Mokshadharma 51
Mokṣadharma 51
- Language
- Sanskrit
Contents
- 51.15 — 2 parts
51.1
yudhiṣṭhira uvāca-aiśvaryaṃ vā mahatprāpya dhanaṃ vā bharatarṣabha
dīrghamāyuravāpyātha kathaṃ mṛtyumatikramet
51.2
tapasā vā sumahatā karmaṇā vā śrutena vā
rasāyanaprayogairvā kairnāpnoti jarāntakau
51.3
bhīṣma uvāca- atrāpyudāharantīmamitihāsaṃ purātanam
bhikṣoḥ pañcaśikhasyeha saṃvādaṃ janakasya ca
51.4
vaideho janako rājā maharṣi vedavittamam
paryapṛcchatpañcaśikhaṃ chinnadharmārthasaṃśayam
51.5
kena vṛttena bhagavannatikrāmejjarāmṛtū
tapasā vā'thavā buddhyā karmaṇā vā śrutena vā
51.6
evamuktaḥ sa vaidehaṃ pratyuvācāparokṣavit
nivṛttirna tayorasti nānivṛttiḥ kathañcana
51.7
na hyahāni nivarttante na māsā na punaḥ kṣapāḥ
so'yaṃ prapadyate'dhvānaṃ cirāya dhruvamadhruvaḥ
51.8
sarvabhūtasamucchedaḥ srotasevodyate sadā
uhyamānaṃ nimajjantamaplave kālasāgare
51.9
jarāmṛtyumahāgrāhe na kaścidabhipadyate
naivāsya kaścidbhavati nāsau bhavati kasyacit
51.10
pathi saṃgatamaivedaṃ dārairanyaiśca bandhubhiḥ
nāyamatyantasaṃvāso labdhapūrvo hi kenacit
51.11
kṣipyante tena tenaiva niṣpannantaḥ punaḥ punaḥ
kālena jātā yātā hi vāyunevābhrasaṃcayāḥ
51.12
jarāmṛtyū hi bhūtānāṃ khāditārau vṛkāviva
balināṃ durbalānāṃ ca hrasvānāṃ mahatāmapi
51.13
evaṃ bhūteṣu bhūtātmā nityabhūto dhruveṣu ca
kathaṃ hi hṛṣyejjāteṣu mṛteṣu ca na saṃjvaret
51.14
kuto'hamāgataḥ ko'smi kva gamiṣyāmi kasya vā
kasmin sthitaḥ kva bhavitā kasmātkimanuśocasi
51.15
draṣṭā svargasya ko'nyo'sti tathaiva narakasya ca
āgamāṃstvanatikramya dadyāccaiva yajeta ca
51.15.p1
[11681]
51.15.p2
itiśrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi pañcaśikhajanakasaṃvāde ekonaviṃśatyadhikatriśatatamo'dhyāyaḥ ||319
Linked texts (2)
- Vulgate (Nīlakaṇṭha's text) — Sanskrit
- Sūktiratnahāra — Kāliṅgarāya Sūrya, Sanskrit