Mokshadharma 65
Mokṣadharma 65
- Language
- Sanskrit
Contents
- 65.42 — 2 parts
65.1
bhīṣma uvāca—
ityevamuktvā vacanaṃ brahmarṣiḥ sumahātapāḥ
prātiṣṭhata śukaḥ siddhiṃ hitvā doṣāṃścaturvidhān
65.2
tamo hyaṣṭāvidhaṃ hitvā jahau pañcavidhaṃ rajaḥ
tataḥ sattvaṃ jahau dhīmāṃstadadbhutamivābhavat
65.3
tatastasminpade nitye nirguṇe liṅgavarjite
brahmaṇi pratyatiṣṭhatsa vidhūmo'gniriva jvalan
65.4
ulkāpātā diśāṃ dāho bhūmikampastathaiva ca
prādurbhūtaḥ kṣaṇe tasmiṃstadadbhutamivābhavat
65.5
drumāḥ śākhāśca mumucuḥ śikharāṇi ca parvatāḥ
nirghātaśabdaiśca girirhimavāndīryatīva ha
65.6
na babhāse sahasrāṃśurna jajvala ca pāvakaḥ
hradāśca saritaścaiva cukṣubhuḥ sāgarāstathā
65.7
vavarṣa vāsavastoyaṃ rasavacca sugandhi ca
vavau samīraṇaścāpi divyagandhavahaḥ śuciḥ
65.8
sa śṛṅge prathame divye himavanmerusaṃbhave
saṃśliṣṭe śvetapīte dve rukmarūpyamaye śubhe
65.9
śatayojanavistāre tiryagūrdhvaṃ ca bhārata
udīcīṃ diśamāsthāya rucire saṃdadarśa ha
65.10
so'viśaṅkena manasā tathaivābhyapatacchukaḥ
tataḥ parvataśṛṅge dve sahasaiva dvidhā kṛte
65.11
adṛśyetāṃ mahārāja tadadbhutamivābhavat
tataḥ parvataśṛṅgābhyāṃ sahasaiva viniḥsṛtaḥ
65.12
na ca pratijaghānāsya sa gatiṃ parvatottamaḥ
tato mahānabhūcchabdo divi sarvaukaukasām
65.13
gandharvāṇāmṛṣīṇāṃ ca ye ca śailanivāsinaḥ
dṛṣṭvā śukamatikrāntaṃ parvataṃ ca dvidhā kṛtam
65.14
sādhu sādhviti tatrāsīnnādaḥ sarvatra bhārata
sa pūjyamāno devaiśca gandharvairṛṣibhistathā
65.15
yakṣarākṣasasaṅghaiśca vidyādharagaṇaistathā
divyaiḥ puṣpaiḥ samākīrṇamantarikṣaṃ samantataḥ
65.16
āsītkila mahārāja śukābhipatane tadā
tato mandākinīṃ ramyāmupariṣṭādabhivrajan
65.17
śuko dadarśa dharmātmā puṣpitadrumakānanām
tasyāṃ krīḍantyabhiratāste caivāpsarasāṃ gaṇāḥ
65.18
śūnyākāraṃ nirākārāḥ śukaṃ dṛṣṭvā vivāsasaḥ
taṃ prakrāmantamājñāya pitā snehasamanvitaḥ
65.19
uttamāṃ gatimāsthāya pṛṣṭhato'nusasāra ha
śukastu mārutādūrdhvaṃ gatiṃ kṛtvāntarikṣagām
65.20
darśayitvā prabhāvaṃ svaṃ brahmabhūto'bhavattadā
mahāyogagatiṃ tvanyāṃ vyāsotthāya mahātapāḥ
65.21
nimeṣāntaramātreṇa śukrābhipatanaṃ yayau
sa dadarśa dvidhā kṛtvā parvatāgraṃ śukaṃ gatam
65.22
śaśaṃsuṛṣayastatra karma putrasya tattadā
tataḥ śukreti dīrgheṇa śabdenākranditastadā
65.23
svayaṃ pitrā svareṇoccaistrīṃllokānanunādya vai
śukaḥ sarvagato bhūtvā sarvātmā sarvatomukhaḥ
65.24
pratyabhāṣata dharmātmā bhoḥ śabdenānunādayan
tata ekākṣaraṃ nādaṃ bhorityeva samīrayan
65.25
pratyāharajjagatsarvamuccaiḥ sthāvarajaṅgamam
tataḥ prabhṛti cādyāpi śabdānuccāritānpṛthak
65.26
girigahvarapṛṣṭheṣu vyāharanti śukaṃ prati
antarhitaḥ prabhāvaṃ tu darśayitvā śukastadā
65.27
guṇāṃstyaktvā śabdādīnpadamabhyagamatparam
mahimānaṃ tu taṃ dṛṣṭvā putrasyāmitatejasaḥ
65.28
niṣasāda giriprasthe putramevānucintayan
tato mandākinītīre krīḍanto'psarasāṃ gaṇāḥ
65.29
āsādya tamṛṣiṃ sarvāḥ saṃbhrāntā gatacetasaḥ
jale nililiyare kāścitkāścidgulmānprapedire
65.30
vasanānyapādaduḥ kāścit dṛṣṭvā munisattamam
tāṃ muktāṃ tu vijñāya muniḥ putrasya vai tadā
65.31
saktāmātmanaścaiva prīto'bhūvrīḍitaśca ha
65.32
taṃ devagandharvavṛto maharṣigaṇapūjitaḥ
pinākahasto bhagavānabhyāgacchata śaṃkaraḥ
65.33
tamuvāca mahādevaḥ sāntvapūrvamidaṃ vacaḥ
putraśokābhisaṃtaptaṃ kṛṣṇadvaipāyanaṃ tadā
65.34
agnerbhūmerapāṃ vāyorantarikṣasya caiva ha
vīryeṇa sadṛśaḥ putraḥ purā mattastvayā vṛtaḥ
65.35
sa tathālakṣaṇo jātastapasā tava saṃbhṛtaḥ
mama caiva prasādena brahmatejomayaḥ śuciḥ
65.36
sa gatiṃ paramāṃ prāpto duṣprāpāmajitendriyaiḥ
daivatairapi viprarṣe naṃ tvaṃ kimanuśocasi
65.37
yāvatsthāsyanti girayo yāvatsthāsyanti sāgarāḥ
tāvattavākṣayā kīrttiḥ saputrasya bhaviṣyati
65.38
chāyāṃ svaputrasadṛśīṃ sarvato'napagāṃ sadā
drakṣyase tvaṃ ca loke'sminmatprasādānmahāmune
65.39
so'nunīto bhagavatā svayaṃ rudreṇa bhārata
chāyāṃ paśyansamāvṛttaḥ sa muniḥ parayā mudā
65.40
iti janmagatiścaiva śukasya bharatarṣabha
vistareṇa samākhyātā yanmāṃ tvaṃ paripṛcchasi
65.41
etadācaṣṭa me rājan devarṣirnāradaḥ purā
vyāsaścaiva mahāyogī saṃjalpeṣu pade pade
65.42
itihāsamimaṃ puṇyaṃ mokṣadharmopasaṃhitam
dhārayedyaḥ śamaparaḥ sa gacchetparamāṃ gatim
65.42.p1
[12474]
65.42.p2
iti śrīma0 śāṃ0 mokṣa0 śukkotpatanasamāptirnāma trayastriṃśadadhikatriśatatamo'dhyāyaḥ | 333
Linked texts (4)
- Vulgate (Nīlakaṇṭha's text) — Sanskrit
- Nāradapurāṇa — Vyāsa, Sanskrit
- Āryacarita — Sanskrit
- Nāradopapurāṇa — Sanskrit