Mokshadharma 54

Mokṣadharma 54

yudhiṣṭhira uvāca- yadyasti dattamiṣṭaṃ vā tapastaptaṃ tathaiva ca
gurūṇāṃ vāpi śuśrūṣā tanme brūhi pitāmaha

bhīṣma uvāca- ātmanānarthayuktena pāpe niviśate manaḥ
sa karma kaluṣaṃ kṛtvā kleśe mahati dhīyate

durbhikṣādeva durbhikṣaṃ kṛśātkleśaṃ bhayādbhayam
mṛtebhyaḥ prasṛtā yānti daridrāḥ pāpakāriṇaḥ

utsavādutsavaṃ yānti svargātsvargaṃ sukhānsukham
śraddadhānāśca dāntāśca dhanasthāḥ śubhakāriṇaḥ

vyālakuñjaradurgeṣu sarpacaurabhayeṣu ca
hastāvāpe na gacchanti nāstikāḥ kimataḥ param

priyadevātitheyāśca vadānyāḥ priyasādhavaḥ
kṣemyamātmavatāṃ mārgamāsthitā hastadakṣiṇāḥ

pulākā iva dhānyeṣu pūtyaṇḍā iva pakṣiṣu
tadvidhāste manuṣyeṣu yeṣāṃ dharmo na kāraṇam

suśīghramapi dhāvantaṃ vidhānamanudhāvati
śete saha śayānena yena yena yathā kṛtam

pāpaṃ tiṣṭhati tiṣṭhantaṃ dhāvantamanudhāvati
karoti kurvataḥ karma chāyevānuvidhīyate

yena yena yathā yaccatpurā karma suniścitam
tattadevottaraṃ bhuṅkte nityaṃ vihitamātmanā

samānakarmavikṣepavidhānaparirakṣaṇam
bhūtagrāmamimaṃ kālaḥ samantādapakarṣati

acodyamānāni yathā puṣpāṇi ca phalāni ca
svaṃ kālaṃ nātivartante tathā karma purā kṛtam

samānaścāvamānaśca lābho'lābhaḥ kṣayāvyayau
pravṛttā na nivarttante nidhanāntāḥ pade pade

ātmanā vihitaṃ duḥkhamātmanā vihitaṃ sukham
garbhaśayyāmupādāya bhajate pūrvadehikam

bālo yuvā vā vṛddhaśca yatkaroti śubhāśubham
tasyāṃ tasyāmavasthāyāṃ bhuṅkte janmani janmani

yathā dhenusahasreṣu vatso vindati mātaram
tathā pūrvakṛtaṃ karma karttāramanugacchati

malinaṃ hi yathā vastraṃ paścācchuddhyati vāriṇā
upavāsaiḥ prataptānāṃ dīrghaṃ sukhamanantakam

dīrghakālena tapasā sevitena mahāmate
dharmanirdhūtapāpānāṃ saṃsidhyante manorathāḥ

śakunānāmivākāśe matsyānāmiva codake
padaṃ yathā na dṛśyeta tathā puṇyakṛtāṃ gatiḥ

alamanyairupālambhaiḥ kīrttitaiśca vyatikramaiḥ
peśanaṃ cānurūpaṃ ca karttavyaṃ hitamātmanaḥ

Linked texts (2)