Mokshadharma 6

Mokṣadharma 6

yudhiṣṭhira uvāca —
mokṣaḥ pitāmahenokta upāyānnānupāyataḥ
samupāyaṃ yathānyāyaṃ śrotumicchāmi bhārata

bhīṣma uvāca —
tvayyevaitanmahāprājña yuktaṃ nipuṇadarśanam
yenopāyena sarvārthaṃ nityaṃ mṛgayase'nagha

karaṇe ghaṭasya yā buddhirghaṭotpattau na sā matā
evaṃ dharmābhyupāyeṣu nānyaddharmeṣu kāraṇam

pūrve samudre yaḥ panthāḥ sa na gacchati paścimam
ekaḥ panthā hi mokṣasya tanme vistarataḥ śṛṇu

kṣamayā krodhamucchindyātkāmaṃ saṃkalpavarjanāt
sattvasaṃsevanāddhīro nidrāṃ ca cchettumarhati

apramādādbhayaṃ rakṣecchvāsaṃ kṣetrajñaśīlanāt
icchāṃ dveṣaṃ ca kāmaṃ ca dhairyeṇa vinivartayet

bhramaṃ saṃmohamāvarttamabhyāsādvinivartayet
nidrāṃ ca pratibhāṃ caiva jñānābhyāsena tattvavit

upadravāṃstathā rogān hitajīrṇamitāśanāt
lobhaṃ mohaṃ ca saṃtoṣādviṣayāṃstattvadarśanāt

anukrośādadharmaṃ ca jayeddharmamavekṣayā
āyatyā ca jayedāśāmarthaṃ saṅgavivarjanāt

anityatvena ca snehaṃ kṣudhāṃ yogena paṇḍitaḥ
kāruṇyenātmano mānaṃ tṛṣṇāṃ ca paritoṣataḥ

utthānena jayettandrīṃ vitarkaṃ niścayājjayet
maunena bahubhāṣyaṃ ca śauryeṇa ca bhayaṃ tyajet

yacchedvāṅmanasī buddhyā tāṃ yacchejjñānacakṣuṣā
jñānamātmāvabodhena yacchedātmānamātmanā

tadetadupaśāntena boddhavyaṃ śucikarmaṇā
yogadoṣānsamucchidya pañca yānkavayo viduḥ

kāmaṃ krodhaṃ ca lobhaṃ ca bhayaṃ svapnaṃ ca pañcamam
parityajya niṣeveta yatavāgyogasādhanān

dhyānamadhyayanaṃ dānaṃ satyaṃ hrīrārjavaṃ kṣamā
śaucamāhārataḥ śuddhirindriyāṇāṃ ca saṃyamaḥ

etairvivardhate tejaḥ pāpmānamupahanti ca
siddhayanti cāsya saṅkalpā vijñānaṃ ca pravartate

dhūtapāpaḥ sa tejasvī laghvāhāro jitendriyaḥ
kāmakrodhau vaśe kṛtvā ninoṣedbrahmaṇaḥ padam

amūḍhatvamasaṅgatvaṃ kāmakrodhavivarjanam
adainyamanudīrṇatvamanudvego vyavasthitiḥ

eṣa mārgo hi mokṣasya prasanno vimalaḥ śuciḥ
tathā vākkāyamanasāṃ niyamaḥ kāmato'nyathā

Linked texts (1)