Mokshadharma 76
Mokṣadharma 76
- Language
- Sanskrit
Contents
- 76.28 — 2 parts
76.1
[13238]
vaiśampāyana uvāca- kasyacittvatha kālasya nāradaḥ parameṣṭhijaḥ
daivaṃ kṛtvā yathānyāyaṃ pitryaṃ cakre tataḥ param
76.2
tatastaṃ vacanaṃ prāha jyeṣṭho dharmātmajaḥ prabhuḥ
ka ijyate dvijaśreṣṭha daive pitrye ca kalpite
76.3
tvayā matimattāṃ śreṣṭha tanme śaṃsa yathāgamam
kimetatkriyate karma phalaṃ vā'sya kimiṣyate
76.4
nārada uvāca-tvayaitatkathitaṃ pūrvaṃ daivaṃ kartavyamityapi
daivataṃ ca paro yajñaḥ paramātmā sanātanaḥ
76.5
tatastadbhāvito nityaṃ yaje vaikuṇṭhamavyayam
tasmācca prasūtaḥ pūrvaṃ brahmā lokapitāmahaḥ
76.6
mama vai pitaraṃ prītaḥ parameṣṭhyapyajījanat
ahaṃ saṃkalpajastasya putraḥ prathamakalpitaḥ
76.7
yajāmi vai pitṝnsādho nārāyaṇavidhau kṛte
evaṃ sa eva bhagavānpitā mātā pitāmahaḥ
76.8
ijyate pitṛyajñeṣu tathā nityaṃ jagatpatiḥ
śrutiścāpyaparā devī putrānhi pitaro'jayan
76.9
vedaśrutiḥ pranaṣṭā ca punaradhyāpitā sutaiḥ
tataste mantradāḥ putrāḥ pitṛtvamupadire
76.10
nūnaṃ suraistadviditaṃ yuvayorbhāvitātmanoḥ
putrāśca pitaraścaiva parasparamapūjayan
76.11
trīnpiṇḍānnyasya vai pṛthvyāṃ pūrvaṃ dattvā kuśāniti
kathaṃ tu piṇḍasaṃjñāṃ te pitaro lebhire purā
76.12
naranārāyaṇāvūcatuḥ- imāṃ hi dharaṇīṃ pūrvaṃ naṣṭāṃ sāgaramekhalām
govinda ujjahārā''śu vārāhaṃ rūpamāsthitaḥ
76.13
sthāpayitvā tu dharaṇīṃ sve sthāne puruṣottamaḥ
jalakardamaliptāṅgo lokakāryārthamudyataḥ
76.14
prāpte cāhnikakāle tu madhyadeśagate ravau
daṃṣṭrāvilagnāṃstrīnpiṇḍānvidhūma sahasā prabhuḥ
76.15
sthāpayāmāsa vai pṛthvyāṃ kuśānāstīrya nārada
sa teṣvātmānamuddiśya pitryaṃ cakre yathāvidhi
76.16
saṃkalpayitvā trīnpiṇḍānsvenaiva vidhinā prabhuḥ
ātmagātroṣmasambhūtaiḥ snehagarbhaistilairapi
76.17
prokṣyāpavargaṃ deveśaḥ prāṅmukhaḥ kṛtavānsvayam
maryādāsthāpanārthaṃ ca tato vacanamuktavān
76.18
vṛṣākapiruvāca- ahaṃ hi pitaraḥ sraṣṭumudyato lokakṛtsvayam
yasya cintayataḥ sadyaḥ pitṛkāryavidhinparān
76.19
daṃṣṭrābhyāṃ pravinirdhūtā mamaite dakṣiṇāṃ diśam
āśritā dharaṇīṃ piṇḍāstasmātpitara eva te
76.20
trayo mūrtivihīnā vai piṇḍamūrtidharāstvime
bhavantu pitaro loke mayā sṛṣṭāḥ sanātanāḥ
76.21
pitā pitāmahaścaiva tathaiva prapitāmahaḥ
ahamevātra vijñeyastriṣu piṇḍeṣu saṃsthitaḥ
76.22
nāsti matto'dhikaḥ kaścitko vā'nyo'rcyo mayā svayam
ko vā mama pitā loke ahameva pitāmahaḥ
76.23
pitāmahapitā caiva ahamevātra kāraṇam
ityetaduktvā vacanaṃ devadevo vṛṣākapiḥ
76.24
varāhaparvate vipra dattvā piṇḍānsavistarān
ātmānaṃ pūjayitvaiva tatraivādarśanaṃ gataḥ
76.25
eṣā tasya sthitiviṃpra pitaraḥ piṇḍasaṃjñitāḥ
labhante satataṃ pūjāṃ vṛṣākapivaco yathā
76.26
ye yajanti pitṝndevāngurūśvaivātithīṃstathā
gāścaiva dvijamukhyāṃśca pṛthivīṃ mātaraṃ yathā
76.27
karmaṇā manasā vācā viṣṇumeva yajanti te
antargataḥ sa bhagavānsarvasattvaśarīragaḥ
76.28
samaḥ sarveṣu bhūteṣu īśvaraḥ sukhaduḥkhayoḥ
mahānmahātmā sarvātmā nārāyaṇa iti śrutaḥ
76.28.p1
[13266]
76.28.p2
iti śrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi nārāyaṇīye pañcacatvāriṃśadadhikatriśatatamo'dhyāyaḥ || 345
Linked texts (2)
- Vulgate (Nīlakaṇṭha's text) — Sanskrit
- Nārāyaṇīya — Vyāsa, Sanskrit