Mokshadharma 44

Mokṣadharma 44

yājñavalkya uvāca-tattvānāṃ sarvasaṃkhyā ca kālasaṃkhyā tathaiva ca
mayā proktā'nupūrvyeṇa saṃhāramapi me śṛṇu

yathā saṃharate jantūnsasarja ca punaḥ punaḥ
anādinidhano brahmā nityaścākṣara eva ca

ahnaḥkṣayamatho buddhvā niśi svapnamanāstathā
codayāmāsa bhagavānavyakto'haṃkṛtaṃ naram

tataḥ śatasahasrāṃśurvyaktenābhicoditaḥ
kṛtvā dvādaśadhā''tmānamādityo'jvaladagnivat

caturvidhaṃ mahīpāla nirdahatyāśu tejasā
jarāyujāṇḍajasvedajodbhijjaṃ ca narādhipa

etadunmeṣamātreṇa vinaṣṭaṃ sthāṇujaṅgamam
kūrmapṛṣṭhasamā bhūmirbhavatyatha samantataḥ

jagaddagdhvā'mitabalaḥ kevalāṃ jagatīṃ tataḥ
ambhasā balinā kṣipramāpūrayati sarvaśaḥ

tataḥ kālāgnimāsādya tadambho yāti saṃkṣayam
vinaṣṭe'mbhasi rājendra jājvalatyanalo mahān

tamaprameyo'tibalaṃ jvalamānaṃ vibhāvasum
ūṣmāṇaṃ sarvabhūtānāṃ saptāciṣamathāñjasā

bhakṣayāmāsa bhagavān vāyuraṣṭātmako balī
vicarannamitaprāṇastiryagūrdhvamadhastathā

tamapratibalaṃ bhīmamākāśaṃ grasate'tmanā
ākāśamapyabhinadanmano grasati cādhikam

mano grasati bhūtātmā so'haṅkāraḥ prajāpatiḥ
ahaṅkāro mahānātmā bhūtabhavyabhaviṣyavit

tamapyanupamātmānaṃ viśvaṃ śambhuḥ prajāpatiḥ
aṇimā laghimā prāptirīśāno jyotiravyayaḥ

sarvataḥ pāṇipādāntaḥ sarvato'kṣiśiromukhaḥ
sarvataḥ śrutimām̐lloke sarvamāvṛtya tiṣṭhati

hṛdayaṃ sarvabhūtānāṃ parvaṇā'ṅguṣṭhamātrakaḥ
atha grasatyananto hi mahātmā viśvamīśvaraḥ

tataḥ samabhavatsarvamakṣayāvyayamavraṇam
bhūtabhavyabhaviṣyāṇāṃ sraṣṭāramanaghaṃ tathā

eṣo'pyayaste rājendra yathāvatsamudāhṛtaḥ
adhyātmamadhibhūtaṃ ca adhidaivaṃ ca śrūyatām

[11441]

iti śrīmadmahā0 śā0 mokṣadharma0 yājñavalkyajanakasaṃvāde dvādaśādhikatriśatatamo'dhyāyaḥ ||312

Linked texts (2)