Pramāṇa · Search · About · API

Matsyapurana 292

Matsyapurāṇa 292

Language
Sanskrit

Contents

292.1

atha purāṇaśravaṇakālīnadharmāḥ
śraddhābhaktisamāyuktā nānyakāryeṣu lālasāḥ
vāgyatāḥ śucayo'vyagrāḥ śrotāraḥ puṇyabhāginaḥ

292.2

abhaktyā ye kathāṃ puṇyāṃ śṛṇvanti manujādhamāḥ
teṣāṃ puṇyaphalaṃ nāsti duḥkhaṃ syājjanmajanmani

292.3

purāṇaṃ ye ca saṃpūjya tāmbūlādyairupāyanaiḥ
śṛṇvanti ca kathāṃ bhaktyā'daridrāḥ syurna saṃśayaḥ

292.4

kathāyāṃ kīrtyamānāyāṃ ye gacchantyanyato narāḥ
bhogāntare praṇaśyanti teṣāṃ dārāśca saṃpadaḥ

292.5

soṣṇīṣamastakā ye ca kathāṃ śṛṇvanti pāvanīm
te balākāḥ prajāyante pāpino manujādhamāḥ

292.6

tāmbūlaṃ makṣayanto ye kathāṃ śṛṇvanti pāvanīm
śvaviṣṭhāṃ khādayantyetānnayanti yamakiṃkarāḥ

292.7

ye ca tuṅgāsanāruḍhāḥ kathāṃ śṛṇvanti dāmbhikāḥ
akṣayyanarakānbhuktvā te bhavantyeva vāyasāḥ

292.8

ye vai varāsanārūḍhā ye ca madhyāsanasthitāḥ
śṛṇvanti satkathāṃ te vai bhavantyarjunapādapāḥ

292.9

asaṃpraṇamya śṛṇvanti viṣabhakṣā bhavanti te
tathā śayānāḥ śṛṇvānte bhavantyajagarā narāḥ

292.10

yaḥ śṛṇoti kathāṃ vaktuḥ samānāsanasaṃsthitaḥ
gurutalpasamaṃ pāpaṃ saṃprāpya narakaṃ vrajet

292.11

ye nindanti purāṇajñānkathāṃ vai pāpahāriṇīm
te vai janmaśataṃ martyāḥ sṛkarāḥ saṃbhavanti hi

292.12

kathāyāṃ kīrtyamānāthāṃ ye vradanti duruttaram
te gardabhāḥ prajāyante kṛkalāsāstathaiva ca

292.13

kadācidapi ye puṇyāṃ na śṛṇvanti kathāṃ narāḥ
te bhuktvā narakānghorānbhavanti vanasūkarāḥ

292.14

ye kathāmanumodante kīrtyamānāṃ narottamāḥ
aśṛṇvanto'pi te yānti śāśvataṃ paramaṃ padam

292.15

kathāyāṃ kīrtyamānāyāṃ vighnaṃ kurvanti ye śaṭhāḥ
koṭyabdaṃ narakānbhuktvā bhavanti grāmasūkarāḥ

292.16

ye śrāvayanti manujānpuṇyāṃ paurāṇikīṃ kathām
kalpakoṭiśataṃ sāgraṃ tiṣṭhanti brahmaṇaḥ pade

292.17

āsanārthaṃ prayacchanti purāṇajñasya ye narāḥ
kambalājinavāsāṃsi mañcaṃ phalakameva ca

292.18

svargalokaṃ samāsādya bhuktvā bhogānyathepsitān
sthitvā brahmādilokeṣu padaṃ yānti nirāmayam

292.19

purāṇasya prayacchanti ye varāsanamuttamam
bhogino jñānasaṃpannā bhavanti ca bhave bhave

292.20

ye mahāpātakairyuktā upapātakinaśca ye
purāṇaśravaṇādeva te prayānti paraṃ padam

292.21

evaṃvidhavidhānena purāṇaṃ śṛṇuyānnaraḥ
bhuktvā bhogānyathākāmaṃ viṣṇulokaṃ prayāti saḥ

292.22

pustakaṃ pūjayetpaścādvastrālaṃkaraṇādibhiḥ
vācakaṃ viprasaṃyuktaṃ pūjayīta prayatnavān

292.23

gobhūmihemavastrāṇi vācakāya nivedayet
brāhmaṇānbhojayetpaścānmaṇḍalaḍḍukapāyasaiḥ

292.24

tvaṃ vyāsarūpī bhagavānbuddhyā cā''ṅgirasopamaḥ
puṇyavāñśīlasaṃpannaḥ satyavādī jitendriyaḥ

292.25

prasannamānasaṃ kuryāddānamānopacārataḥ
tvatprasādādimāndharmānsaṃpūrṇāñśrutavānaham

292.26

evaṃ prārthanakaṃ kṛtvā vyāsasya paramātmanaḥ
yaśasvī ca bhavennityaṃ yaḥ kuryādevamādarāt

292.27

nāradoktānimāndharmānyaḥ kuryānniyatendriyaḥ
kṛtsnaṃ phalamavāpnoti purāṇaśravaṇasya vai

292.28

sūta uvāca
matsyarūpī sa bhagavānmanave buddhiśāline
avāpodghātasahitamuktvā hyantardadhau tadā

292.28.p1

iti purāṇaśravaṇakālīnadharmāḥ
iti śrīmaddvaipāyanamunipraṇītaṃ matsyapurāṇaṃ samāptam

Linked texts (7)