Mokshadharma 40
Mokṣadharma 40
- Language
- Sanskrit
40.1
vasiṣṭha uvāca- atha buddhamathābuddhamimaṃ guṇavidhiṃ śṛṇu
ātmānaṃ bahudhā kṛtvā tānyeva pravicakṣate
40.2
etadevaṃ vikurvāṇo budhyamāno na budhyate
guṇāndhārayate hyeṣa sṛjatyākṣipate tadā
40.3
ajasraṃ tviha krīḍārthaṃ vikaroti janādhipa
avyaktabodhanāccaiva budhyamānaṃ vadantyapi
40.4
na tveva budhyate'vyaktaṃ saguṇaṃ tāta nirguṇam
kadācittveva khalvetadāhurapratibuddhakam
40.5
budhyate yadi vā'vyaktametadvai pañcaviṃśakam
budhyamāno bhavatyeva saṅgātmaka iti śrutiḥ
anenāpratibuddheti vadantyavyaktamacyutam
40.6
avyaktabodhanāccāpi budhyamānaṃ vadantyuta
pañcaviṃśaṃ mahātmānaṃ na cāsāvapi budhyate
40.7
ṣaḍviṃśaṃ vimalaṃ buddhamaprameyaṃ sanātanam
satataṃ pañcaviṃśaṃ ca caturviṃśaṃ ca buddhyate
40.8
dṛśyādṛśye hyanugataṃ svabhāvena mahādyute
avyaktamatra tadbrahma budhyate tāta kevalam
40.9
kevalaṃ pañcaviṃśaṃ ca caturviṃśaṃ na paśyati
budhyamāno yadā''tmānamanyo'hamiti manyate
40.10
tadā prakṛtimāneṣa bhavatyavyaktalocanaḥ
budhyate ca parāṃ buddhiṃ vimalāmamalāṃ yadā
40.11
ṣaḍviṃśo rājaśārdūla tathā buddhatvamāvrajet
tatastyajati so'vyaktaṃ sargapralayadharmi vai
40.12
nirguṇaḥ prakṛtiṃ veda guṇayuktāmacetanām
tataḥ kevaladharmā'sau avyaktavyaktadarśanāt
40.13
kevalena samāgamya vimukto''tmānamāpnuyāt
etattu tattvamityāhurnistattvamajarāmaram
40.14
tattvasaṃśrayaṇādetattattvavacca na mānada
pañcaviṃśati tattvāni pravadanti manīṣiṇaḥ
40.15
na caiṣa tattvavāṃstāta nistattvastveṣa buddhimān
eṣa muñcati tattvaṃ hi kṣipraṃ buddhatvalakṣaṇam
40.16
ṣaḍviṃśo'hamiti prājño gṛhyamāṇo'jarāmaraḥ
kevalena balenaiva samatāṃ yātyasaṃśayam
40.17
ṣaḍviṃśena prabuddhena budhyamāno'pyabuddhimān
etannānātvamityuktaṃ sāṃkhyaśrutinidarśanāt
40.18
cetanena sametasya pañcaviṃśatikasya ha
ekatvaṃ vai bhavatyasya yadā buddhyā na budhyate
40.19
budhyamāno'prabuddhena samatāṃ yāti maithila
saṅgadharmā bhavatyeṣa niḥsaṅgātmā narādhipa
40.20
niḥsaṅgātmānamāsādya ṣaḍviṃśakamajaṃ vibhum
vimucyatyajati cāvyaktaṃ yadā tvetadvibudhyate
40.21
caturviṃśamasāraṃ ca ṣaḍviṃśasya prabodhanāt
eṣa hyapratibuddhaśca budhyamānaśca te'nagha
40.22
prokto buddhaśca tattvena yathāśruti nidarśanāt
nānātvaikatvametāvad draṣṭavyaṃ śāstradarśanāt
40.23
maśakodumbare yadvadanyatvaṃ tadvadetayoḥ
matsyodake yathā tadvadanyatvamupalabhyate
40.24
evamevāvagantavyaṃ nānātvaikatvametayoḥ
etaddhi mokṣa ityuktamavyaktajñānasaṃhitam
40.25
pañcaviṃśatikasyāsya yo'yaṃ deheṣu vartate
eṣa mokṣayitavyeti prāhuravyaktagocarāt
40.26
so'yamevaṃ vimucyeta nānyatheti viniścayaḥ
paraśca paradharmā ca bhavatyeṣa sametya vai
40.27
viśuddhadharmā śuddhena buddhena ca sa buddhimān
vimuktadharmā muktena sametya puruṣarṣabha
40.28
viyogadharmiṇā caiva vimuktātmā bhavatyatha
vimokṣiṇā vimokṣaśca sametyeha tathā bhavet
40.29
śucikarmā śuciścaiva bhavatyamitadīptimān
vimalātmā ca bhavati sametya vimalātmanā
40.30
kevalātmā tathā caiva kevalena sametya vai
svatantraśca svatantreṇa svatantratvamavāpnute
40.31
etāvadetatkathitaṃ mayā te tathyaṃ mahārāja yathārthatattvam
amatsaratvaṃ parigṛhya cārthaṃ sanātanaṃ brahma viśuddhamādyam
40.32
nāvedaniṣṭhasya janasya rājanpradeyametatparamaṃ tvayā bhavet
vidhitsamānāya vibodhakāraṇaṃ prabodhahetoḥ praṇatasya śāsanam
40.33
na deyametacca tathā'nṛtātmane śaṭhāya klībāya na jihmabuddhaye
na paṇḍitajñānaparopatāpine deyaṃ tu deyaṃ ca nibodha yādṛśe
40.34
śraddhānvitāyātha guṇānvitāya parāpavādādviratāya nityam
viśuddhayogāya budhāya nityaṃ kriyāvate ca kṣamiṇe hitāya
40.35
viviktaśīlāya vidhipriyāya vivādahīnāya bahuśrutāya
vijānate caiva na cāhitakṣame dame ca śaktāya śame ca deyam
40.36
etairguṇairhīnatame na deyametatparaṃ brahma viśuddhamāhuḥ
na śreyasā yokṣyati tādṛśe kṛtaṃ dharmapravaktāramapātradānāt
40.37
pṛthivīmimāṃ yadyapi ratnapūrṇāṃ dadyānna deyaṃ tvidamavratāya
jitendriyāyaitadasaṃśayaṃ te bhavetpradeyaṃ paramaṃ narendra
40.38
karāla mā te bhayamastu kiṃcidetacchrutaṃ brahma paraṃ tvayā'dya
yathāvaduktaṃ paramaṃ pavitraṃ viśokamatyantamanādimadhyam
40.39
agādhajanmamaraṇaṃ ca rājannirāmayaṃ vītabhayaṃ śivaṃ ca
samīkṣya mohaṃ tyaja vā'dya sarvajñānasya tattvārthamidaṃ viditvā
40.40
avāptametaddhi mayā sanātanāddhiraṇayagarbhādvadato narādhipa
prasādya yatnena tamugracetasaṃ sanātanaṃ brahma yathā'dya vai tvayā
40.41
pṛṣṭastvayā cāsmi yathā narendra yathā mayedaṃ tvayi coktamadya
tathā'vāptaṃ brahmaṇo me narendra mahājñānaṃ mokṣavidāṃ parāyaṇam
40.42
bhīṣma uvāca —
etaduktaṃ paraṃ brahma yasmānnāvartate punaḥ
pañcaviṃśo mahārāja paramarṣinidarśanāt
40.43
punarāvṛttimāpnoti paraṃ jñānamavāpya ca
nāvabudhyati tattvena budhyamāno'jarāmaram
40.44
etanniḥśreyasakaraṃ jñānaṃ te paramaṃ mayā
kathitaṃ tattvatastāta śrutvā devarṣito nṛpa
40.45
hiraṇyagarbhādbhāṣiṇā vasiṣṭhena mahātmanā
vasiṣṭhādṛṣiśārdūlānnārado'vāptavānidam
40.46
nāradādviditaṃ mahyametadbrahma sanātanam
mā śucaḥ kauravendra tvaṃ śrutavaitatparaṃ padam
40.47
yena kṣarākṣare vitte bhayaṃ tasya na vidyate
vidyate tu bhayaṃ tasya yo naitadvetti pārthiva
40.48
avijñānācca mūḍhātmā punaḥ punarupādravat
pretya jātisahasrāṇi maraṇāntānyupāśnute
40.49
devalokaṃ tathā tiryaṅ manuṣyamapi cāśnute
yadi śudhyati kālena tasmādajñānasāgarāt
40.50
ajñānasāgaro ghoro hyavyakto'gādha ucyate
ahanyahani majjanti yatra bhūtāni bhārata
40.51
yasmādagādhādvyaktāduttīrṇastvaṃ sanātanāt
tasmāttvaṃ virajāścaiva vitamaskaśca pārthiva
Linked texts (2)
- Vulgate (Nīlakaṇṭha's text) — Sanskrit
- Brahmapurāṇa — Vyāsa, Sanskrit