Pramāṇa · Search · About · API

Mokshadharma 75

Mokṣadharma 75

Language
Sanskrit

75.1

naranārāyaṇāvūcatuḥ- dhanyo'syanugṛhīto'si yatte dṛṣṭaḥ svayaṃ prabhuḥ
na hi taṃ dṛṣṭavānkaścitpadmayonirapi svayam

75.2

avyaktayonirbhagavāndurdarśaḥ puruṣottamaḥ
nāradaitaddhi nau satyaṃ vacanaṃ samudāhṛtam

75.3

nāsya bhaktātpriyataro loke kaścana vidyate
tataḥ svayaṃ darśitavānsvamātmānaṃ dvijottama

75.4

tapo hi tapyatastasya yatsthānaṃ paramātmanaḥ
na tatsaṃprāpnute kaścidṛte hyāvāṃ dvijottama

75.5

yā hi sūryasahasrasya samastasya bhaveddyutiḥ
sthānasya sā bhavettasya svayaṃ tena virājatā

75.6

tasmāduttiṣṭhate vipra devāddviśvabhuvaḥ pateḥ
kṣamā kṣamāvatāṃ śreṣṭha yayā bhūmiratu yujyate

75.7

tasmāccottiṣṭhate devātsarvabhūtahitādrasaḥ
āpo hi tena yujyante dravatvaṃ prāpnuvanti ca

75.8

tasmādeva samudbhūtaṃ tejo rūpaguṇātmakam
yena saṃyujyate sūryastato loke virājate

75.9

tasmāddevātsamudbhūtaḥ sparśastu puruṣottamāt
yena sma yujyate vāyustato lokānbivālyasau

75.10

tasmācottiṣṭhate śabdaḥ sarvalokeśvarātprabhoḥ
ākāśaṃ yujyate yena tatastiṣṭhatyasaṃvṛtam

75.11

tasmāccottiṣṭhate devātsarvabhūtagataṃ manaḥ
candramā yena saṃyuktaḥ prakāśaguṇadhāraṇaḥ

75.12

saṅgatotpādakaṃ nāma tatsthānaṃ devasaṃjñitam
vidyāsahāyo yatrāste bhagavānhavyakavyabhuk

75.13

ye hi niṣkalmaṣā loke puṇyapāpavivarjitāḥ
teṣāṃ vai kṣemamadhvānaṃ gacchatāṃ dvijasattama

75.14

sarvaloke tamo'hantā ādityo dvāramucyate
ādityadagdhasarvāṅgā adṛśyāḥ kenacitkvacit

75.15

paramāṇubhūtā bhūtvā tu taṃ devaṃ praviśantyuta
tasmādapi ca nirmuktā aniruddhatanau sthitāḥ

75.16

manobhūtāstato bhūtvā pradyumnaṃ praviśantyuta
pradyumnāccāpi nirmuktā jīvaṃ saṃkarṣaṇaṃ tataḥ

75.17

viśanti viprapravarāḥ sāṃkhyā bhāgavataiḥ saha
tatastraiguṇyahīnāste paramātmānamañjasā

75.18

praviśanti dvijaśreṣṭhāḥ kṣetrajñaṃ nirguṇātmakam
sarvāvāsaṃ vāsudevaṃ kṣetrajñaṃ viddhi tattvataḥ

75.19

samāhitamanaskāśca niyatāḥ saṃyatendriyāḥ
ekāntabhāvopagatā vāsudevaṃ viśanti te

75.20

āvāmapi ca dharmasya gṛhe jātau dvijottama
ramyāṃ viśālāmāśritya tapa ugraṃ samāsthitau

75.21

ye tu tasyaiva devasya prādurbhāvāḥ surapriyāḥ
bhaviṣyanti trilokasthāsteṣāṃ svastītyatho dvija

75.22

vidhinā svena yuktābhyāṃ yathāpūrvaṃ dvijottama
āsthitābhyāṃ sarvakṛcchraṃ vrataṃ samyaganuttamam

75.23

āvābhyāmapi dṛṣṭastvaṃ śvetadvīpe tapodhana
samāgato bhagavatā saṃkalpaṃ kṛtavāṃstathā

75.24

sarvaṃ hi nau saṃviditaṃ trailokye sacarācare
yadbhaviṣyati vṛttaṃ vā vartate vā śubhāśubham
sarvaṃ sa te kathitavāndevadevo mahāmune

75.25

vaiśampāyana uvāca- etacchrutvā tayorvākyaṃ tapasyugre ca vartatoḥ
nāradaḥ prāñjalirbhūtvā nārāyaṇaparāyaṇaḥ

75.26

jajāpa vidhivanmantrānnārāyaṇagatānyahūn
divyaṃ varṣasahasraṃ hi naranārāyaṇāśrame

75.27

avasatsa mahātejā nārado bhagavānṛṣiḥ
tamevābhyarcayandevaṃ naranārāyaṇau ca tau

Linked texts (4)