Mokshadharma 24
Mokṣadharma 24
- Language
- Sanskrit
24.1
parāśara uvāca- kaḥ kasya copakurute kaśca kasmai prayacchati
prāṇī karotyayaṃ karma sarvamātmārthamātmanā
24.2
gauraveṇa parityaktaṃ niḥsnehaṃ parivarjayet
sodaryaṃ bhrātaramapi kimutānyaṃ pṛthagjanam
24.3
viśiṣṭasya viśiṣṭācca tulyau dānapratigrahau
tayoḥ puṇyataraṃ dānaṃ tad dvijasya prayacchataḥ
24.4
nyāyāgataṃ dhanaṃ caiva nyāyenaiva vivardhitam
saṃrakṣyaṃ yatnamāsthāya dharmārthamiti niścayaḥ
24.5
na dharmārthī nṛśaṃsena karmaṇā dhanamarjayet
śaktitaḥ sarvakāryāṇi kuryānnarddhimanusmaret
24.6
apo hi prayatataḥ śītāstāpitā jvalanena vā
śaktito'tithaye dattvā kṣudhārtāyāśrute phalam
24.7
rantidevena lokeṣṭā siddhiḥ prāptā mahātmanā
phalapatrairatho mūlairmunīnarcitavāṃśca saḥ
24.8
taireva phalapatraiśca sa māṭharamatoṣayat
tasmāllebhe paraṃ sthānaṃ śaibyo'pi pṛthivīpatiḥ
24.9
devatā'tithibhṛtyebhyaḥ pitṛbhyaścātmanastathā
ṛṇavān jāyate martyastasmādanṛṇatāṃ vrajet
24.10
svādhyāyena maharṣibhyo devebhyo yajñakarmaṇā
pitṛbhyaḥ śrāddhadānena nṛṇāmabhyarcanena ca
24.11
vācā śeṣāvahāryeṇa pālanenātmano'pi ca
yathāvaddhṛtyavargasya cikīrṣetkarma āditaḥ
24.12
prayatnena ca saṃsiddhā dhanairapi vivarjitāḥ
samyagdhutvā hutavahaṃ munayaḥ siddhimāgatāḥ
24.13
viśvāmitraśca putratvamṛcīkatanayo'gamat
ṛgbhiḥ stutvā mahābāho devānvai yajñabhāginaḥ
24.14
gataḥ śukratvamuśanā devadevaprasādhanāt
devīṃ stutvā tu gagane modate yaśasā vṛtaḥ
24.15
asito devalaścaiva tathā nāradaparvatau
kakṣīvān jāmadagnyaśca rāmastāṇḍyastathā''tmavān
24.16
vasiṣṭho jamadagniśca viśvāmitro'triraiva ca
bharadvājo hariśamaśruḥ kuṇḍadhāraḥ śrutaśravāḥ
24.17
ete maharṣayaḥ stutvā viṣṇumṛgbhiḥ samāhitāḥ
lebhire tapasā siddhiṃ prasādāttasya dhīmataḥ
24.18
anarhāścārhatāṃ prāptāḥ santaḥ stutvā tameva ha
na tu vṛddhimihānvicchetkarma kṛtvā jugupsitam
24.19
ye'rthā dharmeṇa te satyā ye'dharmeṇa dhigastu tān
dharmaṃ vai śāśvataṃ loke na jahyāddhanakāṅkṣayā
24.20
āhitāgnirhi dharmātmā yaḥ sa puṇyakṛduttamaḥ
vedā hi sarve rājendra sthitāstriṣvagniṣu prabho
24.21
sa cāpyagnyavāhito vipraḥ kriyā yasya na hīyate
śreyo hyanāhitāgnitvamagnihotraṃ na niṣkriyam
24.22
agnirātmā ca mātā ca pitā janayitā tathā
guruśca naraśārdūla paricaryā yathātatham
24.23
mānaṃ tyaktvā yo naro vṛddhasevī vidvānklībaḥ paśyati prītiyogāt
dākṣyeṇa hīno dharmayukto na dānto loke'sminvai pūjyate sadbirāryaḥ
Linked texts (2)
- Vulgate (Nīlakaṇṭha's text) — Sanskrit
- Parāśaragītā — Sanskrit