Pramāṇa · Search · About · API

Mokshadharma 25

Mokṣadharma 25

Language
Sanskrit

Contents

25.1

parāśara uvāca-vṛttiḥ sakāśādvarṇebhyastribhyo hīnasya śobhanā
prītyopanītā nirdiṣṭā dharmiṣṭānkurute sadā

25.2

vṛttiścennāsti śūdrasya pitṛpaitāmahī dhruvā
na vṛttiṃ parato mārgecchuśrūṣā tu prayojayet

25.3

sadbhistu saha saṃsargaḥ śobhate dharmadarśibhiḥ
nityaṃ sarvāsvavasthāsu nāsadbhiriti me matiḥ

25.4

yathodayagirau dravyaṃ sannikarṣeṇa dīpyate
tathā satsannikarṣeṇa hīnavarṇo'pi dīpyate

25.5

yādṛśena hi varṇena bhāvyate śuklamambaram
tādṛśaṃ kurute rūpametadevamavehi me

25.6

tasmādguṇeṣu rajyethā mā doṣeṣu kadācana
anityamiha martyānāṃ jīvitaṃ hi calācalam

25.7

sukhe vā yadi vā duḥkhe vartamāno vicakṣaṇaḥ
yaścinoti śubhānyeva sa tantrāṇīha paśyati

25.8

dharmādapetaṃ yatkarma yadyapi syānmahāphalam
na tatseveta medhāvī na taddhitamihocyate

25.9

yo hṛtvā gosahasrāṇi nṛpo dadyādarakṣitā
sa śabdamātraphalabhādrājā bhavati taskaraḥ

25.10

svayaṃbhūrasṛjaccāgre dhātāraṃ lokasatkṛtam
dhātā'sṛjatputramekaṃ lokānāṃ dhāraṇe ratam

25.11

tamarcayitvā vaiśyastu kuryādatyarthamṛddhimat
rakṣitavyaṃ tu rājanyairupayojyaṃ dvijātibhiḥ

25.12

ajihmairaśaṭhakrodhairhavyakavyaprayoktṛbhiḥ
śūdrairnirmājanaṃ kāryamevaṃ dharmo na naśyati

25.13

apnaṣṭe tato dharme bhavanti sukhitāḥ prajāḥ
sukhena tāsāṃ rājendra modante divi devatāḥ

25.14

tasmādyo rakṣati nṛpaḥ sa dharmeṇeti pūjyate
adhīte cāpi yo vipro vaiśyo yaścārjane rataḥ

25.15

yaśca śuśrūṣate śūdraḥ satataṃ niyatendriyaḥ
ato'nyathā manuṣyendra svadharmātparihīyate

25.16

prāṇasantāpanirdiṣṭāḥ kākiṇyo'pi mahāphalāḥ
nyāyenopārjitā dattāḥ kimutānyāḥ sahasraśaḥ

25.17

satkṛtya hi dvijātibhyo yo dadāti narādhipaḥ
yādṛśaṃ tādṛśaṃ nityamaśnāti phalamūrjitam

25.18

abhigamya ca tattṛṣṭyā dattamāhurābhiṣṭutam
yācitena tu yaddattaṃ tadāhurmadhyamaṃ budhāḥ

25.19

avajñayā dīyate yattathaivāśraddhayā'pi vā
tamāhuradhamaṃ dānaṃ munayaḥ satyavādinaḥ

25.20

atikrāmenmajjamāno vividhena naraḥ sadā
tathā prayatnaṃ kurvīta yathā mucyeta saṃśrayāt

25.21

damena śobhate vipraḥ kṣatriyo vijayena tu
dhanena vaiśyaḥ śūdrastu nityaṃ dākṣyeṇa śobhate

25.21.p1

[10630]

25.21.p2

iti śrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi parāśaragītāyāṃ trinavatyadhikadviśatatamo'dhyāyaḥ || 293

Linked texts (4)