Mokshadharma 18

Mokṣadharma 18

yudhiṣṭhira uvāca —
suduḥkhācca sumṛtyośca trasante prāṇinaḥ sadā
ubhayaṃ no yathā na syāttanme brūhi pitāmaha

bhīṣma uvāca —
atrāpyudāharantīmamitihāsaṃ purātanam
nāradasya ca saṃvādaṃ samaṅgasya ca bhārata

nārada uvāca —
uraseva praṇamase bāhubhyāṃ tarasīva ca
saṃprahṛṣṭamanā nityaṃ viśoka iva lakṣyase

udvegaṃ na hi te kiṃcitsusūkṣmamapi lakṣaye
nityatṛpta iva svastho bālavacca viceṣṭase

samaṅga uvāca—
bhūtaṃ bhavyaṃ bhaviṣyaṃ ca sarvametattu mānada
teṣāṃ tattvāni jānāmi tato na vimanā hyaham

upakramamahaṃ veda punareva phalodayān
loke phalāni citrāṇi tato na vimanā hyaham

agādhāścāpratiṣṭhāśca gatimantaśca nārada
andhā jaḍāśca jīvanti paśyāsmānapi jīvataḥ

vihitenaiva jīvanti arogaṅgā divaukasaḥ
balavanto'balāścaiva tasmādasmānsabhājatha

sahasriṇo'pi jīvanti jīvanti śālinastathā
śākena cānye jīvanti paśyāsmānapi jīvataḥ

yadā na śocemahi kiṃ nu naḥ syāddharmeṇa vā nārada karmaṇā vā
kṛtāntavaśyāni yadā sukhāni duḥkhāni vā yanna vigharṣayanti

yasmai prājñāḥ kathayante manuṣyāḥ prajñāmūlaṃ hīndriyāṇāṃ prasādaḥ
muhyanti śocanti tathendriyāṇi prajñālābho nāsti mūḍhendriyasya

mūḍhasya darpaḥ sa punarmoha eva mūḍhasya nāyaṃ na paro'sti lokaḥ
na hyeva duḥkhāni sadā bhavanti sukhasya vā nityaśo lābha eva

bhavātmakaṃ saṃparivartamānaṃ na mādṛśaḥ saṃjvaraṃ jātu kuryāt
iṣṭānbhogāṃścānurudhyetsukhaṃ vā na cintayed duḥkhamabhyāgataṃ vā

samāhito na spṛhayetpareṣāṃ nānāgataṃ cābhinandecca lābham
na cāpi hṛṣyedvipule'rthalābhe tathā'rthanāśe ca na vai viṣīdet

na bāndhavā na ca vittaṃ na kaulyaṃ na ca śrutaṃ na ca mantrā na vīryam
duḥkhāttrātuṃ sarva evotsahante paratra śīlena tu yānti śāntim

nāsti buddhirayuktasya nāyogādvindate sukham
dhṛtiśca duḥkhatyāgaścetyubhayaṃ tu sukhaṃ nṛpa

priyaṃ hi harṣajananaṃ harṣa utsekavardhanaḥ
utseko narakāyaiva tasmāttānsaṃtyajāmyaham

etān śokamayotsekānmohanānsukhaduḥkhayoḥ
paśyāmi sākṣivalloke dehasyā'sya viceṣṭanāt

arthakāmau parityajya viśoko vigatajvaraḥ
tṛṣṇāmohau tu saṃtyajya carāmi pṛthivīmimām

na ca mṛtyorna cādharmānna lobhānna kutaścana
pītāmṛtasyevātyantamiha vā'mutra vā bhayam

etadbrahman vijānāmi mahatkṛtvā tapovyayam
tena nārada saṃprāpto na māṃ śokaḥ prabādhate

Linked texts (2)