.1
289.3
puṇyāṃ tithimathāsādya kṛtvā brāhmaṇavācanam.
ṛtvigmaṇḍapasambhāra bhūṣaṇācchādanādikam .. 289.2
289.4
tulā puruṣavat kuryāt lokeśāvāhanādikam.
kārayetkāñcanaṃ kumbhaṃ mahāratnācitaṃ budhaḥ .. 289.3
289.5
prādeśādaṃgulaśataṃ yāvat kuryāt pramāṇataḥ.
kṣīrājyapūritaṃ tadvat kalpavṛkṣasamanvitam .. 289.4
289.6
padmāsanagatāṃstatra brahmaviṣṇumaheśvarān.
lokapālān mahendrāṃśca svasvavāhanamāsthitān
varāheṇoddhṛtāṃ tadvat kuryāt pṛthvīṃ sapaṅkajām .. 289.5
289.7
varuṇaṃcāsanagataṃ kāñcanaṃ makaropari.
hutāśanaṃ meṣagataṃ vāyuṃ kṛṣṇamṛgāsanam .. 289.6
289.8
tathā kośādhipaṃ kuryāt mūṣikasthaṃ vināyakam.
vinyasyaghaṭamadhyetān vedapañcakasaṃyutān .. 289.7
289.9
ṛgvedasyākṣasūtraṃ syādyajurvedasya paṅkajam.
sāmavedasya vīṇāsyādveṇuṃ dakṣiṇato nyaset .. 289.8
289.10
atharvavedasya punaḥ sruksrucau kamalaṅkare.
purāṇavedo varadaḥ sākṣasūtra kamaṇḍaluḥ.
paritaḥ sarvadhānyāni cāmarāsana-darpaṇam.
pādukopānahacchatraṃ dīpikā bhūṣaṇāni ca .. 289.10
289.11
śayyāñca jalakumbhāṃśca pañcavarṇaṃ vitānakam.
snātvādhivāsanānte tu mantrametamudīrayet .. 289.11
289.12
namo vaḥ sarvadevānāmādhārebhyaścarācare.
mahābhūtādhidevebhyaḥ śāntirastu śivaṃ mama .. 289.12
289.13
yasmānnakiñcidapyasti mahābhūtairvinā kṛtam.
brahmāṇḍe sarvabhūteṣu tasmācchrīrakṣayāstu me .. 289.13
289.14
ityuccārya mahābhūtaghaṭaṃ yo vinivedayet.
sarvapāpavinirmuktaḥ sa yāti paramāṅgatim .. 289.14
289.15
vimānenārkavarṇena pitṛbandhusamanvitaḥ.
stūyamāno varastrībhiḥ padamabhyeti vaiṣṇavam .. 289.15
289.16
ṣor̤aśaitāni yaḥ kuryāt mahādānāni mānavaḥ.
na tasya punarāvṛttiriha loke'bhijāyate .. 289.16
289.17
iha paṭhati ya itthaṃ vāsudevasya pārśve sasutapitṛkalatraḥ saṃśrṛṇotīha samyak.
muraripubhavane vai mandire vārkalakṣmyā tvamarapuravadhūbhirmodate so'pi nityam .. 289.17
Linked texts (5)
- Dānasāgara — Ballālasena, Sanskrit
- Matsya — Sanskrit
- Caturvargacintāmaṇi — Hemādri, Sanskrit
- Dānakhaṇḍa — Hemādri, Sanskrit
- Dānakalpataru — Lakṣmīdhara, Sanskrit
Discussed in (1)
- History of Dharmaśāstra (Ancient and Mediaeval Religious and Civil Law in India) — Kane 1930, English