Pramāṇa · Search · About · API

Mokshadharma 64

Mokṣadharma 64

Language
Sanskrit

Contents

64.1

bhīṣma uvāca - giriśṛṅgaṃ samāruhya suto vyāsasya bhārata
same deśe vivikte sa niḥśalāka upāviśat

64.2

dhārayāmāsa cātmānaṃ yathāśāstraṃ yathāvidhi
pādaprabhṛtigātreṣu krameṇa kramayogavit

64.3

tataḥ sa prāṅmukho vidvānāditye nācirodite
pāṇipādaṃ samādāya vinītavadupāviśat

64.4

na tatra pakṣisaṃghāto na śabdo nātidarśanam
yatra vaiyāsakirdhīmān yoktuṃ samupacakrame

64.5

sa dadarśa tadātmānaṃ sarvasaṅgaviniḥsṛtam
prajahāsa tato hāsaṃ śukaḥ saṃprekṣya tatparam

64.6

sa punaryogamāsthāya mokṣamārgopalabdhaye
mahāyogeśvaro bhūtvā so'vyakrāmadvihāyasam

64.7

tataḥ pradakṣiṇaṃ kṛtvā devarṣi nāradaṃ tataḥ
nivedayāmāsa ca taṃ svaṃ yogaṃ paramarṣaye

64.8

śuka uvāca—
dṛṣṭo mārgaḥ pravṛtto'smi svasti te'stu tapodhana
tvatprasādādgamiṣyāmi gatimiṣṭāṃ mahādyute

64.9

nāradenābhyanujñātaḥ śuko dvaipāyanātmajaḥ
abhivādya punaryogamāsthāyākāśamāviśat

64.10

kailāsapṛṣṭhādutpatya sa papāta divaṃ tadā
antarikṣacaraḥ śrīmānvāyubhūtaḥ suniścitaḥ

64.11

tamudyantaṃ dvijaśreṣṭhaṃ vainateyasamadyutim
dadṛśuḥ sarvabhūtāni manomārutaraṃhasam

64.12

vyavasāyena lokāṃstrīnsarvātso'tha vicintayan
āsthito dīrghamadhvānaṃ pāvakārkasamaprabhaḥ

64.13

tamekamanasaṃ yāntamavyagramakutobhayam
dadṛśuḥ sarvabhūtāni jaṅgamāni carāṇi ca

64.14

yathāśakti yathānyāyaṃ pūjāṃ vai cakrire tadā
puṣpavarṣaiśca divyaistamavacakrurdivaukasaḥ

64.15

taṃ dṛṣṭvā vismitāḥ sarve gandharvāpsarasāṃ gaṇāḥ
ṛṣayaścaiva saṃsiddhāḥ paraṃ vismayamāgatāḥ

64.16

antarikṣagataḥ ko'yaṃ tapasā siddhimāgataḥ
adhaḥkāyordhvavaktraśca netraiḥ samabhirajyate

64.17

tataḥ paramadharmātmā triṣu lokeṣu viśrutaḥ
bhāskaraṃ samudīkṣaṃśca prāṅmukho vāgyato'gamat

64.18

śabdenākāśamakhilaṃ pūrayanniva sarvaśaḥ
tamāpatantaṃ sahasā dṛṣṭvā sarvāpsarogaṇāḥ

64.19

saṃbhrāntamanaso rājannāsanparamavismitāḥ
pañcacūḍāprabhṛtayo bhṛśamutphullalocanāḥ

64.20

daivataṃ katamaṃ hyetaduttamāṃ gatimāsthitam
suniścitamihāyāti vimuktamiva niḥspṛham

64.21

tataḥ samabhicakrāma malayaṃ nāma parvatam
urvaśī pūrvacittiśca yaṃ nityamupasevataḥ

64.22

tasya brahmarṣiputrasya vismayaṃ yayatuḥ param
aho buddhisamādhānaṃ vedābhyāsarate dvije

64.23

acireṇaiva kālena nabhaścarati candravat
pituśśuśrūṣayā buddhiṃ saṃpto'yamanuttamām

64.24

pitṛbhakto dṛḍhatapāḥ pituḥ sudayitaḥ sutaḥ
ananyamanasā tena kathaṃ pitrā visarjitaḥ

64.25

urvaśyā vacanaṃ śrutvā śukaḥ paramadharmavit
udaikṣata diśaḥ sarvā vacane gatamānasaḥ

64.26

so'ntarikṣaṃ mahīṃ caiva saśailavanakānanām
vilokayāmāsa tadā sarāṃsi saritastathā

64.27

tato dvaipāyanasutaṃ bahumānātsamantataḥ
kṛtāñjalipuṭāḥ sarvā nirīkṣante sma devatāḥ

64.28

abravīttāstadā vākyaṃ śukaḥ paramadharmavit
pitā yadyanugacchenmāṃ krośamānaḥ śuketi vai

64.29

tataḥ prativaco deyaṃ sarvaireva samāhitaiḥ
etanme snehataḥ sarve vacanaṃ kartumarhatha

64.30

śukasya vacanaṃ śrutvā diśaḥ sarvāḥ srakānanāḥ
samudrāḥ saritaḥ śailāḥ pratyūcustaṃ samantataḥ

64.31

yathā''jñāpayase vipra bāḍhamevaṃ bhaviṣyati
ṛṣervyāharato vākyaṃ prativakṣyāmahe vayam

64.31.p1

[12432]

64.31.p2

iti śrīmadbhārate0 śānti0 mokṣa0 śukābhipatane dvātriṃśadadhikatriśatatamo'dhyāyaḥ ||332

Linked texts (4)