Mokshadharma 55
Mokṣadharma 55
- Language
- Sanskrit
Contents
- 55.29 — 2 parts
55.1
[119083]
yudhiṣṭhira uvāca-kathaṃ vyāsasya dharmātmā śuko jajñe mahātapāḥ
siddhiṃ ca paramāṃ prāptastanme brūhi pitāmaha
55.2
kasyāṃ cotpādayāmāsa śukaṃ vyāsastapodhanaḥ
na hyasya jananīṃ vidma janma cāgyaṃ mahātmanaḥ
55.3
kathaṃ ca bālasya sataḥ sūkṣmajñāne gatā matiḥ
yathā nānyasya loke'smindvitīyasyeha kasyacit
55.4
etadicchāmyahaṃ śrotuṃ vistareṇa mahāmate
na hi me tṛptirastīha śṛṇvato'mṛtamuttamam
55.5
māhātmyamātmayogaṃ ca vijñānaṃ ca śukasya ha
yathāvadanupūrveṇa tanme brūhi pitāmaha
55.6
bhīṣma uvāca-na hāyanairna palitairna vitterna ca bandhubhiḥ
ṛṣayaścakrire dharmaṃ yo'nūcānaḥ sa no mahān
55.7
tapomūlamidaṃ sarvaṃ yanmāṃ pṛcchasi pāṇḍava
tadindriyāṇi saṃyamya tapo bhavati nānyathā
55.8
indriyāṇāṃ prasaṅgena doṣamṛcchatyasaṃśayam
saṃniyamya tu tānyeva siddhimāpnoti mānavaḥ
55.9
aśvamedhasahasrasya vājapeyaśatasya ca
yogasya kalayā tāta na tulyaṃ vidyate phalam
55.10
atra te varttayiṣyāmi janma yogaphalaṃ tathā
śukasyāgyāṃ gatiṃ caiva durvidāmakṛtātmabhiḥ
55.11
meruśṛṅge kila purā karṇikāravanāvṛte
vijahāra mahādevo bhīmairbhūtagaṇairvṛtaḥ
55.12
śailarājasutā caiva devī tatrābhavatpurā
tatra divyaṃ tapastepe kṛṣṇadvaipāyanastadā
55.13
yogenātmānamāviśya yogadharmaparāyaṇaḥ
dhārayansa tapastepe putrārthaṃ kurusattama
55.14
agnerbhūmerapāṃ vāyorantarikṣasya vā vibho
dhairyeṇa saṃmitaḥ putro mama bhūyāditi sma ha
55.15
saṃkalpenātha yogena duṣprāpamakṛtātmabhiḥ
varayāmāsa deveśamāsthitastapa uttamam
55.16
atiṣṭhanmārutāhāraḥ śataṃ kila samāḥ prabhuḥ
ārādhayanmahādevaṃ bahurūpamumāpatim
55.17
tatra brahmarṣayaścaiva sarve rājarṣayastathā
lokapālāśca lokeśaṃ sādhyāśca vasubhiḥ saha
55.18
ādityāścaiva rudrāśca divākaraniśākarau
vasavo marutaścaiva sāgarāḥ saritastathā
55.19
aśvinau devagandharvāstathā nāradaparvatau
viśvāvasuśca gandharvaḥ siddhāścāpsarasastathā
55.20
tatra rudro mahādevaḥ karṇikāramayīṃ śubhām
dhārayāṇaḥ srajaṃ bhāti jyotsnāmiva niśākaraḥ
55.21
tasmindivye vane ramye devadevarṣisaṃkule
āsthitaḥ paramaṃ yogamṛṣiḥ putrārthamacyutaḥ
55.22
na cāsya hīyate prāṇo na glānirupajāyate
trayāṇāmapi lokānāṃ tadadbhutamivābhavat
55.23
jaṭāśca tejasā tasya vaiśvānaraśikhopamāḥ
prajvalantyaḥ sma dṛśyante yuktasyāmitatejasaḥ
55.24
mārkaṇḍeyo hi bhagavānaitadākhyātavānmama
sa devacaritānīha kathayāmāsa me sadā
55.25
etā adyāpi kṛṣṇasya tapasā tena dīpitāḥ
agnivarṇā jaṭāstāta prakāśante mahātmanaḥ
55.26
evaṃvidhena tapasā tasya bhaktyā ca bhārata
maheśvaraḥ prasannātmā cakāra manasā matim
55.27
uvāca caivaṃ bhagavāṃstryambakaḥ prahasanniva
evaṃvidhaste tanayo dvaipāyana bhaviṣyati
55.28
yathā hyagniryathā vāyuryathā bhūmiryathā jalam
yathā ca khaṃ tathā śuddho bhavitā te suto mahān
55.29
tadbhāvabhāvī tadbuddhistadātmā tadapāśrayaḥ
tejasā''vṛtya lokām̐strīnyaśaḥ prāpsyati te sutaḥ
55.29.p1
[12015]
55.29.p2
iti śrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi śukotpattau trayoviṃśatyadhikatriśatatamo'dhyāyaḥ || 323
Linked texts (5)
- Vulgate (Nīlakaṇṭha's text) — Sanskrit
- Nāradapurāṇa — Vyāsa, Sanskrit
- Vāyupurāṇa — Vyāsa, Sanskrit
- Āryacarita — Sanskrit
- Nāradopapurāṇa — Sanskrit