Pramāṇa · Search · About · API

Matsya Purana 290: adhyāyaḥ 290

Matsyapurāṇa 290

Language
Sanskrit

adhyāyaḥ 290

290.1

kalpānāṃ kīrttanam.

290.2

manuruvāca.
kalpamānaṃ tvayā proktaṃ manvantarayugeṣu ca.
idānīṃ kalpanāmāni samāsāt kathayācyuta! .. 290.1

290.3

matsya uvāca.
kalpānāṃ kīrtanaṃ vakṣye mahāpātakanāśanam.
yasyānukīrtanādeva vedapuṇyena yujyate .. 290.2

290.4

prathamaṃ śvetakalpastu dvitīyo nīlalohitaḥ.
vāmadevastṛtīyastu tatorāthantaro'paraḥ .. 290.3

290.5

rauravaḥ pañcamaḥ proktaḥ ṣaṣṭho deva iti smṛtaḥ.
saptamo'tha bṛhatkalpaḥ kandarpo'ṣṭama ucyate .. 290.4

290.6

sadyo'tha navamaḥ proktaḥ īśāno daśamaḥ smṛtaḥ.
tama ekādaśaḥ proktaḥ tathā sārasvataḥ paraḥ .. 290.5

290.7

trayodaśa udānastu gārur̤o'tha caturdaśaḥ.
kaurmaḥ pañcadaśaḥ proktaḥ paurṇamāsyāmajāyata .. 290.6

290.8

ṣor̤aśo nārasiṃhastu samānastu tato'paraḥ.
āgneyo'ṣṭādaśaḥ proktaḥ somakalpastathāparaḥ .. 290.7

290.9

mānavo viṃśatiḥ proktastat pumāniti cāparaḥ.
vaikuṇṭhaścāparastadvallakṣmīkalpastathāparaḥ .. 290.8

290.10

caturviṃśatimaḥ proktaḥ sāvitrī kalpasaṃjñakaḥ.
pañcaviṃśastato ghoro vārāhastu tato'paraḥ .. 290.9

290.11

saptaviṃśo'tha vairājo gauri kalpastathāparaḥ.
māheśvarastu sa prokta stripuro yatra ghātitaḥ .. 290.10

290.12

pitṛkalpastathānte tu yā kuhūrbrahmaṇaḥ parā.
ityevaṃ brahmaṇo māsaḥ sarvapātakanāśanaḥ .. 290.11

290.13

ādāveva hi māhātmyaṃ yasminyasya vidhīyate.
tasya kalpasya tannāma vihitaṃ brahmaṇā purā .. 290.12

290.14

saṅkīrṇāstāmasāścaiva rājasāḥ sātvikāstathā.
rajastamo mayāstadvadete triṃśadudāhṛtāḥ .. 290.13

290.15

saṅkīrṇeṣu sarasvatyāḥ pitṛṇāṃ vyuṣṭirucyate.
agneḥ śivasya māhātmyaṃ tāmaseṣu divākare .. 290.14

290.16

rājaseṣu ca māhātmyamadhikaṃ brahmaṇaḥ smṛtam.
yasmin kalpe tu yat proktaṃ purāṇaṃ brahmaṇā purā .. 290.15

290.17

tasya tasya tu māhātmyaṃ tatsvarūpeṇa varṇyate.
sātvikeṣvadhikaṃ tadvadviṣṇormāhātmyamuttamam .. 290.16

290.18

tathaiva yogasaṃsiddhā gamiṣyanti parāṃ gatim.
brāhmaṃ pādmamimaṃ yastu paṭhet parvaṇi parvaṇi .. 290.17

290.19

tasya dharme matirbrahma karoti vipulāṃ śriyam.
yastu dadyādimān kṛtvā haimān parvaṇi parvaṇi .. 290.18

290.20

brahmaviṣṇupure vāsaṃ munibhiḥ pūjyate divi.
sarvapāpakṣayakaraṃ kalpadānaṃ yato bhavet .. 290.19

290.21

munirūpāṃstataḥ kṛtvā dadyāt kalpān vicakṣaṇaḥ.
purāṇasaṃhitā ceyaṃ tava bhūpa! mayoditā .. 290.20

290.22

sarvapāpaharā nityamārogya śrīphalapradā.
brahmasaṃvatsaraśatādekāhaṃ śaivamucyate .. 290.21

290.23

śivavarṣaśatādekaṃ nimeṣaṃ vaiṣṇavaṃ viduḥ.
yadā saviṣṇurjāgarti tadedaṃ ceṣṭate jagat .. 290.22

290.24

yadā svapiti śāntātmā tadā sarvaṃ nimīlati.
ityuktvā devadeveśo matsyarūpī janārdanaḥ .. 290.23

290.25

paśyatāṃ sarvabhūtānāṃ tatraivāntaradhīyata.
vaivasvato hi bhagavān visṛjya vividhāḥ prajāḥ .. 290.24

290.26

svāntaraṃ pālayāmāsa mārtaṇḍakulavarddhanaḥ.
yasya manvantarañcaitadadhunā cānuvartate .. 290.25

290.27

puṇyaṃ pavitrametadvaḥ kathitaṃ matsya bhāṣitam.
purāṇaṃ sarvaśāsrāṇāṃ yadetanmūrdhni saṃsthitam.. 290.26

Linked texts (2)

Discussed in (3)