Mokshadharma 49

Mokṣadharma 49

yājñavalkya uvāca-tathaivordhvamamāṇaṃ tu śṛṇuṣvāvahito nṛpa
padbhyāmutkramamāṇasya vaiṣṇavaṃ sthānamucyate

jaṅghābhyāṃ tu vasūndevānāpnuyāditi naḥ śrutam
jānubhyāṃ ca mahābhāgān sādhyāndevānavāpnuyāt

pāyunotkramamāṇastu maitraṃ sthānamavāpnuyāt
pṛthivīṃ jaghanenātha ūrubhyāṃ ca prajāpatim

pārśvābhyāṃ maruto devākṣābhyāmindratvameva ca
bāhubhyāmindramevāhururasā rudrameva ca

grīvayā tu muniśreṣṭhaṃ naramāpnotyanuttamam
viśvedevānmukhenātha diśaḥ śrotreṇa cāpnuyāt

ghrāṇena gandhavahaṃ netrābhyāmagnimeva ca
bhrūbhyāṃ caivāśvinau devau lalāṭena pitṝnatha

brahmāṇamāpnoti vibhuṃ mūrdhnā devāgrajaṃ tathā
etānyutkramaṇasthānānyuktāni mithileśvara

ariṣṭāni pravakṣyāmi vihitāni manīṣibhiḥ
saṃvatsaraviyogasya saṃbhavanti śarīriṇaḥ

yo'rundhatīṃ na paśyeta dṛṣṭapūrvāṃ kadācana
tathaiva dhruvamityāhuḥ pūrṇenduṃ dīpameva ca

khaṇḍābhāsaṃ dakṣiṇataste'pi saṃvatsarāyuṣaḥ
paracakṣuṣi cātmānaṃ ye na paśyanti pārthiva

ātmacchāyākṛtībhūtaṃ te'pi saṃvatsarāyuṣaḥ
atidyutiratiprajñā aprajñā cādyutistathā

prakṛtervikriyāpattiḥ ṣaṇmāsānmṛtyulakṣaṇam
daivatānyavajānāti brāhmaṇaiśca viruddhyate

kṛṣṇaśyāvacchavicchāyaḥ ṣaṇmāsānmṛtyulakṣaṇam
ūrṇanābheryathā cakraṃ chidraṃ somaṃ prapaśyati

tathaiva ca sahasrāṃśuṃ saptarātreṇa mṛtyubhāk
śavagandhamupāghrāya surabhiṃ prāpya yo naraḥ

devatāyatanasthastu saptarātreṇa mṛtyubhāk
karṇanāsāvanamanaṃ dantadṛṣṭivirāgitā

saṃjñālopo nirūṣmatvaṃ sadyomṛtyulakṣaṇam
akasmācca sravedyasya vāmamakṣi narādhipa

mūrdhataścotpated dhūmaḥ sadyomṛtyulakṣaṇam
etāvanti tvariṣṭāni viditvā mānavo'stvavān

niśi cāhani cātmānaṃ yojayetparamātmani
pratīkṣamāṇastatkālaṃ yatkālaṃ pretatā bhavet

athāsya neṣṭaṃ maraṇaṃ sthātumicchedimāṃ kriyām
sarvagandhān rasāṃścaiva dhārayīta narādhipa

sasāṃkhyadhāraṇaṃ caiva viditātmā nararṣabha
jayecca mṛtyuṃ yogena tatpareṇāntarātmanā

gacchetprāpyākṣayaṃ kṛtsnamajanma śivamavyayam
śāśvataṃ sthānamacalaṃ duṣprāpamakṛtātmabhiḥ

Linked texts (1)